Read Kaqchikel Deut 30 Bible Online

Deut 30 - Kaqchikel bible

Deut 30

¹Xinbij yan chiwe ronojel ri urtisanik y ronojel ri etzelanik ri xtik'uluwachij. Y wi rix man nikuquba' ta ik'u'x, kan xkixrutaluj k'a el chuwech re ruwach'ulew. Jak'a wi xtoqaqa chi'ik'u'x,

²jari' toq rix y ri iwalk'ual xkixtzolej chik pe rik'in rija' y kan rik'in ronojel iwánima y ronojel ik'u'x xtinimaj chik ri ruch'abel, achi'el re xinbij chiwe re wakami.

³K'ari' rija' xtuben chiwe chi xkixtzolej-pe chupan ri ximonri'il, kan xtujoyowaj iwech chi'iwonojel y xkixberuk'ama-pe akuchi ix rutalun-el y kan xkixrumol chik k'a jun bey chupan ri iruwach'ulew.

⁴Stape' ta ri winaqi' e talun-el pa taq tinamit ri ek'o k'a pa ruk'isibel chire ri ruwach'ulew, ri Jehová ri qa-Dios k'a chiri' k'a xkeberuk'ama-pe.

⁵Xkixrumol chik k'a chupan ri ruwach'ulew ri akuchi xek'oje-wi ri qati't-qamama', richin keri', rix chuqa' xtiwichinaj ri ruwach'ulew ri' y kan utz xkixk'oje' y kan xkixwinaqir más chikiwech ri qati't-qamama'.

⁶Ri Jehová ri qa-Dios xtuya' ri retal ri rujikibel-tzij pa taq iwánima y keri' chuqa' xtuben rik'in ri kánima ri iwijatzul, richin kan xtiwajo' rija' rik'in ronojel iwánima y chijun ik'aslen, richin keri' kan xkixk'ase'.

⁷Rija' xtuya' k'a ronojel re itzel oyonik pa kiwi' ri etzelanel iwichin, y pa kiwi' ri xeyakatej chiwij rik'in koyowal.

⁸Rix kan xtitzolej ri iwánima rik'in ri Jehová y kan xtinimaj ri ruch'abel y kan xtitaqej ri pixa' ri ya'on chiwe.

⁹Ri Jehová ri qa-Dios xtuben chiwe chi ronojel k'a ri xtiben, kan utz xtel chiwech, y kan xtuya' k'a urtisanik pa kiwi' ri iwalk'ual y pa kiwi' ri iwawej y pa ruwi' ri itiko'n richin utz yixk'ase'. Y ri Jehová kan xtikikot iwik'in, roma ri' ronojel ri xtuben iwik'in kan ja ri utz, achi'el xuben kik'in ri qati't-qamama'.

¹⁰Ronojel re' xtik'ul wi xtinimaj ri nubij rija' y kan xtiben ri nubij ri rupixa' ri e tz'ibatel kan chupan re wuj re', wi xkixtzolej chik pe rik'in rija' rik'in ronojel iwánima y rik'in ronojel ik'u'x.

¹¹Re jun pixa' re ninbij chiwe re wakami man k'ayew ta nuben chiwe rix y kan man nej ta k'o chiwe,

¹²ni man k'a chila' chikaj ta k'o-wi richin ta xtibij: ¿Achike ta k'a xtitikir xtijote-q'anej k'a chikaj qoma roj, richin chi nuqasaj ta pe chiqe ri pixa' y nusik'ij ta chiqawech richin keri' roj kan xtiqaben ri nubij?, xkixcha' ta.

¹³Ni man xkixtikir ta xtibij: ¿Achike ta k'a xtiq'axan la palou la' xaxe qoma roj richin nuq'axaj-pe chiqe ri pixa' y nusik'ij chiqawech richin keri' roj kan xtiqaben ri nubij?, xkixcha' ta.

¹⁴Man keri' ta, roma ri ch'abel kan naqaj chiqe roj k'o-wi, kan qetaman chik y k'o chik pa taq qánima richin niqataqej.

¹⁵Titz'eta', wakami kan ninya' chiwech ri k'aslen o kamik, ri utz o ri ruk'ayewal.

¹⁶Roma ri' ninbij chiwe wakami chi tiwajo' ri Jehová ri qa-Dios y kan titzeqelibej ri rubey y titaqej chuqa' ri rupixa', richin chi yixk'ase' y yixwinaqir, y ri Jehová ri qa-Dios xkixrurtisaj k'a chupan ri ruwach'ulew ri akuchi xkixberuya-wi.

¹⁷Jak'a wi man xtinimaj ta ronojel re pixa' re', y kan xtich'er kan iwi', richin yixxuke' chikiwech ch'aqa' chik dios y ye'isamajij chuqa',

¹⁸wi keri' xtiben, yin kan ninbij k'a chiwe chi kan xkixken chi'anin. Y kan man xkixyaloj ta el chuwech ri ruwach'ulew ri'.

¹⁹Chupan re q'ij re' kan chuwech k'a ri kaj y ri ruwach'ulew ninbij chiwe chi ninya' chiwech ri k'aslen o ri kamik, ri urtisanik o ri etzelanik. Kan ticha' k'a ri k'aslen, richin chi yixk'ase' rix y ri iwijatzul.

²⁰Kan tiwajo' k'a ri Jehová ri qa-Dios rik'in ronojel iwánima y kan tinimaj ri nubij y kan titzeqelibej k'a; roma pa ruq'a' rija' k'o-wi ri k'aslen, richin yixk'ase' k'iy juna' pa ruwach'ulew ri xujikiba' chike ri qati't-qamama', ri Abraham, ri Isaac y ri Jacob, xcha'.