Read Kaqchikel Hch 1 Bible Online

Hch 1 - Kaqchikel bible

Hch 1

¹Nimalej Teófilo: Yin nintz'ibaj-el re jun wuj re' chawe, achi'el ri wuj ri xintz'ibaj-el chawe pa nabey. Y chupan ri wuj ri' nutz'iban k'a el ri samaj ri xutikeriba' kan rubanik ri Jesús, y ri xutikeriba' kan ruk'utik chikiwech ri winaqi'.

²Y keri' xuben, k'a toq xuk'uex-el chila' chikaj. Jak'a toq rija' k'a man jani nibe chila' chikaj, rik'in ri ruchuq'a' ri Loq'olej Espíritu, xubij k'a chike ri e taqon roma rija' ri nik'atzin chi nikiben kan, toq rija' xtibe.

³Y rija' kan xutej poqon y xkamisex. Jak'a toq rija' k'astajineq chik pe, xuk'utula' k'a ri' chikiwech rije' kawineq q'ij, richin tetamex chi kan k'es wi. Y k'o k'a chuqa' xubila' chike chirij ri rajawaren ri Dios.

⁴Y k'o k'a jun q'ij ri Jesús y ri e rutaqon kimolon-ki', ri Jesús xubij chike: Kixk'oje' k'a re wawe' pa tinamit Jerusalem, y tiwoyobej ri nubin chiwe; tiwoyobej k'a ri rusujun-pe ri nata' chi kan nuya'.

⁵Roma pa ka'i-oxi' q'ij apo, ri Dios xtuteq-pe pan iwi' ri Loq'olej Espíritu achi'el ri ya' ri xukusaj ri Juan pa kiwi' ri winaqi' ri e tzeqelibeyon richin, xcha' ri Jesús.

⁶Y ri kimolon k'a ki' xkik'utuj chire ri Jesús: Ajaw, ¿man ja ta kami q'ij re' toq natzolij chik ri q'atbel-tzij pa qaq'a' roj judío?, xecha' chire.*f1*

⁷Jak'a ri Jesús xubij chike: K'a ja na ri Dios nibin jampe' xtibanatej ri', y man nik'atzin ta chi niwetamaj rix.

⁸Xaxe k'a tiwetamaj, chi toq ri Loq'olej Espíritu xtiqaqa-pe pan iwi', xtik'ul k'a uchuq'a', y xkiniq'alajirisaj chikiwech ri winaqi' wawe' pa tinamit Jerusalem, ri ek'o pa ch'aqa' chik tinamit wawe' pa Judea, pa ruwach'ulew Samaria, y chikiwech konojel winaqi' pa ch'aqa' chik ruwach'ulew chi nej chi naqaj, xcha' ri Jesús.

⁹Y kan xaxe chik k'a ri ch'abel ri' ri xubij kan, kan jari' xuchop xbe chila' chikaj. Y ri ek'o rik'in, kan kitzuliben k'a toq xyakatej-el chikiwech, y xok-el pa jun sutz', y man chik xkitz'et ta.

¹⁰Y rije' kan k'a kitzuliben na k'a el ri xbe chikaj. Toq k'a xkina' xebek'ulun e ka'i' achi'el achi'a' kik'in, ri kikusalon seq taq tzieq.

¹¹Y ri ka'i' achi'a' ri' xkibij k'a chike: Rix ri yixpe pa Galilea, ¿achike roma toq yixtzu'un chikaj? Re Jesús re xitz'et chi xbe chikaj re wakami, kan xtipe chik k'a jun bey. Y kan achi'el re xuben-el re xbe, kan keri' chuqa' xtuben ri pa ruka'n bey toq xtiqaqa-pe chila' chikaj, xecha' chike.

¹²Ri e taqon roma ri Cristo xe'el k'a pe ri chiri' pa ruwi' ri juyu' Olivo, y xetzolin ri pa tinamit Jerusalem. Ri juyu' ri' man nej ta k'o-wi chire ri tinamit; xa pa jun la'eq kilómetro k'o-wi.

