Read Kaqchikel Deut 19 Bible Online

Deut 19 - Kaqchikel bible

Deut 19

¹Toq ri Jehová ri qa-Dios xkeruk'is-el ri winaqi' chuwech ri ruwach'ulew ri xtuya' chiwe rix richin niwichinaj y kan xkixk'ase' chupan ri nima'q taq tinamit y chupan ri jay ri ek'o chiri',

²jari' k'a toq xtich'er pan oxi' ri ruwach'ulew ri xtuya' ri Jehová ri qa-Dios chiwe richin xtok iwichin. Y pa kinik'ajal ri oxi' ri' xtik'oje' jujun tinamit richin tobel. Chuqa' nichojmirisaj k'a ri bey ri napon chupan chikijujunal re tinamit re' richin chi xabachike wineq ri xtibanon jun kamik xtanimej y chiri' nuto-wi-ri'.

⁴Wi jun wineq chaq k'ate' nukamisaj jun chik y xa man jun oyowal chikikojol, rija' ruk'amon chi xtanimej-el y nibe chiri' chupan ri tinamit richin tobel richin nukol-el-ri'.

⁵Wi k'o ta jun ri nibe rik'in jun rachibil pa juyu' richin nibekibana' kisi' y toq nuchoy ri che' rik'in ri ikej, xjolojo-el ri ch'ich' chirij ri raqen ikej y k'a chirij ri rachibil xapon-wi y kan xken; ri xbanon keri' kan xtanimej k'a el chi'anin y nibe pa jun chike ri tinamit ri', richin nukol-el-ri'.

⁶Rik'in juba' k'o jun rach'alal ri xken ri nrajo' nuben ruk'exel chire, y nroqotaj rik'in janila royowal richin nukamisaj. Wi ta xaxe jun tinamit richin tobel k'o, y roma ri tinamit ri' kan janila nej k'o-wi, ri rach'alal ri xken kan xtuq'i' y xtukamisaj. Re' xa man ruk'amon ta richin nikamisex roma xa kan qitzij man jun rumak y chuqa' xa man jun bey xketzelaj ta ki'.

⁷Roma ri' yin ninbij chiwe chi tich'ara' oxi' tinamit richin tobel.

⁸Toq ri Jehová ri qa-Dios xtunimirisaj ri iruwach'ulew ri xtiberuya' chiwe achi'el ri sujun chike ri qati't-qamama',

⁹jari' toq rix xtiya' chik oxi' tinamit pa ruwi' ri kan k'o. Ri Jehová kan xtuya' chiwe ri ruwach'ulew ri', xaxe wi kan xtiben ronojel ri nubij ri pixa' ri ninya' yin chiwe wakami, wi kan xtisamajij, y wi kan niwajo'.

¹⁰Richin keri' man chaq xtitix ta kik' chaq keri' chuwech ri ruwach'ulew ri xtiberuya' ri Jehová ri qa-Dios chiwe, y man xtiqaqa ta pan iwi' rix ri mak ri xtibanatej.

¹¹Jak'a wi jun achin xa kan retzelan ri rachpochel y kan ruq'eleben y xapon k'a jun q'ij richin nukamisaj, y nanimej-el y nrajo' niberewaj-ri' pa jun chike ri tinamit richin tobel.

¹²K'ari' ri achi'a' ri k'o kiq'ij richin ri rutinamit xtikiteq ruk'amik chiri' chupan ri tobel. Xtijach-pe ri xbanon ri kamik pa kiq'a' ri rach'alal ri kamineq richin chi nikamisex chuqa' rija'.

¹³Man tipoqonaj ruwech ri kamisanel, richin keri' man jun mak xtiqaqa pa ruwi' ri ruwach'ulew Israel, richin keri' ronojel utz xtel chiwech.

¹⁴Chupan ri ruwach'ulew ri xtiberuya' ri Jehová ri qa-Dios chiwe richin niwichinaj kan, man chaq tichoy-apo ri k'ulba't richin ri iwachpochel, ri kibanon kan ri ojer taq winaqi'.

¹⁵Wi xa ruyon jun wineq nisujun chirij jun chik wineq rik'in xabachike mak, ch'a'oj o kamik man ruk'amon ta ninimex, xa kan xaxe ninimex kitzij wi yesujun e ka'i' o e oxi' ri xetz'eton ronojel.

¹⁶Y wi k'o jun ri nubananej chi xutz'et ronojel chirij jun, y niberusujuj, y nubij chi k'o jun rumak xuben,

¹⁷re nisujun y ri nisujux re e ka'i' re' ye'uk'uex pa rachoch ri Jehová chikiwech ri e sacerdote y ri to'onela' ri ek'o chupan ri q'ij ri'.

¹⁸Rije' nikich'ob rij jebel wi qitzij ri nubij chi xutz'et ronojel o ni. Y wi niq'alajin chi xa man qitzij ta ri nubij chirij ri jun chik wineq,

¹⁹jari' k'a niban chire achi'el ri xrajo' xban chire ri rachpochel, richin keri' nik'is ri man utz ta chi'ikojol rix.

²⁰Y toq ri ch'aqa' chik winaqi' xtiketamaj, kan xtikixibij-ki', richin keri' man tikiben chik rije' keri' chi'ikojol rix.

²¹Man tijoyowaj kiwech ri yebanon etzelal chi'ikojol, xa kan tiya' ruk'exel chike, achi'el re': Ri xtikamisan, niken chuqa' rija'; wi ja ri runaq'-ruwech xtisokotej, wi xtel jun rey, wi ja ri ruq'a', wi ja ri raqen, keri' chuqa' xtiban chire ri xtibanon.