Read Kaqchikel Lc 11 Bible Online

Lc 11 - Kaqchikel bible

Lc 11

¹K'o k'a jun q'ij ri Jesús k'o ri akuchi nich'on-wi rik'in ri Dios. Y toq tanel chik qa, jun chike ri rutijoxela' xubij chire: Ajaw, qojatijoj richin yojch'on rik'in ri Dios, achi'el ri Juan xerutijoj ri rutijoxela', xcha'.

²Kan jari' toq ri Jesús xubij chike: Toq yixch'on rik'in ri Dios, kere' k'a tibij: Qatata' Dios [ri atk'o chila' chikaj,]*f20* kan jantape' ta k'a xtinimirisex ri loq'olej abi' rat. Ri awajawaren ja ta ri' ri xtik'oje' qik'in. [Kan nibanatej ta k'a ri nawajo' rat richin chi nibanatej wawe' chuwech re ruwach'ulew achi'el nikiben ri ek'o awik'in ri chila' chikaj.]*f21*

³Tabana' utzil taya' chuqa' ri qaway ri nik'atzin chiqe ronojel q'ij.

⁴Xtakuy ta ronojel ri man utz ta ri yeqaben chawech, achi'el roj yeqakuy ri winaqi' ri nikiben itzel chiqe. Man k'a taya' q'ij richin yojtzaq pa mak, [xa kan qoj akolo' k'a chuwech]*f22* xcha' ri Jesús.

⁵Ri Jesús xubij chuqa' chike ri rutijoxela': K'o ta jun chiwe rix napon pa nik'aj-aq'a' pa rachoch jun rachibil, y nubij ta chire: Tabana' utzil ninjel ta oxi' away.

⁶Roma xoqaqa jun wachibil wik'in ri juk'an chik peteneq-wi, y yin man jun wey k'o wik'in richin ninya-apo chire, xticha' ta.

⁷Ri wineq ri akuchi nuk'utuj-wi-apo ri wey, man xtich'on ta pe k'a pa ruwarabel y xtubij ta: Man kinaya' pa k'ayew, roma ri ruchi-jay xa xintz'apej yan kan; yin y ri ak'uala' xa oj kotz'ol chik. Roma ri' man yitikir ta yiyakatej-el richin chi ninbenya' kan chawe ri nawajo', xticha' ta pe.

⁸Kan qitzij wi ninbij chiwe, chi ri wineq ri nik'utux-apo ri wey chire, stape' man nibeyakatej ta pe roma kan janila kachibil-ki' rik'in ri nik'utun-apo ri wey, jak'a kan nibeyakatej-pe richin chi titane' chuk'utuxik.

⁹Yin ninbij k'a chiwe rix, chi tik'utuj ri nik'atzin chiwe y ri Dios xtuya-pe. Tikanoj y xtiwil ri niwajo'. Tik'osk'a' ri ruchi-jay y yixak'axex-pe.

¹⁰Roma ronojel ri xtik'utuj, kan xtik'ul-wi. Wi rix kan nikanoj, kan xtiwil-wi. Y wi xkixoyon-apo, kan xtijaq ri ruchi-jay chiwech.

¹¹Y rix ri ix tata'aj, ¿yixtikir kami niya' jun abej pa ruq'a' jun iwalk'ual, toq xa jun kaxlan-wey nuk'utuj chiwe? ¿O niya' ta kami jun itzel kumetz pa ruq'a', toq xa jun ker nuk'utuj chiwe?

¹²¿O niya' ta kami jun alacrán pa ruq'a', toq xa jun saqmolo' ri nuk'utuj chiwe?

¹³Wi rix ri xa man kan ta utz ina'oj, man yixtikir ta niben keri' chike ri iwalk'ual, k'a ta la' chik k'a ri aj-chikajil qatata'. Rija' kan nuya-wi k'a ri Loq'olej Espíritu chike ri kan nikik'utuj, xcha' ri Jesús.

¹⁴K'o k'a jun q'ij ri Jesús k'o apo jun achin rik'in ri memurneq pa ruq'a' jun itzel espíritu. Toq ri Jesús xubij chire ri itzel espíritu chi tel-el rik'in ri achin ri', ri espíritu kan xel na wi el, y ri achin ri' kan xch'on. Ri winaqi' ri xetz'eton, kan janila k'a xkimey ri jun banobel ri'.

