Read Kaqchikel Mc 15 Bible Online

Mc 15 - Kaqchikel bible

Mc 15

¹Toq xseqer k'a pe chupan ri q'ij ri', ri aj-raqen kichin ri sacerdote xkimol k'a ki' e kachibilan ri achi'a' ri k'o kiq'ij, ri etamanela' chirij ri pixa' y konojel ri achi'a' ri pa komon yeq'aton-tzij. Rije' xkich'ob k'a ri achike nikiben rik'in ri Jesús, y kan ximon-el toq xkik'uaj y xbekijacha' pa ruq'a' ri Pilato ri q'atoy-tzij aj-Roma.

²Jari' toq ri Pilato xuk'utuj chire ri Jesús: ¿Ja rat ri ki-rey ri judío?, xcha'. Y ri Jesús xubij: Ja rat ri yabin, xcha'.

³Ri aj-raqen kichin ri sacerdote k'iy k'a ri nikibila-apo chire ri Pilato, richin nikisujuj ri Jesús.

⁴K'ari' ri Pilato xch'on chik apo rik'in ri Jesús y xubij: Rije' janila k'iy ri nikibila-pe chawij richin yatkisujuj, ¿rat man jun ch'abel nabij?, xcha' chire.

⁵Jak'a man rik'in ri' ri Jesús kan man jun chik ch'abel xubij. Y ri Pilato kan janila k'a xumey.

⁶Ronojel juna' toq ninatex ri Solbelri'il, ri q'atoy-tzij aj-Roma k'o chi nrisq'opej-el jun ri k'o pa cárcel ri nikibij ri winaqi' chi utz nel-el.

⁷Ri q'ij ri', k'o k'a pa cárcel jun achin rubini'an Barrabás e rachibilan ch'aqa' chik rachibil. Rije' e qajineq pa cárcel roma xkikamisaj jun wineq chupan ri kiyakatajinenri'il.

⁸Roma ri winaqi' ri' kan ketaman chi ri q'atoy-tzij kan nukol-wi-el jun chike ri ek'o pa cárcel, roma ri' xepe rije' xkik'utuj k'a chire ri Pilato chi trelesaj-el jun chike ri ek'o pa cárcel.

⁹Ri Pilato kan jari' xuk'utuj-pe chike: ¿Niwajo' chi ninkol-el re rey iwichin rix judío?, xcha'.

¹⁰Ri Pilato keri' xubij-pe, roma rija' kan retaman-wi chi ri aj-raqen kichin ri sacerdote kiya'on ri Jesús pa ruq'a', roma itzel nikina' chire ri Jesús.

¹¹Jak'a rije' xkiya' kina'oj ri winaqi', chi tikibij-apo chire ri Pilato chi xa ja ri Barrabás ri nrisq'opej-el.

¹²Ri Pilato kan jari' k'a xbech'on chik pe jun bey y xuk'utuj chike: ¿Achike k'a niwajo' chi ninben rik'in re achin re' ri nibij chi i-rey rix?, xcha'.

¹³Ri winaqi' xech'on chik apo y rik'in uchuq'a' nikibij: Tataqa' rukamisaxik chuwech cruz, yecha'.

¹⁴Roma ri' ri Pilato xubij chike: ¿Achike k'a rumak rubanon chiwech?, xcha'. Jak'a rije' xa man yetane' ta qa. Xa rik'in más uchuq'a' nikibij-apo: ¡Tataqa' rukamisaxik chuwech cruz!, yecha'.

¹⁵Roma ri' ri Pilato xukol k'a el ri Barrabás, richin chi ri winaqi' xkuqer kan kik'u'x. K'ari' xuteq ruch'ayik ri Jesús y xujech-el richin chi tikamisex chuwech cruz.

¹⁶Ri aj-labal aj-Roma xkikusaj k'a apo ri Jesús chuwa-jay richin q'atbel-tzij. K'ari' xekoyoj konojel ri ch'aqa' chik kachibil y xkimol-ki' chirij ri Jesús.

