Read Kaqchikel Mc 10 Bible Online

Mc 10 - Kaqchikel bible

Mc 10

¹Chirij ri' ri Jesús xel-el chiri' y xbe k'a pa ruwach'ulew Judea. Y xq'ax chuqa' juk'an chire ri raqen-ya' Jordán. Chiri', janila chuqa' k'iy winaqi' xkimol-ki' rik'in. Rija' xuchop k'a nuk'ut ri ruch'abel ri Dios chikiwech kan achi'el rubanon-pe.

²Y jari' toq ri fariseo xe'apon rik'in, richin chi nikitejtobej. Rije' xkik'utuj k'a chire wi ruk'amon chi jun achin k'ulan nujech-ri' rik'in ri rixjayil.

³Ri Jesús xubij: ¿Achike k'a ri rubin kan ri Moisés chupan ri pixa'?, xcha'.

⁴Rije' xkibij: Ri Moisés kan ruya'on-wi kan q'ij chi jun achin k'ulan nuben jun wuj richin nujech-ri', y keri' nrelesaj-el ri rixjayil, xecha'.

⁵Roma ri' ri Jesús kan jari' xubij: Kan achi'el k'a kowirineq ri iwánima wakami chupan ri man utz ta, kan keri' chuqa' ri ojer kan. Xa roma ri' toq rija' xubij chi tikirel.

⁶Ri pa rutikeribel, toq ri Dios xuben re ruwach'ulew, kan pa k'ulaj k'a xeruben ri winaqi': Chi achi'a' chi ixoqi', xeruben.

⁷Xa roma ri' ri achin nuch'er-pe-ri' kik'in ri rute-rutata', y rik'in chik ri rixjayil xtuk'uaj-wi-ri',

⁸richin chi kan xtikich'akulaj-ki' chi e ka'i', keri' nubij ri ruch'abel ri Dios. Roma toq kik'uan chik ki', man chik e ka'i' ta, xa jun chik k'a ri kibanon.

⁹Roma ri', ri kan e tunun chik roma ri Dios, man tuben ri wineq chi yeruch'er, xcha' ri Jesús.

¹⁰Toq ri Jesús y ri rutijoxela' ek'o chik k'a pa jay, ri tijoxela' xkik'utula' chik k'a chire ri Jesús pa ruwi' ri k'ari' xerubij kan chike ri fariseo.

¹¹Y xubij: Xabachike achin ri nujech-ri' rik'in ri rixjayil y k'ari' nik'ule' rik'in jun chik ixoq, re achin re' nimakun chuwech ri nabey rixjayil.

¹²Keri' chuqa' ri ixoq ri nujech-ri' rik'in ri rachijil y nik'ule' rik'in jun chik achin, re ixoq re' kan nimakun chuwech ri nabey rachijil, xcha' chike.

¹³Ek'o k'a ak'uala' ri xe'uk'uex-apo chuwech ri Jesús, richin chi rija' tuya' ruq'a' pa kiwi'. Jak'a ri tijoxela' xa xekich'olij-el ri xe'uk'uan-apo ri ak'uala'.

¹⁴Y toq ri Jesús xutz'et ri nikiben ri tijoxela', xpe royowal, y xubij chike: Tiya' q'ij richin chi ri ak'uala' yepe wik'in yin. Roma ri xke'ok pa rajawaren ri Dios, xaxe ri e achi'el ri ak'uala'.

¹⁵Kan qitzij k'a ninbij chiwe, chi ri xa man nikiben ta achi'el ri ak'uala' richin chi nikijech-ki' pa ruq'a' ri Dios, kan man k'a xke'ok ta pa rajawaren rija', xcha'.

¹⁶Rija' xeruch'elela' y xuyala' ri ruq'a' pa kiwi' ri ak'uala' richin xerurtisaj.

¹⁷Ri Jesús xuchop chik el bey; jari' toq k'o jun achin junanin xoqaqa rik'in xxuke' chuwech y xubij chire: Rat utzilej tijonel, tabij chuwe: ¿Achike k'a ruk'amon chi ninben yin richin chi ninwichinaj ri k'aslen richin q'asen?, xcha'.

¹⁸Jak'a ri Jesús xubij chire: ¿Achike roma toq nabij utz chuwe? Roma man jun wineq ri utz ta, xa kan xaxe ri Dios ri utz.

¹⁹Yin ninbij chi rat jebel awetaman ri lajuj pixa' ri xuya' ri Dios chire ri Moisés ojer kan, chi man tiben kamik, chi ri e k'ulan man tikikanoj jun chik, chi man kixeleq', chi man tiyek-tzij chirij jun chik wineq, man tiq'ol jun wineq y tiya' kiq'ij ri ite-itata', xcha'.

²⁰Ri achin kan jari' xubij chire: Tijonel, yin k'a in ko'ol toq nubanon-pe ronojel ri', xcha'.

