Read Kaqchikel Lc 3 Bible Online

Lc 3 - Kaqchikel bible

Lc 3

¹Chupan k'a ri q'ij ri' ja ri Tiberio César ri rey pa ruwi' ri ajawaren richin ri Roma. Toq rija' wolajuj yan juna' tuq'et-tzij, chuqa' yeq'aton-tzij re kaji' q'atoy taq tzij re': Ri Poncio Pilato, rija' niq'aton-tzij pa Judea; ri Herodes Antipas, rija' rey pa ruwi' ri ruwach'ulew Galilea; ri Felipe rach'alal ri Herodes, rija' rey pa kiwi' ri ruwach'ulew Iturea y Traconítide; y ri Lisanias, rija' rey pa ruwi' ri ruwach'ulew Abilene.

²Kan jak'a chuqa' q'ij ri' toq ri Anás y ri Caifás e nimalej taq sacerdote chiri' pa rachoch ri Dios, chiri' pa Jerusalem. Jari' toq ri Dios xch'on rik'in ri Juan ri ruk'ajol ri Zacarías ri chiri' pa tz'iran ruwach'ulew.

³Rija' xaxe k'a chunaqaj ri ruchi' ri raqen-ya' Jordán ri xuchop-el, y xbe. Y nubij k'a chike ri winaqi' ri ye'apon rik'in chi titzolej-pe kik'u'x rik'in ri Dios y tikiqasaj ya' pa kiwi' richin nikik'ut chi xjalatej ri kik'aslen, y keri' ri Dios nukuy kimak.

⁴Kan jak'a rik'in ri Juan xbanatej-wi ri rubin kan ri Dios chire ri jun q'alajirisey ruch'abel ri Dios xubini'aj Isaías, toq xubij:*f6* K'o k'a jun q'ij k'o jun ri xtipe chupan ri tz'iran ruwach'ulew, y kan janila kow xtich'on y xtubij: Tichojmirisaj k'a jun bey richin ri Jehová. Tibana' jun choj laj bey richin ri qa-Dios.

⁵Ronojel ri ek'o pa jotol, k'o chi xketaq'ajux, y ronojel ri ek'o pa xulan, k'o chi xkenojisex. Ri xotoxeq kan xkeban taq'aj chike. Ronojel k'a xtitaq'ajux.

⁶Kan konojel winaqi' xkekolotej roma ri Jehová, nicha'.

⁷Keri' ri Juan, toq ye'apon ri winaqi' rik'in richin nuqasaj ya' pa kiwi', rija' nubij k'a chike: Rix xa ix kijatzul ri q'olonela' taq winaqi'. ¿Achike xbin chiwe chi k'o chi yixanimej chuwech ri ruk'ayewal ri peteneq?

⁸Wi kan qitzij chi rix nitzolej-pe ik'u'x rik'in ri Dios, kan tiq'alajin k'a chupan ri ik'aslen. Man k'a tich'ob-qa rix chi kan xaxe roma ri ix riy-rumam kan ri Abraham, xkixkolotej. Roma, kan ta ri Dios nrajo', rija' yeruben ta riy-rumam ri Abraham chike re abej re yeqatz'et wawe'.

⁹Pa ruwi' ri' nich'on-wi ri tzij: Ri ikej e ya'on chik chuxe' ronojel ri che' ri xa man nikiya' ta kiwech, richin yechoy. Ronojel k'a ri che' ri xkechoy, xkek'aq pa q'aq', nicha', xcha' ri Juan.

¹⁰Kan jari' k'a toq ri winaqi' nikik'utuj chire: ¿Achike k'a ri ruk'amon chi niqaben?, yecha'.

¹¹Ri Juan xubij k'a chike: Achike k'a chiwe rix ri k'o ka'i' rutziaq, tuya' jun chire ri maneq rutziaq. Xabachike k'a chuqa' chiwe rix ri k'o ta wey rik'in, tuya' k'a chuqa' chire ri maneq ruway, xcha' chike.

¹²Ek'o k'a chuqa' ka'i-oxi' achi'a' ri e moloy méro ri k'o chi nitoj chire ri q'atbel-tzij aj-Roma, xe'apon richin xqasex ya' pa kiwi'. Y xkik'utuj k'a chire ri Juan: Tijonel, ¿achike ri ruk'amon chi niqaben roj?, xecha'.

