Read Kaqchikel Deut 31 Bible Online

Deut 31 - Kaqchikel bible

Deut 31

¹Ri Moisés kere' k'a xubij chike konojel ri ruwinaq,

²wakami k'o chik 120 nujuna' y man yitikir ta chik yixink'uaj. Y pa ruwi' re' ri Jehová rubin chik chuwe chi yin man xtinq'axaj ta apo ri raqen-ya' Jordán.

³Kan ja rija' ri xtinabeyej-el chiwech richin yixq'ax-apo y kan chiwech k'a rix xkeruk'is-el ri winaqi' ri ek'o chupan ri ruwach'ulew ri', richin xtok iwichin rix. Chuqa' ri Josué xtok uk'uey iwichin richin yixq'ax-apo, achi'el rubin ri Jehová.

⁴Ri Jehová xtuben chike ri winaqi' ri' achi'el xuben chike ri Sihón y ri Og, ri e rey kichin ri amorreo, toq kan xeruk'is junan kik'in ri tinamit ri ek'o pa kiq'a'.

⁵Ri Jehová xkerujech pan iq'a' y rix kan ja k'a ri nubin yin chiwe jari' ri k'o chi niben kik'in.

⁶Kan kow k'a kixk'oje', titija' iq'ij y man tixibij-iwi' chikiwech, roma ri Jehová ri qa-Dios kan k'o iwik'in y man xkixrumalij ta kan, xcha' ri Moisés.

⁷K'ari' ri Moisés xroyoj ri Josué chikiwech konojel ri winaqi' y xubij chire: Kan kow k'a kak'oje' y tatija' aq'ij, roma ja rat xkatukusan-apo richin re tinamit re' chupan ri ruwach'ulew ri rusujun ri Jehová chike ri qati't-qamama'. Y ja rat k'a xkajachon ri ulew chike richin nikichinaj kan.

⁸Kan ja ri Jehová xtinabeyej chawech y kan xtik'oje' awik'in. Kan man xkaruya' ta kan y man xkarumalij ta kan, y roma ri' man taxibij-awi' y man tamalij ak'u'x, xcha' chire.

⁹Ri Moisés xutz'ibaj k'a re pixa' re' y xujech kan pa kiq'a' ri sacerdote ri e rijatzul kan ri Leví, ri ye'uk'uan ri káxa richin ri rujikibel-tzij ri Jehová, y chike chuqa' konojel ri achi'a' ri k'o kiq'ij.

¹⁰Y xch'on kik'in y kere' k'a ri xubij chike: Chi wuquteq juna', ri juna' toq nikuyutej ronojel ruwech k'as, chupan ri nimaq'ij richin ri taq jay ri banon rik'in ruq'a' taq che', jari' toq xtisik'ix re pixa' re' richin chi ri winaqi' kan tikak'axaj.

¹²Kan ke'imolo' k'a chi achi'a' chi ixoqi' y ak'uala', y chuqa' ri winaqi' ri man e iwinaq ta ri ek'o pan iruwach'ulew, richin keri' ri iwalk'ual rix ri man jun ketaman chire re pixa' re', xtikak'axaj y xtiketamaj nikiya' ruq'ij ri Jehová ri qa-Dios chupan chijun ri kik'aslen ri chiri' chupan ri ruwach'ulew ri xtiwichinaj kan, xcha' ri Moisés.

¹⁴K'ari' ri Jehová xubij chire ri Moisés: Wakami naqaj chik k'a k'o-apo ri q'ij richin ri akamik, roma ri' tataqa' royoxik ri Josué y tak'uaj chupan ri wachoch richin molojri'il, richin xtinbij chire ri ruk'amon chi nuben, xcha'. Keri' ri Moisés y ri Josué junan xebe chupan ri jay richin molojri'il,

¹⁵y jari' toq ri Jehová xuk'ut-ri' chikiwech pa jun sutz' ri pa'el chikaj ri chiri' chuchi' ri jay.

¹⁶Y ri Jehová xubij k'a chire ri Moisés: Rat xkatuxlan yan k'a apo junan kik'in ri ate-atata', y toq rat at maneq chik, re winaqi' richin re tinamit re' xa xkeyojtej y xkekitzeqelibej-el ch'aqa' chik dios ri kichin ri winaqi' ri ek'o pa taq ruwach'ulew ri akuchi xke'apon-wi. Kan xkinkimalij k'a kan y xtikiq'ej ruwi' ri nujikibel-tzij ri nubanon kik'in.

