Read Kaqchikel Lc 22 Bible Online

Lc 22 - Kaqchikel bible

Lc 22

¹Xa naqaj chik k'a k'o-wi ri nimaq'ij toq nikitej kaxlan-wey ri maneq ch'amilej-q'or rik'in, y nikinataj toq ri Dios xuya' ri Solbelri'il.

²Jari' k'a toq ri aj-raqen kichin ri sacerdote y ri etamanela' nikich'obola' k'a achike rubanik nikiben richin nikikamisaj ri Jesús. Jak'a xa kixibin-ki' chikiwech ri winaqi'.

³Jak'a ri Judas Iscariote, jun chike ri kablajuj rutijoxela' ri Jesús, kan nisamej chik ri Itzel-Wineq pa ránima.

⁴Roma ri' rija' xbe k'a kik'in ri aj-raqen kichin ri sacerdote y kik'in chuqa' ri ye'uk'uan kichin ri e aj-labal ri chiri' pa rachoch ri Dios, y xch'on kik'in chirij ri achike rubanik xtuben richin nujech ri Jesús pa kiq'a'.

⁵Rije' kan janila k'a xekikot toq xkak'axaj ri', y xkisuj ruméro.

⁶Ri Judas kan xqa' chuwech. Xuchop k'a ruch'obik jampe' toq xtujech pa kiq'a', jak'a kan k'a ja toq man kimolon ta ki' winaqi' rik'in.

⁷Toq xoqaqa ri nimaq'ij, q'ij richin nitij ri kaxlan-wey maneq ch'amilej q'or rik'in, y toq yekamisex chuqa' ri taq karne'l ri richin ri q'ij ri',

⁸ri Jesús xeruteq k'a el ri Pedro y ri Juan, y xubij k'a el chike: Kixbiyin y tibana' rutzil ri xtiqatej chupan re nimaq'ij, xcha'.

⁹Ri ka'i' tijoxela' xkik'utuj k'a chire chi akuchi nrajo' chi nikiben ruchojmil.

¹⁰Ri Jesús xubij chike: Toq xkixok-apo ri pa tinamit, xtitz'et jun achin ri ruk'amon-pe ruya' pa jun kuku'.*f34* Tiwojqaj k'a el re achin re' k'a achike jay xtok-wi.

¹¹Ri jay ri xtok-wi ri achin ri', chiri' k'a chuqa' kixok-wi rix y kixch'on rik'in ri rajaw-jay, y tibij chire chi yin, ri itijonel, ninbij chi achike jay ri chiri' pa rachoch rija' ri utz ta richin ninben re nimaq'ij re', junan iwik'in rix ri nutijoxela'.

¹²Ri rajaw-jay xkixruk'uaj k'a pa jun ruka'n wiq jay. Y chiri' k'o jun nima-jay ri chojmirisan chik rupan. Ja ri chiri' tibana-wi rutzil ri xtiqatej richin re nimaq'ij re', xcha-el.

¹³Ri ka'i' rutijoxela' ri' kan k'a pa Jerusalem xebe-wi. Toq xe'apon, kan xbanatej na wi achi'el ri rubin-el ri Jesús chike. Y rije' kan xkiben k'a rutzil ronojel ri nik'atzin richin ri nima-wa'in ri'.

¹⁴Toq xapon k'a ri hora, ri Jesús y ri kablajuj rutijoxela' xeraq'e-apo chuchi' ri mesa.

¹⁵Y ri Jesús xubij chike: Kan janila nurayiben-pe chi junan niqanataj ri aq'a' toq ri Dios xuya' ri Solbelri'il, nabey chi yinapon chuwech ri kamik.

¹⁶Roma kan ninbij-wi k'a chiwe, chi kan k'a ja toq k'o chik na ri utzilej ruq'atbel-tzij ri Dios, kan k'a jari' toq xtinben chik re jun wa'in re', xcha'.

¹⁷Ri Jesús xuchop k'a jun qumbel ri k'o vino chupan, y toq rumatioxin chik chire ri Dios, xubij: Tiqumu' k'a kan chi'iwonojel.

¹⁸Roma kan ninbij-wi k'a chiwe, chi kan k'a ja toq xtipe ri rajawaren ri Dios chuwech re ruwach'ulew, kan k'ari' toq xtinqum chik jun bey vino, xcha'.

¹⁹Keri' chuqa' xuk'en-apo ri kaxlan-wey, y toq rumatioxin chik chire ri Dios, xuper y xuya' chike ri rutijoxela' y xubij: Kan titija' k'a. Roma jare' ri nuch'akul ri kan xtijach pan ik'exel rix. Kan tibana' k'a richin jun natabel wichin yin, xcha'.

