Read Kaqchikel Hch 10 Bible Online

Hch 10 - Kaqchikel bible

Hch 10

¹Ri pa tinamit Cesarea k'o k'a jun achin rubini'an Cornelio, y rija' jun aj-raqen pa kiwi' jun tzobaj aj-labal, y ri juq'at aj-labal ri' aj-Italia nibix chike.

²Ri Cornelio y ri e aj pa rachoch e ya'ol k'a ruq'ij ri Dios, y nikixibij k'a ki' yemakun chuwech. Y rija' kan jantape' k'a nich'on rik'in ri Dios, y kan k'iy k'a yerutola-wi ri winaqi' ri man jun k'o kik'in.

³K'o k'a jun q'ij, toq xq'ax yan oxi' hora chire ri nik'aj-q'ij, rija' pa jun achik' jebel xutz'et chi k'o jun ángel richin ri Dios ri xok-apo rik'in, y xubij chire: ¡Cornelio!, xcha' ri ángel ri'.

⁴Ri Cornelio rutzuliben k'a ri ángel, y janila ruxibin-ri'. Y xuk'utuj chire ri achike nrajo'. Ri ángel xubij chire: Ri ach'owen rik'in ri Dios kan janila qajineq chuwech, y keri' chuqa' kan qajineq chuwech ri ye'ato' ri winaqi' ri nik'atzin kito'ik. Roma ri' rija' yarunataj-pe re wakami.

⁵Wakami ke'ataqa' k'a el achi'a', k'a pa Jope richin kebe chiroyoxik ri Simón ri nibix chuqa' Pedro chire.

⁶Rija' k'o k'a pa rachoch ri jun achin rubini'an chuqa' Simón, ri Simón ri nitzako y naq'oman kij o kisale'y chikopi', y k'o rachoch chuchi' ri palou. Y toq xtoqaqa ri Pedro awik'in, xtubij k'a chawe ri nik'atzin chi naben, xcha' ri ángel chire ri Cornelio.

⁷Toq ri ángel ri xch'on kan chire ri Cornelio beneq chik, ri Cornelio xeroyoj k'a e ka'i' rusamajela' y jun aj-labal ri kan jun ya'ol chuqa' ruq'ij ri Dios. Re aj-labal k'a re', jare' ri jantape' k'o rik'in ri Cornelio.

⁸Ri Cornelio xutzijoj k'a ronojel chike, y xeruteq-el pa Jope.

⁹Ruka'n q'ij chire ri kichapon-el bey ri achi'a', xa juba' chik k'a chikij richin ye'apon-apo ri pa tinamit Jope, pa nik'aj-q'ij la'eq ri'. Jari' toq ri Pedro xjote' k'a el pa ruwi' ri jay,*f24* richin nich'on rik'in ri Dios.

¹⁰Rija' kan janila k'a ninum chik, y nurayij k'a niwa' yan. Rokik royoben richin nichojmirisex ri xtutej, ri Dios kan jari' k'a xuben chire ri Pedro chi xutz'et jun achi'el achik'.

¹¹Rija' xutz'et k'a chi ri kaj jaqatajineq, y chila' k'a niqaqa-wi-pe jun nimalej achi'el tzieq, ri e chapalon ri kaji' rutza'n. Y kan q'alaj chi k'o ri peteneq chupan, roma ch'oqoch'ik nitzu'un. Y ri achi'el tzieq ruchapon-pe qajen chuwech re ruwach'ulew.

¹²Chupan ek'o-pe ronojel kiwech chikopi' ri man e utz ta richin yetij: Ek'o nima'q taq chikopi', ek'o aj-xik' taq chikopi', y ri nikiqirirej-ki'.

¹³Kan jari' k'a toq ri Pedro xrak'axaj chi k'o jun ri nich'on chire, y nubij k'a: Pedro, kayakatej. Ke'akamisaj chikopi', y tatija', xcha'.

¹⁴Jak'a ri Pedro xubij: Ajaw, yin man xkentej ta re chikopi' re'. Yin kan man jun bey e nutijon ta chikopi' achi'el re', ri kan e k'utun chinuwech chi man e ch'ajch'oj ta, ri xa xajan richin yetij, xcha'.

¹⁵Ri jun k'a ri nich'on rik'in ri Pedro, xubij k'a pe chire ri pa ruka'n bey: Ronojel ri ch'ajch'ojirisan chik pe roma ri Dios, kan ch'ajch'oj, y man k'a tabij chi xajan, xcha'.

¹⁶Oxi' bey k'a ri xbitej keri', y k'ari' ri nimalej achi'el tzieq xtzolin-el chikaj.

¹⁷Ri Pedro k'a k'o na k'a ri chiri', y man nril ta achike nuch'ob chirij ri achi'el achik' ri xutz'et, toq ri oxi' achi'a' ri e taqon-el roma ri Cornelio jari' xe'apon, nikikanoj k'a ri rachoch ri Simón. Y toq xkil ri jay,

¹⁸xkik'utuj k'a apo wi chiri' k'o-wi ri Simón ri nibix chuqa' Pedro chire.

