Read Kaqchikel Mc 13 Bible Online

Mc 13 - Kaqchikel bible

Mc 13

¹Toq ri Jesús xel-pe ri pa rachoch ri Dios, jun chike ri rutijoxela' xubij chire: Tijonel, tatzu' re rubanik re rachoch ri Dios, y re abej re e ukusan chire, xcha'.

²Y ri Jesús xubij: Rat kan ye'atzu' k'a chi re jay re' yalan e jebel y e nima'q kibanik, jak'a xtapon jun q'ij toq xa kan xkewulex re nimalej taq abej re e ukusan chike re jay re'; xketzaq k'a pe y kan man jun k'a abej ri xtik'oje' kan, xcha'.

³Ri Jesús y ri rutijoxela' xe'apon k'a pa ruwi' ri juyu' richin Olivo. Ri chiri' ri Jesús xtz'uye-qa akuchi jebel nikitzu-apo ri rachoch ri Dios. Jari' toq ri Pedro, ri Jacob o, ri Juan y ri Andrés xkik'utuj chire pa ruyonil:

⁴Tabij chiqe: ¿Jampe' xtik'uluwachitej ri xabij yan qa? ¿Achike retal richin keri' ninabex chi nibanatej yan?, xecha'.

⁵Ri Jesús xubij: Kan jebel k'a tichajij-iwi' richin man jun xkixq'olo.

⁶Roma xa kan e k'iy-wi k'a ri xkebek'ulun-pe y xtikibila': Ja yin ri Cristo, xkecha'. Y janila e k'iy ri xkeq'olotej pa kiq'a'.

⁷Xtiwak'axala' k'a chi ek'o ajawaren k'o labal najin chikikojol. Jak'a man tisach ik'u'x, roma ronojel ri' xa kan k'o chi yebanatej na. Jak'a man ja ta ri' ri ruk'isibel taq q'ij richin re ruwach'ulew.

⁸Roma jun ruwach'ulew xtiyakatej k'a el chirij jun chik ruwach'ulew. Ek'o chuqa' rey xkeyakatej-el chikij ch'aqa' chik rey. Xkepe k'a yabilal, wayjal y chuqa' xtuben silonel xabakuchi chire re ruwach'ulew. Jari' ri nabey taq q'axomal, y k'ari' xkepe chik k'a ch'aqa' kiwech tijoj-poqonal.

⁹Jak'a rix kan tichajij-iwi' jebel, roma xa kan ek'o ri xkejacho iwichin pa kiq'a' ri achi'a' ri pa komon yeq'aton-tzij. Chuqa' xkixch'ay ri pa taq jay richin molojri'il, akuchi nikak'axaj ri ruch'abel ri Dios. Xkixuk'uex k'a chikiwech q'atoy taq tzij y chikiwech rey, richin xkiniq'alajirisaj chikiwech.

¹⁰Roma kan k'atzinel k'a chi nabey nitzijox ri utzilej rutzijol richin kolotajik chike konojel winaqi' richin ri ruwach'ulew.

¹¹Jak'a toq xkixuk'uex richin chi yixbejach pa kiq'a' ri q'atoy taq tzij, man tich'ob ri achike chi ch'abel ri xtibebij. Rix xaxe k'a tibij ri achike chi ch'abel ri xtuya' ri Dios chiwe, roma xa kan man ja ta chik rix ri xkixch'on ri ramaj ri', xa kan ja chik ri Loq'olej Espíritu ri xtich'on.

¹²Xtapon k'a ri q'ij, chi wi ek'o ta e ka'i' kach'alal-ki'; jun chike rije' xtiyakatej y xtujech ri rach'alal pa kamik. Chuqa' ek'o tata'aj ri xkeyakatej chikij ri kalk'ual. Y ri alk'ualaxela' xkeyakatej chuqa' chikij ri kite-kitata' y xkekijech pa kamik.

¹³Jak'a rix kan konojel k'a xke'etzelan iwichin roma ikuquban ik'u'x wik'in. Jak'a ri kan xtutej ruq'ij chi nipa'e' kow y xtukoch' k'a pa ruk'isibel chire ronojel re', kan xtikolotej-wi.

¹⁴Chuqa' kan xtapon-wi ri q'ij toq ri etzelal xtik'oje' chupan ri jay akuchi man jun nok-apo, chupan ri rachoch ri Dios. Ri nitz'eton ri tz'ibatel kan wawe', kan tiq'ax k'a chuwech ri nutz'et. Konojel k'a ri xtikitz'et chi kan ja chik ri' ri nibanatej, ri ek'o pa Judea xa kan ke'animej k'a el y tibekewaj-ki' pa taq juyu'.

¹⁵Ri k'o q'anej pa ruk'isibel wiq chire ri rachoch, man tiqaqa-pe richin nok apo pa rachoch richin chi k'o na niberuk'ama-pe.

¹⁶Ri nisamej pa juyu', man k'a tibe chik na pa rachoch chuk'amik ruq'u'.

¹⁷Chupan ri q'ij ri', toq'ex k'a kiwech ri ixoqi' ri koyoben alanik, y ri ixoqi' ri xa k'a nikiya' na kitz'um taq kal.

