Read Kaqchikel Deut 18 Bible Online

Deut 18 - Kaqchikel bible

Deut 18

¹Ri e sacerdote levita y chijun ri tzobaj richin Leví man jun xtikichinaj achi'el ri ch'aqa' chik qawinaq. Roma ri kamelabel y ri sipanik ri niqasuj chuwech ri Jehová, jari' ri xtok kichin rije'.

²Man xtikichinaj ta ri ulew richin tiko'n achi'el konojel qawinaq, roma ri xkichinaj rije' ja ri xek'oje' kan pa rusamaj ri Jehová, achi'el rubin rija' chike.

³Toq xtisuj ri iwawej richin kamelabel, ri sacerdote k'o chi xtikik'ul ri rij ruwi', ri rukaxtate'*f4* y ri rupan.

⁴Chuqa' k'o chi nikik'ul ri nabey taq ruwech tiko'n richin ri jalajoj ruwech ixin, ri vino, ri aceite y ri nabey rusumal ri karne'l ri nisokaj-el.

⁵Roma ja ri Jehová ri qa-Dios ri xcha'on kichin rije' y ri kijatzul chikikojol ri ch'aqa' chik tzobaj richin Israel, richin nikisamajij rija' jantape'.

⁶Wi k'o jun levita chupan xabachike tinamit chire ri iruwach'ulew y nrajo' nipe pa rachoch ri Jehová richin nusamajij rik'in ronojel ránima,

⁷kan utz k'a xtusamajij ri Jehová ri qa-Dios kik'in ri e rachibil levita ri ek'o chiri' chuwech rija'.

⁸Junan ri kiway xtikik'ul, achi'el nikik'ul ri ch'aqa' chik levita, pa ruwi' ri nikik'ul chuwi-kiq'a' ri e aj pa rachoch.

⁹Toq xkixok chupan ri ruwach'ulew ri akuchi xtuya-wi ri Jehová ri qa-Dios chiwe; man titzeqelibej ri itzel taq banobel ri nikiben ri ch'aqa' chik ruwach'ulew.

¹⁰Man jun chiwe ri xtusuj ri ralk'ual richin kamelabel y nuq'axaj pa q'aq'. Man ye'ik'ulubej k'a ri yech'on kik'in ri espíritu, richin niwetamaj ri peteneq chiwech, ni man yixch'on kik'in ri kaminaqi'. Man niya' q'ij chi yek'oje' aj-itza' chi'ikojol. Ni man kixq'olon rik'in meyel taq banobel.

¹²Roma ronojel re' kan man niqa' ta chuwech ri Jehová y kan itzel yerutz'et ri yebanon ronojel re'. Xa roma ri' xkerelesaj-el ri winaqi' pa kiruwach'ulew y xkerujech pan iq'a', roma ri kibanobal man niqa' ta chuwech ri Dios.

¹³Jak'a rix kan choj ri ik'aslen tibana' chuwech ri Jehová ri qa-Dios.

¹⁴Roma ri tinamit ri akuchi xtiwichinaj-wi, kan yekiben ronojel re itzel taq banobel re'. Jak'a chiwe rix; ri Jehová ri qa-Dios man xtuya' ta q'ij richin keri' xtiben.

¹⁵Ri Jehová ri qa-Dios xtuyek-pe chi'ikojol jun q'alajirisey ruch'abel rija', achi'el yin; y kan k'o chi xtinimex rutzij.

¹⁶Re' kan roma keri' ri xik'utuj chire ri Jehová ri qa-Dios, toq xch'on qik'in pa ruwi' ri juyu' Horeb, ri q'ij toq xqamol-qi' chiri'. Jari' toq rix xibij chi man niwajo' ta chik niwak'axaj ri ruch'abel ri Jehová ri qa-Dios, ni man niwajo' ta chik nitz'et ri jun nimalej ruxaq-q'aq' ri', richin keri' man yixken ta.

¹⁷K'ari' ri Jehová xubij chuwe: Ja' kan utz wi ri xkibij.

¹⁸Yin xkibanon richin chikikojol rije' xtel-wi-pe jun q'alajirisey ri nuch'abel achi'el rat, jun ri kan iwinaq rix, y kan xtubij chike ri winaqi' achike ri xtinbij chire.

¹⁹Y xabachike wineq ri man nrak'axaj ta ri nuch'abel ri nuq'alajirisaj rija' pa nubi' yin, ri wineq ri' kan xtinq'et k'a tzij pa ruwi'.

²⁰Jak'a wi k'o jun niyakatej-pe y nuben chi nuq'alajirisaj ri nuch'abel y nubij ch'abel ri xa man nubin ta yin chire, o wi nich'on pa kibi' ch'aqa' chik dios, re wineq re' kan nikamisex, xcha' ri Jehová chuwe.

²¹Rik'in juba' rix nich'ob-qa achike rubanik niben richin niwetamaj chi ri xubij ja ri Jehová biyon chire o ni.

²²Wi ri q'alajirisanel nubij pa rubi' ri Jehová, y man xtibanatej ta ri nubij, re' jun retal chi man ja ta ri Jehová ri qa-Dios biyon chire, nel chi tzij chi re q'alajirisanel re', xa xubij richin nunimirisaj-ri', roma ri' man tixibij-iwi' chuwech.