Read Kaqchikel Zac 5 Bible Online

Zac 5 - Kaqchikel bible

Zac 5

¹Chirij ri' k'o chik k'a jun xk'utumej chinuwech. Y xintz'et k'a chi k'o jun nim wuj ri beneq pa kaq'iq'.

²Y ri ángel xuk'utuj k'a chuwe ri achike ri yinajin chutz'etik. Y yin xinbij chi nintz'et jun wuj ri beneq pa kaq'iq' ri k'o waqi' jaj raqen y ka'i' jaj rik'in oxi' q'a'aj ri ruwech.

³K'ari' xubij chuwe: Chuwech la wuj k'o jun itzel oyonik ri xtibiyin chuwech chijun ri ruwach'ulew. Ri jun ruwech ri wuj tz'ibatel chi ri eleq'oma' xkeken. Y ri jun chik ruwech tz'ibatel chi ri nujikiba' ta rutzij ri xa man qitzij ta ri nubij, rija' kan man xtikolotej ta kan.

⁴Ri Jehová k'iytisanel richin ronojel nubij chi xtuteq re jun etzelanik re' richin napon pa kachoch ri winaqi' ri', y xa kan xtik'oje' k'a chiri' k'a toq xtik'is na el ri tem y ri abej chire ri kachoch, xcha'.

⁵Xeri' ri ángel ri nich'on wik'in xik'o-el chinuwech, y xubij chuwe chi tintz'eta' ri achike ri xtibek'ulun-pe.

⁶Yin xinbij chire chi man wetaman ta. Y rija' xubij chuwe chi ri' jun chakech ri nikusex richin etabel. Y re' nuk'exewachuj ri itzel kibanobal ri winaqi'.

⁷Ri chakech ri' tz'apen rik'in jun tz'apebel ri banon rik'in plomo. K'ari' xjaq-q'anej ruwi' ri chakech ri', y xintz'et chi chiri' tz'uyul jun ixoq.

⁸Ri ángel xubij chuwe chi re ixoq re' nuk'exewachuj ri etzelal. K'ari' xunim-qa chupan ri chakech, y xutz'apej chik kan ruwi'.

⁹Xitzu'un-q'anej chikaj y xintz'et e ka'i' ixoqi' yexik'an e peteneq qik'in, y janila nima'q ri kixik'. Y toq xe'oqaqa, xkitzeqej-el ri chakech richin xkik'uaj-el.

¹⁰Xink'utuj k'a chire ri ángel akuchi xtikik'uaj-wi ri chakech.

¹¹Y rija' xubij chuwe chi xtikik'uaj-el pa ruwach'ulew Babilonia richin chi chiri' xtikipaba-q'anej jun rachoch ri ixoq ri k'o chupan ri chakech. Y toq xtik'achoj ri jay ri', chiri' xtich'okobex-wi, xcha'.