¹⁷Y chupan ri q'ij ri' ri nuq'aq'alen kan xtiqaqa k'a pa kiwi'. Kan xkenmalij k'a kan y man xkento' ta chik. Y kan xtipe k'a k'iy ruk'ayewal y tijoj-poqonal pa kiwi' k'a toq xkenk'is. K'ari' rije' xtikik'utuj ri achike roma maneq chik ri Jehová kik'in y achike roma qajineq re ruk'ayewal re' pa kiwi'.

¹⁸Toq xtapon ri q'ij ri' yin kan xkenmalij wi kan, roma ronojel ri itzel ri yekibanala' chi xekiyala' kiq'ij ch'aqa' chik dios.

¹⁹Wakami k'a tatz'ibaj re jun bixanik re' y ke'atijoj ri awinaq richin chi nikibixaj; y re bix re' xtok jun q'alajirisabel nuch'abel chikij ri awinaq israelita.

²⁰Y toq yin xkenkusaj-apo chupan ri ruwach'ulew ri akuchi niwachin-wi ronojel ruwech tiko'n, ri ruwach'ulew ri kan nuya'on nutzij chire chi chike ri ite-itata' ninya-wi, toq rije' xewa-xe'uk'ya' yan richin xech'uch'u' y xeti'ojir yan, jari' toq xtikiya' kiq'ij ch'aqa' chik dios y xkinkimalij kan yin y xtikiq'ej ruwi' ri nujikibel-tzij.

²¹Y toq xtipe k'a k'iy ruk'ayewal y tijoj-poqonal pa kiwi', jari' toq re jun bixanik re' xtuq'alajirisaj chikipalej ri winaqi' ri nubin chik kan yin. Y re bix re' kan man xtimestex ta koma ri kijatzul roma kan wetaman chik achike chi ch'obonik ri k'o kik'in rije', y xa k'a man jani kenkusaj-apo chupan ri ruwach'ulew, ri kan nuya'on chik nutzij chi kan ninya' chike, xcha' ri Jehová.

²²Keri' toq ri Moisés xutz'ibaj ri bix ri' chupan ri q'ij ri', y xuk'ut chikiwech ri ruwinaq richin xketamaj.

²³K'ari' ri Jehová xuya' ri ruchojmilal chire ri Josué, y xubij chire: Kan kow k'a kak'oje' y tatija' aq'ij, roma ja rat k'a ri xkatukusan-apo kichin ri awinaq chupan ri ruwach'ulew ri kan nuya'on chik nutzij chi kan ninya' chike; y yin kan xkik'oje' k'a awik'in rat, xcha' ri Jehová chire.

²⁴Toq ri Moisés xuk'is k'a rutz'ibaxik chuwech jun wuj ronojel ri ch'abel richin ri pixa',

²⁵rija' xubij k'a chike ri levita ri ye'uk'uan ri káxa ri richin ri rujikibel-tzij ri Jehová:

²⁶Tiyaka' k'a re wuj re', ri richin ri pixa' chuxikin ri káxa ri richin ri rujikibel-tzij ri Jehová ri qa-Dios; y tik'oje' k'a chiri' richin chi jari' ri q'alajirisabel pan iwi' rix chire ri man ja ta ye'iben.

²⁷Roma yin kan wetaman chi kan ix jun tinamit ri man yixniman ta tzij y kan janila kow ri iwánima. Wakami xiben ronojel re' chuwech ri Jehová y xa k'a in k'es na iwik'in. ¿Achike ta k'a ri man ta xtiben toq in kamineq chik?

²⁸Wakami k'a, ke'imolo-pe re wawe' chinuwech yin ri achi'a' ri k'o kiq'ij ri ek'o chupan konojel ri tzobaj, y chuqa' ri samajela' ri e richin ri tinamit, richin keri' kan xtinq'alajirisaj k'a chuqa' chike rije' re ch'abel re'. Y ri kaj y ri ruwach'ulew kan xtikitz'et k'a ronojel re'.

²⁹Roma yin wetaman chi toq xa in kamineq chik el, rix xkixyojtej jumul. Kan xtiya' kan ri bey ri xinbij chiwe ri k'o chi niwojqaj, y wetaman chuqa' ri xtipe chiwij ri chiwech-apo. Kan xtipe k'a ruk'ayewal pan iwi', roma kan itzel ri ibanobal chuwech ri Jehová, y niben chire richin nipe royowal roma ronojel ri xtiben, xcha' ri Moisés.

³⁰K'ari' ri Moisés xuben chik k'a re bix re' chikiwech ri ruwinaq richin chi tikak'axaj; xuchop-el pa rutikeribel k'a pa ruk'isibel, y kere' k'a xubij: