Read Kaqchikel Deut 2 Bible Online

Deut 2 - Kaqchikel bible

Deut 2

¹Chirij ri' xojtzolin y xojbe pa tz'iran ruwach'ulew, xqak'uaj ri bey ri nibe pa Kaqa-Palou, achi'el ri rubin ri Jehová chuwe, y kan xaxe k'a chunaqaj ri chuwi' taq juyu' richin Seír xojk'oje-wi. Y kan chaq yojbe kela' yojbe kela' xqaben ri janipe' juna' xojk'oje' chiri'.

²K'ari' ri Jehová xch'on wik'in y xubij chuwe:

³Janila yan k'iy juna' ri chaq yixbe-kela' yixbe-kela' niben chunaqaj re ruwach'ulew re'. Wakami k'a kixbiyin pa ruchojmil ri xaman.

⁴Kere' tabij chire ri tinamit: Rix kan yixbeq'ax yan k'a pa kitinamit ri edomita ri ek'o chiri' pa Seír, y ri winaqi' ri' kan e iwach'alal-wi. Rije' kan xtikixibij k'a ki' chiwech, jak'a rix kan utz tibana' kik'in.

⁵Man jun tiben chike re winaqi' re' richin niyek koyowal, roma re ulew re' kan man xtinya' ta chiwe, y man jun iq'a' chire re ruwach'ulew re'. Jare' ri kichinan ri e rijatzul kan ri Esaú y ja yin ri in yoyon chike.

⁶Rix xtiloq' k'a el ronojel ri k'o chi nitej richin yixwa-yixuk'ya', xcha' ri Dios chuwe.

⁷Ri Jehová ri qa-Dios kan ruya'on k'a urtisanik pa ruwi' ronojel ri qabanon-pe; y kan oj ruchajin k'a pe chupan re jun nimalej tz'iran ruwach'ulew re'. Kan chupan k'a chi kawineq juna' k'o-pe qik'in y man jun ri man ta xuya' chiqe.

⁸Keri', roj xojbe k'a chuchi' ri kiruwach'ulew ri aj-Edom. Xojel-pe chupan ri bey ri peteneq pa tinamit Elat y Esión-guéber. Xeri' xojbe chupan ri bey ri nibe pa tz'iran ruwach'ulew richin Moab.

⁹Y ri Jehová xubij chuwe: Man jun tiben chike re winaqi' re' richin niyek koyowal, roma man ninya' ta chiwe ri ulew ri' richin niwichinaj. Roma yin xinya' yan ri tinamit Ar chike ri e rijatzul kan ri Lot richin xkichinaj kan, xubij ri Jehová, xcha' ri Moisés.

¹⁰Ojer kan xek'oje' ri winaqi' emita chiri'. Ri winaqi' ri' janila e k'iy, kan janila kuchuq'a' y nima'q kipalen, kan e achi'el ri e rijatzul kan ri Anac.

¹¹Chuqa' re winaqi' re' nibix refaíta chike y chuqa' e rijatzul kan ri Anac, stape' ri winaqi' aj-Moab nikibij emita chike.

¹²Ojer kan chupan chijun ri ruwach'ulew Seír xek'oje' ri winaqi' horeo, y xk'uluwachitej k'a chi ri edomita xekelesaj-pe chiri' y xekikamisaj konojel. Y ja k'a rije' ri xek'oje' kan chupan ri ruwach'ulew ri', kan achi'el k'a xqaben roj israelita pa ruwi' ri ruwach'ulew ri xuya' ri Jehová chiqe.

¹³Y ri Moisés xubij: Chirij re' xqaq'axaj ri ch'uti'n raqen-ya' Zéred achi'el rubin ri Jehová.

¹⁴Kan xaxe k'a toq xojel-pe pa Cadés-barnea, k'a ri q'ij toq xqaq'axaj ri ti ch'uti'n raqen-ya' Zéred, q'axineq-pe juwineq waqxaqlajuj juna'. Y roma ri' konojel ri achi'a' ri e qawinaq ri k'o chik kijuna' richin yebe pa labal toq xojel-pe pan Egipto xa xek'is yan kan, achi'el ri ya'on-tzij ri rubanon ri Jehová.

¹⁵Kan ja ri royowal ri Jehová ri xk'ison-el kichin chiqakojol ri akuchi ojk'o-wi-qa, y roma ri' xek'is kan konojel.

¹⁶Y chirij k'a ronojel ri xbanatej, toq xa xeken yan kan chiqakojol konojel ri achi'a' ri e richin labal,

¹⁷jari' toq ri Jehová xubij chuwe:

¹⁸Wakami k'a, kixbiyin y pa tinamit Ar yixok-wi-el richin niq'axaj ri ruwach'ulew Moab.

¹⁹Y toq xkixnaqajub k'a apo chikinaqaj ri winaqi' amonita, ri e rijatzul kan ri Lot, man jun tiben chike richin niyek koyowal, roma man ninya' ta chiwe ri ulew ri' richin niwichinaj, roma yin xinya' yan ri ruwach'ulew ri' chike rije', xcha' ri Moisés.

