Read Kaqchikel Deut 33 Bible Online

Deut 33 - Kaqchikel bible

Deut 33

¹Toq k'a man jani tijote-el ri Moisés pa ruwi' ri juyu', jari' toq xrurtisaj kan ri tinamit Israel. Y jare' k'a ri urtisanik ri xuya' kan pa kiwi':

²Y xubij k'a: Ri Jehová k'a pa ruwi' ri juyu' Sinaí xpe-wi; kan k'a pa ruwach'ulew Seír oj rusaqirisan-pe; kan xyik'lun k'a pe pa ruwi' ri juyu' ri k'o pa Parán. Y pa 1,000 ángel ek'o rik'in, y pa rijkiq'a' ruk'amon-pe jun achi'el q'aq' nitzu'un.

³Kan qitzij na wi ri Jehová kan nrajo' ri rutinamit, konojel ri kijachon-ki' pa ruq'a' kan yeruchajij. rije' kan janila nikiqasaj-ki' chuwech, y chikijujunal kan nikak'axaj ri rutijonik.

⁴Ri pixa' ri xinya' yin chiwe, kan achi'el k'a jun beyomel ri xiwichinaj kan rix ri tzobaj richin ri Jacob.

⁵Toq xerumol ri aj-raqen richin ri qatinamit Jesurún, toq xerumol konojel ri tzobaj richin ri Israel, jari' toq xibij: Ri Jehová jari' ri qa-rey.

⁶Rix ri tzobaj richin Rubén; ¡Kan tik'ase' ri iwijatzul y man ta niken! Kan man ta e juba' ok ri achi'a' ri ek'o iwik'in,

⁷Rix ri tzobaj richin Judá; Ri Jehová xtrak'axaj ri ich'abel rix, toq xtik'utuj chire rija' richin yixtzolej kik'in ri iwinaq. Y kan xkixruto' rik'in ri ruchuq'a', xkixruto' chikiwech ri e etzelanel iwichin.

⁸Rix ri tzobaj richin Leví; Ri Jehová, xuben chiwe chi xixok sacerdote. Chiri' pa Masá y pa Meribá ri Jehová xixrutejtobej rix, y rix kan xikuquba' ik'u'x rik'in rija'.

⁹Rix kan más k'a xiwajo' ri jikibel-tzij chikiwech ri ite-itata'. Rix kan más k'a xiwajo' xinimaj ri ruch'abel ri Dios chikiwech ri iwach'alal, y ri iwalk'ual.

¹⁰Rix xtik'ut ri q'atbel-tzij chikiwech ri iwinaq israelita, xtik'ut ri pixa' chuwech ri itinamit. Xtiporoj k'a ri pom chuwech ri Jehová, y xtisuj ri chikop pa ruwi' ri porobel.

¹¹Ri nimalej Jehová, kan xtrurtisaj ta k'a ronojel ri xtiben, y xtuk'ul ta k'a rik'in kikoten ri isamaj. Chuqa' kan tuqasaj k'a kiq'ij ri e etzelanel iwichin, richin keri' man xkeyakatej ta chik pe chiwij.

¹²Rix ri tzobaj richin Benjamín: Rix ri janila yixajowex roma ri Jehová y roma ri' kan ikuquban ik'u'x. Ri nimalej Dios xkixchajin ronojel q'ij; y kan xkixk'oje' chuxe' ri ruq'a' rija'.

¹³Rix ri tzobaj richin José: Ri Jehová kan ta xtuya' ri urtisanik pa ruwi' ri iwulew, rik'in ronojel ri jebel nipe chila' chikaj, rik'in ri raxq'ab. y chuqa' rik'in ri ya' ri ye'alex-pe chuwech re ruwach'ulew.

¹⁴Rik'in jebelej taq ruwech itiko'n ri nuya' juna-juna'. y rik'in chuqa' ri jebelej taq ruwech itiko'n ri nuya' ronojel ik'.

¹⁵Kan pa ruk'iyal k'a ruwech taq che' ri e tijel ri xkek'oje'. Chuqa' xtiwachin ri ulew ri ek'o kojol juyu' ri kan ek'o-pe ojer ri'.

¹⁶Ri ruwach'ulew kan ta k'a xtuya' chiwe ronojel ruwech beyomel. Xtiqaqa ta más rutzil ri Jehová pan iwi' rix chikiwech ri iwach'alal. Ronojel re' xtuben ri Jehová ri xch'on-pe chupan ri k'ix ri nik'a'on pa q'aq'.

