Read Kaqchikel Lc 17 Bible Online

Lc 17 - Kaqchikel bible

Lc 17

¹K'o k'a jun q'ij ri Jesús xubij k'a chike ri rutijoxela': Jantape' k'a k'o pikbel pa ruk'aslen jun wineq. Jak'a kan toq'ex ruwech ri wineq ri nibanon richin nitzaq jun chik.

²Ri nibanon ri etzelal ri', más ta utz xa nixim-el chuqul jun nimalej abej richin ke'en, y keri' nik'aq k'a chupan ri palou, ke chuwech nuben chire jun tzeqelibey wichin yin chi nitzaq pa mak.

³Roma ri' rix tichajij k'a ri ik'aslen. Wi k'o jun iwach'alal nimakun chiwech, kan tibij chire. Wi ri nimakun nitzolin-pe ruk'u'x, tikuyu' rumak.

⁴Wi pa jun q'ij wuqu' ta bey k'o itzel nuben chiwe y chi wuqu' bey nubij chiwe chi nitzolin-pe ruk'u'x, kan tikuyu' rumak, xcha' ri Jesús.

⁵Ri tijoxela' xkibij k'a chire ri Jesús: Qajaw, tabana' k'a chiqe chi ninimer ta más ri qakuqubabel-k'u'x, xecha'.

⁶Roma ri' ri Jesús xubij chike: Wi rix kan ikuquban ik'u'x rik'in ri Dios, stape' ta ri ikuqubabel-k'u'x xa achi'el ok jun ti ija'tz richin ri mostaza; rix kan yixtikir ta nibij chire la che' la' chi tel-el la akuchi tikil-wi, y tibetike' chupan ri palou; y la che' la' kan nunimaj-wi itzij.

⁷Wi k'o ta jun chiwe rix ri k'o jun rusamajel, y rutaqon ta el pa juyu' pan arado o pa yuq'un karne'l, ¿kan xaxe kami toq nitzolin-pe, xtibij chire: Katok pa jay, karaq'e' chuchi' ri mesa y kawa', xkicha' ta chire?

⁸Pa ruk'exel ri' nibij chire: Tachojmirisaj ri xtintej re wakami tiqaq'ij, y tachojmirisaj chuqa' awi' rat richin keri' yinawilij-pe re yiwa' y yinuk'ya', y kan k'a toq yikolaj na yin, k'ari' kawa' y katuk'ya' rat, yacha'.

⁹¿Namatioxij kami chire ri asamajel roma xuben ri xabij chire?, yin ninch'ob chi man namatioxij ta chire.

¹⁰Xa kan keri' chuqa' rix toq ibanon chik ri samaj ri rubin ri Dios chiwe, tibij: Roj oj samajela' ri man jun ok yojk'atzin-wi. Roma xaxe ok ri bin chiqe, xaxe ri' ri xqaben, kixcha', xcha' ri Jesús chike ri rutijoxela'.

¹¹K'ari' ri Jesús rachibilan ri rutijoxela' xuchop chik el bey pa Jerusalem, y xq'ax k'a chikikojol ri ruwach'ulew Galilea y ri Samaria.

¹²Toq xapon pa jun ko'ol tinamit, ek'o k'a e lajuj achi'a' ri k'o ri yabil ri nutaluj-ri' chikij. Ri achi'a' ri' xebek'ulun-pe, jak'a xa kan k'a nej xepa'e-wi chire ri Jesús.

¹³Xesik'in-apo y xkibij: Qajaw, tajoyowaj qawech roma re yabil re qak'uluwachin, xecha'.

¹⁴Ri Jesús kan xerutzu' y xubij chike chi kebiyin y tibekik'utu-ki' chikiwech ri sacerdote. Rokik k'a kichapon-el binen richin nibekik'utu-ki' chikiwech ri sacerdote, jari' toq ri yabil xk'is-el chikij y xech'ajch'ojir.

¹⁵Jun k'a chike ri e lajuj achi'a', toq xutz'et chi kan xk'achojirisex, rija' xtzolin. Kan rik'in k'a ruchuq'a' xch'on richin xuya' ruq'ij-ruk'ojlen ri Dios.

¹⁶Toq xapon rik'in ri Jesús, xxuke' chuwech y xuqasaj-ri' k'a pan ulew richin xmatioxij chire ri Jesús. Re achin re' aj-Samaria.

¹⁷K'ari' ri Jesús xubij: ¿Man e lajuj ta k'a ri xech'ajch'ojir chire ri kiyabil? ¿Akuchi ek'o-wi ri e beleje' chik?

¹⁸¿Kan man jun chik k'a ri xtzolin ta pe richin chi nuya' ruq'ij-ruk'ojlen ri Dios, xaxe re jun ri man judío ta ri xtzolin-pe?, xcha' ri Jesús.