²⁰Ri ruwach'ulew ri' kan xetamex-wi chi kichin kan ri winaqi' refaíta; ja rije' k'a ri xek'oje' chiri' ri ojer kan, y ri amonita xkibij zamzumita chike.

²¹Ojer kan ri refaíta kan janila e k'iy y janila kuchuq'a' y nima'q kipalen, achi'el ri e rijatzul kan ri Anac. Ri Jehová xerukusaj k'a ri amonita richin xeruk'is-el ri winaqi' ri'. Y ja ri amonita xek'oje' kan pa kik'exel.

²²Keri' chuqa' xbanatej kik'in ri winaqi' horeo, toq ri Jehová xerukusaj k'a ri e rijatzul kan ri Esaú richin xekik'is-el ri winaqi' ri', y ja rije' xek'oje' kan pa kik'exel chiri' pa ruwach'ulew Seír.

²³Ri winaqi' heveo ri xek'oje' pa taq kokoj tinamit ri napon k'a pa tinamit Gaza, xek'is koma ri aj-Filistea ri e peteneq pa ruwach'ulew Caftor y ja rije' ri xek'oje' kan pa kik'exel.

²⁴Y ri Moisés xubij: Ri Jehová xubij chuwe chi tiqachapa' chik k'a el bey y tiqaq'axaj la raqen-ya' Arnón, roma rija' rujachon chik pa qaq'a' ri Sihón ri rey kichin ri amorreo ri k'o pa tinamit Hesbón. Y xubij chuqa' chi tiqabana' k'a labal kik'in richin yojok kan chuwech ri ruwach'ulew richin niqichinaj kan.

²⁵Y ri Jehová xubij chi xtuben chike konojel winaqi' richin ri ruwach'ulew chi xtikik'en qakiy y xtikixibij-ki' toq xtikak'axaj ri qatzijol, y roma ri' rije' kan xkebaybot y xtipe bis kik'in.

²⁶Y toq ojk'o pa tz'iran ruwach'ulew richin ri Cademot, xenteq k'a el achi'a' e ya'ol rutzijol rik'in ri rey Sihón pa tinamit Hesbón, richin nibekik'utuj utzil chire y kere' k'a xinbij-el:

²⁷Tabana' utzil chiqe richin yojq'ax-el chupan ri aruwach'ulew y kan choj k'a xtiqojqaj-el ri nima-bey y man xtiqach'er ta kan qi'.

²⁸Xtiqatoj k'a kan chiwe rik'in saqipueq, ri xtik'atzin chiqe richin yojwa-yojuk'ya'. Xaxe wi naya' q'ij chiqe richin yojq'ax-el keri'.

²⁹Achi'el xkiben qik'in ri winaqi' edomita ri ek'o pa Seír y ri winaqi' moabita ri ek'o pan Ar, keri' ta k'a xtaben qik'in rat. Kan xqojato' ta k'a toq xtiqaq'axaj ri raqen-ya' Jordán richin yojapon chupan ri ruwach'ulew ri akuchi rusujun-wi ri Jehová qa-Dios chiqe, xicha'.

³⁰Jak'a ri rey ri' man xuya' ta q'ij richin xojq'ax-el chupan ri ruwach'ulew, roma ri Jehová ri qa-Dios xukowirisaj ri ránima y kan xupaba-ri' chiqawech. Ri Jehová xuben keri' richin chi xujech pa qaq'a' ri Sihón y ri ruwach'ulew.

³¹Ri Jehová xubij chik chuwe: Yin kan nuchapon chik k'a chi ninjech ri Sihón y ri ruruwach'ulew pan iq'a', kixok k'a chupan y tichapa' ruch'akik richin nok kan iwichin jumul.

³²Toq ri Sihón y ri aj-labal xepe richin nokibana' oyowal qik'in pa Jahas,

³³jari' toq ri Jehová ri qa-Dios xujech pa qaq'a' y kan xqach'ek rija' y chuqa' ri e ruk'ajol y keri' chuqa' chijun ri rutinamit.

³⁴Y k'ari' xojok k'a chupan ronojel ri kitinamit y xeqak'is konojel; xeqakamisaj kan chi achi'a' chi ixoqi', chi ak'uala'. Y man jun xqak'asba' kan.

³⁵Xa kan xaxe k'a ri awej y ronojel ri k'o rejqalen ri xok kan qichin roj chike ri tinamit ri xeqach'ek.

³⁶Roj kan xeqach'ek k'a ronojel ri tinamit, nitiker-pe rik'in ri Aroer k'a pa Galaad, y ronojel ri tinamit ek'o-qa chuchi' ri raqen-ya' Arnón, kan man jun k'a ri xch'akon ta chiqij roj, roma ri Jehová ri qa-Dios xerujech pa qaq'a'.

³⁷Jak'a ri pa kiruwach'ulew ri amonita man xojapon ta, ni ta chupan ri ulew ri k'o chunaqaj ri ch'uti'n raqen-ya' Jaboc, y ni ta ri pa taq tinamit ri ek'o chuwi' taq juyu', achi'el ri xubij ri Jehová ri qa-Dios chiqe.