Read Kaqchikel Hch 6 Bible Online

Hch 6 - Kaqchikel bible

Hch 6

¹Chupan k'a ri q'ij ri', ri kikuquban kik'u'x rik'in ri Jesús kichapon yek'iyer. Y k'o k'a sujunik kichin ri yech'on griego chikij ri yech'on hebreo. Ri yech'on griego nikibij k'a chi ri malkani' taq ixoqi' ri ek'o chikikojol, niban chike chi juba' ok kejqalen toq k'o niya'ox chike ri richin q'ij-q'ij.

²Roma ri' ri kablajuj e taqon roma ri Cristo xekimol k'a konojel rije', y xkibij chike: Man k'a ruk'amon ta chi roj niqamalij kan ri ruq'alajirisaxik ri ruch'abel ri Dios, richin ja rix yixqilij.

³Wakami k'a qach'alal, ke'icha-pe wuqu' achi'a' ri chi'ikojol, achi'a' ri kan etaman chi choj ri kik'aslen, k'o etamabel kik'in y nojineq ri kánima rik'in ri Loq'olej Espíritu, richin keri' jari' ri xkeqaya' chuwech ri k'o chi niya'ox chiwe.

⁴Jak'a roj kan xtiqaben-wi ri samaj achi'el ri qabanon-pe. Jantape' xqojch'on rik'in ri Dios, y xtiqaq'alajirisaj ri ruch'abel, xecha' chike.

⁵Kan konojel xqa' chikiwech ri xbix chike, y xekicha' k'a ri e wuqu' achi'a'. Ri jun k'a ri xkicha' rubini'an Esteban, y re' jun achin ri kan jebel wi kuqul ruk'u'x rik'in ri Dios, y nojineq ránima rik'in ri Loq'olej Espíritu. Xekicha' chuqa' ri Felipe, ri Prócoro, ri Nicanor, ri Timón, ri Parmenas y ri Nicolás ri aj pa tinamit Antioquía; rija' man judío ta, jak'a kan nunimaj k'a ri nubij ri kipixa', y kan kik'in k'a rije' k'o-wi toq k'a man jani runiman ta ri Jesús chiri'.

⁶Jak'a wuqu' achi'a' re' ri xebepabex chikiwech ri e taqon roma ri Cristo. Rije' xech'on rik'in ri Dios, y k'ari' xkiya' kiq'a' pa kiwi' ri achi'a' ri', richin tiq'alajin chi jari' nikichop ri kisamaj.

⁷Ri ruch'abel ri Dios rik'in ruchuq'a' beneq, y yek'iyer k'a chuqa' ri nimanela' ri chiri' pa tinamit Jerusalem. Y e janila k'a chuqa' chike ri sacerdote ri yeniman.

⁸Ri Dios xuya' ruchuq'a' ri Esteban y chuqa' xuya' rutzil pa ruwi'. Roma ri' toq k'o meyel taq banobel y retal ri yerubanala' chikiwech ri winaqi'.

⁹Jak'a ek'o winaqi' ri xebeyakatej-pe y xkichop-ki' rik'in ch'abel rik'in ri Esteban. Re winaqi' k'a re' e richin jun jay akuchi nikimol-ki' ri winaqi' richin nikak'axaj ruch'abel ri Dios, ri rubini'an Ri e Totajineq. Chuqa' ek'o winaqi' aj pa tinamit Cirene y Alejandría, aj pa ruwach'ulew Cilicia y Asia.

¹⁰Roma ri Esteban kan ja ri Loq'olej Espíritu ri xya'on etamabel chire; roma ri', toq rija' xch'on, ri winaqi' ri' xa man xetikir ta rik'in.

¹¹Roma ri' xekitoj ch'aqa' winaqi' richin keri' tikibij chi xkak'axaj chi ri Esteban itzel xch'on chirij ri pixa' richin ri Moisés y chirij chuqa' ri Dios.

¹²Xebeyakatej k'a pe chirij ri Esteban e kachibilan ri achi'a' ri k'o kiq'ij, ri etamanela' chirij ri pixa' y ri ch'aqa' chik winaqi'. Xbekichapa-pe, y xkik'uaj chikiwech ri achi'a' ri yeq'aton-tzij chikikojol ri judío.

¹³Xekik'uaj k'a achi'a' richin chi nikitz'uk-tzij chirij ri Esteban. Ri achi'a' ri' nikibij k'a: Re jun achin re' man nitane' ta k'a richin nubij itzel chirij re rachoch ri Dios y chirij ri pixa' richin ri Moisés.

¹⁴Roma qak'axan k'a chi nubila' chi ri Jesús aj-Nazaret xtuwulaj re jay re', y chi xtujel-el ronojel ri rubin kan ri Moisés ri nik'atzin chi tiqabana', xecha'.

¹⁵Jari' k'a toq ri achi'a' ri yeq'aton-tzij ri e tz'uyul ri chiri', xkitzu-xkitzu' ruwech ri Esteban. Jari' toq xkitz'et chi xjalatej ruwech, y xok achi'el titzu'un jun ángel.