¹⁸Roma ri' xa tik'utuj chire ri Dios chi ri wululen ri' man ta nibanatej chupan ri q'ij richin job.

¹⁹Chupan ri ruq'ijul ri' kan xtik'o k'a ruwi' ri tijoj-poqonal ri xtipe; jun tijoj-poqonal ri man jun bey k'uluwachitajineq ta pa ruwi' re ruwach'ulew jampe' ri banon kan roma ri Dios, k'a re wakami chupan re qaq'ijul roj. Y chuqa' man jun bey chik xtik'uluwachitej.

²⁰Ri Dios xtuqasaj juba' ri q'ij richin ri tijoj-poqonal ri'. Jak'a wi man ta xtuqasaj ri q'ij ri', kan man jun ta xtikolotej kan. Jak'a roma ri rutzil ri Dios pa kiwi' ri e rucha'on chik, kan xtuqasaj k'a ri q'ij ri'.

²¹Chupan ri q'ij ri', ek'o k'a ri xkebin chiwe chi titz'eta', ja Cristo ri k'o chiri' o ja Cristo ri k'o kela', jak'a rix man tinimaj ri nikibij chiwe.

²²Roma kan ek'o k'a ri xkebek'ulun-pe y xtikibila' chi ja rija' ri Cristo, o ja rija' jun q'alajirisey ruch'abel ri Dios. Jak'a man ke'inimaj; roma xa e q'olonela'. Y xkekibanala' k'a nima'q taq retal y nima'q meyel taq banobel, y rik'in ri' yekiq'ol ri winaqi'. Y rik'in juba' xkekiq'ol ri e cha'on chik roma ri Dios.

²³Jak'a rix kan tichajij-iwi', richin chi man yixq'olotej, roma xa kan ja yan k'a re' ri xinbij kan chiwe.

²⁴Toq e q'axineq chik k'a ronojel ri tijoj-poqonal ri', kan xtibanatej-wi k'a chi ri q'ij xtiq'equmatej, y ri ik' chuqa' man xtisaqirisan ta chik.

²⁵Ri ch'umila' xketzaq k'a el ri akuchi ek'o-wi. Kan ronojel wi k'a ri nimalej taq uchuq'a' ri e richin ri chikaj xkesilon roma ri ruchuq'a' ri Dios.

²⁶Jari' k'a toq xkinkitz'et chik yin ri xiqaqa-pe achi'el wineq chi'ikojol, chi yiqaqa-pe pa sutz', rik'in chik nimalej uchuq'a' y nuq'ij-nuk'ojlen.

²⁷Jari' toq yin xkenteq ri nu-ángel chikoyoxik ri e nucha'on chik. Kan xkekimol k'a pe re kere' pa relebel-q'ij, pa qajibel-q'ij, pa xaman y pa xokon. Kan xkekimol k'a pe chijun ruwach'ulew, nitiker-pe pa jun rutza'n re kaj napon k'a la jun chik rutza'n.

²⁸Kan tik'ama' k'a ina'oj rik'in ri wíkix. Toq nuchop nijotayin, etaman chik chi naqaj chik k'o-pe ri job.

²⁹Y keri' k'a toq rix itz'eton chik ronojel ri xinbij yan qa, tiwetamaj k'a chi noqaqa yan ri q'ij. Xa kan naqaj chik k'a k'o-wi-pe.

³⁰Tiwak'axaj k'a jebel re xtinbij chiwe re wakami: Ronojel re' xtik'uluwachitej toq re jun sol winaqi' re' man jani kek'is-el chuwech re ruwach'ulew.

³¹Re ruwach'ulew y ri kaj kan richin wi yek'is. Jak'a ri nuch'abel man xtik'is ta choj keri'.

³²Jak'a ri q'ij y ri hora toq yin xkipe chik, man jun etamayon, ni ri ángel ri ek'o chila' chikaj man ketaman ta jampe'. Xa kan xaxe k'a ri nata' Dios ri etamayon ri'.

³³Rix kan jantape' tiwoyobej ri ruq'ijul ri nupetebal, roma xa man iwetaman ta jampe' xtapon ri q'ij ri'.

³⁴Roma ri nupetebal yin kan achi'el toq jun achin nuya' kan ri rachoch y nibe nej, juk'an chik tinamit. Rija' nuchilabela' k'a kan ri rusamaj chike ri rusamajela'. Kan nuyala' k'a kan kisamaj chikijujunal, y chire ri chajinel kan nubij k'a kan chi jantape' troyobej-apo ri rupeten.

³⁵Roma ri' kan jantape' kiniwoyobej-apo, roma man iwetaman ta jampe' xkinoqaqa yin ri rajaw-jay. Roma rik'in juba' xkinoqaqa toq nok-pe ri aq'a', o ja ri pa nik'aj-aq'a', toq nisik'in-pe ri mama' nimaq'a' yan, o ja toq niseqer yan pe.

³⁶Yin kan ninwajo' k'a chi yiniwoyobej ta apo, roma kan man xtinya' ta na rutzijol toq xkipe, y man ninwajo' ta yixonwila' chi yixwer.

³⁷Kan achi'el k'a ri ninbij chiwe rix chi kiniwoyobej-apo, kan keri' chuqa' ninbij chike konojel, kan kiniwoyobej k'a, xcha' ri Jesús.