Read Kaqchikel Mal 2 Bible Online

Mal 2 - Kaqchikel bible

Mal 2

¹Kan chiwe k'a rix sacerdote ninya-wi re jun rutzijol re':

²Wi rix man xtiwak'axaj ta y wi man xtinimirisaj ta ri nimalej nubi' rik'in ronojel ri iwánima, yin Jehová in k'iytisanel richin ronojel kan xtinwoyoj k'a pe ri itzel pan iwi'. Y pa ruwi' ri urtisanik ri ik'ulun chik wik'in yin, xa xtiqaqa itzel pan iwi'.

³Chuqa' yin xtinya' ruk'ayewal pa kiwi' ri iwijatzul, y kan xtink'eq k'a el chi ipalej ri nikipamaj ri chikopi' ri ye'isuj chinuwech, richin junan xkixink'eq-el rik'in ri pamaj.

⁴Yin Jehová in k'iytisanel richin ronojel xtinben keri' richin man niyojtej ta ri jikibel-tzij ri qabanon rik'in ri ánima Leví.

⁵Ri jikibel-tzij ri' xuya' k'aslen y uxlanibel-k'u'x. Re' xinya' chire richin nik'oje' ta nukiy chuwech y nuya' ta wejqalen; y rija' kan keri' xuben.

⁶Ri Leví kan xuk'ut k'a ri qitzij y kan man jun q'oloj ri xerubij. Chuqa' kan rik'in k'a uxlanibel-k'u'x y pa ruchojmilal ri xbiyin wik'in, y kan e k'iy k'a ri xuben chike chi man xkiben ta itzel taq banobel.

⁷Rix sacerdote ja ta rix ri ix uk'uey rutzijol, y ri isamaj ja ta ri ye'itijoj ri winaqi' richin niketamaj nuwech yin Jehová ri in k'iytisanel richin ronojel. Y ri winaqi' k'o chi nikikanoj ri tijonik iwichin rix.

⁸Jak'a rix ri ix sacerdote xa kan xijech'ej kan iwi' wik'in yin Jehová ri in k'iytisanel richin ronojel, y roma ri' kan e k'iy ri xkixolq'otij kan ri pixa'. Y rik'in ri' kan xiq'ej ruwi' ri nujikibel-tzij ri xinben rik'in ri Leví.

⁹Y roma rix man xitzeqelibej ta ri nubey achi'el nubij ri nupixa' y chuqa' man junan ta xiben kik'in ri winaqi', roma ri' yin xinben chiwe richin yixetzelex y kan man jun iwejqalen chikiwech ri tinamit, xcha' ri Dios.

¹⁰¿Man xaxe ta kami jun qatata'? ¿Man xaxe ta kami jun qa-Dios ri xbanon qichin? ¿Achike k'a roma rix ye'iq'ol ri iwach'alal, y keri' man niya' ta rejqalen ri rujikibel-tzij ri Dios ri xuben kik'in ri qati't-qamama'?

¹¹Rix tinamit Judá man xiben ta ri xijikiba' chuwech ri Jehová. Rix aj-Jerusalem xa ruyon itzel ri xiben pan Israel. Rix xa xiben chire chi man ch'ajch'oj ta ri rachoch ri Jehová roma xa xixk'ule' kik'in ixoqi' ri xa man junan ta i-dios kik'in.

¹²Ri Jehová kan xtukamisaj ta k'a xabachike ri nibanon keri', stape' ta xtusuj sipanik chuwech.

¹³Y man xaxe ta ri', xa kan nimuba' ri ruporobal ri Dios rik'in ri ruya'al runaq' taq iwech. Y yixoq' roma ri Dios man nuk'awomaj ta ri isipanik.

¹⁴¿Achike k'a roma ri Jehová man nuk'awomaj ta ri isipanik? Roma rija' kan rutz'eton chi rix xa xiq'ej ruwi' ri jikibel-tzij ri xiben kik'in ri iwixjayilal ri xixk'ule' kik'in toq rix k'a ix alaboni' na. Xibij chi kan xe'ok ta iwachibil richin chijun ik'aslen. Kan chuwech ri Dios xiya' itzij chike chi kan ye'iwajo' richin q'asen.

¹⁵Ja ri Dios xbanon iwichin rix y ri iwixjayilal richin xa jun xiben, y chuqa' xa jun espíritu. ¿Achike kami roma xuben? Richin nik'iyer ri iwijatzul ri kan ch'aron chire rija'. Roma ri' kan tichajij-iwi', y man tiq'ol ri iwixjayil ri achoq ik'in xixk'ule-wi toq k'a ix alaboni' na.

¹⁶Roma ri' ri Jehová kan nrixowaj toq jun achin nujech-ri' rik'in ri rixjayil, roma re' kan jun itzel banobel. Roma ri' rix achi'a' kan tichajij k'a iwi' y man tiben ri q'oloj ri'.

¹⁷Ri Jehová kan xkos yan k'a chi rak'axaxik ri ich'abel, y man rik'in ri' rix nik'utuj ri achike k'a ri nibij rix richin ri Jehová xkos yan iwik'in. Roma rix kan jantape' nibij chi ri Jehová kan yeqa' chuwech konojel ri nikiben itzel, y chuqa' man niniman ta chike ri winaqi' ri yebanon etzelal.