²¹Ri Jesús rik'in k'a ajowabel xutzu' ruwech ri achin ri' y xubij chire: K'a k'o jun ri man abanon ta. Tabek'ayij k'a kan ronojel ri k'o awik'in y ri rajel tataluj chikiwech ri winaqi' ri man jun k'o kik'in, richin keri' nik'oje' abeyomel chila' chikaj. K'ari' katanpe richin kinatzeqelibej, y man tapoqonaj nak'owisaj tijoj-poqonal, xcha' chire.

²²Jak'a toq ri achin xrak'axaj re ch'abel re', janila xbison roma rija' kan janila ri beyomel k'o rik'in. K'ari' xupiskolij-el-ri'.

²³K'ari' ri Jesús xerutzu' ri rutijoxela', y xubij chike: Ri k'o kibeyomel, janila k'ayew richin chi ye'ok pa rajawaren ri Dios, xcha' chike.

²⁴Roma ri' ri rutijoxela' ri Jesús kan janila xkimey ri ch'abel ri xubij. Jak'a kan xubij chik jun bey chike: Janila k'ayew richin chi ri winaqi' ye'ok pa rajawaren ri Dios.

²⁵Xa más man k'ayew ta chi niq'ax jun camello pa ti rujulil jun baq, ke chuwech jun beyom nok ta pa rajawaren ri Dios, xcha'.

²⁶Jak'a toq ri tijoxela' xkak'axaj chik jun bey ri ch'abel ri xubij ri Jesús, xsach kik'u'x y xkibila' k'a chikiwech: Wi xa keri', man jun xtikolotej ri', xecha'.

²⁷Jari' toq ri Jesús xerutzu-apo y xubij chike: Ri janila k'ayew chikiwech ri winaqi', chuwech ri Dios xa man k'ayew, xcha'.

²⁸Jari' toq ri Pedro xubij chire: Roj qaya'on kan ronojel ri k'o qik'in, richin at qatzeqeliben, xcha'.

²⁹Jak'a ri Jesús xubij chire: Kan qitzij k'a ninbij chiwe, chi xabachike wineq, wi woma yin y roma ri utzilej ch'abel richin kolotajik ruya'on ta kan rachoch, rach'alal, rute-rutata', [rixjayil,]*f13* ralk'ual o rulew,

³⁰ri wineq ri' kan xtuk'ul yan k'a, wok'al más rachoch re wakami ke chuwech ri rubanon-pe; keri' chuqa' ruya'on kan rach'alal, rute', ralk'ual o rulew. Stape' ronojel re' kan rik'in wi k'a tijoj-poqonal nuk'ul roma tzeqelibey wichin yin, jak'a ri chiqawech-apo, kan xtuk'ul k'a ri ruk'aslen richin q'asen.

³¹E k'iy k'a ri janila kiq'ij re wakami, jak'a xa xtapon ri q'ij toq xa maneq chik kiq'ij xtiban chike. Y e k'iy ri maneq ok kiq'ij re wakami, jak'a kan xtapon ri q'ij toq xtik'oje' kiq'ij, xcha' ri Jesús.

³²Ri Jesús, ri rutijoxela' y ri ch'aqa' chik winaqi' kichapon k'a el bey pa Jerusalem. Ja ri Jesús ri ik'owineq-el chikiwech. Ri tijoxela' kan janila k'a nikimey, y ri winaqi' ri e tzeqelibeyon-el richin kan janila kixibin-ki'. K'ari' ri Jesús xeruch'er-el ri rutijoxela' y xubij chik k'a chike ri achike chi tijoj-poqonal ri xtuk'owisaj.

³³Rija' xubij chike: Rix iwetaman chi ja ri pa Jerusalem qachapon-wi-el bey, y ja ri chiri' ri xkijach-wi-el yin ri xiqaqa-pe achi'el wineq chi'ikojol. Xkijach-el pa kiq'a' ri aj-raqen kichin ri sacerdote y pa kiq'a' ri etamanela' chirij ri pixa'. Y rije' xkinkijech-el pa kiq'a' winaqi' ri xa man e judío ta.

³⁴Ri winaqi' ri' xkinkitze'ej, xkinkichubaj, xkinkich'ey, y k'ari' xkinkikamisaj. Jak'a pa rox q'ij xkik'astej-pe, xcha'.

³⁵K'ari' ri Jacobo y ri Juan, ri e ruk'ajol ri Zebedeo, xejel k'a apo rik'in ri Jesús, y xkibij chire: Tijonel, roj niqajo' niqak'utuj jun utzil chawe, y niqajo' chi kan ta naben qik'in ri xtiqak'utuj chawe, xecha'.

³⁶Rija' xuk'utuj chike achike chi utzil ri nikajo'.

³⁷Y rije' xkibij: Roj niqajo' chi toq rat atk'o chik pan awajawaren, naben ta chuqa' chiqe roj chi yojtz'uye' ta apo awik'in; jun ta ri nik'oje' pan awijkiq'a' y jun ta ri pan awajxokon, xecha'.

³⁸Jak'a ri Jesús xubij chike: Rix xa man iwetaman ta ri nik'utuj: ¿Nikoch' kami chuqa' jun tijoj-poqonal achi'el ri xtiqaqa pa nuwi' yin? Roma ronojel ri xtiq'ax pa nuwi' yin, kan jun k'ayewalej tijoj-poqonal, xcha' ri Jesús.

³⁹Rije' xkibij chi yetikir nikikoch'. Roma ri' ri Jesús xubij chik k'a chike: Kan qitzij wi k'a chi rix xtikoch' na wi achi'el ri xtiban chuwe yin. Kan xtikoch' jun k'ayewalej tijoj-poqonal achi'el ri xtiqaqa pa nuwi' yin.

⁴⁰Jak'a ri nik'utuj chuwe chi jun nitz'uye' pa wijkiq'a' y jun ri nitz'uye' pa wajxokon, ri' man pa nuq'a' ta yin k'o-wi richin chi ninya' chiwe. Roma ri nik'utuj rix, ri' xa pa ruq'a' chik ri Dios k'o-wi, xcha' ri Jesús.

⁴¹Jak'a ri lajuj chik tijoxela', toq xkak'axaj ri xbitej, xpe koyowal chike ri Jacobo y ri Juan.

⁴²Jari' k'a toq ri Jesús xeroyoj ri rutijoxela' y xubij chike: Rix jebel iwetaman chi re wawe' chuwech re ruwach'ulew, ja ri banon q'atoy taq tzij chike ri ek'o pa kiwi' ri winaqi', y roma kan ek'o ri winaqi' pa kiq'a', roma ri' kan nikina' chi ja rije' k'o kiq'ij richin nikiben ri nikajo'.

⁴³Jak'a ri chi'ikojol rix man keri' ta. Roma ri nrajo' nik'oje' ruq'ij, k'o chi nuqasaj-ri' chubanik xabachike samaj.

⁴⁴Wi jun chiwe rix kan nrajo' chi ja rija' ri nabey, kan tuqasaj k'a ri' richin nok jun ilinel kichin konojel.

⁴⁵Y keri' yin ri xiqaqa-pe achi'el wineq chi'ikojol. Yin man ninpoqonaj ta yisamej koma ch'aqa', roma kan richin ri' toq xipe. Ja yin ri yiya'on ri nuk'aslen richin keri' e k'iy yekolotej, xcha' ri Jesús.

⁴⁶K'ari' ri Jesús y ri rutijoxela' xe'apon pa tinamit Jericó. Y janila k'a e k'iy winaqi' ri e beneq kik'in. Y toq xeq'ax yan el chiri', chuchi' bey k'o k'a jun moy rubini'an Bartimeo, y re' nel chi tzij ruk'ajol ri Timeo. Rija' tz'uyul chiri', nuk'utula' kan ruméro chike ri winaqi' ri yeq'ax keri'.

⁴⁷Jak'a toq xrak'axaj chi ri niq'ax-el keri' ja ri Jesús aj-Nazaret, rija' rik'in k'a ruchuq'a' xch'on y xubij: Tajoyowaj nuwech Jesús, ri at riy-rumam kan ri rey David, xcha'.

⁴⁸Roma ri' e k'iy k'a winaqi' ri xkich'olij richin man chik tich'on. Jak'a rija' xa rik'in más ruchuq'a' ri nich'on y nubij: Tajoyowaj nuwech Jesús, ri at riy-rumam kan ri rey David, nicha'.

⁴⁹Toq ri Jesús xrak'axaj ri ruch'abel, xpa'e-qa y xubij chi toyox-pe ri moy. Y jari' xbekoyoj-pe y xkibij chire: Kakikot y kayakatej, roma ri Jesús yaroyoj, xecha' chire.

⁵⁰Ri achin ri', kan jari' xyakatej-pe. Xrelesaj kan ri ruq'u' chirij y xuk'eq kan. K'ari' xbe-apo rik'in ri Jesús.

⁵¹Ri Jesús xuk'utuj chire: ¿Achike k'a nawajo' richin ninben awik'in?, xcha'. Ri moy xubij chire: Tijonel, yin ninwajo' yitzu'un, xcha'.

⁵²K'ari' ri Jesús kan jari' xubij chire: Wakami k'a katzolin pan abey, roma xakuquba' ak'u'x, xak'achoj, xcha'. Y kan chupan k'a ri ramaj ri' ri moy xtzu'un y xrojqaj-el ri Jesús.