¹⁹Y roma ri Pedro k'a najin na chuch'obik rij ri achik', kan jak'a ri Loq'olej Espíritu ri xbin chire: Ek'o e oxi' achi'a' ri yatkikanoj.

²⁰Kayakatej k'a el y kaqaqa-qa kik'in, y chuqa' man tapoqonaj yabe kik'in, roma ja yin xitaqo-pe kichin k'a re wawe' awik'in, xcha'.

²¹Y ri Pedro kan xbeqaqa-pe kik'in ri e oxi' achi'a' ri e taqon-el roma ri Cornelio, y xubij chike: Ja yin ri Pedro ri nikanoj. ¿Achike k'a roma toq ix peteneq chinukanoxik?, xcha'.

²²Ri achi'a' xkibij k'a chire ri Pedro: Jun aj-raqen pa kiwi' jun tzobaj aj-labal rubini'an Cornelio oj rutaqon k'a pe chi'awoyoxik. Y re achin k'a re' jun achin choj ruk'aslen, jun achin ri nuxibij-ri' nimakun chuwech ri Dios. Konojel ri awinaq judío janila nikajo'. Y k'o k'a jun loq'olej ángel ri xoch'on rik'in, y re ángel re' xubij kan chire chi karoyoj rat, y trak'axaj ri achike xtabij chire. Roma ri' xojpe chi'awoyoxik, xecha'.

²³Ri Pedro xerukusaj-apo pa jay ri achi'a' ri', richin yek'oje' na el ri jun aq'a' chiri'. Y ri pa ruka'n q'ij, ri Pedro kan xbe na wi kik'in k'a pa Cesarea. Ek'o k'a qach'alal ri aj chiri' pa Jope xetzeqe-el chirij ri Pedro.

²⁴K'a pa ruka'n q'ij chire ri ke'el-pe ri pa Jope, k'ari' xe'apon pa Cesarea. Chupan ri tinamit ri', ri Cornelio e royon k'a ri e rach'alal y chuqa' e royon winaqi' ri kan e rachibil, y e koyoben-apo ri Pedro.

²⁵Toq ri Pedro nok k'a apo pa rachoch ri Cornelio, ri Cornelio xbexuke' chuwech richin xuya-apo ruq'ij. Kere' ruk'ulik xuben-apo.

²⁶Jak'a ri Pedro xuyek q'anej y xubij chire: Kapa'e' y man kaxuke' chinuwech yin, roma yin xa in jun chuqa' wineq achi'el rat, xcha'.

²⁷Ri Pedro y ri Cornelio yetzijon k'a, xe'ok-apo pa jay. Jari' toq ri Pedro xutz'et chi e k'iy winaqi' ri kimolon-ki' ri chiri'.

²⁸Rija' xubij k'a chike ri winaqi' ri': Rix kan jebel wi iwetaman chi roj judío man k'a ya'on ta q'ij chiqe chi junan qawech iwik'in y yojok ta pa taq iwachoch rix ri xa man ix judío ta. Jak'a ri Dios xuk'ut k'a chinuwech chi man ruk'amon ta chi ninbij chire jun wineq, xa roma man judío ta, chi man ch'ajch'oj ta.

²⁹Roma ri', kan xaxe k'a xe'apon ri achi'a' ri e itaqon-el richin yinkoyoj, kan man jun k'a xinbij chi man yipe ta; xa kan jari' xipe kik'in. Y re wakami ninwajo' k'a ninwetamaj achike roma toq xiteq woyoxik, xcha' ri Pedro.

³⁰Jak'a kan jari' xch'on-apo ri Cornelio, y xubij k'a: K'o yan kaji' q'ij ri', yin ximewayin. Y toq k'o yan oxi' hora tiq'ax chire ri nik'aj-q'ij, jari' toq yich'on rik'in ri Dios. Jari' k'a toq jun achi'el achin, niyik'lun rutziaq, xuk'ut-ri' chinuwech.

³¹Y xubij k'a chuwe: Cornelio, ri Dios utz rak'axan ri ach'owen, y chuqa' kan qajineq chuwech chi ye'ato' ri winaqi' ri nik'atzin kito'ik.

³²Ke'ataqa' k'a el achi'a' k'a pa Jope richin yebe chiroyoxik ri Simón ri nibix chuqa' Pedro chire. Y k'o pa rachoch jun achin rubini'an chuqa' Simón. Y re jun Simón re' k'o rachoch chunaqaj ri palou, y nitzako y naq'oman kij o kisale'y chikopi'. Toq ri Pedro xtoqaqa awik'in, k'o k'a ri xtorubij chawe, xcha' ri ángel chuwe.

³³Roma ri' kan jari' xinteq akanoxik, y matiox k'a chi kan xape. Y kan chuwech wi k'a ri Dios ojk'o-wi qonojel re qamolon-qi' wawe', y niqajo' k'a niqak'axaj ri xtaq'alajirisaj chiqawech, ri kan ja ri Dios biyon chawe richin taq'alajirisaj rat, xcha' ri Cornelio chire ri Pedro.

