Read Kaqchikel Jn 12 Bible Online

Jn 12 - Kaqchikel bible

Jn 12

¹Toq xa waqi' chik k'a q'ij nrajo' richin napon ri q'ij toq nikinataj toq ri Dios xuya' ri Solbelri'il, ri Jesús xbe pa Betania, ri rutinamit ri Lázaro ri xken-el, y xk'asox chik roma rija'.

²Y ri chiri' xban k'a jun nima-wa'in, roma xapon ri Jesús. Ja ri Marta ri ye'ilin-apo ri pa mesa. Ri Lázaro jun k'a chike ri e raq'el-apo ri pa mesa*f13* rik'in ri Jesús.

³Ri María xberuk'ama' k'a pe jun libra jubulej aq'om ri janila jotol rajel.*f14* Jare' k'a ri xuya' chirij raqen ri Jesús y xerusula' kan rik'in ri rusumal taq ruwi' rija'. Y ri jay ri' kan xnoj k'a rik'in ri rujubulil ri aq'om ri'.

⁴K'o k'a jun chike ri tijoxela' ri rubini'an Judas Iscariote, ri tijoxel ri xtik'ayin richin ri Jesús. Rija' xubij:

⁵Re jubulej aq'om re' rajel jun juna' samaj. ¿Achike k'a roma toq man xk'ayix ta, y re méro re' xtalux ta chike ri winaqi' ri man jun k'o kik'in?, xcha'.

⁶Toq rija' keri' xubij, man roma ta k'a chi kan janila yerajo' ri winaqi' ri man jun k'o kik'in. Xa kan roma k'a eleq'om y chi ja rija' ri yakol-méro kichin ri tijoxela' y k'o k'a nrelesala-el.

⁷Kan jari' k'a toq ri Jesús xubij chire: Taya' kan; roma stape' man jani yiken richin yimuq, jak'a kan wichin yin ruyakon-pe re aq'om re'.

⁸Roma ri winaqi' ri man jun k'o kik'in, kan jantape' k'a ek'o iwik'in. Jak'a yin man jantape' ta xkik'oje' iwik'in, xcha' rija'.

⁹Toq ri Jesús xnabex k'a pe koma ri ruwinaq chi k'o pa Betania, kan janila k'a winaqi' ri xepe rik'in. Rije' xepe roma ri Jesús y richin chuqa' chi nikitz'et kan ri Lázaro, ri xk'asox roma ri Jesús chikikojol ri kaminaqi'.

¹⁰Roma ri' ri aj-raqen kichin ri sacerdote xkiya' chikiwech chi chuqa' ri Lázaro xtikikamisaj rachibilan ri Jesús.

¹¹Roma chirij ri Lázaro xkiya-wi chi janila e k'iy kiwinaq ri yeya'on kan kichin rije' y nikikuquba' kik'u'x rik'in ri Jesús.

¹²Pa ruka'n q'ij, ri chiri' pa Jerusalem, kan e janila k'a e k'iy winaqi'. Konojel rije' kik'ulun-ki' chiri' roma ri nimaq'ij. Y toq xkak'axaj k'a chi beneq-apo ri Jesús,

¹³xebe chuk'ulik e kik'uan ruq'a' palma, y nikibila': ¡Nimalej ruq'ij ri rey ri peteneq pa rubi' ri Dios! ¡Jare' ri qa-rey roj ri oj judío!, yecha'.

¹⁴Ri Jesús kan k'o k'a jun alaj bur ri xril, richin chi xuch'okolibej, kan achi'el wi k'a ri nubij chupan ri ruch'abel ri Dios ri tz'ibatel kan:*f15*

¹⁵Man k'a tuxibij-ri' ri iwánima rix ri ix richin chik ri tinamit Sión roma ri i-rey jare' k'a peteneq, ch'okol-pe chirij jun alaj bur, nicha'.

¹⁶Chupan ri q'ij ri', ronojel re' man xq'ax ta chikiwech ri rutijoxela'. Jak'a xq'ax chikiwech kan k'a ja toq ri Jesús k'astajineq chik el chikikojol ri kaminaqi' y k'o chik ruq'ij-ruk'ojlen. K'ari' k'a toq xoqaqa chikik'u'x chi xbanatej achi'el ri tz'ibatel kan.

¹⁷Jak'a ri winaqi' ri xetz'eton richin ri Jesús toq xroyoj ri Lázaro richin xk'astej-pe chikikojol ri kaminaqi', xkitzijola' k'a chike ri ch'aqa' chik winaqi'.

¹⁸Rije' toq xkak'axaj chik k'a ri meyel banobel ri', kan xepe richin nokik'ulu' ri Jesús.

¹⁹Jak'a ri fariseo nikibila' k'a chikiwech: Titzu', konojel ri winaqi' e beneq chirij. Man nikinimaj ta qatzij, yecha'.

²⁰Chikikojol k'a konojel ri winaqi' ri e apowineq pa Jerusalem richin nikiya' ruq'ij ri Dios chupan ri nimaq'ij ri', ek'o chuqa' e ka'i-oxi' winaqi' griego.

²¹Rije' xe'apon-apo rik'in ri Felipe aj-Betsaida ri k'o pa Galilea, y xkibij chi rije' nikajo' yech'on juba' rik'in ri Jesús.

²²Ri Felipe xbe y xberubij k'a chire ri Andrés. K'ari' chi e ka'i' xebe-apo k'a rik'in ri Jesús richin xbekibij chire chi nikajo' yech'on rik'in.

²³Ri Jesús kan jari' k'a xubij chike ri ka'i' tijoxela' ri': Ja q'ij re' xoqaqa richin chi yin, ri xiqaqa-pe achi'el wineq chi'ikojol, xtik'oje' nuq'ij-nuk'ojlen.

²⁴Y tiwak'axaj k'a re xtinbij chiwe re wakami, chi kan qitzij wi: Jun ti ruwech-trigo wi man nitik ta, jantape' xtuben xaxe jun ti ruwech-trigo. Jak'a wi nitik-qa y xtiq'ey-qa, pa ruk'iyal xtuya' ri ruwech.

²⁵Roma ri', ri wineq ri yalan nupoqonaj ri ruk'aslen re wawe' chuwech re ruwach'ulew, kan xtusech k'a ri ruk'aslen. Jak'a ri man nupoqonaj ta ri ruk'aslen, kan richin k'a jantape' nuyek-apo.

²⁶Wi k'o k'a jun ri nrajo' chi yin yinok rajaw, tipe k'a wik'in. Y ri akuchi ink'o-wi yin, kan chiri' k'a xtik'oje-wi ri nusamajel. Y wi rija' xtuben ri nusamaj, xtinimirisex k'a ruq'ij roma ri nata'.

²⁷Yin kan janila k'a niq'axo ri wánima wakami. Jak'a man ruk'amon ta chi ninbij chire ri nata' chi kirukolo' chuwech re q'axomal re' y xa kan roma ri' xinoqaqa, xcha'.

²⁸K'ari' rija' xch'on rik'in ri Dios y xubij: Nata', kan tabana' k'a chi niq'alajin ta ri aq'ij-ak'ojlen, xcha'. Kan jari' k'a toq ri Dios xch'on-pe chila' chikaj y xubij: Kan nubanon chik k'a keri'. Y xtinben chik k'a jun bey, chi kan niq'alajin-wi ri nuq'ij-nuk'ojlen, xcha'.

²⁹E janila k'a chike ri winaqi' ri ek'o chiri' ri xebin chi xa jun koqolajay. Jak'a ri ch'aqa' chik nikibij: Jun ángel ri xch'on-pe rik'in, yecha'.

³⁰Roma ri' ri Jesús xubij chike: Ri jun ri xiwak'axaj chi xch'on-pe chila' chikaj, xch'on-pe iwoma rix y man woma ta yin.

³¹Wakami noqaqa yan k'a ri ruq'atoj-tzij ri Dios pa kiwi' ri winaqi' ri ek'o chuwech re ruwach'ulew, y kan xtelesex k'a el ri uk'uayon richin re ruwach'ulew.

³²Y toq yin xkijotobex-q'anej, ri winaqi' kan xkenk'en-pe wik'in, xcha' rija'.

³³Ri Jesús keri' xubij richin xuq'alajirisaj ri rubanik ri rukamik.

³⁴Roma ri' ri winaqi' xkibij: Roj qetaman ri nubij chupan ri ruch'abel ri Dios chi ri Cristo toq xtipe, xtik'oje' richin jantape'. ¿Achike roma rat nabij chi ja rat ri' ri jun ri xaqaqa-pe achi'el wineq chiqakojol?, jak'a wakami xa nabij chi xkaken. Taq'alajirisaj k'a chiqawech achike ri xtipe achi'el wineq chiqakojol, kan jari' ri Cristo o man ja ta, xecha' rije'.

³⁵Jari' k'a toq ri Jesús xubij chike: Yin ri in k'amayon-pe ri saqil xa ti juba' ok xkik'oje' iwik'in. Kan chupan k'a ri saqil ri' kixbiyin-wi, roma k'a k'o na richin chi ri q'equ'm man yixruq'i' ta y man iwetaman ta akuchi nibe-wi.

³⁶Roma ri' kan tikuqer ik'u'x wik'in yin ri in k'amayon-pe ri saqil, richin chi yixok alk'ualaxela' richin ri saqil, xcha'. K'ari' xeruya' kan richin man jun xetaman akuchi xbe-wi.

³⁷Ri Jesús kan xerubanala-wi janila meyel taq banobel chikiwech ri winaqi'. Man rik'in ri' rije' man xkikuquba' ta kik'u'x rik'in.

³⁸Y kere' k'a ri xbanatej, roma kan k'o k'a chi nibanatej na ri e tz'ibatel kan*f16* roma ri Isaías, ri q'alajirisey ruch'abel ri Dios ojer. Rija' rutz'iban k'a kan: ¿Achike ta k'a xtiniman ri niqabij? ¿Y achoq pa ruwi' xq'alajin-wi ruchuq'a' ri Jehová?, xcha'.

³⁹Re winaqi' re' kan man k'a tikirel ta chi nikikuquba' kik'u'x rik'in, roma chupan ri rutz'iban kan ri Isaías nubij chuqa':*f17*

⁴⁰Ri Dios kan rubanon k'a chike rije' chi man yetzu'un ta y kowirineq ri kánima roma man nrajo' ta chi rije' xtikitz'et ri rubanobal, y chuqa' xtikak'axaj ri ruch'abel, y xtikitzeqelibej ta chik. Y man nrajo' ta chi xkeruk'achojirisaj, xcha'.

⁴¹Ri Isaías kere' xubij roma xutz'et ri ruq'ij-ruk'ojlen ri Jesús ri xtuk'ul.

⁴²Man rik'in ri' e k'iy chike ri achi'a' ri pa komon yeq'aton-tzij xkikuquba' kik'u'x rik'in ri Jesús. Xa jak'a man xkiq'alajirisaj ta ki', roma nikixibij-ki' chikiwech ri fariseo, roma ye'oqotex-pe chupan ri jay ri nikimol-wi-ki' richin nikak'axaj ri ruch'abel ri Dios.

⁴³Rije' xa más k'a xkich'ob achike xtikibij ri winaqi', y man ja ta ri nuch'ob ri Dios.

⁴⁴Ri Jesús rik'in k'a ruchuq'a' xch'on y xubij: Ri nukuquba' ruk'u'x wik'in yin, man xaxe ta k'a yin ri xkirunimaj, chuqa' nukuquba' ruk'u'x rik'in ri Dios ri taqayon-pe wichin.

⁴⁵Ri nitz'eton wichin yin, kan nutz'et k'a chuqa' ri Dios ri taqayon-pe wichin.

⁴⁶Roma yin ri saqil, xipe chuwech re ruwach'ulew richin chi achike k'a ri xtukuquba' ruk'u'x wik'in, man xtik'oje' ta kan chupan jun q'equ'm k'aslen.

⁴⁷Jak'a ri wineq ri nrak'axaj ri nuch'abel y xa man niqa' ta chuwech nuben ri nrak'axaj, man xtinq'et ta tzij pa ruwi'. Roma yin xipe man richin ta chi ninq'et-tzij pa kiwi' ri winaqi'. Jak'a ri nusamaj yin ja ri yenkol ri winaqi'.

⁴⁸Jak'a ri pa ruk'isibel q'ij, kan xtiq'at k'a tzij pa kiwi' ri ye'etzelan wichin y man nikik'ul ta ri nuch'abel pa kánima. Xtiq'at-tzij pa kiwi', roma ri ch'abel ri xenq'alajirisaj.

⁴⁹Roma ri ch'abel ri xenq'alajirisaj chiwech, man yin ta xibin; kan ja ri nata' ri taqayon-pe wichin, y rubin k'a pe chuwe achike chi ch'abel ri nonq'alajirisaj chiwech.

⁵⁰Y kan wetaman k'a chi ri rubin-pe ri nata' Dios chuwe, kan nuya-wi k'a k'aslen ri man k'isel ta. Roma ri' re ch'abel re nonbij chiwe, kan achi'el rubixik rubanon-pe ri nata' chuwe, xcha'.