Read Kaqchikel Lc 7 Bible Online

Lc 7 - Kaqchikel bible

Lc 7

¹Toq ri Jesús xtane' chi ch'owen chikiwech ri winaqi', xbe pa tinamit Capernaum.

²Ri chiri' k'o jun aj-raqen pa kiwi' ri aj-labal aj-Roma. Y re achin re' k'o jun rusamajel ri janila nrajo', jak'a xa yawa', y xa niken yan.

³Toq ri aj-raqen xrak'axaj ri nikibij chirij ri Jesús, rija' xeruteq ka'i-oxi' achi'a' ri k'o kiq'ij chikikojol ri judío, richin nikik'utuj utzil chire ri Jesús chi tipe richin noruk'achojirisaj kan ri rusamajel.

⁴Toq rije' xe'apon rik'in ri Jesús, janila k'a xkik'utuj utzil chire. Y xkibij: Kan ruk'amon chi naben re jun utzil re' chire ri aj-raqen.

⁵Roma rija' janila yojrajo' roj judío, y chuqa' xuben jun jay ri akuchi niqamol-wi-qi', richin niqak'axaj ri ruch'abel ri Dios, xecha'.

⁶Roma ri' ri Jesús xbe k'a chikij chirachoch ri aj-raqen. Jak'a toq ye'apon yan, ri aj-raqen ri' xeruteq k'a pe ch'aqa' chik achi'a' ri kan e rachibil, richin xokik'ulu' ri Jesús y nikibij chire: Wajaw, man taya' más samaj chawij, roma yin xa in jun aj-mak, y man ruk'amon ta chi yatok pa wachoch.

⁷Jari' ri xbanon chuwe chi kan man ruk'amon ta chi yin yinapon awik'in. Roma ri' xaxe k'a tabij chi nik'achoj ri nusamajel, y xtik'achoj.

⁸Roma yin ink'o chuqa' chuxe' rutzij jun chik y chuqa' ek'o achi'a' e ya'on pa nuq'a'. Toq yin ninbij chire jun chi tibe, kan nibe-wi; y wi ninbij chire chi tipe, kan nipe-wi. Y toq ninbij chire ri nusamajel chi tubana' jun samaj, kan nuben-wi, xcha-el.

⁹Toq ri Jesús xrak'axaj re' kan xumey k'a qa y xubij chike ri e tzeqelibeyon richin: Kan qitzij ninbij chiwe chi kan man jun bey k'a wilon ta jun kuqubabel-k'u'x achi'el re', ni ta chupan ri ruwach'ulew Israel, xcha'.

¹⁰Toq xetzolin ri e taqon roma ri aj-raqen, xkitz'et k'a chi ri samajel ri yawa' xk'achoj-el chire ri yabil.

¹¹Jun chik k'a q'ij, ri Jesús xbe pa jun tinamit rubini'an Naín, y e beneq chuqa' ri rutijoxela' rik'in. Janila k'a chuqa' winaqi' ri e beneq chikij.

¹²Toq ri Jesús y ri e beneq rik'in ye'ok yan apo ri pa Naín, xkitz'et k'a chi k'amon-pe jun kamineq richin nibemuq kan. Re kamineq re' jun ala', ral jun malka'n ixoq. Rija' xa kan xaxe k'a ri jun ral ala' ri k'o. Y janila k'a winaqi' ri q'ejeloy richin ri e beneq rik'in richin ri muqunik.

¹³Toq ri Jesús xutz'et ruwech ri ixoq ri xken-el ri ral, xujoyowaj ruwech, y xubij k'a chire chi man chik toq'.

¹⁴Ri Jesús xuchop-apo ri tz'alem akuchi uk'uan-wi-el ri kamineq, y ri e uk'uayon-el richin xepa'e-qa. Rija' xubij k'a chire ri kamineq: Chawe rat ninbij-wi. Kayakatej, xcha'.

¹⁵Toq ri Jesús xubij keri', ri kamineq xyakatej, y xbetzijon-pe. Y ri Jesús xujech k'a el ri ala' chire ri rute'.

¹⁶Toq ri winaqi' xkitz'et ri xbanatej, xpe jun nimalej xibinri'il kik'in. Xkiya' chuqa' ruq'ij-ruk'ojlen ri Dios, y nikibila' k'a: Chiqakojol xbek'ulun-pe jun nimalej q'alajirisey ruch'abel ri Dios. Wakami ri Dios xuteq-pe jun ri niya'on rutzil chiqakojol roj ri oj rutinamit, yecha' ri winaqi'.

¹⁷Keri' ri xuben ri Jesús chupan ri q'ij ri', xapon rutzijol k'a pa ruwach'ulew Judea, y pa taq tinamit ri ek'o chunaqaj.

¹⁸Ri Juan xrak'axaj k'a ronojel, roma ja ri rutijoxela' ri xebetzijon chire. Roma ri' rija' xeroyoj e ka'i' chike rije',

¹⁹y xeruteq-el rik'in ri Jesús richin xbekibij chire: ¿Kan ja rat ri Cristo ri qoyoben? ¿O xa niqoyobej chik na jun?

