Read Kaqchikel Mt 5 Bible Online

Mt 5 - Kaqchikel bible

Mt 5

¹Y toq ri Jesús xerutz'et chi e janila chi winaqi' ri kimolon-ki' chiri', rija' xjote-el pa ruwi' ri juyu', y xtz'uye' k'a qa. Y k'ari' xkimol-apo-ki' ri rutijoxela' rik'in.

²Y jari' toq ri Jesús xch'on k'a richin yerutijoj, y xubij:

³Jebel ruwa-kiq'ij ri noqaqa chikik'u'x chi kan nik'atzin ri Dios chupan ri kik'aslen, roma rije' kan ye'ok-wi chupan ri aj-chikajil ajawaren.

⁴Jebel ruwa-kiq'ij ri ye'oq' wakami, roma rije' kan xtibekuqubex kik'u'x.

⁵Jebel ruwa-kiq'ij ri kiqasan-ki', roma rije' xke'ichinan ri ruwach'ulew pa ruq'a' ri Dios.

⁶Jebel ruwa-kiq'ij ri kan nik'at kánima chirij ri ruchojmilal; ri Dios xtuben chike chi xtich'uch'u' ri kánima.

⁷Jebel ruwa-kiq'ij ri kan nikijoyowaj kiwech ch'aqa' chik, roma rije' kan xtijoyowex chuqa' kiwech.

⁸Jebel ruwa-kiq'ij ri ch'ajch'oj kánima, roma rije' kan xtikitz'et ruwech ri Dios.

⁹Jebel ruwa-kiq'ij ri yeqasan ruwi' oyowal, roma rije' xtibix chike chi e ralk'ual ri Dios.

¹⁰Jebel ruwa-kiq'ij ri nikik'owisaj tijoj-poqonal, roma choj ri kik'aslen chuwech ri Dios, roma rije' kan xke'ok chupan ri aj-chikajil ajawaren.

¹¹Jebel ruwa-iq'ij rix, toq xkixyoq', xkixtzeqelibex y xtitz'uk-tzij chiwij woma yin.

¹²Kan titze'en k'a iwech y kixkikot janila, roma nim rajel-ruk'exel ri xtik'ul chila' chikaj. Ri xtik'owisaj rix, kan keri' chuqa' xkik'owisaj ri e q'alajirisey ruch'abel ri Dios ri xek'oje' ojer kan.

¹³Ja rix ri ix achi'el atz'an chikikojol ri winaqi'. Jak'a wi ta ri atz'an nik'is ta el ri ratz'amil, xa kan man jun chik k'a banel richin ta natz'amin. Xa man jun chik k'a nik'atzin-wi; xa kan xaxe chik k'a nik'atzin chi nik'aq-el y yeq'ax ri winaqi' pa ruwi'.

¹⁴Rix kan ix achi'el saqil chuwech re ruwach'ulew, achi'el jun tinamit ri k'o pa ruwi' jun juyu' ri man tikirel ta richin nrewaj-ri'.

¹⁵Roma rix man jun bey k'a nitzij ta jun q'aq' richin nisaqirisan y nijupuba' ta kan jun bojo'y pa ruwi'. Ri q'aq' ri nitzij kan richin k'a nisaqirisan; roma ri' nikanoj jun k'ojelibel ri nitz'uyuba-wi, richin keri' kan yerusaqirisaj konojel ri ek'o pa jay.

¹⁶Kan keri' ta k'a xtisaqirisan ri ik'aslen rix chikiwech ri winaqi'; Richin keri' toq xtikitz'et k'a ri utzilej taq ibanobal, ri winaqi' kan xtikiya' k'a ruq'ij-ruk'ojlen ri aj-chikajil qatata'.

¹⁷Man k'a tich'ob chi yin xipe chuyojik ri pixa' ri ruya'on kan ri Moisés, y ri wuj ri kitz'iban kan ri ojer taq q'alajirisey ruch'abel ri Dios. Yin xipe richin ninben ronojel ri kibin kan rije'.

¹⁸Roma kan qitzij ninbij chiwe, chi ronojel ri tz'ibatel kan chupan ri pixa', kan xkebanatej-wi. Re ruwach'ulew y re kaj xa xkek'is k'a. Jak'a ri e tz'ibatel kan chupan ri pixa' kan xkebanatej-wi, y man jun xtik'oje' kan chaq keri'.

