Read Kaqchikel Deut 11 Bible Online

Deut 11 - Kaqchikel bible

Deut 11

¹Kan tiwajo' k'a ri Jehová ri qa-Dios ronojel q'ij chire ri ik'aslen, y kan titaqej k'a ronojel re pixa' re'.

²Kan tiq'ax k'a chiwech wakami, ronojel ri xiwetamaj chirij ri xuben ri Jehová qik'in richin chi xojrutijoj chuwi tijoj-poqonal, roma kan ja rix xixtz'eton y man ja ta ri iwalk'ual. Rix kan xitz'et k'a ri runimirinen y ri nimalej ruchuq'a'.

³Xitz'et k'a ri nima'q taq banobel ri xuben ri Jehová pan Egipto pa ruwi' ri rey y pa kiwi' konojel ri ruwinaq.

⁴Xitz'et k'a ri xuben kik'in ri aj-labal richin ri Egipto, kik'in ri kikiej y ri ki-carruaje, y toq xek'is kan chuxe' ri Kaqa-Palou toq xojkitzeqelibej-pe. Ri Jehová kan xeruk'is k'a kan jumul.

⁵Toqaqa k'a chi'ik'u'x ronojel ri xuben qik'in roj chupan ri tz'iran ruwach'ulew k'a toq xojoqaqa re wawe'.

⁶Xitz'et ri xuben ri Jehová chiqakojol kik'in ri Datán y ri Abiram, ri e ruk'ajol ri Eliab, rijatzul kan ri Rubén, toq xjaqatej ri ruwach'ulew y xerubeq' chi achijlonel, ixjayilonel y alk'ualaxel, keri' chuqa' ri kachoch ri banon rik'in tzieq y ronojel ri kawej.

⁷Kan ja rix k'a ri xixtz'eton ronojel ri nima'q taq banobel ri xerubanala' ri Jehová.

⁸Roma ri' kan tiyaka' k'a ronojel ri pixa' ri xinbij chiwe re q'ij re', richin kan xtik'oje' iwuchuq'a' y kan xtiwichinaj ri ulew ri xtibeya'ox chiwe.

⁹Richin keri' kan xtiyaloj ri ik'aslen chuwech ri jebelej ruwach'ulew ri rusujun ri Jehová chike ri qati't-qamama' y chiwe rix ri ix kijatzul.

¹⁰Ri ruwach'ulew ri xtiwichinaj man achi'el ta ri ruwach'ulew Egipto, akuchi xojel-wi-pe. Chiri' kan xeqatik na y xeqaya'aj na ronojel tiko'n achi'el niban chike ri tiko'n ri ek'o pa taq qejoj.

¹¹Jak'a ri xtiwichinaj rix, kan jun ruwach'ulew ri kan k'o juyu' y taq'aj, ruwach'ulew ri kan niya'ex roma ri job.

¹²Ri ruwach'ulew ri' kan ja ri Jehová ri qa-Dios nichajin, y ri rutzubal kan ruya'on pa ruwi' richin q'asen.

¹³Wi rix kan xtitaqej ri pixa' ri xinya' chiwe re q'ij re', y kan niwajo' ri Jehová ri qa-Dios, y kan nisamajij rik'in ronojel iwánima y chijun ri ik'aslen,

¹⁴rija' kan xtuya-pe ri job pa ruq'ijul pa ruwi' ri ruwach'ulew. Keri' chuqa' xtuya-pe ri saq'ij richin keri' xtik'ol ri jalajoj ruwech ixin, ri vino y ri aceite richin olivo.

¹⁵Y chuqa' xtuben chi nik'ase-pe q'os pa juyu' richin nikitej ri iwawej, y chuqa' kan xtik'ase' ri iway rix y xtitej k'a janipe' ri niwajo'.

¹⁶Kan tichajij k'a iwi'; man kixq'olotej; man tijech'ej kan iwi' rik'in rija' richin niya' kiq'ij ch'aqa' chik dios y yixxuke' chikiwech.

