Read Kaqchikel Zac 6 Bible Online

Zac 6 - Kaqchikel bible

Zac 6

¹Yin Zacarías k'o chik k'a jun xk'utumej chinuwech. Y xintz'et kaji' carruaje e richin labal, ri xe'el-pe chukojol ka'i' juyu'. Y ri ka'i' juyu' ri' kan e banon rik'in q'enq'oj-pueq.

²Ri nabey carruaje, ja ri kiej ri kaqkoj kij ri e uk'uayon richin. Ri ruka'n carruaje, ja ri kiej ri q'eq kij ri e uk'uayon richin.

³Ri rox carruaje, ja ri kiej ri seq kij ri e uk'uayon richin. Y ri rukaj carruaje ja ri kiej ri k'o seq'eseq keq y seq chikij ri e uk'uayon richin.

⁴Yin xink'utuj k'a chire ri ángel achike nuk'exewachuj.

⁵Y rija' xubij chuwe chi jare' ri kaji' espíritu ri ye'el-pe rik'in ri Jehová richin yepe chuwech chijun ri ruwach'ulew.

⁶Ri carruaje ri uk'uan koma kiej q'eq kij, jari' ri yepe pa xaman chire ri ruwach'ulew. Ri carruaje ri uk'uan koma kiej seq kij, jari' ri yepe pa qajbel-q'ij chire ri ruwach'ulew. Y ri carruaje ri uk'uan koma kiej ri k'o seq'eseq keq y seq chikij, jari' ri yepe pa xokon.

⁷Y re kiej re' kan rik'in k'a janila kikoten nikajo' yebe yan chupan chijun ruwach'ulew. Roma ri' ri ángel xubij-el chike chi kebiyin. Y rije' kan keri' xkiben.

⁸Chirij ri', ri ángel xsik'in-pe wik'in y xubij k'a chuwe chi tintz'eta' ri kiej ri xebe pa xaman, roma xbekiqasaj kan ruwi' ri royowal ri Jehová pa ruwi' ri ruwach'ulew ri'.

⁹Ri Jehová xch'on chik wik'in, y xubij k'a chuwe:

¹⁰Ri Heldai, Tobías y ri Jedaías xetzolej yan pe pa Babilonia. y ek'o pa rachoch ri Josías, ri ruk'ajol ri Sofonías. Roma ri' kabiyin yan chiri' kik'in richin nak'ul-pe ri sipanik ri kik'amon-pe.

¹¹K'ari' xtak'uaj k'a el ri saqipueq y ri q'anapueq, richin xtiban jun nima-corona chire ri kan k'o ruwiq. Y xtaya' pa rujolon ri nimalej sacerdote Josué ri ruk'ajol ri Josadac.

¹²Xkach'on k'a rik'in y xtaya' re jun rutzijol re' chire, yin Jehová k'iytisanel richin ronojel ri yibin: Re wawe' k'o jun ri rubini'an Ri Xjotayin-pe, roma xa xtik'iy-pe achi'el nuben ri ruq'a-che', richin ja rija' xtichojmirisan chik q'anej ri wachoch.

¹³Ja rija' ri xtipaban k'a ri wachoch y kan xtik'oje' k'a janila ruk'ojlemal. Kan xtitz'uye' k'a pa ruch'akat richin xtuq'et-tzij pa ruchojmilal. Chuqa' kan xtuben ri rusamaj ri sacerdote, y kan xtik'oje' k'a uxlanibel-k'u'x chikikojol.

¹⁴Jak'a ri corona xtik'atzin k'a richin jun natabel kichin ri Heldai, Tobías, Jedaías y ri Josías ri chiri' pa wachoch yin Jehová.

¹⁵Y xkepe k'a winaqi' e aj nej richin xketo'on y xtikipaba' chik q'anej ri wachoch. Y k'ari' xtiwetamaj k'a chi ja yin Jehová k'iytisanel richin ronojel ri in taqayon-pe iwik'in. Y re' xtibanatej wi rix xtiya' ixikin chire ri nuch'abel yin Jehová. Jare' ri rutzijol ri xuya' chuwe.