Read Kaqchikel Deut 16 Bible Online

Deut 16 - Kaqchikel bible

Deut 16

¹Toq napon ri ik' Abib kan tibana' ri nimaq'ij richin natabel toq ri Jehová xuya' ri Solbelri'il, richin niya' ruq'ij-ruk'ojlen rija', roma chupan jun aq'a' chire ri ik' ri' jari' toq rija' xojrelesaj-pe pan Egipto.

²Chupan k'a ri nimaq'ij ri', xtikamisaj k'a wákix y karne'l richin nitej chiri' akuchi rucha'on-wi ri Jehová richin niya' ruq'ij.

³Ri ti chikop ri' nitej rik'in kaxlan-wey ri maneq ch'amilej-q'or rik'in. Wuqu' k'a q'ij nitej ri kaxlan-wey keri'. Re' nuk'exewachuj ri tijoj-poqonal, roma kan chi'anin k'o chi xojel-pe pan Egipto. Keri', kan chijun k'a ik'aslen toqaqa chi'ik'u'x ri q'ij toq xojel-pe pan Egipto.

⁴Chupan ri wuqu' q'ij ri' man tik'oje' ch'amilej-q'or iwik'in chupan chijun ri iruwach'ulew. Chuqa' chire ri ti'ij ri xtitej chupan ri tiqaq'ij ri', man jun nik'oje' kan richin ri jun chik q'ij.

⁵Y man tikamisaj ri chikop ri' chupan xabachike tinamit,

⁶xa kan xaxe ri akuchi rucha'on-wi ri Jehová ri qa-Dios, richin niya' ruq'ij-ruk'ojlen. Chiri' k'o chi nikamisaj ri chikop ri' toq niqaq'ij-qa, roma jari' toq xojel-pe pan Egipto.

⁷Ri ti'ij ri' xtisa' y nitej ri akuchi rucha'on-wi ri Jehová ri qa-Dios, y ri jun chik q'ij jari' yixtzolin pa taq iwachoch.

⁸Waqi' q'ij nitej ri kaxlan-wey ri maneq ch'amilej-q'or rik'in, y pa ruwuq q'ij nimol-iwi' y yixuxlan richin niya' ruq'ij-ruk'ojlen ri Jehová ri qa-Dios; ri q'ij ri' kan man jun achike samaj niben.

⁹Toq q'axineq chik wuqu' semana chire ri q'ij toq nichap ri q'atoj trigo,

¹⁰jari' toq k'o chi ninimaq'ijuj ri semana richin niya' ruq'ij-ruk'ojlen ri Jehová ri qa-Dios. Y xtik'uaj k'a apo ri sipanik ri janipe' k'a nalex-pe pan iwánima, ri achi'el k'a ri urtisanik ri ruya'on ri Jehová ri qa-Dios pan iwi'.

¹¹Kan xkixnimaq'ijun k'a chuwech ri Jehová ri qa-Dios ri chiri' ri akuchi ruch'aron-wi rija', richin niya'ox ruq'ij, junan kik'in ri iwalk'ual, ri isamajela', ri levita ri xkek'oje' pan itinamit, ri winaqi' ri man e iwinaq ta, ri meba'i' y ri malkani' ri xkek'oje' chi'ikojol pa taq itinamit.

¹²Toqaqa k'a chi'ik'u'x chi roj chuqa' xojxime' pa samaj chupan ri ruwach'ulew Egipto, roma ri', kan tibana' k'a ronojel re ninbij chiwe wakami.

¹³Y toq xiyitz' yan ri ruya'al ri uva y xiq'et yan ri trigo, jari' toq xkixnimaq'ijun wuqu' q'ij richin ri taq jay banon rik'in ruq'a' taq che'.

¹⁴Y kan kixkikot k'a chupan ri nimaq'ij, toq yixuxlan y niya' ruq'ij ri Dios; rix, ri iwalk'ual, ri isamajela', ri e levita, ri winaqi' ri man e iwinaq ta, ri meba'i' y ri malkani' ri ek'o chupan ri iruwach'ulew.

¹⁵Wuqu' k'a q'ij xkixnimaq'ijun richin niya' ruq'ij-ruk'ojlen ri Jehová ri qa-Dios chiri' akuchi rucha'on-wi rija', roma kan xtuya' urtisanik pan iwi' rik'in ronojel ri itiko'n y pa ruwi' ronojel ri samaj ri xtiben. Kan xkixnimaq'ijun rik'in janila kikoten.

¹⁶Konojel ri achi'a' k'o chi ye'apon oxi' mul pa jun juna', chuwech ri Jehová chiri' akuchi rucha'on-wi rija'; chupan ri nimaq'ij richin ri kaxlan-wey ri maneq ch'amilej-q'or rik'in, ri nimaq'ij richin ri Pentecostés y ri nimaq'ij richin ri taq jay banon rik'in ruq'a' taq che', y man jun tapon chuwech ri Jehová ri qa-Dios ri man jun ruk'uan-el.

¹⁷Chi'ijujunal xtik'uaj-apo ri isipanik achi'el ri urtisanik ri ruya'on ri Jehová ri qa-Dios pan iwi'.

¹⁸Kan ke'ikanola' k'a to'onela' y samajela' richin ri tinamit, richin nikiq'et-tzij pa ruwi' chijun ri ruwach'ulew ri xtibeya'ox chiwe chi'ijujunal ri tzobaj, richin keri' yixbiyin rik'in ruchojmilal.

¹⁹Kan tibana' ronojel pa ruchojmilal. Man tiben chi niya' chire jun ri xa man ruk'amon ta richin nuk'ul, y man tiben chi man niya' ta chire jun ri ruk'amon richin nuk'ul. Man tirayij chi yixpuaqix. Roma wi keri' niben xa nuben chiwe richin nutz'apej runaq'-iwech richin niben pa ruchojmilal y ri iq'atbel-tzij xa nuben chi ja ri e choj yeqaqa kan chuxe'.

²⁰Ja ri ruchojmilal, y kan xaxe ri ruchojmilal ri k'o chi nitzeqelibej, richin yixk'ase' y xtiwichinaj ri ruwach'ulew ri xtiberuya' ri Jehová ri qa-Dios chiwe.

²¹Chunaqaj ri akuchi ibanon-wi ri porobel richin ri Jehová ri qa-Dios, man jun che' titik-qa richin niya' ruq'ij ri ixoq-dios Asera.

²²Man jun wachibel paban tiben rik'in abej richin niya' ruq'ij, roma re' kan nretzelaj ri Jehová ri qa-Dios.