¹³Ri Juan xubij chike: Xaxe k'a ri bin chiwe roma ri q'atbel-tzij, kan xaxe ri' tik'utuj chike ri winaqi', xcha'.

¹⁴Chuqa' ek'o ka'i-oxi' aj-labal, xkik'utuj-apo chire: Roj, ¿achike ruk'amon chi niqaben?, xecha'. Ri Juan xubij chike: Man jun tiwelesaj chuwi kiq'a' ri winaqi', xaxe roma k'o q'atbel-tzij pan iq'a'. Ni man jun achike ke'iq'abala' chikij winaqi'; xa kan kixkikot rik'in ri nich'ek, xcha' chike.

¹⁵Ri winaqi' ri ek'o k'a apo rik'in ri Juan, kan koyoben k'a chi ri Juan k'o ta ri nubij, roma nikibila' k'a pa taq kánima chi rik'in juba' ja rija' ri Cristo.

¹⁶Roma ri' ri Juan xubij chike ri winaqi': Yin, xaxe k'a ya' ninqasaj pa kiwi' ri winaqi' toq nitzolej-pe kik'u'x rik'in ri Dios. Jak'a kan k'o jun ri xtipe ri chiqawech-apo, ri man achi'el ta ok yin. Roma yin kan man ruk'amon ta richin ninsol ri ruximibal ri ruxajab. Ri jun ri' nim ruq'ij y nim ruchuq'a', y kan xtuqasaj pa kiwi' ri winaqi' ri Loq'olej Espíritu rachibilan q'aq'.

¹⁷Rija' kan xtuben k'a achi'el jun achin toq nujosq'ij ri ru-trigo, ri nukusaj jun pielca richin nuk'eq chuwa-kaq'iq' ri trigo ch'ayon chik. Ri runaq' ri trigo xtuk'ol richin nuyek kan, jak'a ri páxa xa xtuk'eq kan pa q'aq', jun q'aq' ri man jun bey xtichup, xcha'.

¹⁸Ri Juan rik'in k'a pixabanik xutzijoj ri utzilej ch'abel ri' chike ri winaqi'.

¹⁹Chuqa' rija' xubij k'a chire ri Herodes, chi man utz ta ri rubanon, roma rija' ruk'amon-qa ri Herodías ri rixjayil ri Felipe, ri rach'alal. Xerunataj chuqa' ch'aqa' chik rumak ri e rubanalon.

²⁰Pa ruwi' ronojel re', ri Herodes xnimer k'a ruwi' ri rumak, roma xutz'apej ri Juan pa cárcel.

²¹Y xbanatej chi toq najin niqasex ya' pa kiwi' ri winaqi', chuqa' jari' toq xqasex ya' pa ruwi' ri Jesús. Y rokik rija' najin chi ch'owen rik'in ri Dios, jari' toq xjaqatej ri kaj.

²²Ri Loq'olej Espíritu kan tz'etel-wi ri xqaqa-pe pa ruwi' ri Jesús, kan achi'el jun paloma. Xak'axatej k'a chuqa' jun ch'abel ri peteneq chila' chikaj ri nubij: Ja rat ri nuk'ajol yin ri kan janila yatinwajo', y yikikot awik'in, xcha' ri ch'abel ri'.

²³Chupan ri q'ij ri', ri Jesús k'o la'eq juwineq lajuj rujuna'. Kan jari' k'a toq xuchop ri rusamaj. Y chikiwech ri winaqi', ri Jesús ruk'ajol ri José. Y ri José ruk'ajol kan ri Elí.

²⁴Y ri Elí ruk'ajol kan ri Matat, y ri Matat ruk'ajol kan ri Leví, y ri Leví ruk'ajol kan ri Melquí, y ri Melquí ruk'ajol kan ri Janai, y ri Janai ruk'ajol kan jun chik achin rubini'an José.

²⁵Y ri José ruk'ajol kan ri Matatías, y ri Matatías ruk'ajol kan ri Amós, y ri Amós ruk'ajol kan ri Nahúm, y ri Nahúm ruk'ajol kan ri Eslí, y ri Eslí ruk'ajol kan ri Nagai.