¹⁵Jak'a ek'o chike ri winaqi' ri nikibij: Ri Jesús yerelesaj ri itzel taq espíritu rik'in ri ruchuq'a' ri Beelzebú, ri kajawal ri itzel taq espíritu, yecha'.

¹⁶Ek'o k'a ch'aqa' chik winaqi', ri xaxe richin nikitejtobej ri Jesús xkibij k'a chire chi tubana' jun chik meyel banobel, wi kan qitzij peteneq rik'in ri Dios.

¹⁷Jak'a ri Jesús retaman k'a ri nikinojila' ri winaqi' ri', roma ri' xubij: Ronojel ajawaren ri xa ruyon rija' nuch'er-ri', xa kan xtitole' kan; y keri' chuqa' pa jun jay, wi xa yejalajo' chikiwech y yech'aratej, man xkepa'e' ta kan.

¹⁸Y wi ri Itzel-Wineq yerelesaj-el ri kan e rusamajela', kan nik'ulun k'a chi tzij chi ruyon rija' nroqotaj-el-ri'. Wi keri' nuben, ruyon nik'oje' kan y chi'anin nitzaq. Yin kere' ninbij chiwe, roma rix nibij chi yin k'o ri Beelzebú wik'in, y roma ri' toq yitikir yenwelesaj ri itzel taq espíritu.

¹⁹Y wi yin yenwelesaj ri itzel taq espíritu pa rubi' ri Beelzebú, ¿achike k'a nich'ob rix chikij ri yetzeqeliben iwichin? ¿Achike yoyon uchuq'a' chike rije' richin yetikir yekelesaj itzel taq espíritu chuqa'? Kan ja k'a ri yetzeqeliben iwichin ri yeq'alajirisan chi man utz ta ri nibij rix.

²⁰Yin kan ja wi ri Dios ri yoyon-pe uchuq'a' chuwe richin yitikir yenwelesaj ri itzel taq espíritu. Y re' niq'alajin chi kan xoqaqa yan k'a ri q'ij chi ri Dios xuchop yan nuq'et-tzij.

²¹Wi k'o ta jun achin ri kan janila ruchuq'a', y k'o ronojel tobel ri nik'atzin chire richin nuchajij ri rachoch, kan man jun k'a ri xtelesan ta chire ri k'o rik'in.

²²Jak'a wi nok'ulun ta chik jun achin ri más ruchuq'a' chuwech rija', nich'akatej, y nelesex chire ronojel ri tobel ri nukusaj ri rukuquban ruk'u'x rik'in, k'ari' ri achin ri más ruchuq'a' nutalula' k'a ronojel ri xrelesaj-el chire ri achin ri xuch'ek.

²³Roma ri', ninbij chi ri man wik'in ta yin nisamej-wi, xa yakatajineq chuwij. Y ri achike ri man yiruto' ta richin nink'ol ri ixin, xa jari' ri najin chutaluxik.

²⁴Toq k'o jun itzel espíritu nel-el pa ránima jun wineq, kan niberukanoj uxlanen akuchi tolan-tolan, jak'a xa kan man nril ta ri uxlanen ri nukanoj y nubij k'a: Más utz yitzolin chik ri akuchi xinel-wi-pe, nicha-qa.

²⁵Toq nitzolin chik apo pa ránima ri wineq, nril k'a ri ránima ri wineq ri' achi'el jun jay ri man jun k'o chupan, meson y chojmirisan kan jebel.

²⁶K'ari' re itzel espíritu re' yeruk'en k'a pe e wuqu' chik rachibil ri más e itzel, y konojel k'a re' ye'ok pa ránima ri wineq ri'. Y ri wineq achoq ik'in yek'oje-wi, kan más k'ayew nuben ri ruk'aslen ke chuwech ri rubanon-pe nabey, xcha'.

²⁷Toq ri Jesús najin chi ch'owen, jari' k'a toq jun ixoq ri chiri' chikikojol ri winaqi', rik'in uchuq'a' xbech'on-pe, y xubij: Jebel ruwa-ruq'ij ri ixoq ri xalan y xk'iytisan awichin, xcha' chire ri Jesús.

²⁸Jak'a ri Jesús xubij: Kan más k'a jebel ruwa-kiq'ij ri ye'ak'axan ri ruch'abel ri Dios y kan nikiben ronojel ri nubij, xcha'.