¹⁹Xabachike wineq ri nuq'ej ruwi' jun chike ri nubij chupan ri pixa', stape' ta jun tzij ri achi'el xa ta man jun rejqalen niq'alajin; y kan keri' chuqa' yerutijoj-wi ri ch'aqa' chik winaqi'; ri nibanon keri', xa man jun k'a ok ruq'ij xtik'oje' chikikojol ri ek'o chupan ri aj-chikajil ajawaren. Jak'a ri wineq ri nibanon ronojel ri tz'ibatel chupan ri pixa' y kan keri' chuqa' yerutijoj-wi ri ch'aqa' chik winaqi', ri nibanon keri' kan xtik'oje' k'a ruq'ij chikikojol ri ek'o chupan ri ajawaren ri'.

²⁰Roma ri', rix ri niwajo' yixok chupan ri aj-chikajil ajawaren, kan nik'atzin k'a chi ri ik'aslen más ta choj chuwech ri kik'aslen ri achi'a' etamanela' chirij ri pixa' y chuwech ri kik'aslen ri fariseo.

²¹Rix kan iwak'axan k'a ri xbix chike ri qawinaq ojer kan chi man kekamisan. Y xabachike k'a wineq ri nikamisan, kan aj-mak-wi y k'o chi niq'at-tzij pa ruwi'.

²²Jak'a yin ninbij chi wi k'o ta jun ri, stape' ta xaxe royowal ri nipe chire jun wineq, kan nimakun-wi y kan k'o chi tiq'at-tzij pa ruwi'. Chuqa' ri nibin chire jun chik wineq chi maneq runa'oj; ri nibin keri', kan aj-mak chuqa', roma ri' kan ruk'amon chi nuk'uex chikiwech ri achi'a' ri pa komon yeq'aton-tzij richin chi niq'at-tzij pa ruwi'. Y xabachike k'a ri nibin nakanik chire jun chik wineq, ri' xa kan oyoben chik roma ri q'aq'.

²³Roma ri' wi rat kan atk'o chik apo rik'in ri porobel richin chi naya' jun sipanik chire ri Dios y jari' toq noqaqa chi'ak'u'x chi ri awach'alal royowal chawe,

²⁴kan taya' k'a kan ri sipanik chiri' akuchi k'o-wi ri porobel, y jari' kabiyin rik'in ri wineq ri'. Tabechojmirisaj kan ri banatajineq chi'ikojol. Y toq achojmirisan chik kan y junan chik iwech, k'ari' katzolin y tasuju' ri sipanik chire ri Dios.

²⁵Wi k'o ta oyowalen chi'ikojol, kan tachojmirisaj chi'anin rik'in ri etzelanel awichin, rokik xa k'a ri' ichapon-el bey pa q'atbel-tzij, roma wi xa man keri' ta xtaben, ri sujunel chawij xkarujech pa ruq'a' ri q'atoy-tzij, y re q'atoy-tzij re' xkarujech-el pa ruq'a' ri chajiy cárcel, y rija' xkaberutz'apej kan.

²⁶Y kan qitzij wi ninbij chire ri keri' nik'uluwachin, chi xa kan man xtel ta k'a pe ri chiri' pa cárcel, k'a toq rutojon chik na kan ronojel ri kan k'o chi nutoj.

²⁷Rix kan jebel iwetaman ri xbix kan ojer chi jun wineq ri k'ulan, man tukanoj jun chik richin nimakun rik'in.

²⁸Jak'a yin ninbij chi xabachike wineq ri nuya' ruwech chirij jun chik, ri nibanon keri', pa ránima xa kan xmakun yan.

²⁹Xa roma ri' wi jun runaq'-awech nibanon chawe chi yamakun, más utz tawelesaj y tatorij-el. Roma más utz chi xaxe jun chike ri runaq'-awech nibe kan y mani kan chijun ri ach'akul ri nibe kan pa q'aq'.

³⁰Chuqa' wi xa jun chike ri aq'a' nibanon chawe chi yamakun, más utz chi tachoyo' y tatorij-el. Roma más utz chi xaxe jun chike ri aq'a' nibe kan y mani chi kan chijun ri ach'akul ri nibe kan pa q'aq'.

³¹Y chuqa' iwetaman chi ri ojer kan xbix chi wi jun achin ri man nrajo' ta chik ri rixjayil y nujech-ri' rik'in; tubana' jun wuj ri richin jachojri'il y tuya' chire ri ixoq.

³²Jak'a yin ninbij chiwe chi ri achin ri nujech-ri' rik'in ri rixjayil y xa man roma ta chi ri ixoq xukanoj ta chik jun achin; ri achijlonel ri' kan nuben-wi k'a chire ri rixjayil chi nimakun. Y wi k'o ta chik jun achin ri nik'ule' rik'in ri ixoq ri rujachon ri', ri achin ri' kan nimakun-wi.

