Read Kaqchikel Lc 2 Bible Online

Lc 2 - Kaqchikel bible

Lc 2

¹Chupan k'a ri q'ij ri', ri Augusto César q'atoy-tzij pa ruwi' ri ajawaren Roma. Jari' toq xuteq rubixik chike konojel winaqi' chi nibeban jun tz'iban bi'aj.

²Re jun nabey tz'iban bi'aj re' xbanatej toq k'a q'atoy na tzij ri Cirenio pa ruwi' ri ruwach'ulew Siria.

³Konojel k'a ri winaqi' k'o chi nibekitz'ibaj kibi' pa taq kitinamit ri akuchi e alaxineq-wi ri kati't-kimama'.

⁴Ri chiri' pa Galilea pa tinamit Nazaret, xbe ri José richin niberutz'ibaj ri rubi' k'a pa tinamit Belén, ri k'o pa Judea, ri akuchi xalex-wi ri ánima David, roma ri José riy-rumam kan rija'.

⁵Ri José rachibilan ri María, ri ruk'utun richin nik'ule' rik'in. Chi e ka'i' rije' xebe k'a pa Belén chutz'ibaxik kibi'. Y ri María xa naqaj chik k'a alanik chirij.

⁶Ri chiri' k'a pa Belén ek'o-wi toq xtz'aqet ri q'ij richin chi nalex ri ak'ual,

⁷y xralaj k'a ri nabey ti ral chupan jun jay kichin chikopi', roma man xkil ta chik jun jay akuchi ta xek'oje-wi kan. Ri María xubolqotij chupan jun k'ul, y xuliba-qa chupan jun kachabal chikopi' ri k'o chiri'.

⁸Chupan ri aq'a' ri' ek'o k'a yuq'unela' yekiwaraj kikarne'l pa juyu' ri naqaj nikanej-wi kan chire ri Belén.

⁹Jari' toq xuk'ut-ri' jun ángel chikiwech re yuq'unela' re', y ri ruk'ojlemal ri Dios kan xerusaqirisaj. Y rije' janila xkik'en rukiy.

¹⁰Jak'a ri ángel xubij chike: Man tixibij-iwi'. Roma yin nuk'amon-pe jun utzilej rutzijol chiwe, richin janila kikoten chike konojel winaqi';

¹¹wakami chiri' pa Belén, ri rutinamit kan ri rey David, xalex ri ikolonel, y rija' ja ri Cristo ri iwajaw.

¹²Jak'a retal re' ri xtinya' chiwe richin xtiwil ri ak'ual: Xtitz'et k'a chi bolqotin jebel pa jun k'ul y kotz'oban pa jun kachabal chikopi', xcha' ri ángel.

¹³Kan jari' xe'ok'ulun ch'aqa' chik ángel ri janila e k'iy e peteneq chila' chikaj. Y rije' nikiya' k'a ruq'ij ri Dios, y nikibij:

¹⁴¡Nim ruq'ij-ruk'ojlen ri Dios ri k'o chila' chikaj! ¡Re wawe' chuwech re ruwach'ulew k'o ta uxlanen kik'in ri winaqi' ri junan kiwech rik'in ri Dios!, yecha'.

¹⁵Toq ri ángel xetzolej-q'anej chila' chikaj, kan jari' toq ri yuq'unela' xkibila-qa chikiwech: Jo' junanin pa Belén. Jo' chutz'etik ri ak'ual ri xalex chila'. Roma ri ajaw kan xuteq-pe re rutzijol chiqe, xecha'.

¹⁶Chi'anin k'a xebe k'a pa tinamit. Kan xkil na wi ri María, ri José, y ri ak'ual kotz'oban k'a pa jun kachabal chikopi'.

¹⁷Re yuq'unela' re', kan xaxe xkitz'et ri ak'ual, xkichop k'a rutzijoxik ri xbix chike roma ri ángel, pa ruwi' re ak'ual re'.

¹⁸Konojel k'a ri winaqi' ri ye'ak'axan, kan nikimey k'a ri utzilej taq ch'abel ri nikitzijoj ri yuq'unela'.