²⁰Ri e rutaqon-el ri Juan, xe'apon k'a rik'in ri Jesús. Y xkibij: Ri Juan oj rutaqon-pe awik'in, richin noqak'utuj chawe wi ja rat ri Cristo ri qoyoben o xa k'o chi niqoyobej chik na jun, xecha'.

²¹Chupan k'a ri ramaj ri' toq ek'o-qa chiri' ri e ka'i' rutijoxela' ri Juan, ri Jesús e k'iy k'a winaqi' xeruk'achojirisaj chire ri yabil, y chire ri nima'q taq ruk'ayewal. Xerelesala' chuqa' itzel taq espíritu ri ek'o kik'in ch'aqa' winaqi', y xuben chuqa' chike chi e k'iy moyi' ri xetzu'un.

²²K'ari' ri Jesús xubij chike ri tijoxela' ri': Wakami kixtzolin, y titzijoj chire ri Juan ri xitz'et kan y xiwak'axaj: Ri moyi' yetzu'un, ri e jetz' yebiyin, ri e yawa'i' rik'in ri yabil ri nutaluj-ri' yek'achoj, ri man ye'ak'ex ta yek'achoj, ri kaminaqi' yek'astej y ri winaqi' ri man jun k'o kik'in, ninbij ri utzilej ch'abel richin kolotajik chike.

²³Tibij k'a chire chi jun wineq ri kan rukuquban ruk'u'x wik'in y man jun bey yirumalij kan, jebel ruwa-ruq'ij, xcha'.

²⁴Toq ri e rutaqon-pe ri Juan xetzolin, ri Jesús xerubila' k'a utzilej taq tzij chirij ri Juan chikiwech ri winaqi' ri ek'o chiri'. Kere' k'a ri nubij: ¿Achike ri xibetz'eta' rix chiri' pa tz'iran ruwach'ulew? ¿Xitz'et jun achin chiri', ri achi'el aj, ri nibe-kela' nibe-kela' pa ruq'a' ri kaq'iq'?

²⁵¿Achike ri xibetz'eta' rix chiri'? ¿Xitz'et kami rix jun achin ri jebel taq tzieq e rukusan? Man keri' ta. Roma ri achi'a' e kikusalon tzieq keri', xa pa rachoch ri rey ek'o-wi.

²⁶¿Jak'a achike ri xibetz'eta' rix chiri' pa tz'iran ruwach'ulew? ¿Jun achin ri niq'alajirisan ruch'abel ri Dios ri xitz'et chiri'? Ja'. Rija' kan más wi chuwech jun q'alajirisey ruch'abel ri Dios.

²⁷Chirij k'a ri Juan nich'on-wi ri Dios chupan ri ruch'abel ri tz'ibatel kan, toq nubij:*f14* Xtuteq-pe jun ya'ol rutzijol, richin ja rija' ri xtijaqo ri bey chuwech, keri' ri tz'ibatel kan.

²⁸Tiwetamaj k'a, chi janipe' winaqi' ri e alaxineq chuwech re ruwach'ulew, man jun k'a ri más ta ruq'ij chuwech ri Juan. Jak'a ri más maneq ruq'ij pa rajawaren ri Dios xa kan más nim ruq'ij chuwech ri Juan, xcha'.

²⁹Ek'o k'a apo chijun ri tinamit chiri' y ek'o chuqa' moloy méro ri k'o chi nitoj chire ri rey, ri xkak'axaj ri xubij ri Jesús. Rije' xkibij k'a chi ri Dios yalan choj. Roma ri' xqasex ya' pa kiwi' roma ri Juan.

³⁰Jak'a ri fariseo y ri etamanela' chirij ri pixa' man xkajo' ta xkik'ul ri kan ruch'obon ri Dios chi kan kichin chuqa' rije'. Roma ri' man xkajo' ta xqasex ya' pa kiwi' roma ri Juan.

³¹Y ri Jesús xubij chik: ¿Achike kami ninbij chikij ri winaqi' richin re q'ij re'? ¿Achoq ik'in e junan wi?

³²Rije' xa e junan kik'in ri alaboni' ri ek'o pa taq bey. Roma rije' rik'in kuchuq'a' yech'on chikiwech, y nikibij k'a chupan ri ketz'anen: Xojq'ojoman rik'in xul rik'in kikoten chiwech, jak'a man xixxajo' ta. Xqabixaj bix richin bis chiwech, jak'a man xixoq' ta, yecha'.

³³Roma toq xok'ulun ri Juan, rija' xmewayin, y man xuqum ta chuqa' ri vino. Jak'a rix xibij chire chi rija' k'o itzel espíritu rik'in.