³³Y chuqa' rix kan jebel iwetaman ri xbix chike ri qawinaq ojer kan, chi man tikiq'ej ruwi' ri ya'on-tzij ri nikiben. Xa kan tikibana' k'a ri xkiya' kitzij chire richin nikiben chuwech ri ajaw.

³⁴Jak'a yin ninbij chiwe chi man jun bey tiben jun ya'on-tzij pa rubi' ri kaj, roma kan ja ri chila' chikaj k'o-wi ri rajawaren ri Dios.

³⁵Ni man tiya' itzij pa rubi' ri ruwach'ulew, roma ja re' ri rupalibal ri Dios, ni man chuqa' tikusaj ri rubi' ri Jerusalem, roma re tinamit re' kan richin ri nimalej rey.

³⁶Ni man tiben jun ya'on-tzij y ninataj ri rusumal-iwi' roma rix xa kan man xkixtikir ta xtiben chi jun rusumal-iwi' xtok ta seq o q'eq.

³⁷Ronojel k'a ri ich'owen kan xaxe k'a ri qitzij; wi ja' kan jari' k'a, y wi ni kan ni k'ari'. Roma wi xa xtiben jun ya'on-tzij xa kan niq'alajin chi k'o itzel pan iwánima.

³⁸Y rix kan jebel iwetaman ri xbix chike ri qawinaq ri ojer kan, chi ri nelesan jun runaq'-ruwech jun wineq, kan keri' k'a chuqa' tiban chire ri xbanon. Ri niq'ajo-el rey jun wineq, kan keri' k'a chuqa' tiban chire ri xbanon.

³⁹Jak'a yin ninbij chiwe chi man tipaba-iwi' chuwech ri nibanon etzelal chiwe. Wi xa k'o k'a jun ri nupaq'ij ri ipalej, xa kan utz k'a niya-iwi' pa ruq'a' jun bey chik.

⁴⁰Y wi k'o jun wineq ri kan yixruchop chi oyowal roma nrajo' nrelesaj kan ri itziaq chiwij, kan man k'a tipoqonaj niya' kan chire; y pa ruwi' ri', kan tiya' k'a kan chuqa' ri iq'u' chire.

⁴¹Wi jun aj-labal nibanon chiwe chi tik'uaj-el ri rejqa'n, xa kan rik'in k'a kikoten tik'uaj ri ejqa'n ri', y chuqa' man tipoqonaj nisuj-iwi' richin nik'uaj más nej.

⁴²Y wi k'o jun ri k'o nuk'utuj chiwe, kan tiya' k'a chire. Y wi k'o chuqa' nuk'utuj pa qajik chiwe, man tipoqonaj niya-el chire.

⁴³Rix kan jebel iwetaman ri xbix ojer kan chi kan ruk'amon-wi chi kan ke'iwajo' ri iwachpochel. Jak'a ri ye'etzelan iwichin, kan ke'iwetzelaj.

⁴⁴Jak'a yin ninbij chi kan ke'iwajo' k'a ri ye'etzelan iwichin; tiya' urtisanik pa kiwi' ri ye'etzelan iwichin; utz tibana' kik'in ri xa man utz ta kina'oj iwik'in rix y tik'utuj ri rutzil ri Dios pa kiwi' ri ye'oqotan y ri yeyoq'on iwichin.

⁴⁵Richin keri' kan niq'alajin-wi chi rix ix ralk'ual ri aj-chikajil qatata'. Roma rija' kan utz wi k'a pa qawi' qonojel. Kan k'a chila' chikaj nuben-pe chi k'o ri rusaqil ri q'ij pa kiwi' ri winaqi' e utz y pa kiwi' ri winaqi' e itzel; kan k'a chila' k'a chuqa' nuben-pe chi k'o job pa kiwi' ri winaqi' e choj y ri man e choj ta.

⁴⁶Wi rix ye'iwajo' xaxe ri ye'ajowan iwichin, xa man jun rajel-ruk'exel xtik'ul, roma ri keri' xa kan kibanobal chuqa' ri e itzel taq moloy méro ri k'o chi nitoj chire ri rey aj-Roma.

⁴⁷Y wi rix xaxe ri iwach'alal ri ye'iq'ejela', ¿achike ta chik k'a ri más utz ri yixtajin chubanik? Man jun. Roma xa keri' chuqa' nikiben ri winaqi' ri man ketaman ta ruwech ri Dios.

⁴⁸Rix kan kixok k'a tz'aqet rik'in ri ibanobal achi'el ri aj-chikajil qatata' ri kan tz'aqet rik'in ri rubanobal.