Read Kaqchikel Zac 7 Bible Online

Zac 7 - Kaqchikel bible

Zac 7

¹Ri Jehová xch'on chik jun bey wik'in chupan ri q'ij kaji' chire ri beleje' ik' ri nibix Quisleu chire. Y re' xbanatej chupan ri rukaj juna' chire ri q'atbel-tzij richin ri rey Darío pa ruwi' ri ruwach'ulew Persia.

²Chupan ri q'ij ri' ri winaqi' aj-Betel xekicha-el y xekiteq-el ri Sarézer y ri Régem-mélec e kachibilan-el achi'a' aj chiri'. Y rije' xebe richin chi xbekik'utuj ri ruto'onik ri Jehová.

³Xebech'on kik'in ri e sacerdote ri ek'o chupan ri rachoch ri Jehová, y chuqa' kik'in ri e q'alajirisey ruch'abel. Y xkik'utuj: ¿Ruk'amon kami yojoq' y yojmewayin chupan ri ro' ik', achi'el ri qabanon-pe k'a re wakami?, xecha'.

⁴Jari' toq ri Dios xubij chuwe

⁵chi tinbij k'a chike konojel ri winaqi' y chuqa' chike ri sacerdote chi juna' chi juna' chupan ri oxk'al lajuj juna', rije' xemewayin y xejilon chupan ri ro' y ri ruwuq ik'. Jak'a rije' xa man richin ta xkiya' ruq'ij-ruk'ojlen ri Jehová.

⁶Y toq rije' xewa-xe'uk'ya', xkiben xaxe richin nich'uch'u' ri kánima.

⁷Y re rutzijol re' junan rik'in ri rutzijol ri xuya' ri Jehová ri ojer, koma ri e q'alajirisey ruch'abel, chike ri winaqi' aj-Jerusalem y ri kokoj taq tinamit toq utz e beneq, y toq k'a ek'o na winaqi' pa xokon chire ri Judá y ri pa taq'aj. Jare' k'a ri rutzijol ri xuya' ri Jehová chuwe.

⁸Ri Jehová xch'on chik jun bey wik'in, y xuya' re jun rutzijol re' chuwe:

⁹Yin Jehová k'iytisanel richin ronojel ri yibin. Toq xtiq'et-tzij, kan tibana' k'a pa ruchojmilal. Kan xkixajowan k'a y tik'oje' k'a joyowanik chi'ikojol.

¹⁰Man ke'itz'ila' ri malkani', ri e meba'i', ri man e iwinaq ta y winaqi' ri man jun k'o kik'in, y man jun xtipe ta pa ránima chi xtuch'ob ta itzel chirij ri rachpochel.

¹¹Jak'a xa man xiwajo' ta xiwak'axaj. Xa xiya' k'a kan ri ruche'el-iwij y xitz'apela' pa taq ixikin richin man xiwak'axaj ta.

¹²Xa xikowirisaj ri iwánima richin man xiya' ta iwak'axabal chire ri pixa', ni chuqa' chire ri nuch'abel ri xinteq-pe ri ojer kan koma ri e q'alajirisey nuch'abel. Y roma ri' yin xyakatej janila woyowal.

¹³Chupan ri q'ij toq yin xich'on iwik'in, man xiniwak'axaj ta. Roma ri' yin chuqa' man xixinwak'axaj ta toq xixch'on wik'in. Yin Jehová k'iytisanel richin ronojel ri yibin.

¹⁴Roma ri' xixintaluj k'a el achi'el nuben ri surkum toq nuk'uaj-el ronojel. Y keri' xixtalutej-el pa taq ruwach'ulew ri man jun bey iwetaman. Y kan xtole' k'a kan ri iruwach'ulew. Man jun chik xk'oje' kan chiri', y stape' rubanon kan janila jebel ok, jak'a re wakami xa kan xok kan tz'iran, xcha'.