Read Kaqchikel Mt 15 Bible Online

Mt 15 - Kaqchikel bible

Mt 15

¹Chirij ri' ek'o k'a ka'i-oxi' etamanela' chirij ri pixa' y ri fariseo ri xepe pa Jerusalem richin xech'on rik'in ri Jesús y xkibij chire:

²¿Achike roma toq ri atijoxela' nikiq'ej ruwi' ri bin kan koma ri qati't-qamama'? Roma ri atijoxela' kan man nikich'ej ta ri kiq'a' toq nikitej kiway, achi'el ri ruchojmilal ri ya'on kan, xecha'.

³Jak'a ri Jesús xubij chike: Y rix, ¿achike k'a roma toq xa rik'in ri kibin kan ri iwati't-imama', rik'in ri' niq'ej-wi ruwi' ri rupixa' ri Dios?

⁴Ri rupixa' ri Dios nubij k'a chi tiqaya' kiq'ij ri ite-itata'. Y ri nibanon itzel chike rute-rutata', kan tikamisex k'a; keri' ri rubin kan ri Dios.

⁵Jak'a rix xa nich'ob chi rik'in nibij chike ri ite-itata' chi man yixtikir ta ye'ito' roma xa xisuj yan chire ri Dios ri k'o ta chi niya' chike rije', rik'in ri' yixel chuwech ri k'atzinel richin niben.

⁶Y rik'in ri ibanobal keri' niq'alajin chi rix kan man niya' ta kiq'ij ri ite-itata' y kan iq'ajon ruwi' ri rupixa' ri Dios.

⁷Rix xa ka'i' ipalej. Xa kan jebel k'a rubixik rubanon kan ri Isaías chiwij, toq xubij:*f21*

⁸Rix xaxe rik'in ri ich'abel niya' nuq'ij; jak'a ri iwánima xa kan k'o janila nej chuwe yin.

⁹Y toq niya' nuq'ij, xaxe nikamuluj pixa' ri e banon koma winaqi'. Keri' ri rutz'iban kan ri Isaías chiwij, xcha'.

¹⁰Chirij ri' ri Jesús xch'on kik'in ri janila chi winaqi' ri kimolon-ki' chiri', y xubij k'a chike: Tiwak'axaj k'a re xtinbij chiwe y tiq'ax-el chiwech.

¹¹Ri nitz'ilobisan richin ri wineq man ja ta k'a ri nutej-qa nibanon. Ri nitz'ilobisan xa ja ri itzel taq ch'abel ri yepe rik'in ri wineq, xcha' ri Jesús.

¹²Jari' toq ri tijoxela' xejel-apo rik'in, y xkibij chire: ¿Man xatz'et ta chi ri fariseo xpe koyowal toq xkak'axaj ri ch'abel ri xabij?, xecha' chire.

¹³Jak'a rija' xubij chike: Ronojel tiko'n ri man ja ta ri aj-chikajil nata' banayon-qa, xa kan xtik'uq-el.

¹⁴Xa ke'iya' kan la winaqi' la', roma rije' xa kan e moyirineq rik'in ri etamabel ri k'o kik'in, y yekiyuqej ch'aqa' chik ri xa e moyi' chuqa'. Y wi ri e moyi' yekiyuqej ri ch'aqa' chik moyi', xa kan junan k'a xketzaq pa taq jul, xcha' ri Jesús.

¹⁵Jak'a ri Pedro xubij chire ri Jesús: Taq'alajirisaj chiqawech ri nibek'ulun-wi ri k'ambel-tzij ri xakusaj, xcha'.

¹⁶Roma ri' ri Jesús xubij: ¿Chuqa' rix kan man niq'ax ta chiwech ri ninbij?

¹⁷¿Kan man niq'ax ta k'a chiwech chi ri nutej-qa ri wineq xa choj pa rupan nibe-wi y k'ari' nel-el?

¹⁸Ri nuben chi jun wineq man ch'ajch'oj ta, ja ri ch'abel y ri nojibel ri ye'el-pe pa ránima.

¹⁹Roma xa pa kánima k'a ri winaqi' yepe-wi ri itzel taq ch'obonik. Chiri' nipe-wi ri ch'obonik toq yekamisan. Chiri' chuqa' nipe-wi ri ch'obonik toq ri winaqi' ri e k'ulan y ri man e k'ulan ta nikikanola-ki' richin yemakun; chuqa' chiri' nipe-wi toq ye'eleq', toq yetz'uku tzij, y chuqa' toq yeyoq'on.

²⁰Y ronojel k'a ri banobel ke taq ri' jari' ri nibanon chire jun wineq chi nok man ch'ajch'oj ta. Jak'a ri nuben ri wineq chi man ruch'ajon ta ruq'a' nutej-qa ruway, achi'el nikibij rije'; ri' man nuben ta chi rija' nok man ch'ajch'oj ta, xcha' ri Jesús.

²¹Chirij ri' ri Jesús e rachibilan ri rutijoxela' xel k'a el ri chiri', y xbe k'a pa ruwach'ulew akuchi ek'o-wi ri tinamit Tiro y Sidón.

²²Y chiri' k'o k'a jun ixoq aj-Canaán ri xpe rik'in ri Jesús. Rija' roma bis, kan nuk'utula' utzil chire, y nubila' k'a rik'in ruchuq'a': Wajaw, rat riy-rumam kan ri rey David. Tajoyowaj nuwech y kinato', roma ri wal xten k'o jun itzel espíritu rik'in, y k'ayew rubanon pa ruq'a', xcha'.