³⁴Ri Pedro kan jari' k'a xuchop nich'on, y xubij: Wakami kan qitzij k'a nik'ulun chinuwech chi ri Dios kan junan rubanon chiqe qonojel winaqi'. Man xaxe ta jun tinamit nrajo', y yeretzelaj ta kan ri ch'aqa' chik.

³⁵Xabachike ta ri qatinamit chiri', ri Dios kan utz yojrutz'et qonojel ri kan niqaxibij-qi' chi yojmakun chuwech y e choj ri qabanobal.

³⁶Chiqakojol k'a roj judío xorutzijoj-wi-qa chi nuteq pe ri Jesucristo wawe' chuwech re ruwach'ulew, y rija' ri qajaw qonojel roj winaqi'. Y re ch'abel re' xoruya-qa kolotajik y uxlanen pa taq qánima.

³⁷Rix ri' noqaqa chi'ik'u'x ronojel k'a ri xbanatej ri q'ij ri' ri pa ronojel Judea. Pa nabey, ja ri Juan ri q'alajirisey ruch'abel ri Dios ri xqasan ya' pa kiwi' ri winaqi'. Y k'ari' ja ri Jesús ri xbetikeriban rutzijoxik ri ruch'abel ri Dios ri pa ruwach'ulew Galilea.

³⁸Iwetaman chuqa' ri' chi ri Jesús ri aj-Nazaret, kan k'o-wi ri Loq'olej Espíritu rik'in, ri ya'on-pe chire roma ri Dios. Roma ri' kan k'o-wi uchuq'a' pa ruq'a'. Kan xaxe k'a ri utz ri xerubanala' chike ri winaqi'. Xeruk'achojirisala' chuqa' winaqi' ri e chapon roma ri itzel-wineq. Kere' ri xerubanala' ri Jesús, roma kan k'o-wi ri Dios rik'in.

³⁹Y ri janipe' ri xerubanala' ri Jesús ri pa Jerusalem y ri pa Judea, kan xqatz'et k'a roj. Jari' ri yojtajin chuq'alajirisaxik chikiwech ri winaqi'. Rija' xbajix k'a chuwa jun cruz richin xkamisex.

⁴⁰Ri pa rox q'ij chire ri tikamisex, ri Dios xuk'asoj-pe, y xuben chire chi xuk'utula-ri'.

⁴¹Man k'a chikiwech ta xabachike winaqi' xuk'ut-ri'; xa kan xaxe chiqawech roj ri kan ruch'obon-wi-pe ri Dios pa qawi' ri ojer chi niqaq'alajirisaj ri k'astajibel richin ri Jesús. Y junan k'a xojwa-xojuk'ya' rik'in rija', toq k'astajineq chik pe chikikojol ri kaminaqi'.

⁴²Y rija' kan janila k'a xuchilabej kan chiqe chi tiqatzijoj ri rubi' y tiqaq'alajirisaj chi ri Dios xuben chire chi ja rija' ri niq'aton-tzij pa qawi' roj ri oj k'es y pa kiwi' chuqa' ri winaqi' ri e kaminaqi' chik el.

⁴³Kan ojer k'a ri bitajineq kan koma ri xeq'alajirisan ri ruch'abel ri Dios, chi qonojel k'a ri xqakuquba' qak'u'x rik'in ri Jesucristo, xtikuyutej qamak pa rubi' rija', xcha'.

⁴⁴Kan k'a nich'on k'a ri Pedro chikiwech ri winaqi' ri kimolon-ki' pa rachoch ri Cornelio, toq ri Loq'olej Espíritu jari' xqaqa-pe pa kiwi' ri ye'ak'axan richin.

⁴⁵Toq xbanatej re', ri judío ri e peteneq chirij ri Pedro, xsach kik'u'x toq xkitz'et chi ri Loq'olej Espíritu kan nisipex-pe chuqa' chike ri winaqi' ri', y rije' xa man e judío ta.

⁴⁶Ri judío yekak'axaj k'a ri xa man e judío ta chi yech'on pa ch'aqa' chik ch'abel ri xa man kich'abel ta rije', y nikiya' ruq'ij ri Dios.

⁴⁷Jari' toq ri Pedro xubij k'a: ¿Kan k'o ta kami jun xtibin chi man tiqasex ya' pa kiwi' re xkik'ul yan ri Loq'olej Espíritu achi'el ri xqak'ul chuqa' roj?, xcha'.

⁴⁸Ri Pedro xubij k'a chi tiqasex ya' pa ruwi' ri Cornelio y pa kiwi' konojel ri kimolon-ki' rik'in retal richin xkikuquba' kik'u'x rik'in ri Cristo. Y pa rubi' ri ajaw Jesús tiya'ox. Ri k'ak'a' qach'alal ri', xkik'utuj k'a chire ri Pedro chi tik'oje-qa ka'i-oxi' q'ij kik'in. Y rija' kan keri' xuben.