¹⁷Xkiya' k'a jun tzieq q'eQ'oj keq chirij, achi'el yekikusala' ri rey. Y xkipach'uj chuqa' jun q'ayis ri janila ruk'ixal. Kan achi'el jun corona xkiben chire, y k'ari' xkiya' pa rujolon.

¹⁸Chuqa' kan nikiben chi nikiq'ejela' ri Jesús, y nikibila' chire: Kan tik'ase' ri ki-rey ri judío, yecha'.

¹⁹Rije' nikibojila' k'a pa rujolon rik'in jun aj y nikichubala' chuqa'. Kan yexukuyaj chuwech, y nikiben chi nikiya' ruq'ij.

²⁰Toq rije' xetane' chi tze'en chirij, xkelesaj-el ri tzieq ri kiya'on-qa chirij. K'ari' xkiya-el ri kan rutziaq-wi rija', y xkik'uaj k'a el richin chi nibekibajij chuwech cruz.

²¹Toq kichapon k'a el bey, xkik'ul jun achin ri peteneq pa juyu'. Rija' jun aj-Cirene, rubini'an Simón; kitata' ri Alejandro y ri Rufo. Ri aj-labal xkiben k'a chire ri Simón chi xuk'uaj-el ri ru-cruz ri Jesús.

²²Xkik'uaj ri Jesús k'a pa ruwi' ri jun juyu' ri nibix Gólgota chire, nel chi tzij Akuchi K'o-wi ri Baq Richin Jolomaj.

²³Toq ek'o chik chiri', xkisuj vino xolon rik'in mirra chire ri Jesús.*f21* Jak'a rija' man xrajo' ta xuqum.

²⁴Toq kibajin chik ri Jesús chuwa ri cruz, xkiya' k'a pan etz'anen ri rutziaq richin xkitz'et achike chi tzieq ri nikik'uala-el chikijujunal.

²⁵Ri Jesús xkibajij chuwech cruz ri pa beleje' hora chire ri nimaq'a'.

²⁶Pa ruwi-el ri cruz, chiri' tz'ibatel-wi chuwech jun tz'alem ri achike rumak ri Jesús richin nikamisex. Chuwech ri tz'alem ri' nubij: Jare' ri ki-rey ri judío, nicha'.

²⁷Ek'o chuqa' e ka'i' chik achi'a' ri e eleq'oma', ri xekibajij chuxikin ri Jesús; jun xpabex pa rijkiq'a' y jun pa rajxokon.

²⁸[Rik'in ri' kan xbanatej achi'el ri tz'ibatel kan chupan ri ruch'abel ri Dios, toq nubij:*f22* Rija' kan junan xtikamisex kik'in ri aj-maki'.]*f23*

²⁹Ri winaqi' ri yeq'ax-el rik'in ri Jesús, nikisilola' k'a kijolon chuwech, y nikibila' k'a chire: Rat ri xabin chi kan nawulaj ri rachoch ri Dios y pan oxi' q'ij napaba' chik jun bey;

³⁰wakami takolo' k'a awi' ayon y kaqaqa-pe chuwech ri cruz, yecha'.

³¹Keri' k'a chuqa' nikiben ri aj-raqen kichin ri sacerdote. Rije' y ri etamanela' chirij ri pixa' nikitze'ej k'a ri Jesús y nikibila' k'a chikiwech: Rija' kan e k'iy-wi k'a xerukol, jak'a rija' man nitikir ta nukol-ri'.

³²Kan rubin k'a chi ja rija' ri Cristo, ri qa-rey roj judío. Wi keri', kan tiqaqa k'a pe chuwech ri cruz, richin niqatz'et y niqanimaj, yecha'. Y ri eleq'oma' ri e bajin chuwech cruz kan k'o chuqa' ch'abel ri yekibila-apo chire ri Jesús.

³³Toq xnik'ajer q'ij, jari' k'a toq xq'equmer ri ruwach'ulew. Y ri q'equ'm ri' xk'is k'a el k'a toq xnik'ajer-el ri tiqaq'ij.