²⁰Toq e wayneq chik, ri Jesús xuchop k'a chuqa' ri qumbel ri k'o vino chupan, y xubij: Re vino re ninq'ej wakami, nuk'exewachuj ri k'ak'a' jikibel-tzij, y re' nijikibex rik'in ri nukik'el ri niq'ejq'o' iwoma rix.

²¹Wakami k'a, ri achin ri xkijacho-el pa kiq'a' ri winaqi', jun chiwe rix ri ixk'o-pe wik'in re pa mesa.

²²Kan tiwak'axaj k'a re ninbij chiwe, chi yin, ri xiqaqa-pe achi'el wineq chi'ikojol, kan yibe-wi pa kamik, roma kan jare' ri ruch'obon ri Dios pa nuwi'. Jak'a toq'ex ruwech ri xtijacho-el wichin, xcha' ri Jesús.

²³Jari' toq ri rutijoxela' ri Jesús nikibila-qa chikiwech chi achike kami ri xtijacho-el richin rija'.

²⁴Re tijoxela' re' xkich'ojila' k'a chuqa' chikiwech achike ri más nim ruq'ij chikikojol rije'.

²⁵Jak'a ri Jesús xa xubij chike: Ri q'atoy taq tzij richin re ruwach'ulew, roma kan ek'o ri winaqi' pa kiq'a', roma ri' kan nikina' chi ja rije' ri e kajaw. Y ri achi'a' ri kan k'o kiq'a' chike ri winaqi', kan achi'a' e banoy utzil nibix chike.

²⁶Jak'a chi'ikojol rix nutijoxela' man keri' ta. Roma ri más nim ruq'ij chi'ikojol rix, nik'atzin chi nuna-qa-ri' chi xa más ko'ol chikiwech ri rachibil. Y ri jun chiwe rix ri nik'oje' pan iwi', nik'atzin chi nuna-qa-ri' chi xa maneq ruq'ij.

²⁷Roma ri', ¿ja kami ri k'o pa mesa nilix-apo ri k'o más ruq'ij ó ja ri ilinel? ¿Man ja ta kami ri k'o pa mesa nilix-apo ri más ruq'ij? Jak'a chinuwech yin man keri' ta, roma yin xa achi'el jun ilinel ink'o chi'ikojol.

²⁸Rix kan ixk'o k'a pe wik'in chupan ri tejtobenik ri ninq'axaj.

²⁹Roma ri', yin xtinya' jun q'atbel-tzij pan iq'a' rix, kan achi'el ri rubanon ri nata' Dios wik'in yin,

³⁰richin keri' xkixwa' y xkixuk'ya' junan wik'in pa mesa, ri pa wajawaren. Y chiri' rix xkixok k'a q'atoy-tzij pa kiwi' ri kablajuj tzobaj richin ri tinamit Israel, xcha'.

³¹Ri Jesús xubij k'a chuqa' chire ri Pedro: Simón, Simón ninbij k'a chawe chi ri Itzel-Wineq xixruk'utuj yan chire ri Dios richin chi yixrutejtobej. Kan nrajo' k'a yixrusiloj achi'el nisilox ri trigo chupan ri chaybel.

³²Jak'a yin kan in ch'owineq-wi-pe rik'in ri Dios, pan awi' rat, richin keri' kan takuquba' ak'u'x wik'in. Jak'a toq xtitzolin-pe ak'u'x wik'in, tabana' chike ri ch'aqa' chik nutijoxela' chi kan tikikuquba-wi kik'u'x wik'in, xcha' ri Jesús.

³³Y ri Simón xubij: Wajaw, wi rat xkatuk'uex pa cárcel, yibe awik'in. Yibe chuqa' awik'in, wi rat xkatapon chuwech ri kamik, xcha'.

³⁴Jak'a ri Jesús xubij chire: Pedro, yin ninbij k'a chawe, chi chupan re q'ij wakami k'a man jani tisik'in-pe ri mama' toq rat oxi' yan bey tabij chike ri yek'utun chawe, chi man awetaman ta nuwech, xcha' ri Jesús chire.

³⁵K'ari' ri Jesús xuk'utuj k'a chike ri rutijoxela': Toqaqa chi'ik'u'x, toq ri jun bey xixinteq y man xinwajo' ta richin xik'uaj peqes, ni méro, ni jun chik k'ulaj xajab. ¿K'o kami ri xk'atzin chiwe y man xiwil ta?, xcha'. Y rije' xkibij chi man jun.

