Read Kaqchikel Lc 16 Bible Online

Lc 16 - Kaqchikel bible

Lc 16

¹Ri Jesús xubij chuqa' chike ri rutijoxela': K'o k'a jun achin beyom. Y re beyom re' k'o k'a jun rusamajel ri k'o pa ruwi' ronojel ri k'o rik'in. Jak'a xtzijox chire ri achin beyom chi ri rusamajel ri k'o pa ruwi' ronojel, najin chuk'isik ri rubeyomel.

²Ri rajaw ri beyomel ri' xuteq k'a royoxik ri samajel ri'. Y toq xoqaqa ri samajel, ri rajaw xubij chire: ¿Achike nabij chuwe chirij ri nitzijox chawij? Wakami k'a ninwajo' nintz'et achike rubanon ronojel ri beyomel pan aq'a', roma wawe' xk'is-wi kan ri asamaj, xcha' ri rajaw ri samaj.

³Y ri samajel xuch'ob k'a qa pa ránima: ¿Achike ninben? Roma re wajaw nrelesaj nusamaj, y ninben ta k'a jun chik ruwech nusamaj ri nrajo' uchuq'a', jak'a xa man yitikir ta chik, y yinok ta molonel pa taq bey, jak'a xa yik'ix.

⁴Wakami wetaman chik achike ri xtinben, richin keri' ek'o yek'ulu wichin ri pa taq kachoch, toq xtelesex nusamaj, xcha-qa.

⁵Re samajel k'a re' xeroyoj chikijujunal ri k'o kik'as rik'in ri rajaw, y xuk'utuj chire ri nabey chi janipe' ruk'as rik'in ri rajaw.

⁶Y ri achin aj-k'as xubij k'a: Yin k'o wok'al barril aceite oliwo nuk'as, xcha'. Ri rusamajel ri beyom xubij k'a chire ri aj-k'as chi jare' ri ruwujil ri ruk'as rija'. Y xubij chi tubana' chik kan jun, y chupan ri jun chik wuj xtutz'ibaj chi xaxe kawineq lajuj barril aceite ri ruk'as.

⁷Toq xapon chik k'a jun aj-k'as, ri samajel xuk'utuj k'a chire chi janipe' ri ruk'as. Y rija' xubij: Yin juwineq kintal trigo nuk'as, xcha'. Ri samajel xubij k'a chire chi jare' ri ruwujil ri ruk'as rija'. Y xubij chi tubana' chik kan jun, y chupan ri jun chik wuj xtutz'ibaj chi xaxe waqlajuj kintal ri ruk'as.

⁸Toq ri rajaw ri beyomel xrak'axaj ri xuben ri jun itzel samajel ri', xubij chi kan rik'in na'oj xuben ronojel ri'. Achi'el k'a ri achin ri', e keri' ri winaqi' ri k'a kikuquban na kik'u'x rik'in ri ruwach'ulew. Y janila wi e nowineq chikiwech ri kiniman ri Dios y e richin chik ri saqil.

⁹Yin ninbij k'a chiwe chi tikusaj ri beyomel richin re ruwach'ulew richin ye'ito' ri iwachibil. Richin keri' toq ri ibeyomel xtik'is, xkixk'ul k'a chila' chikaj chupan ri jay ri man jun bey xkek'is.

¹⁰Jun ri kan utz nuben rik'in ri xa maneq rejqalen, kan utz k'a chuqa' xtuben rik'in ri kan janila rejqalen. Jak'a ri xa man choj ta nuben rik'in ri xa maneq más rejqalen, xa keri' chuqa' xtuben rik'in ri kan k'o-wi rejqalen.

¹¹Wi rik'in ri beyomel richin re ruwach'ulew, rix man utz ta niben, ¿xtijach kami ri qitzij beyomel pan iq'a'?

¹²Roma wi xa man utz ta niben rik'in ri beyomel richin re ruwach'ulew ri uxqanen kan pan iq'a', k'a ta la' chik k'a chi utz ta niben rik'in ri qitzij beyomel, ri kan iwichin wi rix.

¹³Man jun k'a samajel ri nitikir ta yerilij e ka'i' rajaw pa jun bey. Roma wi nrajo' jun chike ri rajaw, nretzelaj chik kan ri jun. Y wi kan nunimaj rutzij ri jun, man nitikir ta nuben keri' rik'in ri jun chik. Chuqa' man nitikir ta nibe ránima chirij ri beyomel, y nutzeqelibej chuqa' ri Dios, xcha' ri Jesús.

¹⁴Toq ri fariseo xkak'axaj k'a ri xubij ri Jesús, xa xkiyojobej, roma rije' kan beneq kánima chirij ri beyomel.

¹⁵Roma ri' ri Jesús xubij chike: Rix kan nibananej chikiwech ri winaqi' chi kan janila ix choj. Jak'a ri Dios retaman achike ri k'o pan iwánima. Ri k'o janila rejqalen chuwech re ruwach'ulew, ri Dios kan nrixowaj.