¹⁹Y ri Jesús xubij chuqa' chire ri achin aj-Samaria: Kayakatej y kabiyin. Ri kuqubabel ak'u'x xuben chawe richin xakolotej, xcha' chire.

²⁰Ri fariseo xkik'utuj k'a chire ri Jesús chi jampe' k'a xtoqaqa ri rajawaren ri Dios. Y ri Jesús xubij k'a chike: Ri rajawaren ri Dios man xtiya'ox ta na rutzijol.

²¹Man k'a jun xtibin ta chi jare' k'o wawe', o jala' k'o chila', roma ri rajawaren ri Dios k'o chik iwik'in, xcha' ri Jesús.

²²Xubij k'a chike ri rutijoxela': Xke'oqaqa k'a ri q'ij toq rix xtiwajo' chi stape' xaxe jun q'ij yik'oje' ta chik iwik'in, yin ri xiqaqa-pe achi'el wineq chi'ikojol. Jak'a man xkinitz'et ta chik.

²³Kan ek'o k'a ri xkebin chiwe: Jare' k'o wawe'. Jala' k'o chila', xkecha'. Jak'a rix man k'a kixbe kik'in, ni man ke'itzeqelibej.

²⁴Roma toq xtapon ri q'ij chi yin, ri xiqaqa-pe achi'el wineq chi'ikojol, yipe chik jun bey, xkinoqaqa achi'el jun koyopa', ri niq'alajin jebel roma nusaqirisaj ri jun ruchi' ri kaj k'a ri jun chik ruchi'.

²⁵Jak'a nabey k'o k'a chi nink'owisaj na k'iy tijoj-poqonal, y chuqa' yinetzelex koma re sol winaqi' re'.

²⁶Ri q'ij k'a toq xkipe, yin ri xiqaqa-pe achi'el wineq chi'ikojol, kan xtibanatej k'a chuqa' achi'el ri xk'uluwachitej chupan ri q'ij toq xk'ase' ri Noé.

²⁷Rije' xa jak'a ri kiway-kuk'ya' ri nikich'ob; chuqa' ri k'ulubik, ri yeyatej chuqa' kimi'al-kik'ajol richin yek'ule'. Jari' ri yekich'obola' rije', toq xapon k'a ri q'ij richin chi ri Noé y ri e aj pa rachoch xe'ok chupan ri jun nimalej barco y xuchop ri kamik job, ri xeruk'is konojel ri winaqi';

²⁸achi'el chuqa' ri xk'uluwachitej pa ruq'ijul ri Lot. Toq ri winaqi' xa beneq kánima rik'in ri kiwa'in, rik'in ri achike yekiqumula', rik'in ri kiloq'oj, ri kik'ayij, ri kitikoj y ri paban taq jay.

²⁹Jak'a ri q'ij toq ri Lot xel-pe pa tinamit Sodoma, xqaqa k'a kan q'aq' y ri chuwilej-abej pa ruwi' ri tinamit. Kan achi'el k'a job xuben toq xqaqa-pe ri chikaj, y kan konojel winaqi' ri ek'o chiri' xeruk'is q'aq'.

³⁰Keri' chuqa' ri q'ij toq yin ri xiqaqa-pe achi'el wineq chi'ikojol xkinok'ulun chik qa re chuwach'ulew.

³¹Toq xtapon ri q'ij ri' ri wineq ri k'o-q'anej pa ruwi' ri rachoch, choj keri' tanimej-el. Man tok chik apo pa rachoch richin chi k'o niberuk'ama-pe. Y ri nisamej pa juyu', man chik titzolej chirachoch.

³²Roma xaxe k'a toqaqa chi'ik'u'x ri xuk'uluwachij ri rixjayil ri Lot.

³³Ri kan yalan nupoqonaj ri ruk'aslen re wawe' chuwach'ulew, man xtril ta jun qitzij ruk'aslen. Jak'a ri man nupoqonaj ta ri ruk'aslen richin re wawe', rija' kan xtril-wi k'a ri qitzij ruk'aslen.

³⁴Toq yin xkipe chik jun bey, wi ek'o ta e ka'i' yewer pa jun ch'at, jun k'a chike rije' ri xtuk'uex-el y ri jun chik xtik'oje' kan.

³⁵Wi ek'o ta e ka'i' ixoqi' ri junan yeke'en, jun ri xtuk'uex-el y ri jun chik xtik'oje' kan.

³⁶[Y wi ek'o ta e ka'i' achi'a' ri junan yesamej pa juyu', jun ri xtuk'uex-el y ri jun chik xtik'oje' kan, xcha'.]*f28*

³⁷Jak'a ri tijoxela' xkik'utuj chire: Qajaw, ¿akuchi k'a xtik'uluwachitej-wi ronojel re'?, xecha'. Roma ri' ri Jesús xubij chike: Akuchi k'o-wi jun ch'akulaj kamineq, chiri' k'a nikimol-wi-ki' ri k'ucha', xcha'.