³⁴Toq xinoqaqa yin, ri xiqaqa-pe achi'el wineq chi'ikojol, nintej kaxlan-wey, y ninqum chuqa' vino. Jak'a rix nibij chuwe chi xaxe wa'in ninwajo', y nibij chuqa' chi in jun q'abarel, chi in kachibil ri moloy méro y in kachibil chuqa' ri man nikitzeqelibej ta chuqa' ri ipixa'.

³⁵Jak'a ri na'oj niq'alajin pa kik'aslen ri winaqi' ri yetzeqeliben richin ri na'oj, xcha' ri Jesús.

³⁶K'o k'a jun chike ri fariseo ri rubini'an Simón xroyoj ri Jesús richin jun wa'in pa rachoch; y toq ri Jesús y ri ch'aqa' chik xe'ok-apo chiri', xeraq'e' k'a apo chuchi' ri mesa.*f15*

³⁷Chuqa' k'o jun ixoq ri itzel ruk'aslen ri aj chiri'. Re ixoq re', xretamaj k'a chi ri Jesús k'o pa rachoch ri Simón, roma ri' rija' xapon chiri'. Rija' ruk'uan-apo jun k'ojelibel ri banon rik'in ri abej alabastro. Re k'ojelibel re' k'o-el jun ruwech jubulej aq'om chupan.

³⁸Re ixoq re' xapon k'a rik'in ri Jesús, y xpa'e' k'a qa chiraqen; janila k'a noq' y xulukuba-qa-ri' chiri'. Y ri ruya'al taq runaq'-ruwech re ixoq re' yeqaqa-qa chirij raqen ri Jesús. K'ari' xerusu' ri raqen rik'in ri rusumal taq ruwi', yerutz'ubala' y xuya' ri jubulej aq'om chirij.

³⁹Ri Simón, toq xutz'et ri xuben ri ixoq, xuch'ob-qa: Wi ta re Jesús kan qitzij wi chi q'alajirisey ruch'abel ri Dios, nunabej ta achike ixoq nichapo la raqen. Roma la jun ixoq la' itzel ruk'aslen, xcha-qa.

⁴⁰Jak'a ri Jesús xubij chire: Simón, k'o jun ri ninwajo' ninbij chawe, xcha'. Ri Simón xubij chire: Wajaw, ¿achike k'a ri nawajo' nabij chuwe?, xcha'.

⁴¹Ri Jesús xubij jun k'ambel-tzij chire: Ek'o k'a e ka'i' achi'a' k'o kik'as rik'in jun achin ri niya'on méro pa qajik. Jun chike re achi'a' re', ik'owineq kablajuj mul ruwi' ri ruk'as chuwech ri jun chik.

⁴²Jak'a re e ka'i' achi'a' re' man yetikir ta nikitoj ri kik'as; roma ri' ri achin ri yoyon méro pa qajik chike xubij chi man chik tikitoj, xa tik'is keri'. Wakami k'a tabij chuwe: ¿Achike k'a chike re e ka'i' achi'a' re' ri más najowan richin ri achin ri niya'on méro pa qajik?, xcha'.

⁴³Ri Simón xubij: Yin ninbij chi ja ri más k'iy ruk'as xuben rik'in, xcha'. Ja', keri', xcha' ri Jesús chire ri Simón.

⁴⁴Ri Jesús rutzuliben ri ixoq toq xubij chire ri Simón: ¿Natz'et re ixoq re'? Yin toq xinok-pe re wawe' pan awachoch, man xaya' ta nuya' ch'ajibel-waqen. Jak'a re ixoq re' xeruch'ej re waqen rik'in ri ruya'al taq runaq'-ruwech, y xeruchaqirisaj rik'in ri rusumal taq ruwi'.

⁴⁵Chuqa' toq xinok-pe, man xinatz'ubaj ta richin xinaq'ejela'. Jak'a re ixoq re', ja ri waqen ri e rutz'uban re jampe' kinoqaqa.

⁴⁶Rat chuqa' man xaq'ej ta juba' aceite pa nujolon toq xinok-pe. Jak'a re ixoq re', kan jubulej aq'om ri xuyala' chirij re waqen.

⁴⁷Roma ri' ninbij chawe rat, Simón, chi re ixoq re' xkuyutej ri janila rumak. Roma ri' janila nrajo' ri xkuyu ri rumak. Jak'a ri xa man k'iy ta ri rumak ri xekuyutej, xa man kan ta nrajo' ri xkuyu ri rumak, xcha'.

⁴⁸K'ari' ri Jesús xubij chire ri ixoq: Ri amak xekuyutej yan, xcha'.

⁴⁹Y konojel ri winaqi' ri ek'o junan rik'in ri Jesús ri chiri' pa mesa, nikibila' k'a chikiwech: ¿Achike k'a chi achin re'? Roma kan yerukuy chuqa' mak, yecha'.

⁵⁰K'ari' ri Jesús xubij chire ri ixoq: Xakolotej, roma xakuquba' ak'u'x wik'in. Katzolin k'a rik'in uxlanibel-k'u'x, xcha'.