Read Kaqchikel Ro 11 Bible Online

Ro 11 - Kaqchikel bible

Ro 11

¹¿Kan qitzij kami chi ri Dios yeretzelaj ri ruwinaq judío? Man keri' ta, roma yin kan wilon ri rutzil ri Dios. Y yin kan in israelita-wi, in rijatzul kan ri Abraham, in richin kan ri tzobaj Benjamín.

²Ri Dios man retzelan ta k'a kan ri rutinamit ri e rucha'on-pe ojer: ¿Man iwetaman ta k'a ri nubij chupan ri ruch'abel ri tz'ibatel kan, chirij ri Elías? Rija' xch'on rik'in ri Dios chikij ri ruwinaq judío, y xubij:*f39*

³Xekiwulaj-el ri porobel akuchi niya'ox-wi aq'ij rat, y rik'in espada xekikamisaj ri e q'alajirisey ach'abel. Xaxe chik k'a yin ri xikolotej kan, y wakami yinkikanoj richin nikelesaj chuqa' ri nuk'aslen yin,*f40* xcha'.

⁴¿Y achike xubij ri Dios chire ri Elías? Ri Dios xubij:*f41* Yin e nuch'aron kan e 7,000 winaqi' aj-Israel ri man xexuke' ta chikiwech ri Baal ni man xkitz'ubaj ta, xcha' ri Dios.

⁵Y keri' chuqa' wakami ek'o jujun chike ri qawinaq judío ri junan oj cha'on roma ri rutzil ri Dios.

⁶Roj ri oj cha'on roma ri Dios, man oj cha'on ta roma ri jebel qabanobal. Roma wi ta keri', man ta nibix chi oj cha'on roma ri rutzil ri Dios.

⁷Xa oj juba' ok chiqe roj judío ri oj cha'on, roma ri Dios xqil ri niqakanoj. Jak'a ri ch'aqa' chik qawinaq ri man e cha'on ta roma ri Dios man xkil ta; xa xkowirisex ri kánima.

⁸Toqaqa chi'ik'u'x ri nubij chupan ri ruch'abel ri Dios:*f42* Ri Dios man ruya'on ta q'ij chike richin niq'ax chikiwech ri kiq'axan-pe. Kan achi'el xa ta e moyirineq y man ye'ak'ex ta. Keri' kibanon-pe, xcha'.

⁹Y ri David rubin kan chuqa':*f43* Ri kinimaq'ij rije' richin yewa-ye'uk'ya', kan ta k'a xtik'atzin richin pajk'ibel chike, y richin nikitoj ri kimak.

¹⁰Kan k'ate' ta k'a rije' xke'ok moy richin chi man yinkitzu' ta chik. Roma ta ri tijoj-poqonal, lukulik ta xtikiben y man ta xtik'is-el chikij, xcha'.

¹¹¿Kan qitzij kami chi ri qawinaq, richin ta jantape' xetzaq pa ruq'a' ri etzelal roma ri pajk'ibel ri'? Man keri' ta. Ri Dios nrajo' chi nuk'asoj k'a jun itzel rayibel kik'in ri e nuwinaq chikij ri winaqi' man e judío ta, y roma ri' xusuj k'a chuqa' ri kolotajik chike.

¹²Ri nuwinaq xemakun chuwech ri Dios, y roma ri' rija' xusuj ronojel ri rutzil chike ri ch'aqa' chik winaqi' chuwech re ruwach'ulew. Jak'a kan más urtisanik ri xtipe toq ri nuwinaq xtitzolin-pe kik'u'x rik'in ri Dios.

¹³Y k'o k'a chuqa' ri ninwajo' ninbij chiwe rix ri man ix judío ta: Yin in jun taqon-pe roma ri Cristo chiwe rix, y kan ninya-wi k'a ruq'ij ri nusamaj.

¹⁴Y rik'in re' ninwajo' k'a nink'asoj jun itzel rayibel kik'in ri nuwinaq chiwij rix richin yekolotej ta.

¹⁵Roma ri winaqi' ri man e judío ta kan xk'an kiwech roma ri Dios, y jare' ri xpe toq ri Dios xerumalij kan ri nuwinaq judío. Jak'a más k'a ri utzil ri xkepe toq ri nuwinaq xtik'an chik kiwech roma ri Dios, achi'el toq nik'astej-pe jun kamineq.

¹⁶Xa kan e achi'el k'a ri nabey sipanik ri nel chire ri ke'en ri richin ri kaxlan-wey ri nikiya' chire ri Dios. Roma ri nabey chire ri ke'en ri' kan loq'olej wi, keri' chuqa' ri ch'aqa' chik ke'en. Y wi ta jun wineq nusuj jun ruxe' che' chire ri Dios, xa kan ronojel ri ruq'a' ri che' ri' nok loq'olej richin ri Dios.

¹⁷K'o k'a jun q'ij xtik k'a jun che' richin oliwo. Chirij ri' xelesex-el jun ruq'a'. Chuqa' xtun-apo jun ti ruq'a-che' oliwo ri xa choj k'iyineq-pe pa juyu'. Ri nuwinaq judío kan e achi'el ri ruq'a-che' ri xelesex-el. Y rix ri man ix judío ta xa ix achi'el ri ti ruq'a-che' ri' ri xtun-apo pa kik'exel rije'. Xixtun-apo rik'in ri che' oliwo y k'iy utzil nik'ul.

