Read Kaqchikel Deut 29 Bible Online

Deut 29 - Kaqchikel bible

Deut 29

¹Y keri' chupan ri q'ij ri' ri Moisés xtane' chubixik chike ri ruwinaq re ruka'n jikibel-tzij re', toq k'a ek'o na chiri' pa Moab. Y ri nabey jikibel-tzij xban ojer kan chiri' pan Horeb.

²K'ari' ri Moisés xerumol k'a konojel ri ruwinaq y xubij chike: Rix xitz'et k'a ronojel ri xuben ri Jehová ri chiri' chupan ri ruwach'ulew Egipto, chire ri rey, chike ri rusamajela' y chire chijun ri ruwach'ulew.

³Kan xitz'et k'a ronojel ri nima'q taq tejtobenik y ri nima'q taq retal y ri meyel taq banobel ri xuben.

⁴Stape' rik'in ronojel re xitz'et, rix kan man niq'ax ta chiwech.

⁵Roma chupan ri kawineq juna', toq xixinyuqej chupan ri tz'iran ruwach'ulew, kan man xtziaqir ta ri itziaq ni ri ixajab.

⁶Stape' kan man k'a itijon ta kaxlan-wey y man iqumun ta vino y ni ta jun chik ruwech ya' ri ch'amirineq chik ri niq'abarisan, jak'a ri Dios kan ruya'on iway más utz, y re' richin chi niwetamaj chi ri Jehová jari' ri qa-Dios.

⁷Y toq xojoqaqa re wawe' xojkichop chi oyowal ri Sihón, rey richin ri Hesbón, y ri Og rey richin ri ruwach'ulew Basán, y roj kan xeqach'ek.

⁸Y xqak'en kan ri kiruwach'ulew y xqaya' chike ri tzobaj richin ri Rubén, richin ri Gad y chike ri nik'aj tzobaj richin ri Manasés richin xkichinaj.

⁹Kan titaqej k'a ri ruchojmilal y kan tibana' ri achike ri nubij, richin keri' kan ronojel k'a utz xtel chiwech ri xtiben.

¹⁰Wakami chi'iwonojel rix kan imolon-pe-iwi' chuwech ri Jehová ri qa-Dios: Ri e aj-raqen richin ri tzobaj achi'a' ri k'o kiq'ij, ri samajela' richin ri tinamit y konojel ri achi'a' ri e qawinaq,

¹¹ri taq iwalk'ual, ri iwixjayilal y ri man e iwinaq ta ri ek'o chi'ikojol, nitiker-el rik'in ri nich'aron ri isi' k'a rik'in ri neran ri iya'.

¹²Roj qamolon-qi' wawe' richin chi noqaqa chi'ik'u'x richin nitaqej ri jikibel-tzij ri xiben rik'in ri Jehová ri qa-Dios.

¹³Wakami kan nijike' k'a kan chi roj kan oj rutinamit y rija' kan qa-Dios achi'el ri rusujun chiqe y chike ri qati't-qamama': Ri Abraham, ri Isaac y ri Jacob.

¹⁴Y man xaxe ta qik'in roj re qamolon-qi' wawe' nuben ri Jehová re jun jikibel-tzij re' y re jun ya'on-tzij re',

¹⁵xa kan keri' chuqa' kik'in ri man jani ke'alex.

¹⁶Rix iwetaman jebel ri achike chi k'aslen ri xqaq'axaj-pe pan Egipto, ri xqaben toq xojq'ax chikikojol ri nima'q taq ruwach'ulew y ri achike xqak'uluwachij pa taq bey.

¹⁷Y chuqa' xitz'et ri itzel taq kibanobal ri xekiben rije', toq xekiben wachibel ri e banon rik'in che', rik'in abej, rik'in saqipueq y q'anapueq. Y ri winaqi' ri' jari' ri nikiya' kiq'ij.