³⁶Ri Jesús xubij k'a chike: Jak'a re wakami jun wi chik rubanik. Roma wakami ri k'o peqes rik'in, tuk'uaj. Ri k'o ruméro, tuk'uaj chuqa'. Ri maneq ru-espada, tuk'ayij ri ruq'u' ri ruq'un y k'ari' tuloq'o' jun richin.

³⁷Wakami kere' ninbij chiwe, roma k'o chi nibanatej achi'el ri nubij chupan ri ruch'abel ri Dios ri tz'ibatel kan,*f35* toq nubij chi kan achi'el chuqa' jun aj-mak xban chuwe. Roma ronojel k'a ri e tz'ibatel kan chuwij yin chupan ri ruch'abel ri Dios, kan xkebanatej-wi, xcha' ri Jesús.

³⁸K'ari' ri tijoxela' xkibij chire ri Jesús: Qajaw, wawe' ek'o ka'i' espada, xecha'. Jak'a ri Jesús xubij chike: Man chik tinataj ri', xcha'.

³⁹Ri Jesús toq eleneq chik k'a el ri chiri', xbe k'a ri akuchi kan tibe-wi. Rija' xbe k'a ri pa juyu' richin Olivo. Y ri rutijoxela' kan e tzeqetel-wi-el chirij.

⁴⁰Toq xe'apon, xubij chike: Kixch'on rik'in ri Dios richin chi toq yixtejtobex, man kixtzaq pa mak, xcha'.

⁴¹K'ari' ri Jesús xbiyin chik apo juwineq jaj, xxuke-qa chiri', y xuchop k'a ch'owen rik'in ri Dios.

⁴²Y nubij: Nata' Dios, tabana' k'a chi man ta nink'owisaj re jun tijoj-poqonal re', wi kan keri' ri nawajo' chuqa' rat. Jak'a man taben ri ninrayij yin, xa kan tabana' ri niqa' chawech rat, xcha'.

⁴³[K'o k'a jun ángel ri peteneq chila' chikaj xuk'ut-ri' chuwech, richin noruya-qa ruchuq'a' ri Jesús.

⁴⁴Y kan janila k'a q'axo'n ri k'o pa ránima. Roma ri' kan rik'in k'a ronojel ránima nich'on rik'in ri Dios. Y roma ri' xuchop nitz'oqpin. Y ri ya' ri nel chirij kan nima'q taq tz'uj, achi'el toq jun nibiyin rukik'el.]*f36*

⁴⁵Toq ri Jesús xtane' chi ch'owen rik'in ri Dios, xpe kik'in ri rutijoxela', jak'a toq xoqaqa kik'in, rije' xa kichapon waran, roma janila chik yebison.

⁴⁶Y xubij chike: ¿Achike roma xa yixwer? Kixyakatej, y kixch'on rik'in ri Dios y tik'utuj chire chi toq yixtejtobex, man kixtzaq pa mak, xcha' chike.

⁴⁷Kan k'a nich'on na k'a ri Jesús kik'in ri rutijoxela', toq k'a xkina' xe'apon e k'iy winaqi' kik'in. Kan ja ri Judas ri uk'uayon-apo kibey ri winaqi' ri' y xjel-apo rik'in ri Jesús richin xutz'ubaj.

⁴⁸Jak'a ri Jesús xubij chire: ¿Xinatz'ubaj yin ri xiqaqa-pe achi'el wineq chi'ikojol, xaxe richin yinak'ayij-el pa kiq'a' ri ye'etzelan wichin?, xcha'.

⁴⁹Ri tijoxela', toq xkitz'et ri najin rubanik, xkinabej ri achike ri xtibek'uluwachitej. Y xkibij k'a chire: Qajaw, ¿yojyakatej chikij rik'in espada?, xecha'.

⁵⁰K'o k'a jun chike ri tijoxela' ri xusok jun samajel richin ri nimalej sacerdote. Kan xuchoy ri ruxikin ri k'o pa rijkiq'a'.

⁵¹Jak'a ri Jesús xubij chike ri rutijoxela': Man jun chik tiben, xcha'. K'ari' rija' xuchop ri ruxikin y xuk'achojirisaj kan.

⁵²Kan ja ri aj-raqen kichin ri sacerdote, ri e uk'uey kichin ri aj-labal pa rachoch ri Dios, y ri achi'a' k'o kiq'ij, jari' ri e beneq chapoy richin ri Jesús. Rija' xubij chike: ¿Achike k'a xich'ob rix? ¿Xich'ob chi yixpe chuchapik jun eleq'om y roma ri' ik'amon-pe che' y espada?

⁵³Kan q'ij-q'ij k'a xik'oje' iwik'in ri pa rachoch ri Dios, y man jun achike ta xiben chuwe. K'a ja ramaj re' ri ya'on chiwe rix, ramaj richin xtich'akon ri q'equ'm, xcha' ri Jesús.

⁵⁴Xkichop k'a el ri Jesús, y xkik'uaj pa rachoch ri nimalej sacerdote. Y ri Pedro e rutzeqeliben-el, jak'a xa k'anej k'o-wi.

⁵⁵Ri chiri' pa nik'aj ruwa-jay, ri rusamajela' ri nimalej sacerdote xkibox q'aq', y xetz'uye-apo konojel ri chuchi' q'aq'. Chuqa' ri Pedro xtz'uye-apo chikikojol.

⁵⁶K'o k'a jun xten raj-ik' ri nimalej sacerdote ri k'o chiri', y toq xutz'et ri Pedro chi tz'uyul chiri' rumeq'on-ri', xretamaj ruwech y xubij: Re jun achin re' rachibil chuqa' ri Jesús, xcha'.

⁵⁷Jak'a ri Pedro xa xrewaj k'a chuwech ri xten, y xubij: Yin man wetaman ta ruwech ri Jesús, xcha'.

⁵⁸K'a juba' ri' k'o chik k'a jun ri xtz'eton-pe richin ri Pedro, y xubij chire: Rat at jun chike ri ek'o rik'in ri Jesús, xcha'. Ri' man yin ta ri', xcha' ri Pedro chire.

⁵⁹Xa k'a jun nima-ko'ol tiq'ax-qa, toq k'o chik k'a jun ri xbin chi ri Pedro, kan qitzij wi chi rachibil ri Jesús, roma kan aj-Galilea chuqa'.

⁶⁰Jak'a rija' xubij: Man niq'ax ta chinuwech achike roma nabij keri', xcha' ri Pedro. Kan k'a nich'on na k'a, toq ri mama' xbesik'in-pe.

⁶¹Jari' toq ri Jesús xtzu'un-pe chirij y xutzu-pe. Ri Pedro kan jari' xoqaqa chuk'u'x ri rubin kan ri ajaw chire, chi k'a man jani tisik'in-pe ri mama' toq rija' oxi' yan bey tubij chike ri yek'utun chire, chi man retaman ta ruwech.

⁶²Roma ri' ri Pedro xel k'a el chiri' y rik'in janila bis xujiq' oq'ej.

⁶³Ri achi'a' ri e chajiyon richin ri Jesús, yetze'en k'a chirij y nikich'ey.

⁶⁴K'ari' xkitz'apej runaq'-ruwech, xkipaq'ila' chupalej y nikik'utula' k'a chire: ¿Achike ri xach'ayo? Tabij na k'a chiqe, yecha' chire.

⁶⁵K'iy k'a ch'abel ri man e utz ta ri xkibila' chire.

⁶⁶Toq xseqer k'a pe, xkimol k'a ki' achi'a' ri k'o kiq'ij, ri e aj-raqen kichin ri sacerdote, y ri etamanela'. Ri Jesús xuk'uex k'a apo chikiwech ri achi'a' ri', ri kan pa komon yeq'aton-tzij. Y xkik'utuj k'a chire:

⁶⁷Tabij k'a chiqe: ¿Ja rat ri' ri Cristo?, xecha'. Jak'a ri Jesús xubij chike: Wi ninbij chiwe chi ja yin ri Cristo, man yininimaj ta.

⁶⁸Chuqa' wi ta k'o ri yenk'utuj-apo chiwe, man jun xtibij-pe chuwe, chuqa' man xkiniwisq'opej ta el.

⁶⁹Toq xtiq'ax k'a kan re jun tijoj-poqonal re', yin ri xiqaqa-pe achi'el wineq chi'ikojol, xkibetz'uye' k'a pa rijkiq'a' ri Dios ri nitikir nuben ronojel, xcha' ri Jesús.

⁷⁰Kan jari' k'a toq konojel xkibij-apo chire ri Jesús: ¿Wakami, kan ja rat ri ruk'ajol ri Dios?, xecha'. Y rija' xubij: Ja rix ri xixbin, xcha'.

⁷¹K'ari' rije' nikibij: Man jun chik tzij nik'atzin chiqe richin niqetamaj chi re Jesús kan aj-mak-wi. Roma qonojel xqak'axaj ri k'ari' nubij-qa, yecha'.