¹⁸Jak'a man ruk'amon ta chi ninimirisaj-iwi' rix y niqasaj kiq'ij ri nuwinaq ri xe'elesex-el, roma rix iwetaman chi man ja ta ri ruq'a' ri che' ri e chapayon richin ri ruxe', xa ja ri ruxe' ri chapayon kichin ri ruq'a' ri che'.

¹⁹Y rik'in juba' rix nich'ob: Roj kan ruk'amon chi niqanimirisaj-qi', roma ek'o ruq'a' ri che' ri xejoq'-el, richin chi ja roj ri xojtun kan pa kik'exel rije', yixcha' ta qa.

²⁰Jak'a rije' roma ri man xkinimaj ta ri Dios, roma ri' toq xe'elesex-el. Y rix xaxe roma ikuquban ik'u'x rik'in ri Dios toq ixk'o kan pa kik'exel. Roma ri' man ruk'amon ta chi ninimirisaj-iwi'. Xa tixibij-iwi'.

²¹Rix iwetaman chi ri Dios man xerukuy ta ri nuwinaq judío. Xa xerelesaj-el, stape' rije' kan e ruq'a' wi ri che' ri'. Wi keri' xuben kik'in rije', chuqa' rix man xkixrukuy ta roma rix xa ix achi'el ri ruq'a-che' ri richin ri k'echelaj.

²²Kan tiwetamaj k'a chi ri Dios janila najowan, jak'a chuqa' kan nuya' rutojbalil ri mak. Ri nuwinaq ri e tzaqineq chupan ri kimak, kan xkik'ul ri rutojbalil ri kimak. Y rix kan ix uk'uan k'a chupan ri rutzil ri Dios. Roma ri' kan nik'atzin chi rix kan yixk'oje' chupan ri utzil ri'. Roma wi man xtiben ta keri', rix chuqa' yixelesex-el.

²³Y wi ri nuwinaq nikichop nikinimaj chik, kan xtik'amer chik kiwech jun bey, roma ri Dios kan k'o uchuq'a' rik'in richin nujel ri kik'aslen.

²⁴Rix kan ix achi'el k'a ruq'a' jun oliwo ri richin ri k'echelaj. Jak'a xixelesex-pe rik'in ri che' ri' y xixtun-apo rik'in ri oliwo ri tikon, stape' man ix richin ta ri che' ri'. Y wi keri' xban chiwe rix, k'a ta la' chik k'a ri nuwinaq judío chi man ta xketun chik jun bey rik'in ri che' tikon; roma rije' kan e richin wi ri che' ri'.

²⁵Wach'alal, yin ninwajo' chi rix iwetaman ta re k'a juba' tuq'alajirisaj ri Dios, richin man xa tina-iwi' iyon rix chi janila iq'ij. Y ri nuwinaq judío ri kowirineq ri kánima y man nikajo' ta nikinimaj ri Dios, keri' xkek'oje', k'a toq xkekolotej na ri man e judío ta.

²⁶K'ari' toq ri nuwinaq judío kan xkekolotej chik, achi'el nubij ri ruch'abel ri Dios:*f44* Ri kolonel xtel-pe chiri' pa Sión, y xtrelesaj-el ri etzelal chikikojol ri e rijatzul kan ri Jacob.

²⁷Yin kan xtinben jun jikibel-tzij kik'in toq xtinkuy ri kimak, nicha'.

²⁸Ek'o nuwinaq judío ri niketzelaj ri Dios, roma man kiniman ta ri utzilej ch'abel richin kolotajik. Y roma k'a man kiniman ta, ri Dios xuya' ri ruch'abel chiwe rix ri man ix judío ta. Jak'a kan k'a yerajo' na ri nuwinaq, roma e rucha'on y roma chuqa' ri rutzil ri xusuj chike ri ojer taq qati't-qamama'.

²⁹Roma toq ri Dios nuya', kan man nrelesaj ta chik. Y toq nroyoj ri rutinamit, kan man nutzolij ta ri' chirij.

³⁰Toq rubanon kan, rix ri man ix judío ta man iniman ta rutzij ri Dios. Jak'a toq ri nuwinaq judío xkiya' kan ri Dios, rija' xusuj ri rutzil chiwe rix, y rix xik'ul.

³¹Rix ri ojer kan man ix nimey ta tzij, jak'a re wakami xik'ul yan ri rutzil ri Dios. Keri' chuqa' ri nuwinaq ri man kiniman ta ri Dios, jak'a xtapon ri q'ij toq rije' xtikik'ul ri rutzil ri Dios.

³²Ri Dios kan nuq'alajirisaj k'a chi konojel winaqi' oj aj-maki'; jak'a nrajo' nusuj ri rutzil chiqe qonojel.

³³Ri Dios kan janila wi na'oj, beyomel y etamabel k'o rik'in. Roj kan man niq'ax ta chiqawech ri ruch'obonik, y man niq'ax ta chuqa' chiqawech ri rubey.

³⁴¿K'o kami jun wineq ri q'axineq chuwech ri achike nuch'ob ri Dios? ¿O k'o kami jun ri tikirineq rubin chire ri Dios ri ruk'amon chi nuben?*f45*

³⁵¿K'o kami jun wineq ri nabey ruya'on ta jun sipanik chire ri Dios, richin chi rija' kan nuya-pe ri rajel-ruk'exel chire?*f46*

³⁶Roma ja rija' ri xbanon ronojel. Kan rik'in wi k'a rija' e peteneq-wi, y ronojel re xeruben, richin chi nikiya' ruq'ij-ruk'ojlen. Kan tinimirisex k'a ruq'ij ri Dios richin jantape'. Keri' ta k'a.