²⁹Toq janila chi winaqi' ye'ajin nikimol-apo-ki' chirij ri Jesús, jari' toq rija' xubij k'a chike: Rix ix jun sol winaqi' ri janila ix itzel y man ninimaj ta ri Dios. Kan niwajo' k'a chi yin ninben na jun meyel banobel chiwech richin yininimaj. Jak'a xa man xtink'ut ta chiwech ri niwajo', roma xa kan xaxe ri xbanatej rik'in ri Jonás, ri q'alajirisey ruch'abel ri Dios, xaxe ri' ri retal chuqa' ri xtinya' chiwe rix.

³⁰Achi'el k'a xk'uluwachitej chi ri Jonás xok jun retal chikiwech ri winaqi' ri aj-Nínive, keri' chuqa' yin ri xiqaqa-pe achi'el wineq chi'ikojol, xtibek'uluwachitej chi yin xkikusex richin jun retal chiwech.

³¹Chupan ri q'ij toq niq'aton-tzij ri rey Salomón, ri reina richin ri ruwach'ulew Sabá janila nej xbiyin richin xorak'axaj ri retamabal ri rey ri'. Jak'a re wakami ink'o yin ri más nuq'ij chuwech ri rey ri', y xa man jun chiwe rix ri niniman ta wichin. Roma ri' toq xtapon k'a ri q'ij richin xtiq'at-tzij, xtipe ri reina ri' richin nuq'alajirisaj ri imak rix.

³²Chupan ri q'ij toq ri Jonás xberuch'abalij ruch'abel ri Dios chiri' pa Nínive, kan jari' ri winaqi' xtzolej-pe kik'u'x rik'in ri Dios. Jak'a re wakami ink'o yin ri más nuq'ij chuwech ri Jonás, y xa man jun chiwe rix ri nitzolin-pe ruk'u'x wik'in. Roma ri' toq xtapon k'a ri q'ij richin xtiq'at-tzij, xkepe ri aj-Nínive ri' richin nikiq'alajirisaj ri imak rix.

³³Rix kan man jun bey k'a nitzij ta jun q'aq' richin nisaqirisan, y nijupuba' ta kan jun bojo'y pa ruwi'. Ri q'aq' ri nitzij, kan richin k'a nisaqirisan; roma ri' nikanoj jun k'ojelibel ri nitz'uyuba-wi, richin keri' kan yerusaqirisaj konojel ri ek'o pa jay. Ri wineq ri nutzij jun q'aq', nutzeqeba' richin keri' yerusaqirisaj ri ye'ok-apo pa jay.

³⁴Ri runaq'-iwech kan yek'atzin k'a, achi'el nik'atzin jun q'aq' richin saqil; y wi ri runaq'-iwech e utz, rix ixk'o pa jun saqil. Jak'a wi ri runaq'-iwech man e utz ta, rix xa ixk'o pa jun q'equ'm.

³⁵Roma ri' tichajij ri ik'aslen, richin keri' ri saqil ri ruya'on ri Dios pan iwánima man tijalatej, y xa xtok qa q'equ'm.

³⁶Roma wi kan ixk'o pa jun saqil, y man jun retal ri q'equ'm iwik'in, jebel seq niq'alajin ri saqil iwik'in achi'el jun q'aq' tzijil, xcha'.

³⁷Toq ri Jesús xtane' k'a qa richin nitzijon chikiwech ri winaqi', k'o k'a jun chike ri fariseo xubij chire chi tubana' utzil nibe ta rik'in pa rachoch richin nibewa'. Y ri Jesús kan xbe na wi, y xberaq'e' chuchi' ri mesa.

³⁸Ri fariseo kan xumey toq xutz'et ri Jesús, roma raq'el chik apo ri pa mesa y man xuch'ej ta ruq'a' achi'el nubij ri kipixa' ri judío.

³⁹Y ri Jesús xubij chire: Rix fariseo jebel nich'ej ri ich'akul jak'a ri iwánima xa tz'il-tz'il, achi'el jun leq ri jebel ch'ajch'oj rij y ri rupan xa tz'il-tz'il, roma ri iwánima xa nojineq rik'in eleq', y rik'in etzelal.

⁴⁰Rix nakaneq. ¿Kan man iwetaman ta k'a chi ri xbanon re qach'akul, ja chuqa' ri' xbanon ri qánima?

⁴¹Rix toq k'o niya' chike ri man jun k'o kik'in, k'o chi nalex-pe rik'in jun iwánima ch'ajch'oj, richin keri' chuwech ri Dios ronojel ch'ajch'oj.