¹⁹Jak'a ri María kan xeruyek k'a pa ránima ronojel ri tzij ri', y nuch'obola' k'a kij.

²⁰Ri yuq'unela' xetzolej k'a. Nikiyala' ruq'ij-ruk'ojlen ri Dios y nikinimirisala' ri rubi', roma ronojel ri xkitz'et y kan xkak'axaj achi'el ri xubij kan ri ángel.

²¹Toq xtz'aqet waqxaqi' q'ij talex ri ti ak'ual, jari' toq xqupix richin jun retal,*f4* y Jesús ri rubi' xkiya', kan achi'el ri bi'aj ri xubij ri ángel chire ri María toq k'a man jani tiyawej kan chirij ri ak'ual.

²²Toq xtz'aqet k'a ri q'ij achi'el nubij ri pixa', chi ri ixoqi' ri ye'alan k'o chi nikich'ajch'ojirisaj-ki', ri María y ri José kan keri' wi xkiben, y xkik'uaj chuqa' ri Jesús richin chi kan jari' nibekik'utu' kan pa rachoch ri Dios.

²³Keri' xkiben roma ri pixa' nubij chi ronojel nimalaxel ala' pa jun jay, kan richin wi ri Dios.*f5*

²⁴K'o chi nikisuj ka'i' paloma e nima'q o ka'i' taq kokoj. Y keri' xkiben rije'.

²⁵Ri chiri' pa Jerusalem k'o jun achin rubini'an Simeón. Rija' choj ri ruk'aslen y ya'ol ruq'ij ri Dios. Kan k'o-wi ri Loq'olej Espíritu rik'in y royoben toq xtipe ri Cristo chukolik ri tinamit Israel.

²⁶Ri Loq'olej Espíritu ruq'alajirisan chik k'a chire ri Simeón chi man xtutz'et ta ri kamik k'a toq rutz'eton chik na kan ri Cristo, ri cha'on roma ri Dios.

²⁷Chupan k'a ri q'ij toq ri te'ej-tata'aj xkik'uaj ri Jesús pa rachoch ri Dios richin nikiben achi'el ri nubij ri pixa', kan jak'a chuqa' q'ij ri' toq xapon ri Simeón pa rachoch ri Dios, roma kan ja ri Loq'olej Espíritu xbanon chire.

²⁸Ri Simeón xuch'elej k'a ri ak'ual, y xuya' ruq'ij ri Dios, y xubij:

²⁹Wajaw, wakami k'a xa kan utz chik chi yinawelesaj-el, y xkiken rik'in uxlanen, roma kan achi'el ri abin chuwe, kan keri' xbanatej.

³⁰Ri runaq'-nuwech xkitzu' yan k'a kan ri kolotajik ri peteneq awik'in rat,

³¹ri xaya-pe rat kichin konojel ri winaqi'.

³²Ja rija' chuqa' ri saqil kichin ri winaqi' ri man e qawinaq ta. Y ruwaq'ijaj chiqe roj ri atinamit, xcha' ri Simeón.

³³Ri José y ri María janila nikimey ri nubila' ri Simeón pa ruwi' ri ak'ual.

³⁴Jari' toq ri Simeón xerurtisaj y xubij chire ri María: Tawak'axaj na pe, re ak'ual re' ya'on-pe roma ri Dios richin chi e k'iy chike ri qawinaq judío xkeyakatej y e k'iy chuqa' ri xketzaq. Rija' kan xya'ox k'a pe richin jun retal richin ri kolotajik, jak'a e k'iy ri xa xtiketzelaj.

³⁵Kan roma k'a rija' toq xtibeq'alajin-pe ri etzelal ri k'o pa taq kánima ri winaqi'. Roma ronojel re', kan xtana' k'a chi kan achi'el jun espada ri xtiju'ux pan awánima, xcha' ri Simeón chire ri María.

³⁶K'o k'a chuqa' jun ixoq q'alajirisey ruch'abel ri Dios rubini'an Ana, rumi'al kan ri Penuel, y riy-rumam kan ri Aser. Re Ana re' ti ri'j chik. Rija' k'a ko'ol toq xk'ule'. Xaxe wuqu' juna' xkik'uaj-ki' rik'in ri rachijil, roma xa chi'anin xken-el chuwech.

