Read Kaqchikel Ro 6 Bible Online

Ro 6 - Kaqchikel bible

Ro 6

¹¿Achike xtiqabij wakami? ¿Utz ta k'a chi k'a yojmakun na richin chi más niq'alajin ri rutzil ri Dios?

²¡Man keri' ta! Roma roj man niqak'axaj ta toq ri mak yojroyoj, roj xa oj achi'el kaminaqi' chire ri mak. Wi keri', ¿achike k'a roma k'a ojk'o na chupan ri mak?

³¿Man iwetaman ta k'a chi ri qasan-ya' jari' ri retal chi roj kan xojken yan rik'in ri Cristo, roma jun qabanon rik'in?

⁴Toq xojya'ox-qa pa ya', achi'el kan xojken rik'in ri Cristo, y kan xojmuq rik'in. Y roma ri' yojtikir niqabij chi toq rija' xk'astej-pe roma ri ruchuq'a' ri tata'ixel, roj chuqa' xojk'astej-pe rik'in y wakami k'o chi niqak'uaj jun k'ak'a' k'aslen.

⁵Roma wi jun xqaben rik'in ri Jesucristo roma ri rukamik, chuqa' roj xqojk'astej junan rik'in rija'.

⁶Toq rubanon kan, xqak'uaj jun itzel k'aslen. Jak'a re wakami ri itzel k'aslen ri' xbajix rik'in ri Jesucristo chuwech ri cruz. Y roma ri' ri itzel rayibel richin ri mak xk'is, y man oj ximil ta chik pa ruq'a' ri mak ri'.

⁷Konojel k'a ri xeken, ri mak man jun chik ruq'a' chike.

⁸Roj achi'el xojken rik'in ri Cristo toq rija' xken, roma ri' qakuquban qak'u'x chi yojk'ase' chuqa' rik'in rija'.

⁹Y qetaman chuqa' chi ri kamik maneq chik ruq'a' chire ri Cristo, roma rija' xk'astej. Roma ri' man xtiken ta chik.

¹⁰Toq ri Cristo xken roma xuyoj ri mak, xaxe jun bey ri xken. Y wakami k'es richin nuben ri rurayibel ri Dios.

¹¹Y roj kan man k'a tiqamestaj chi achi'el ta kan xojken junan rik'in ri Cristo, y roma ri' ri mak man jun chik ruq'a' chiqe. Y chuqa' achi'el ta kan xojk'astej-pe junan rik'in richin niqaben ri rurayibel ri Dios.

¹²Roma ri' kan man k'a tiqaya' q'ij chi ri mak nik'oje' pa qak'aslen chi nibin chiqe ri k'o chi niqaben. Qetaman chi xqojken, y roma ri' man tiqaya' q'ij chi ja ri itzel taq rayinik ri ye'uk'uan qichin.

¹³Toq rubanon kan oj kamineq chupan ri mak, jak'a re wakami qak'uan chik jun k'ak'a' k'aslen. Roma ri' tiqajacha-qi' pa ruq'a' ri Dios richin niqaben ri choj ri nrajo' rija'. Man tiqaya' q'ij richin nok ri mak qik'in y yeqaben ri man e choj ta.

¹⁴Ruk'amon chi ri mak kan man jun ta chik ruq'a' chiqe. Pa ruk'exel re' ja ta ri rutzil ri Dios nitz'eton ri niqaben, y man ja ta ri pixa'.

¹⁵¿Achike k'a nel chi tzij ri xqabij? ¿Kan jantape' ta k'a xqojmakun xaxe roma ja ri rutzil ri Dios ri nikolon qichin, y man ja ta ri pixa'?

¹⁶Rix jebel iwetaman chi xabachike wineq ri nuya-ri' chi nok loq'on samajel, kan chuxe' k'a rutzij ri rajaw ri samaj k'o-wi. Roma ri' roj wi xtiqaya-qi' chuxe' rutzij ri mak, kan xqojok-wi rusamajela' ri mak y xqojruk'uaj pa kamik. Jak'a wi xtiqaya-qi' chuxe' rutzij ri Dios, xqojok rusamajela' rija', y xqojruk'uaj chupan ri k'aslen choj.

¹⁷Toq rubanon kan, xa xixok ix achi'el loq'on samajel pa ruq'a' ri mak. Jak'a re wakami matiox chire ri Dios chi rix rik'in ronojel iwánima xinimaj ri xink'ut chiwech.

¹⁸Ja k'a re wakami kan xixtotej pa ruq'a' ri mak; kan ix rusamajela' chik ri Dios y ik'uan chik jun k'aslen choj.

¹⁹K'ayew richin chi niq'ax chiwech ronojel re', y roma ri' xinkusaj ri k'ambel-tzij ri'. Toq rubanon kan, rix xiya' q'ij chi xok ri mak iwik'in, richin niben ronojel ruwech mak. Jak'a re wakami kan tijacha-iwi' richin yixukusex roma ri Dios chubanik ri choj; richin keri' kan ch'ajch'oj ri ik'aslen chuwech rija'.

²⁰Toq rix xixok loq'on samajel roma ri imak, man nik'atzin ta xixsamej pa ruchojmilal.

²¹¿Y achike k'a xuk'en-pe chiwe ri itzel k'aslen ri xik'uaj? Roma wakami xa yixk'ix toq noqaqa chi'ik'u'x ri itzel k'aslen ri'. Y re itzel banobel re' xa kamik nuk'en-pe.

²²Jak'a re wakami ri mak kan man jun chik ruq'a' chiwe; xa kan ixk'o chik pa ruq'a' ri Dios. Roma ri' toq ik'ulun chik jun k'aslen ch'ajch'oj, y pa ruk'isibel nuk'en-pe ri k'aslen ri man k'isel ta.

²³Roma ri rutojbalil ri mak xa kamik nuk'en-pe chiqe. Jak'a ri Dios nusipaj ri k'aslen ri man k'isel ta chiqe roj. Y ja k'aslen re' ri nisipex chiqe roma ri qajaw Cristo Jesús.