¹⁶Toq k'a man jani tuchop samaj ri Juan, konojel ri winaqi' k'o chi ja ri pixa' richin ri Moisés y ri kich'abel ri e q'alajirisey ruch'abel ri Dios ri xkinimaj. Jak'a toq xuchop samaj ri Juan jari' toq xchap rutzijoxik ri utzilej rutzijol ri nich'on chirij toq ri winaqi' ye'ok pa rajawaren ri Dios. Roma ri' e k'iy winaqi' ri janila nikitej kiq'ij richin ye'ok ri chiri'.

¹⁷Jak'a más man k'ayew ta chi re ruwach'ulew y ri kaj yek'is, ke chuwech ri pixa', xcha' ri Jesús.

¹⁸Chuqa' ri Jesús xubij: Wi k'o ta jun achin ri nujech-ri' rik'in ri rixjayil y k'ari' nik'ule' chik rik'in jun ixoq, re achin re' kan nimakun; nuben achi'el k'o ta rik'in jun ixoq itzel ruk'aslen. Y wi k'o jun chik achin ri nuk'uan-el ri ixoq ri rujachon ri' rik'in ri rachijil, chuqa' ri achin ri' nimakun, xcha' ri Jesús.

¹⁹Ri Jesús xubij k'a: Xk'oje' k'a jun achin ri janila beyom. Rija' ruyon k'a jebel taq tzieq ri jotol kajel ri yerukusala', y q'ij-q'ij nubanala' nima'q taq wa'in.

²⁰Chuqa' xk'oje' k'a jun achin molonel y nojineq ruch'akul rik'in ch'a'k. Rija' rubini'an Lázaro, y kan ja ri chuchi-rachoch ri beyom nik'oje-wi.

²¹Chiri' ri tz'i' kan ye'apon k'a richin nikireq' ri ch'a'k ri k'o chirij. Jak'a ri Lázaro kan janila nurayij chi nutej ta ri ruchi' taq wey ri yetzaq-qa chuxe' ri mesa.

²²Jun q'ij rija' xken-el, y k'a ja ri akuchi k'o kikoten xapon-wi, ri chiri' rik'in ri Abraham. Kan k'a chiri' xuk'uex-wi, koma ri ángel. Y chuqa' ri achin beyom xken, y xmuq.

²³Jak'a rija' xa xbe akuchi k'o tijoj-poqonal. Rija' xtzu'un-pe, y jari' toq xutz'et ri Abraham, k'a nej k'a k'o-wi. Xutz'et k'a chuqa' ri Lázaro raq'el-apo chuwa-ruk'u'x ri Abraham.

²⁴Ri achin beyom rik'in uchuq'a' xch'on, y xubij k'a chire ri Abraham: Táta Abraham, tajoyowaj nuwech. Tataqa-pe wik'in ri Lázaro y xtuch'eqeba-pe jun ruwi' ruq'a' richin chi noruya' kan richin yich'uch'u' juba' yin, roma nik'at ri waq' chupan re q'aq' re', xcha'.

²⁵Jak'a ri Abraham xubij chire: Toqaqa k'a chi'ak'u'x, chi toq xak'ase' chuwech ri ruwach'ulew, yalan jebel xak'owisaj ri ak'aslen, jak'a re Lázaro yalan tijoj-poqonal xuk'owisaj. Jak'a re wakami, rija' yalan jebel ri ruk'aslen ri xorila' wawe', y rat xa jun k'aslen richin tijoj-poqonal xawil.

²⁶Chuqa' xa k'o jun nimalej siwan chiqakojol. Roma ri', wi k'o jun ri k'o wawe' nrajo' ta napon iwik'in, man nitikir ta. Y wi ta jun chiwe rix nrajo' nipe wawe' qik'in roj, man nitikir ta chuqa', xcha' ri Abraham.

²⁷Y ri achin beyom xubij k'a: Wi keri', nink'utuj jun chik utzil chawe rat nata' Abraham chi tataqa-el ri Lázaro chuwech ri ruwach'ulew, pa rachoch ri nata'.

²⁸Roma ek'o wo'o' wach'alal, y ninwajo' chi nibech'on ta kik'in, richin man kepe rije' re wawe' re akuchi k'o janila tijoj-poqonal, xcha'.

²⁹Jak'a ri Abraham xubij chire: Rije' k'o kik'in ri ruch'abel ri Dios ri rutz'iban kan ri Moisés. Y k'o chuqa' ri kitz'iban kan ri e q'alajirisey ruch'abel ri Dios ojer kan. Jari' k'a ri tikak'axaj, y tikinimaj, xcha' ri Abraham.

³⁰K'ari' ri achin beyom xubij: Man keri' ta, táta Abraham. Roma wi ta k'o jun kamineq ri nik'astej-el y napon ta kik'in ri wach'alal, kan xtitzolej-wi kik'u'x rik'in ri Dios, xcha'.

³¹Jak'a ri Abraham xubij chire: Wi man nikinimaj ta ri ruch'abel ri Dios ri rutz'iban kan ri Moisés, y ri kitz'iban kan ri q'alajirisanela' ri xek'oje' ojer kan, xa man xtikinimaj ta chuqa' jun ri nik'astej-el chikikojol ri kaminaqi', xcha'.