Read Kaqchikel Mc 16 Bible Online

Mc 16 - Kaqchikel bible

Mc 16

¹Toq q'axineq chik ri uxlanibel-q'ij, ri María aj-Magdala, ri María ri kite' ri José y ri Jacob o, y chuqa' ri Salomé, xbekiloq'o-pe jubulej taq aq'om richin nibekiya' kan chirij ri ruch'akul ri Jesús.

²Ri nimaq'a' yan chire ri ruka'n q'ij, toq k'ari' nibek'ulun-pe ri q'ij, jari' toq xebe chuchi' ri jul.

³Rije' nikibila' k'a chikiwech: ¿Achike k'a xtijaqo ri jul chiqawech?, yecha'.

⁴Jak'a toq xkitz'et ri jul, xa jaqel chik ruchi', stape' ri abej tz'apebel-ruchi' ri jul, janila nim.

⁵Toq rije' xe'ok-apo chupan ri jul, xkitz'et chi k'o jun ala' chiri', tz'uyul ri pa kijkiq'a-apo, rukusan jun tzieq seq ri napon k'a chiraqen-qa. Roma ri' ri ixoqi' janila xkixibij-ki'.

⁶Jak'a rija' xubij: Man tixibij-iwi'. Roma yin kan wetaman chi rix nikanoj ri ruch'akul ri Jesús aj-Nazaret, ri xkamisex chuwech ri cruz. Jak'a rija' xk'astej yan el, xa maneq chik wawe'. Titzu' la akuchi xk'oje-wi.

⁷Wakami k'a kixbiyin, y tibebij chire ri Pedro y chike ri ch'aqa' chik rutijoxela' chi ri Jesús xtinabeyej-el chiwech, richin nik'ul-iwi' rik'in chila' pa Galilea. Chiri' xtitz'et-wi achi'el ri rubin kan chiwe, xcha-el chike.

⁸K'ari' ri ixoqi' ri' xe'el k'a pe ri chiri' pa jul, kan yebaybot roma xibinri'il. Kan man jun k'a achoq chire xkitzijoj-wi roma xa kan janila kixibin-ki'.*f25*

⁹[Toq ri Jesús xk'astej chupan ri nimaq'a' chire ri ruka'n q'ij chire ri uxlanibel-q'ij, xuk'ut-ri' chuwech ri María aj-Magdala, ri achoq ik'in xerelesaj e wuqu' itzel taq espíritu.

¹⁰Ri María kan jari' xbe, y xberubij chike konojel ri xerachibilaj ri Jesús. Y rije' janila k'a yebison y kichapon oq'ej.

¹¹Jak'a toq rije' xkak'axaj chi ri Jesús k'astajineq chik pe y chi ri María aj-Magdala xutz'et yan kan ruwech, xa man xkinimaj ta.

¹²Keri' chuqa' ri Jesús xuk'ut-ri' chikiwech e ka'i' rutijoxela' ri kichapon-el bey richin yebe pa juyu', jak'a ri Jesús kan jun wi chik nitzu'un toq xuk'ut-ri' chikiwech rije'.

¹³Rije' xbekibij chuqa' chike ri ch'aqa' chik kachibil, jak'a chuqa' man xenimex ta.

¹⁴Pa ruk'isibel, ri Jesús xuk'ut-ri' chikiwech ri julajuj rutijoxela', toq kichapon wa'in. Rija' xeruch'olij k'a roma man xkikuquba' ta kik'u'x; xa xkikowirisaj ri kánima y man xekinimaj ta ri xetz'eton richin ri Jesús chi k'astajineq chik pe chikikojol ri kaminaqi'.

¹⁵Jari' toq xubij kan chike: Kan kixbiyin chuwech re ruwach'ulew y titzijoj ri utzilej ch'abel richin kolotajik chike konojel ri winaqi'.

¹⁶Ri winaqi' ri yeniman y niqasex ya' pa kiwi' retal chi xjalatej yan kik'aslen, xkekolotej k'a. Jak'a ri winaqi' ri xa man nikimaj ta, xtiqaqa k'a ri ruk'ayewal pa kiwi'.

¹⁷Ri xkeniman wichin, k'iy k'a xkekibanala': Pa nubi' k'a yin xkekelesala' itzel taq espíritu y xkech'on pa ch'aqa' chik ch'abel.

¹⁸Stape' xkekichop itzel taq kumatzi' o wi xkekitijla' kamisanel taq aq'om, man jun k'a xtikik'uluwachij. Xtikiya' chuqa' kiq'a' pa kiwi' yawa'i' y xkek'achoj.

¹⁹Toq ri ajaw Jesús ch'owineq chik kan kik'in ri rutijoxela', xbe y ri chila' chikaj xk'ul roma ri Dios, y xtz'uye-apo pa rijkiq'a'.

²⁰Y keri' ri tijoxela' xe'el k'a chi nej chi naqaj, richin xkitzijoj ri ruch'abel ri Dios. Y ri ajaw kan k'o-wi k'a kik'in richin yeruto', y chuqa' kan xuben chike chi k'iy nima'q taq banobel ri xekiben richin tiq'alajin chi kan ja ri qitzij ri nikitzijoj.] Kan keri' ta k'a.