Read Kaqchikel Deut 10 Bible Online

Deut 10 - Kaqchikel bible

Deut 10

¹Chupan ri q'ij ri', ri Jehová xubij chuwe: Tachoyo' ka'i' tz'alem taq abej junan rik'in ri xinjech chawe pa nabey. Chuqa' tabana' kan jun káxa rik'in tz'alem. K'ari' kajote-pe wik'in wawe' pa ruwi' re juyu',

²y xtintz'ibaj-el chuwech ri tz'alem taq abej ri' ri ch'abel ri xentz'ibaj chuwech ri xe'apaxij; y re' xke'ayek chupan ri káxa, xcha' chuwe.

³Yin kan xinteq rubanik ri káxa ri' y ja ri che' acacia ri xukusex chire. Chuqa' xinteq rubanik ri ka'i' tz'alem taq abej achi'el rubanik ri ka'i' nabey. Xink'uaj-el y xibe k'a el pa ruwi' ri juyu'.

⁴Ri Jehová kan xutz'ibaj chik chuwech, achi'el ri xutz'ibaj-pe pa nabey ri lajuj rupixa', y xuya' chik pe chuwe. Re' kan junan k'a rik'in ri ch'abel ri xubij chiqe toq xch'on pa ruwi' ri juyu' pa jun ruxaq-q'aq' chupan ri q'ij richin molojri'il.

⁵K'ari' xiqaqa-pe pa ruwi' ri juyu'; y xenya' ri tz'alem taq abej ri' chupan ri káxa, achi'el xubij ri Jehová chuwe, y chiri' ek'o-wi k'a re wakami, xcha' ri Moisés.

⁶Ri israelita xe'el-el pa Beerot-bené-jaacán y xe'apon pa Moserá; chiri' xken-wi kan ri Aarón y chiri' chuqa' xmuq wi kan. Y ja ri Eleazar ri ruk'ajol xk'oje' kan pa ruk'exel richin xok kan nimalej sacerdote.

⁷Chirij ri' xe'el-el chiri' y xe'apon pa Gudgoda, y xe'el chik el chiri' y xe'apon pa Jotbata, ri akuchi janila kokoj taq raqen-ya' ek'o.

⁸Chupan ri q'ij ri' ri Jehová xucha' ri tzobaj richin kan ri Leví richin chi ja rije' ri ye'uk'uan ri káxa richin ri rujikibel-tzij, y richin nikisuj kamelabel y nikik'utuj urtisanik pa qawi', achi'el nikiben k'a re q'ij re'.

⁹Roma ri' ri e levita maneq ulew richin tiko'n xkichinaj chikikojol ri kach'alal, roma ri xkichinaj rije' ja ri xek'oje' kan pa rusamaj ri Jehová, achi'el rubin rija' chike.

¹⁰Y ri Moisés xubij chike ri ruwinaq: Chupan ri q'ij ri' yin xik'oje' pa ruwi' ri juyu', kawineq q'ij y kawineq aq'a' achi'el xinben ri nabey mul. Y ri Jehová kan xirak'axaj k'a jun bey chik y roma ri' man xeruk'is ta.

¹¹Ri Jehová kere' k'a xubij chuwe: Kabiyin y katik'o chikiwech ri awinaq, y kixbiyin chupan ri ruwach'ulew ri xinjikiba' chike ri iwati't-imama' richin nok iwichin, xcha' chuwe.

¹²Wakami k'a nuwinaq, ri Jehová ri qa-Dios jare' ri nuk'utuj chiqe: Kan tiqaya' rejqalen, kan tiqatzeqelibej ri bey ri niqa' chuwech rija'. Kan tiqajo' y kan tiqaya' ruq'ij-ruk'ojlen rik'in ronojel qánima y chijun ri qak'aslen.

¹³Chuqa' tiqataqej ronojel ri pixa', richin keri' kan utz xqojbe chupan ri qak'aslen.

¹⁴Ri Jehová ri qa-Dios kan richin k'a rija' ri kaj ri tz'etel y ri man tz'etel ta, y chuqa' chijun ruwach'ulew, y ronojel ri ek'o chuwech.

¹⁵Y man rik'in ri', kan xuya' k'a ri rajowabal pa kiwi' ri qati't-qamama', roma ri' xojrucha' roj ri oj kijatzul kan rije' chikikojol konojel ri winaqi', achi'el rubanon wakami.

¹⁶Kan tiyaka' k'a ronojel ri rujikibel-tzij ri Dios pa taq iwánima y man chaq tikowirisaj-iwi'.

¹⁷Roma ri Jehová ri qa-Dios kan ja rija' ri Dios pa kiwi' konojel ri dios ri ek'o, y kan ja rija' ri Ajaw pa kiwi' konojel ajaw ri ek'o. Rija' kan Dios nim rejqalen ri k'o ronojel uchuq'a' pa ruq'a' y kan ruk'amon yojbaybot chuwech. Rija' man nuben ta rukojol kik'in ri winaqi', ni man yojtikir ta niqapuaqij.

¹⁸Rija' kan yeruto' k'a ri meba'i' y ri malkani', y chuqa' kan yerajo' ri man e aj pa qatinamit ta, y roma ri' kan nuya' kiway y kitziaq.

¹⁹Kan keri' chuqa' tiqabana' roj, keqajo' k'a ri man e qawinaq ta, roma roj xa kan xojk'oje' chuqa' pan Egipto.

²⁰Kan chuwech k'a ri Jehová ri qa-Dios tiqaxibij-qi' y kan xaxe rija' tiqaya' ruq'ij y tiqasamajij. Y pa rubi' k'a rija' xtiqaya' ri qatzij.

²¹Kan tiqanimirisaj k'a ri rubi' ri Jehová, roma kan xuben k'a nima'q taq banobel ri kan nak'en rukiy qoma roj, y re' kan xqatz'et.

²²Toq ri qati't-qamama' xe'apon pan Egipto xaxe e oxk'al lajuj wineq, jak'a re wakami ri Jehová ri qa-Dios xuben chiqe chi janila xojwinaqir achi'el ri kajlabal ri ch'umila' ri ek'o chila' chikaj.