Read Kaqchikel Deut 26 Bible Online

Deut 26 - Kaqchikel bible

Deut 26

¹Juba-apo, rix xkixok chupan ri ruwach'ulew ri akuchi xtuya-wi ri Jehová ri qa-Dios chiwe richin niwichinaj y kan xkixk'oje' chupan.

²Jari' k'a xtik'uaj ri nabey ruwech ronojel ri itiko'n ri xtiben-qa chuwech ri ruwach'ulew y niya-el chupan jun chakech. Y yixbe ri akuchi k'o-wi ri rachoch ri Jehová richin xtinatex ri rubi' chiri'.

³Xkixapon k'a chuwech ri sacerdote ri xtik'oje' ri q'ij ri' y kere' k'a xtibij chire: Yin wakami yimatioxin chire ri Jehová ri qa-Dios, roma xinok chupan re ruwach'ulew ri xusuj chike ri qati't-qamama', richin xuya' chiqe, xkixcha'.

⁴Ri sacerdote xtuk'en k'a ri chakech ri niya-apo chire, y xtuya-apo chuwech ri porobel richin ri Jehová ri qa-Dios;

⁵Y kere' k'a xtibij-apo chuwech ri Jehová ri qa-Dios: Ri qati't-qamama' e aj-Aram xebe-kela' xebe-kela' xkiben y xa juba' man xeken. Chuqa' xebek'oje' pan Egipto y e juba' ok. Chiri' janila xewinaqir. Kan xe'ok jun nimalej tinamit y xk'oje' kuchuq'a'.

⁶Jak'a ri aj-Egipto janila xekiya' pa tijoj-poqonal. Kan janila xekiya' pa tijoj-poqonal y pan ilinri'il.

⁷Roma ri' xkik'utuj chawe rat Jehová ri qa-Dios, xkik'utuj richin chi ye'ato'. Rat kan xe'awak'axaj y xajoyowaj kiwech. Xawetamaj ri kowilej taq samaj y xatz'et ri tijoj-poqonal ri xya'ox pa kiwi'.

⁸Xe'awelesaj-pe pan Egipto rik'in nimalej awuchuq'a'; xe'awelesaj-pe rik'in nima'q y meyel taq banobel. Toq xe'awelesaj-pe, ri aj-Egipto kan xkik'en rukiy.

⁹Wakami roj ri oj kalk'ual kan rije' xojak'en-pe re wawe'; wakami ojk'o chupan re ruwach'ulew akuchi niwachin ronojel ruwech tiko'n.

¹⁰Wakami k'a Jehová, qak'amon-pe chawe re nabey taq ruwech qatiko'n; jare' ri nabey taq ruwech qatiko'n richin ri ruwach'ulew ri xaya' chiqe, xkixcha'. Y k'ari' xtiya' kan ri ichakach chuwech ri Jehová y kan xtiya' ruq'ij y kan xkixxuke' k'a chuwech.

¹¹Y xkixkikot k'a roma ronojel ri utzil ri xtuya' ri Jehová ri qa-Dios chiwe rix y ri e aj pan iwachoch. Keri' chuqa' xkenimaq'ijun iwik'in, ri levita y ri man e iwinaq ta ri ek'o chi'ikojol.

¹²Ronojel juna' k'o chi niya' jun chire ri lajuj, jak'a pa rox juna' ri jun chire ri lajuj, k'o chi niya' chike ri e levita, ri man e iwinaq ta, ri meba'i' y ri malkani' ri ek'o chi'ikojol, richin rije' yewa' y ye'uk'ya' pa taq itinamit y nikitej ronojel ri nikirayij.

¹³Jari' k'a toq kere' xtibij chire ri Jehová ri qa-Dios: Kan xinch'er yan kan ri nutiko'n ri ninya' chawe rat; richin xtintaluj chikiwech ri e levita y ri man e nuwinaq ta, richin xtinya' chike ri meba'i' y ri malkani', achi'el ri abin chuwe. Y man nuq'ajon ta ruwi' re apixa' re', y man numestan ta ri rubanik.

¹⁴Man jun chire ronojel re' xintej ta toq ink'o pa bis; ni man jun chire ronojel re' xinchop ta toq man in ch'ajch'oj ta; y chuqa' man jun chire re' nusujun ta chike kaminaqi'. Jehová ri at qa-Dios, yin kan nuniman-pe atzij y kan nutaqen-pe ronojel ri abin chuwe.

¹⁵Tatz'eta' k'a pe chila' chikaj ri akuchi atk'o-wi. Taya' k'a pe urtisanik pa ruwi' ri atinamit Israel; ri akuchi niwachin-wi ronojel ruwech tiko'n; achi'el ri xasuj chike ri qati't-qamama', xkixcha'.

¹⁶Ri Jehová ri qa-Dios nubij chiqe wakami chi kan tiqataqej ronojel ri pixa' ri xuya' chiqe; kan tiqachajij k'a y kan tiqasamajij k'a rik'in ronojel qánima chijun ri qak'aslen.

¹⁷Wakami kan xijikiba' k'a itzij chi kan ja ri Jehová ri i-Dios, y kan nitzeqelibej ri rubey y niben ri nubij ri pixa' ri xuya' chiwe, y chi kan jantape' xtinimaj rutzij.

¹⁸Ri Jehová xubij re wakami chi roj israelita kan oj jun tinamit richin rija' achi'el ri rusujun chiqe, roma ri' kan tiqataqej ronojel ri rupixa'.

¹⁹Rija' kan xtuben jun nimalej ruwach'ulew chiqe, nim qejqalen y kan xtel rutzijol richin kan janila ruwa-qaq'ij chikiwech ri ch'aqa' chik ruwach'ulew achi'el ri rubin rija', kan oj jun tinamit ri ch'aron roma ri Jehová ri qa-Dios, xcha' ri Moisés.