Read Kaqchikel Zac 8 Bible Online

Zac 8 - Kaqchikel bible

Zac 8

¹Ri Jehová xch'on chik k'a jun bey wik'in y xubij chuwe:

²Yin kan janila k'a ninwajo' ri Sión, y roma ri' niyakatej janila woyowal toq ronojel man utz ta beneq.

³Roma ri' yin xkitzolin chik pa Jerusalem y chiri' xkik'ase-wi. K'ari' ri itinamit xtubini'aj: Nima-Tinamit ri k'o Qitzijri'il Rik'in. Y ri juyu' wichin yin xtubini'aj ri Loq'olej Juyu'.

⁴Y ri taq e rijita'q winaqi' ri kik'uan kich'ame'y xketz'uye' chik jun bey pa taq nima'q ruwech bey ri akuchi niban-wi molojri'il ri chiri' pa Jerusalem.

⁵Chuqa' ri taq ak'uala' xke'etz'an chiri'.

⁶Yin Jehová ri yibin. Ri winaqi' ri k'a ek'o na kan chupan ri tinamit ri', kan janila k'ayew xtuben chikiwech richin nikinimaj, jak'a yin kan man jun k'ayew chinuwech.

⁷Yin kan xkenkol k'a ri nuwinaq ri ek'o pa taq ruwach'ulew ri ek'o chikinaqaj.

⁸Y xkenk'en-pe, y kan xkek'oje' k'a pa Jerusalem. Xke'ok chik k'a nutinamit, y yin xkinok ki-Dios. Y kan xtinben pa ruchojmilal kik'in, y man xkenmalij ta kan. Yin Jehová ri yibin.

⁹Yin Jehová ri k'o ronojel uchuq'a' pa nuq'a' ninbij chiwe rix ri xixk'oje' wawe' toq ri e q'alajirisey nuch'abel xech'on pa ruwi' ri wachoch toq xya'ox-qa ri ruxe', chi kan tik'oje' iwuchuq'a' y man timayamo-qa ri iwánima, richin nipaba-q'anej ri wachoch.

¹⁰Ri q'ij toq xya'ox-qa ri ruxe' ri wachoch ri ojer kan, ri winaqi' man jun kajel nikik'ul y ni ta ri qajibel kichin ri chikopi'. Chuqa' ri winaqi' man yetikir ta yek'ayin ni yeloq'on roma ri janila chi ruk'ayewal. Chuqa' xinben chi konojel xeyakatej chikij ri kachibil.

¹¹Jak'a re chiwech-apo man xtinben ta chik keri' iwik'in rix ri juba' ri xixk'oje' kan. Yin Jehová k'iytisanel richin ronojel ri yibin.

¹²Chupan ri q'ij ri' ri ija'tz kan jebel xkebos-pe, y ri juwi-uva xa kan xtik'oje' ruwech. Ri qasanbel-ulew kan xtik'ase' ri tiko'n chuwech, y xtinben k'a chi xtiqaqa raxq'ab pa ruwi' ri iruwach'ulew. Chuqa' xtinben chi ri iwinaq ri xek'oje' kan, kan xtok kichin ronojel re'.

¹³Ri ojer kan xixok etzelanik chikikojol ri ruwach'ulew. Jak'a chiwech-apo, rix winaqi' aj-Judá y ri aj-Israel, xkixinkol y xkixok jun urtisanik. Roma ri' man k'a tik'oje' xibinri'il iwik'in; xa kan tik'oje' iwuchuq'a'.

¹⁴Yin Jehová ri yibin. Ri ojer kan xinben itzel chike ri iwati't-imama' toq rije' xkiyek woyowal, y man xintzolij ta wi' chuwij.

¹⁵Jak'a xinch'ob yan chi chiwech-apo xtinben utz iwik'in rix aj-Jerusalem y kik'in ri winaqi' aj-Judá. Roma ri' man k'a tixibij-iwi'.

¹⁶Jare' ri rubanik ri k'o chi niben: Kixch'on qitzij kik'in ri iwachpochel. Tiq'ata-tzij pa ruchojmilal, richin keri' xtik'oje' ta uxlanenri'il pa taq q'atoj-tzij.

¹⁷Man jun chiwe rix tuch'ob itzel chirij ri rachpochel. Ni man tijikiba-itzij chire ri xa man qitzij ta. Yin kan ninwixowaj ronojel re'. Yin Jehová ri yibin, xcha'.

¹⁸Ri Jehová xch'on chik wik'in, y xubij chuwe:

¹⁹Toq rix yixmewayin pa rukaj ik', pa ro', pa ruwuq y pa lajuj ik', kan xtok k'a jun nimaq'ij richin janila kikoten chi'ikojolil rix. Roma ri' k'o chi niwajo-iwi' chiwech-qa rix, y tik'oje' uxlanenri'il chi'ikojol.

²⁰Kan xkepe k'a e k'iy winaqi' kichin ch'aqa' chik ruwach'ulew.

²¹Y ri winaqi' kichin jalajoj ruwech tinamit xkekik'uaj-el ch'aqa' chik winaqi' richin xkepe kik'in rije' richin xkinkikanoj yin Jehová k'iytisanel richin ronojel.

²²E k'iy k'a winaqi' richin ch'aqa' chik tinamit y ri ruwach'ulew ri k'o uchuq'a' kik'in xkepe wawe' richin xkinkikanoj yin Jehová richin xtikil urtisanik.

²³Chupan ri q'ij ri', xtibebanatej k'a chi e lajuj achi'a' ri kepe pa ch'aqa' chik ruwach'ulew, xtikichop chi rutziaq jun iwinaq, y xtikibij k'a chire: Taya' q'ij chiqe richin yojbe awik'in, roma qak'axan chi iwik'in rix k'o-wi ri Jehová, xkecha'. Jare' ri rutzijol ri xuya' ri Dios.