³⁷Rija' k'o chik jumuch' kaji' rujuna'; y chiri' k'a pa rachoch ri Dios nik'oje-wi q'ij-q'ij. Y chi paq'ij chi chaq'a' nich'on rik'in ri Dios y k'iy mul nimewayin.

³⁸Chupan ri ramaj ri' rija' xok-apo y janila k'a xmatioxin chire ri Dios roma ri ak'ual ri'. Y xuchop k'a rutzijoxik chike ri winaqi' ri e oyobeyon richin ri xtikolon ri Jerusalem pa kiq'a' ri aj-Roma.

³⁹Ri José y ri María xkiben k'a ronojel ri nuchilabej ri Dios chupan ri pixa'. K'ari' xetzolej pa kitinamit Nazaret ri k'o pa Galilea.

⁴⁰Ri ak'ual xuchop k'a ruk'iyinen, y xk'oje' chuqa' el ruchuq'a'. Rija' kan ninimer k'a el rik'in etamabel, y k'o ri rutzil ri Dios pa ruwi'.

⁴¹Ri María y ri José kan ronojel k'a juna' yebe pa tinamit Jerusalem richin nikinataj toq ri Dios xuya' ri Solbelri'il chike ri kati't-kimama'.

⁴²Toq xtz'aqet kablajuj rujuna' ri Jesús, xebe pa Jerusalem achi'el kibanon-pe ronojel bey.

⁴³Toq ik'owineq chik k'a kan ri nimaq'ij ri', ri María y ri José kichapon bey richin yetzolin chikachoch. Jak'a man ketaman ta k'a chi ri Jesús xa xk'oje' kan chiri' pa Jerusalem.

⁴⁴Rije' kan kuqul k'a kik'u'x chi ri ak'ual beneq, y keri' xebiyin jun q'ij. Jak'a toq xkinabej chi xa man beneq ta, k'a jari' toq xkik'utula' chike ri kach'alal y chike ri ketaman kiwech.

⁴⁵Roma man xkil ta ri ak'ual, ri José y ri María xetzolin kan chukanoxik pa Jerusalem.

⁴⁶Xbanatej k'a, chi k'a pa rox q'ij xkil ri ak'ual ri chiri' pa rachoch ri Dios. Rija' tz'uyul-apo kik'in ri achi'a' e etamanela' chirij ri pixa', nrak'axaj ri nikibij y k'o chuqa' ri yeruk'utula-apo chike.

⁴⁷Konojel k'a ri kan xkak'axaj ri nubij ri ak'ual, kan xkimey; roma ri nik'utux-pe chire, kan jebel wi nitikir nubij-apo chike. Kan niq'alajin-wi chi k'o nojibel rik'in.

⁴⁸Toq ri María y ri José xkitz'et, kan janila xkimey y jari' toq ri María xubij chire: ¿Achike roma toq xak'oje' kan y man jun xabij chiqe? Tatzu'; la atata' y yin janila at qakanon chik. Y kan niq'axo chik qánima roma man jun bey yatqil, xcha'.

⁴⁹Jari' toq rija' xubij chike: ¿Achike roma yinikanoj? Man iwetaman ta k'a chi yin k'o chi yik'oje' pa rachoch ri nata', xcha' chike.

⁵⁰Jak'a ri ch'abel ri xubij ri ak'ual chike ri rute-rutata', xa man xq'ax ta chikiwech.

⁵¹K'ari' ri ak'ual junan k'a xtzolin kik'in rije' pa kitinamit Nazaret, y kan janila k'a nunimaj kitzij. Y ronojel ri xbanatej rik'in ri ak'ual, ri María xeruyek k'a pa ránima.

⁵²Ri Jesús ruchapon ruk'iyinen, y kan keri' chuqa' ri etamabel ri k'o rik'in beneq pa jotol. Kan janila k'a jebel chuwech ri Dios, y janila k'a chuqa' jebel chikiwech ri winaqi'.