¹⁷Rix achi'a' aj-Efraín ri ix richin oyowal, kan janila iwuchuq'a' achi'el jun alaj achij wákix. Chuqa' rix achi'a' aj-Manasés ri ix richin oyowal, kan ix achi'el jun achij wákix ri janila mal. Rik'in ri iwuk'a' xke'ich'ek konojel ri e etzelanel iwichin. Rik'in ri ikum xke'ich'ek tinamit ri ek'o pa ruk'isibel chire ri ruwach'ulew.

¹⁸Rix ri tzobaj richin Zabulón y ri Isacar: Kixkikot k'a rix rijatzul ri Zabulón ronojel mul toq yixel-el; y rix rijatzul ri Isacar, kixkikot k'a chupan ri iwachoch ri e banon rik'in tzieq.

¹⁹Kan xtiwelesaj beyomel chiri' chuchi' ri choy, kan k'a chuchi' ri choy xtiwil beyomel. Roma ri' xke'iwoyoj konojel ri iwinaq chiri' pa ruwi' ri juyu' richin yixnimaq'ijun; y chiri' xtisuj kamelabel richin ruchojmilal.

²⁰Rix ri tzobaj richin Gad: Ri Jehová xtiya'on ri nima-ruwach'ulew chiwe; y roma ri' tiya' ruq'ij. Rix kan ye'iq'elebej ri e etzelanel iwichin achi'el nuben jun koj, kan yerujoq' ri kiq'a' y ri kijolon.

²¹Rix xixk'oje' kan rik'in ri jebelej ruwach'ulew, ruwach'ulew ri kan ruk'amon chi nok kichin ri e aj-raqen. Xixnabeyej k'a chikiwech ri ch'aqa' chik iwinaq, toq ri aj-raqen xekimol konojel ri tinamit. Kan xiben pa ruchojmilal achi'el xubij ri Jehová chiwe, kan xitaqej ri pixa' ri ya'on chike konojel ri tinamit.

²²Rix ri tzobaj richin Dan: Rix kan ix achi'el jun ti alaj koj ri niropilan nel-pe pa ruwach'ulew Basán.

²³Rix ri tzobaj richin Neftalí: Rix kan jebel ix tz'eton roma ri Jehová, y chuqa' janila urtisanik ya'on pan iwi'. Ja rix ri ix rajaw ri ruwach'ulew ri k'o pa qajbel-q'ij y napon k'a pa xokon chire ri choy.

²⁴Rix ri tzobaj richin Aser: Kan utz ruwa-iq'ij chikikojol ri ch'aqa' chik iwinaq. Kan janila xkixajowex chikiwech ri iwach'alal, y kan pa ruk'iyal ta k'a aceite xtik'oje' iwik'in.

²⁵Ri ruchi' ri itinamit kan xketz'ape' rik'in ch'ich' y rik'in q'enq'oj-pueq, kan xtik'oje' ta k'a iwuchuq'a' ronojel q'ij chire ri ik'aslen.

²⁶Kan man jun chik Dios k'o achi'el ri qa-Dios. Rija' achi'el xa ta pa ruwi' ri sutz' niqaqa-pe chikaj richin yixruto-el chi'anin, y chuqa' achi'el xa ta pa sutz' nipe-wi rik'in ri nimalej ruq'ij-ruk'ojlen.

²⁷Ri Dios richin q'asen jari' ri itobal. Ja rija' ix chapayon rik'in uchuq'a' tibe-q'ij tibe-seq. Xtuben k'a chi ye'animej-el chiwech ri e etzelanel iwichin, y nubij chiwe richin ye'ikamisaj.

²⁸Rix kan xkixk'ase' rik'in kuqubabel-k'u'x y ri iwijatzul kan xkek'ase' rik'in uxlanen roma ri chiri' e maneq chik etzelanel kichin. Chuwech ri ruwach'ulew kan xtiwachin ri trigo y ri uva, y ri chikaj kan xtiqaqa-pe job pa ruwi' ri iwulew.

²⁹Ri Jehová xkolon iwichin, y kan xuya' janila urtisanik chiwe. Ri Jehová kan yixruchajij y kan yixruto'. Rija' nuben oyowal pan ik'exel rix richin yixch'akon chikij ri etzelanel iwichin, y kan ja rix xkixk'oje' pa kiwi' rije', xcha' ri Moisés.