Read Kaqchikel Deut 3 Bible Online

Deut 3 - Kaqchikel bible

Deut 3

¹Chirij ri', xqachop-el ri jun chik bey ri nibe pa Basán, jari' toq ri rey Og e rachibilan-pe konojel ri aj-labal, xojokik'ulu' chiri' pa tinamit Edrei, richin nokibana' oyowal qik'in.

²K'ari' ri Jehová xubij chuwe: Man tixibij-iwi' chikiwech, roma xa xinjech yan pan iq'a' ri rey, ri e aj-labal, y chijun ri ruwach'ulew. Tibana' k'a achi'el xiben chire ri Sihón rey kichin ri amorreo, ri xek'oje' pan Hesbón, xcha' chuwe.

³Ri Jehová ri qa-Dios xujech chuqa' pa qaq'a' ri Og rey richin Basán y konojel ri aj-labal, kan xeqach'ek k'a, y kan man jun xk'ase' kan chike.

⁴Xeqach'ek k'a oxk'al tinamit y chijun ri ruwach'ulew richin Argob.

⁵Ronojel k'a re tinamit re' e sutin-kij rik'in nimaq taq tz'aq, ri kichi' kan jebel e tz'apen y kan e q'ebalon ch'ich' chirij. Ek'o chuqa' ch'aqa' chik tinamit ri man xe'ajlex ta, y man e sutin ta kij chi tz'aq.

⁶Kan xeqak'is k'a konojel ri tinamit, chi achi'a', chi ixoqi', chi ak'uala' xeqakamisaj, achi'el xqaben toq xeqak'is ri Sihón rey richin Hesbón y konojel ri ruwinaq.

⁷Xa kan xaxe k'a ri awej y ronojel ri k'o rejqalen ri xok kan qichin roj.

⁸Chupan k'a ri q'ij ri' xqak'en kan kulew ri e ka'i' rey kichin ri amorreo. Ri kiruwach'ulew k'o pa relebel-q'ij chire ri raqen-ya' Jordán: Nitiker-el rik'in ri raqen-ya' Arnón y napon k'a pa xaman chire ri juyu' Hermón,

⁹y ronojel ri chuwi' taq juyu' ri k'o chukojol ri Galaad y ri Basán, k'a pa Salcá y Edrei, xcha' ri Moisés. Ri juyu' Hermón ri aj-Sidón nikibij Sirión chire, y ri amorreo nikibij Senir chire.

¹¹Kan xaxe chik k'a ri rey Og ri k'o kan chike ri e refaíta. Ri raqen ri ruch'at*f1* ka'i' jaj rik'in ka'i' q'a'aj y ri ruwech jun jaj rik'in jun q'a'aj, y re' kan rik'in ch'ich' banon-wi. Y ri ch'at ri' k'o k'a pa kitinamit ri amonita kela' pa Rabá k'a re wakami.

¹²Y ri Moisés xubij chike: Ri ruwach'ulew ri xok kan qichin chiri', k'o pa xaman chire ri tinamit Aroer, chuchi' ri raqen-ya' Arnón. Keri' chuqa' ri nik'aj chire ri chuwi' taq juyu' Galaad y ronojel ri rutinamit. Jare' k'a ri xinjech chike ri e rijatzul kan ri Rubén y ri e rijatzul kan ri Gad.

¹³Y chike ri nik'aj tzobaj ri e rijatzul kan ri Manasés, xinya-wi kan ri nik'aj chik chire ri ruwach'ulew Galaad y chijun ri ruwach'ulew Basán. Ojer kan, chijun ri ruwach'ulew Argob y ri ruwach'ulew Basán kan etaman chi kan kichin ri refaíta.

¹⁴Jun chike ri e rijatzul kan ri Manasés rubini'an Jaír xuch'ek chijun ri ruwach'ulew Argob k'a pa ruk'ulba't ri ruwach'ulew Guesur y Maacá. Rija' xujel k'a ri rubi' ri ruwach'ulew Basán y xubij Havot-Jaír chire, k'a re wakami.

¹⁵Keri', chike k'a ri e rijatzul ri Maquir xinya-wi ri ruwach'ulew Galaad.

¹⁶Jak'a chike ri e rijatzul kan ri Rubén y ri Gad xinya' chijun ri ruwach'ulew Galaad, nitiker-el rik'in ri raqen-ya' Arnón, y ri ruk'ulba't niq'ax pa runik'ajal ri raqen-ya' ri', y napon pa xaman k'a rik'in ri jun chik raqen-ya' Jaboc. Re' jare' ri kik'ulba't ri e rijatzul kan ri Amón.

¹⁷Ri ruk'ulba't ri ruwach'ulew nitiker-el pa qajbel-q'ij chire ri raqen-ya' Jordán, nel-pe rik'in ri choy richin Quinéret*f2* y napon k'a rik'in ri Tzayi-Choy, ri k'o chuxe-pe ri juyu' Pisgá.

¹⁸Chupan ri q'ij ri' xinya' chiwe rix ri ix rijatzul kan ri Rubén, ri Gad, y ri nik'aj chiwe ri ix rijatzul kan ri Manasés re jun ruchojmilal re': Ri Jehová ri qa-Dios nujech re ruwach'ulew re' chiwe richin niwichinaj kan. Jak'a konojel ri aj-labal, tikichapa' ri kikamisabal y ke'ik'o-el chikiwech ri qawinaq israelita.

¹⁹Xaxe k'a yek'oje' kan ri iwixjayilal, ri iwalk'ual y chuqa' ri iwawej, roma kan wetaman chi e k'iy awej ri ek'o iwik'in; kan xkek'oje' k'a kan ri chiri' pa taq tinamit ri xenya' yan chiwe.

²⁰Ke'ito' k'a ri qawinaq israelita, k'a toq xtikichinaj na kan ri ruwach'ulew ri xtuya' ri Jehová chike re k'o pe juk'an chire ri raqen-ya' Jordán. Toq ri Jehová xtuya' uxlanen chike achi'el ri xuya' yan chiwe rix, k'ari' xkixtzolej chik pe chupan re ruwach'ulew ri xinya' yan chiwe chi'ijujunal.

²¹Chupan k'a ri q'ij ri' xinbij k'a chire ri Josué: Xatz'et ronojel ri xuben ri Jehová ri qa-Dios kik'in ri Sihón y ri Og; kan keri' k'a chuqa' xtiberubana' kik'in konojel ri e rey ri ek'o pa taq ruwach'ulew ri akuchi xkatapon-wi.

²²Y man taxibij-awi' chikiwech ri winaqi' ri', roma ri Jehová ri qa-Dios kan ja rija' ri xtibanon oyowal pan ak'exel, xicha' chire.

²³Chupan ri q'ij ri' xink'utuj utzil chire ri Jehová, y xinbij:

²⁴Ajaw Jehová, rat kan achapon k'a pe ruk'utik chinuwech yin ri asamajel, ri nimalej ak'ojlen y ri awuchuq'a', ¿k'o kami jun chik Dios chila' chikaj y chuwech re ruwach'ulew ri nitikir nuben meyel taq banobel ri achi'el ye'aben rat?

²⁵Roma ri' nink'utuj jun nimalej utzil chawe richin chi naya' ta q'ij chuwe richin yiq'ax la juk'an chik chire ri raqen-ya' Jordán, roma yin ninwajo' nintz'et ri utzilej ruwach'ulew, y nintz'et ta ri jebelej taq juyu' richin ri Líbano, keri' xinbij.

²⁶Jak'a ri Jehová xyakatej royowal chuwij yin, iwoma rix, y man xrajo' ta xrak'axaj ri achike xink'utuj chire y xubij chuwe: Katane', man chik kach'on más chirij ri'.

²⁷Kajote-el pa ruwi' ri juyu' Pisgá, y katzu'un ri pa xaman, ri pan xokon, ri pa relebel-q'ij y ri pa qajbel-q'ij y tatzu' kan jebel, roma rat kan man xkaq'ax ta apo juk'an chire ri raqen-ya' Jordán.

²⁸Xaxe k'a tabij chire ri Josué chi tutija' ruq'ij y tukuquba' ruk'u'x, roma ja rija' xtuk'uan richin ri tinamit y ja rija' xtibejachon ri ruwach'ulew chikiwech ri winaqi' ri xtabetz'eta' kan, xcha' ri Jehová chuwe.

²⁹Y keri' xojk'oje' kan pa taq'aj kojol juyu', chuwech-apo ri tinamit Bet-peor.