¹⁷Wi keri' xtiben, ri Jehová kan xtiyakatej royowal pan iwi' rix, y man xtuteq ta pe ri job; y ri ulew man xtiwachin ta chik, y kan chi'anin xkixken roma wayjal.

¹⁸Roma ri' kan tiyaka' k'a re ch'abel re' pa taq iwánima y tich'obo'. Tixima' k'a chirij iq'a' y ri nik'aj iwech richin jun retal.

¹⁹Ke'itijoj k'a ri iwalk'ual chire re ch'abel re' toq ixk'o pa taq iwachoch, toq ix beneq pa taq bey, toq yixkotz'e-qa y toq yixyakatej-el.

²⁰Y kan titz'ibaj k'a chuwech ri ruchi' taq iwachoch,

²¹richin chi rix y chuqa' ri iwalk'ual xtiyaloj ri ik'aslen chupan ri ruwach'ulew ri rusujun kan ri Jehová chike ri qati't-qamama'. Keri' ri ik'aslen kan xtiyaloj achi'el ri ch'umila' ri ek'o chuwech ri kaj.

²²Wi rix kan xtitaqej pa ruchojmilal ri pixa' ri xinbij chiwe y kan niben ri nubij y kan niwajo' ri Jehová ri qa-Dios, y kan nitzeqelibej ri bey richin rija',

²³ri Jehová kan xkerujech pan iq'a' ri etzelanel iwichin. Xkerelesaj k'a el ri winaqi' ri' stape' kan e k'iy y kan más kuchuq'a' chiwech rix. Chupan k'a ri kiruwach'ulew rije' xkixk'oje-wi kan rix.

²⁴Ronojel ri ruwach'ulew ri akuchi xkixq'ax-wi jari' xtok iwichin, nitiker-pe pa xokon chire ri tz'iran ruwach'ulew y napon k'a pa Líbano, y nitiker-pe pa relebel-q'ij chire ri raqen-ya' Éufrates y napon k'a chuchi' ri palou.

²⁵Man jun k'a ri xtupaba' ta ri' chiwech, roma ri Jehová ri qa-Dios xtuben chike chi xtikik'en ikiy, y xtipe jun nimalej xibinri'il pa kiwi' ri winaqi' ri ek'o pa nima'q taq ruwach'ulew ri akuchi xkixq'ax-wi, achi'el ri rubin rija' chiwe.

²⁶Chupan k'a re q'ij re' ninya' chiwech richin nicha' chukojol ri urtisanik y ri etzelanik.

²⁷K'o urtisanik wi rix kan ninimaj ri pixa' ri ruya'on ri Jehová ri qa-Dios ri xinbij chiwe wakami.

²⁸Ri etzelanik xtik'ul k'a wi rix man xtinimaj ta ri pixa' ri xinbij chiwe wakami, y wi xtich'er kan iwi' richin ye'itzeqelibej kan jujun chik dios ri xa man iwetaman ta kiwech.

²⁹Toq ri Jehová ri qa-Dios ix rukusan chik apo chupan ri ruwach'ulew ri xtiwichinaj kan, kan xtiqaq'alajirisaj k'a re urtisanik re' pa ruwi' ri juyu' Guerizim, y re etzelanik re' xtiq'alajirisaj pa ruwi' ri juyu' Ebal.

³⁰Ri juyu' ri', ek'o la juk'an-apo chire ri raqen-ya' Jordán chupan ri kiruwach'ulew ri aj-Canaán. Ek'o pa qajbel-q'ij chire ri taq'aj chuwech-pe ri tinamit Guilgal chunaqaj ri paten-che' richin ri Moré.

³¹Rix kan jare' k'a xkixq'ax la juk'an-apo ruchi' raqen-ya' y xtok iwichin ri ruwach'ulew ri xtuya' ri Jehová ri qa-Dios chiwe. Toq rix xe'ich'ek yan y ixk'o chik chupan,

³²kan titz'eta' k'a richin niben ronojel ri nubij ri pixa' ri ya'on chiwe.