¹⁸Wakami k'a man jun tuch'er kan ri' y numestaj ta kan ri Jehová ri qa-Dios, ni ta achi'a', ni ta ixoqi', ni ta ri alk'ualaxela' y ni ta ri iy-mam y ri ach'alalri'il ri richin ri tinamit, richin ye'isamajij y niya' kiq'ij ch'aqa' chik dios kichin ri winaqi' ri e richin ri ruwach'ulew ri'; roma wi k'o jun nibanon keri' chi'ikojol xa kan nok k'a achi'el ruxe' che' ri k'ey-k'ey y nikamisan.

¹⁹Rik'in juba' toq iwak'axan chik ri ch'abel richin ri ya'on-tzij k'o jun chi'ikojol ri kan janila xtuna-ri' y xtubij-qa: Yin kan man jun xtink'uluwachij stape' xtinben ronojel ri niqa' chinuwech yin, xticha-qa; y jari' ri xtibanon chi xtipe wululen chiqij qonojel.

²⁰Ri Jehová kan man jun bey xtukuy rumak ri wineq ri nich'obon keri', xa kan xtrelesaj royowal chirij ri wineq ri', y kan xtuya' ri itzel oyonik pa ruwi' achi'el ri tz'ibatajineq kan chupan re jun wuj re', y kan xtuk'is-el jumul ri rijatzul chuwech re ruwach'ulew.

²¹Y ri Jehová xtuch'er-el ri wineq ri nibanon keri' chikikojol konojel ri qawinaq y xtuben chire richin janila xtutej poqon achi'el ri etzelanik ri xtz'ibex kan chupan ri wuj richin ri pixa'.

²²Ri iwijatzul ri xkepe chiwech-apo y keri' chuqa' ri man e iwinaq ta ri yepe nej, xtikitz'et ri tijoj-poqonal y ri yabilal ri ruya'on ri Jehová pa ruwi' re ruwach'ulew re'.

²³Y xtikitz'et k'a chi ri chiri' kan xtok kan tz'iran ruwach'ulew, xa kan xaxe chik ri chuwilej-abej, atz'an y k'atineq ulew k'o y man niwachin ta chik y ni ta q'ayis man nik'ase' ta chik chuwech, roma kan xtibanatej rik'in achi'el ri xbanatej kik'in ri tinamit Sodoma, Gomorra, Admá y Zeboím, roma ri Jehová xyakatej janila royowal chikij y xeruk'is.

²⁴K'ari' ri winaqi' richin ronojel ruwach'ulew xtikik'utuj ri achike roma ri Jehová xyakatej royowal y xuben kere' chire re jun ruwach'ulew re'.

²⁵Y k'ari' xtibix k'a chikij: Kela' xkik'uluwachij roma xkimalij kan ri rujikibel-tzij ri Jehová ri ki-Dios kan ri kati't-kimama', ri jikibel-tzij ri xuben kik'in toq xerelesaj-pe pan Egipto.

²⁶Xa xekitzeqelibej-el ch'aqa' chik dios y xexukutaj chikiwech richin xkiya' kiq'ij, y re dios re' xa man ketaman ta kiwech y chuqa' man jun ri kik'ulun ta pa kiq'a'.

²⁷Roma ri' ri Jehová janila xyakatej royowal chirij re ruwach'ulew re' y xuya-pe pa ruwi', ronojel ri itzel oyonik ri tz'ibatel kan chupan re jun wuj re'.

²⁸Y rik'in k'a ri janila royowal, ri Jehová xerelesaj-el chupan re kiruwach'ulew, y xerutaluj-el pa ch'aqa' chik ruwach'ulew, achi'el re niqatz'et k'a re q'ij re', xkecha'.

²⁹Ronojel ri man tz'etel ta pa ruq'a' ri Dios ek'o-wi, jak'a ronojel ri e q'alajirisan kan, qichin k'a roj y kichin ri qalk'ual, richin jantape' niqataqej ronojel ri ruchojmilal richin re pixa' re'.