²³Jak'a ri Jesús kan man jun ch'abel xubij chire ri ixoq. Jari' toq ri tijoxela' xejel-apo rik'in ri Jesús y xkik'utuj utzil chire chi tubana' chi nik'oje' kan re ixoq re', roma tzeqetel-pe chikij y ri ruch'abel kan k'anej nak'axex-wi.

²⁴Y ri Jesús xubij: Yin xitaq-pe xaxe chikikanoxik ri qawinaq judío ri man ek'o ta pa rajawaren ri Dios, xcha'.

²⁵Kan jari' xpe ri ixoq, xoxuke' chuwech ri Jesús, y xubij chire: Wajaw, tabana' utzil kan kinato', xcha'.

²⁶Jak'a ri Jesús xubij chire: Ri rutzil ri Dios man utz ta chi chire xabachike ninya-wi. Achi'el ri kiway ri alk'ualaxela' ri man ruk'amon ta chi nelesex chike rije' richin niya'ox chikiwech ri tz'i', xcha' ri Jesús.

²⁷Jak'a ri ixoq xubij: Wajaw, kan qitzij ri nabij. Jak'a kan yojtikir k'a chuqa' niqak'ul-apo juba' chire ri utzil ri'. Achi'el nikiben ri taq tz'i' ri yekimolola' ri ruk'aj wey ri yekitzeq-qa ri kajaw ri yewa' pa mesa, xcha'.

²⁸Roma ri' ri Jesús xubij chire ri ixoq: Kan janila nim ri nimabel k'u'x ri k'o awik'in; roma ri' kan tibanatej k'a awik'in ri achi'el ri nawajo', xcha' ri Jesús. Keri' k'a ri xten ri', kan chupan k'a ri ramaj ri' xel-el ri itzel espíritu rik'in.

²⁹Ri Jesús e rachibilan ri rutijoxela' xel-pe chupan ri tinamit Tiro y Sidón, y xapon k'a chunaqaj ri choy richin ri Galilea. Y rija' xjote-q'anej pa ruwi' jun juyu' y xbetz'uye' chiri'.

³⁰Y kan janila k'a chi winaqi' ri xe'apon rik'in, y e kik'uan-apo yawa'i'. Chike ri yawa'i' ek'o ri man choj ta yebiyin roma e jetz', ek'o e moyi', ek'o mema', ek'o ri man utz ta ri kiq'a', y ek'o ch'aqa' chik ri jalajoj ruwech yabil nok chike. Ri winaqi' ri' yekiya' k'a apo ri yawa'i' chuwech ri Jesús, y rija' xeruk'achojirisaj.

³¹Kan roma k'a ri xuben ri Jesús kik'in ri yawa'i', ri winaqi' kan janila k'a xkimey. Xkitz'et k'a chi ri mema' rubanon kan, wakami yech'on chik. Ri man utz ta ri kiq'a', xek'achoj. Ri e jetz', choj chik yebiyin. Ri moyi', yetzu'un chik. Roma ri' ri winaqi' kan xkiya' k'a ruq'ij-ruk'ojlen ri Dios.

³²Chirij ri' ri Jesús xeroyoj ri rutijoxela', y xubij chike: Yin janila ninjoyowaj kiwech re winaqi' re', roma k'o yan oxi' q'ij ek'o-pe wik'in y kan man jun kiway richin nikitej. Y yenteq ta k'a el chi taq kachoch choj keri' man jun nikitej-el, man utz ta; man xa kebetzaq pa taq bey roma wayjal, xcha' rija'.

³³Kan jari' k'a xech'on-apo ri tijoxela' chire ri Jesús y xkibij: Re akuchi ojk'o-wi-qa xa e maneq winaqi'. ¿Akuchi ta k'a nibeqila-pe wey richin yeqatzuq re janila chi winaqi' re'?, xecha'.

³⁴Ri Jesús xuk'utuj chike chi janipe' kaxlan-wey k'o kik'in. Y rije' xkibij: Roj xaxe ok wuqu' kaxlan-wey k'o qik'in y chuqa' ka'i-oxi' taq ker, xecha' chire.

³⁵Jari' toq ri Jesús xubij chi ketz'uye-qa konojel ri winaqi'.

³⁶K'ari' rija' xeruli'ej ri wuqu' kaxlan-wey y ri ker pa ruq'a' y xumatioxij chire ri Dios. Y k'ari' xeruperela-el y xuyala-el chike ri rutijoxela'. Y rije' xkitaluj chikiwech ri janila chi winaqi' ri ek'o apo chiri'.

³⁷Kan konojel k'a jebel xkitej kiway y kan man jun ri man ta jebel xwa'. Man rik'in ri' k'a k'o na ri man xk'is ta; xmol kan ronojel y xuben wuqu' chakech ri xnoj kan rik'in ri kaxlan-wey y ker ri man xk'is ta.

³⁸Janila chi winaqi' ri xewa'. Ek'o la'eq e 4,000 achi'a'. Jak'a ri ixoqi' y ri ak'uala' ri xkitej kiway, man xe'ajlex ta.

³⁹Chirij ri' ri Jesús xerutaqala-el ri winaqi' chi taq kachoch, jak'a rija' e rachibilan ri rutijoxela' xok-el pa barco, y xebe k'a pa ruwach'ulew Magadán.