¹³Toq xe'apon pa Jerusalem, xejote-el ri pa ruka'n wiq jay ri akuchi kan ek'o-wi-pe y jere' ri ek'o ri chiri': Ri Pedro, ri Jacob o, ri Juan, ri Andrés, ri Felipe, ri Tomás, ri Bartolomé, ri Mateo, ri Jacobo ri ruk'ajol ri Alfeo, ri Simón ri aj-labal y ri Judas ri ruk'ajol ri jun chik Jacob o.

¹⁴Y konojel rije' kan jantape' k'a yech'on rik'in ri Dios junan, kachibilan ri María ri rute' ri Jesús, y ri ch'aqa' chik ixoqi' y chuqa' ri e rach'alal ri Jesús.

¹⁵Y jun q'ij toq kimolon ki' jun la'eq e 120 qach'alal, ri Pedro xbepa'e-pe chikiwech, y xubij k'a chike:

¹⁶Wach'alal, ri rey David ri xk'oje' ojer kan, xutz'ibaj k'a kan ri ch'abel ri xeruya' ri Loq'olej Espíritu pa ránima. Chiri' nich'on chirij ri Judas ri xuk'uan kibey ri winaqi' ri xebe chuchapik ri Jesús. Kan k'o-wi k'a chi xbanatej ri'.

¹⁷Jak'a ri Judas ri' kan qachibil, y xsamej chuqa' junan qik'in, xcha'.

¹⁸Rik'in ri méro ri xuk'ul toq xujech ri Jesús, rik'in ri' xuloq' jun ulew y chiri' xtzaq-wi; rija' xkubuku' ri rupan y xel ronojel ri rixkolob.

¹⁹Y toq xbanatej re', konojel k'a ri winaqi' aj-Jerusalem xe'etaman, y roma ri' chupan ri kich'abel nibix Hacéldama chire ri ulew ri'. Y ri bi'aj ri' nel chi tzij: Ulew akuchi xbiyin kik'.

²⁰Y ri Pedro xubij chik: Roma ri' bin kan chupan ri Wuj Richin Bix chire ri Dios:*f2* Ri rachoch kan ta xtitole' kan, y kan ta man jun chik xtik'oje' kan chupan. Y chuqa' nubij:*f3* Y ri rusamaj kan jun ta chik xtik'oje' kan pa ruk'exel. Kere' nubij ri ruch'abel ri Dios.

²¹Roma ri', kan nik'atzin k'a chi niqakanoj jun ruk'exel ri Judas, jak'a kan ja ri chikikojol ri qachibil ri kan jantape' ek'o-pe qik'in, y ri kan beneq-wi qik'in toq xk'oje' ri ajaw Jesús;

²²jun chike ri kan ek'o-pe qik'in toq ri Jesús xqasex ya' pa ruwi' roma ri Juan, k'a toq xbe chila' chikaj. Kan nik'atzin k'a chi nuq'alajirisaj junan qik'in roj achike rubanik toq ri Jesús xbek'astej-pe chikikojol kaminaqi', xcha' ri Pedro.

²³Y jari' xkiya-apo' kibi' e ka'i': Ri Matías, y ri jun chik rubini'an José, ri nikibij chuqa' Barsabás y Justo chire.

²⁴Xech'on k'a rik'in ri Dios y xkibij: Ajaw, rat ri natz'et ri qánima qonojel, tak'utu' k'a chiqawech achike k'a chike re ka'i' achi'a' re' ri acha'on,

²⁵richin nok kan jun taqon roma ri Cristo pa ruk'exel ri Judas, richin nipa'e' chuwech ri samaj. Roma ri Judas xa xuya' kan ri samaj, roma ri itzel xerubanala'. Y wakami rija' xapon yan akuchi ruk'amon chi napon-wi, xecha'.

²⁶Rije' xkiya' pan etz'anen ri achin ri xk'oje' kan pa ruk'exel ri Judas richin nok kachibil ri e julajuj ri e taqon roma ri Cristo. Y ri xch'akon ja ri Matías, y rija' xjunamatej-ruwech kik'in ri e julajuj ri'.