⁴²¡Toq'ex iwech rix fariseo! roma rix niya' ri lajujteq chire ronojel ri maneq janila rejqalen, achi'el ri q'ayis menta, ri róra*f23* y ronojel kiwech ichaj. Jak'a iya'on kan rubanik ri más rejqalen achi'el nubij chupan ri pixa' chi choj tiqabana' kik'in ri winaqi', y tiqajo' ri Dios. Jare' ri nabey ta ruk'amon qabanon, y k'a ta ri' niqaben ri yojtajin chubanik.

⁴³¡Toq'ex iwech rix fariseo! roma ye'ikanoj ri tz'uyubel akuchi yetz'uye-wi ri winaqi' ri kan k'o kiq'ij, ri pa rachoch ri Dios. Y kan janila chuqa' niqa' chiwech ri yixq'ejelox kan pa taq nima'q ruwech bey ri akuchi nibekimolo-wi-ki' ri winaqi'.

⁴⁴¡Toq'ex iwech rix etamanela' y rix fariseo ri xa ka'i' ipalej! roma ri iwánima xa man ch'ajch'oj ta, achi'el jun muqubel kamineq ri xa man niq'alajin ta. Ri winaqi' ri yejel-apo iwik'in, achi'el xa ta yebiyin pa ruwi' ri muqubel kamineq ri' y man ketaman ta. Y keri' rije' ye'ok man e ch'ajch'oj ta, xcha' ri Jesús.

⁴⁵Jak'a jun chike ri etamanela' chirij ri pixa' xubij chire ri Jesús: Tijonel, toq rat nabij keri', man xaxe ta ri fariseo yesokotej, xa kan jajun chuqa' roj, xcha'.

⁴⁶Ri Jesús xubij chire ri etamanel ri': ¡Toq'ex chuqa' iwech rix roma nimalej taq ejqa'n niya' chikij ri winaqi', ejqa'n ri kan k'o kalal y k'ayew kik'uaxik. Y rix man nisiloj ta jun ti ruwi-iq'a' richin ye'ito'.

⁴⁷¡Toq'ex iwech, roma jebel ye'ichojmirisala' ri tz'aq akuchi e muqul-wi ri e q'alajirisey ruch'abel ri Dios ojer kan, stape' rije' xa ja ri iwati't-imama' ri xekamisan kichin.

⁴⁸Wakami niq'alajin k'a chi rix kan niqa' chiwech ri itzel ri xekibanala' ri iwati't-imama' ri ojer, roma stape' rije' xekamisan ri achi'a' ri', jak'a rix ye'ichojmirisala' ri tz'aq akuchi e muqul-wi kan.

⁴⁹Roma ronojel ri' ri Dios xubij rik'in etamabel: Xkenteq k'a achi'a' kik'in ri winaqi' ri xkeq'alajirisan ri nuch'abel, y xkenteq chuqa' tijoxela' chikikojol. Jak'a jujun chike rije' xa xkekikamisaj, y ek'o ri xtikiben chike richin nikik'owisaj poqon.

⁵⁰Ri Dios xuben keri' richin pan iwi' rix ri ixk'o wakami, xtuya-wi ri kikamik konojel rije', nitiker-pe k'a pa rutikeribel re ruwach'ulew.

⁵¹Nitiker-pe rik'in ri rukamik ri Abel*f24* k'a rik'in ri rukamik ri Zacarías,*f25* ri xkamisex chunaqaj ri porobel ri k'o chuwa-rachoch ri Dios. Roma ri' ninbij chiwe, chi ri Dios pan iwi' rix xtuya-wi ri kikamik konojel ri winaqi' ri'.

⁵²¡Toq'ex iwech rix etamanela' chirij ri pixa' roma rix iwetaman achike rubanikil richin chi jun wineq nok richin ri Dios, jak'a rix man ix okineq ta richin ri Dios y chuqa' ye'iq'et ri winaqi' ri nikajo' ye'ok richin ri Dios, xcha'.

⁵³Toq ri Jesús xel-el ri chiri', ri etamanela' chirij ri pixa' y ri fariseo xe'oyower janila. Y roma ri' rije' ronojel k'a nikik'utula-apo chire ri Jesús xaxe richin nikineq.

⁵⁴Rije' kan man nikiya' ta k'a kan juba' ri Jesús, k'o ta nikajo' chi nikak'axaj chi rija' k'o ta jun ch'abel ri man ruk'amon ta ri nubij.