²⁶Y ri Nagai ruk'ajol kan ri Máhat, y ri Máhat ruk'ajol kan jun chik achin rubini'an Matatías, y ri Matatías ruk'ajol kan ri Semeí, y ri Semeí ruk'ajol kan ri Josec, y ri Josec ruk'ajol kan ri Joiadá.

²⁷Y ri Joiadá ruk'ajol kan ri Johanán, y ri Johanán ruk'ajol kan ri Resá, y ri Resá ruk'ajol kan ri Zorobabel, y ri Zorobabel ruk'ajol kan ri Salatiel, y ri Salatiel ruk'ajol kan ri Nerí.

²⁸Y ri Nerí ruk'ajol kan jun chik achin rubini'an Melquí, y ri Melquí ruk'ajol kan ri Adí, y ri Adí ruk'ajol kan ri Cosam, y ri Cosam ruk'ajol kan ri Elmadam, y ri Elmadam ruk'ajol kan ri Er.

²⁹Y ri Er ruk'ajol kan jun chik achin rubini'an Jesús, y ri Jesús ruk'ajol kan ri Eliézer, y ri Eliézer ruk'ajol kan ri Jorim, y ri Jorim ruk'ajol kan jun chik achin rubini'an Matat.

³⁰Y ri Matat ruk'ajol kan jun chik achin rubini'an Leví, y ri Leví ruk'ajol kan ri Simeón, y ri Simeón ruk'ajol kan ri Judá, y ri Judá ruk'ajol kan jun chik achin rubini'an José, y ri José ruk'ajol kan ri Jonam, y ri Jonam ruk'ajol kan ri Eliaquim.

³¹Y ri Eliaquim ruk'ajol kan ri Meleá, y ri Meleá ruk'ajol kan ri Mená, y ri Mená ruk'ajol kan ri Matatá, y ri Matatá ruk'ajol kan ri Natán.

³²Y ri Natán ruk'ajol kan ri David, y ri David ruk'ajol kan ri Isaí, y ri Isaí ruk'ajol kan ri Obed, y ri Obed ruk'ajol kan ri Booz, y ri Booz ruk'ajol kan ri Sélah, y ri Sélah ruk'ajol kan ri Nahasón.

³³Y ri Nahasón ruk'ajol kan ri Aminadab, y ri Aminadab ruk'ajol kan ri Admín, y ri Admín ruk'ajol kan ri Arní. Y ri Arní ruk'ajol kan ri Hesrón, y ri Hesrón ruk'ajol kan ri Fares, y ri Fares ruk'ajol kan jun chik achin rubini'an Judá.

³⁴Y ri Judá ruk'ajol kan ri Jacob, y ri Jacob ruk'ajol kan ri Isaac, y ri Isaac ruk'ajol kan ri Abraham, y ri Abraham ruk'ajol kan ri Térah, y ri Térah ruk'ajol kan ri Nahor.

³⁵Y ri Nahor ruk'ajol kan ri Serug, y ri Serug ruk'ajol kan ri Ragau, y ri Ragau ruk'ajol kan ri Péleg, y ri Péleg ruk'ajol kan ri Éber, y ri Éber ruk'ajol kan jun chik achin rubini'an Sélah.

³⁶Y ri Sélah ruk'ajol kan ri Cainán, y ri Cainán ruk'ajol kan ri Arfaxad, y ri Arfaxad ruk'ajol kan ri Sem, y ri Sem ruk'ajol kan ri Noé, y ri Noé ruk'ajol kan ri Lámec.

³⁷Y ri Lámec ruk'ajol kan ri Matusalén, y ri Matusalén ruk'ajol kan ri Enoc, y ri Enoc ruk'ajol kan ri Jéred, y ri Jéred ruk'ajol kan ri Mahalaleel, y ri Mahalaleel ruk'ajol kan jun chik achin rubini'an Cainán.

³⁸Y ri Cainán ruk'ajol kan jun chik achin rubini'an Enós, y ri Enós ruk'ajol kan ri Set, y ri Set ruk'ajol kan ri Adán, y ri Adán ruk'ajol ri Dios.