³⁴Jari' toq ri Jesús kan rik'in ruchuq'a' xch'on y xubij: Eloi, Eloi,*f24* ¿lemá sabactani?, xcha'. Re ch'abel re' nel chi tzij: Nu-Dios yin, nu-Dios yin, ¿achike k'a roma toq xinamalij kan?

³⁵Ri ek'o apo chiri' chunaqaj, toq xkak'axaj ri xubij, xkibila' k'a: ¿Xiwak'axaj? Rija' ja ri Elías ri nroyoj, xecha'.

³⁶Jari' toq k'o jun ri junanin xberumuba-pe jun achi'el bo'j chupan jun ch'amilej vino, xuya' chutza'n jun aj y xuya' chire ri Jesús. K'ari' xubij: Tiqoyobej na q'alaj-ri' wi nipe ri Elías chuqasaxik, xcha'.

³⁷Kan jari' toq ri Jesús rik'in ruchuq'a' xch'on y xken-qa.

³⁸Y ri tzieq ri achoq ik'in ch'aron-wi ri rupan ri rachoch ri Dios xel pa ka'i'. Xuchop-pe pa jotol k'a pa xulan-qa.

³⁹Chuwech-apo akuchi k'o-wi ri Jesús k'o k'a jun aj-raqen pa kiwi' ri aj-labal aj-Roma. Rija' xrak'axaj k'a toq ri Jesús rik'in ruchuq'a' xch'on, y jari' toq xken. Roma ri' rija' xubij: Kan qitzij na wi chi re achin re' kan ruk'ajol ri Dios, xcha'.

⁴⁰Ek'o chuqa' ixoqi' ri yetzu'un-apo, jak'a kan nej ek'o-wi. Chikikojol ri ixoqi' ri', k'o ri María aj-Magdala, k'o ri María ri kite' ri José y ri Jacobo ri k'a ak'ual na, y k'o chuqa' ri Salomé.

⁴¹Ri ixoqi' ri', kan k'a k'o ri Jesús pa Galilea, toq kojqan y kilin-pe. Chuqa' kan ek'o ch'aqa' chik ixoqi' ri chiri' ri kojqan-apo ri Jesús ri pa Jerusalem.

⁴²Ri tiqaq'ij ri' toq nitiker yan qa ri uxlanibel-q'ij y ri winaqi' nikibanala' chik rutzil ronojel ri xtik'atzin chike chupan ri q'ij ri',

⁴³jun achin rubini'an José aj pa tinamit Arimatea, kan man jun xibinri'il chuwech xberuk'utuj chire ri Pilato ri ruch'akul ri Jesús richin numuq. Rija' janila k'a ruq'ij chikikojol ri yeq'aton-tzij pa komon, y chuqa' kan royoben-apo ri rajawaren ri Dios.

⁴⁴Jak'a ri Pilato kan xumey-qa chi ri Jesús kan chi'anin xken-qa. Roma ri' xroyoj ri aj-raqen kichin ri aj-labal, y xuk'utuj chire wi qitzij chi kamineq chik ri Jesús.

⁴⁵Toq ri aj-raqen kichin ri aj-labal xubij chire chi qitzij xken yan ri Jesús, k'ari' xuya' q'ij chire ri José chi tiberumuqu' kan.

⁴⁶K'ari' ri José xuloq' jun tzieq nim banon rik'in lino. Toq ruqasan chik pe ri ruch'akul ri Jesús chuwa ri cruz, xupis k'a el chupan ri tzieq ri'. K'ari' xberumuqu' kan pa jun jul k'oton chuwech jun juyu' abej. Y rija' xusurij-apo jun nimalej setesik abej y rik'in ri' xutz'apej kan ruchi' ri jul.

⁴⁷Ri María aj-Magdala y ri María ri rute' ri José, kitzuliben k'a akuchi xmuq-wi kan ri Jesús.