Read Kaqchikel 1 Co 14 Bible Online

1 Co 14 - Kaqchikel bible

1 Co 14

¹Jantape' k'a tik'oje' ri ajowabel iwik'in y kan tirayij chuqa' ri sipanik ri yeruya' ri Loq'olej Espíritu. Y ri más rejqalen ri k'o ja ri niq'alajirisaj ta ri ruch'abel ri Dios.

²Ri qach'alal ri nich'on pa jun chik ch'abel man kik'in ta winaqi' nich'on-wi; kan rik'in-wi ri Dios, roma kan man jun achoq chuwech niq'ax-wi ri nubij. Rija' kan ja k'a ri Espíritu ri nibanon chire chi nubij ri qitzij ri ewatel.

³Jak'a ri nuq'alajirisaj ri ruch'abel ri Dios, kan chike k'a ri winaqi' nich'on-wi. Nuben chike richin yek'iy rik'in ri kik'aslen, yerupixabaj y nukuquba' kik'u'x.

⁴Ri qach'alal ri nich'on pa ch'aqa' chik ch'abel, xaxe chire rija' nuk'en-pe k'iyinen. Jak'a ri qach'alal ri niq'alajirisan ri ruch'abel ri Dios, kan nuben chi yek'iy konojel ri qach'alal.

⁵Ri nurayibel yin, ja ta ri chi'iwonojel yixch'on ta pa ch'aqa' chik ch'abel, jak'a ri más ninwajo' chiwe ja ta chi niq'alajirisaj ri ruch'abel ri Dios. Roma más rejqalen ri niq'alajirisan ri ruch'abel ri Dios, ke chuwech ri nich'on pa jun chik ch'abel. Xaxe wi niq'alajirisex ri nel chi tzij, richin yek'iy ri qach'alal, jebel chuqa'.

⁶Roma xa ta yin yinapon chila' iwik'in rix wach'alal, y pa jun chik ch'abel yibech'on iwik'in, ¿k'o kami utz ri nuk'en-pe chiwe? Jak'a kan k'o-wi utz ri nuk'en-pe chiwe, wi ninq'alajirisaj ri xuk'ut ri Dios chinuwech, o yich'on rik'in etamabel, o ninbij ri nibix chuwe roma ri Dios, o yixintijoj.

⁷Toq jun wineq nuq'ojomaj jun xul o jun arpa, y xa man pa rubeyal ta nuben chire, man q'alaj ta achike chi bix ri nuq'ojomaj.

⁸O ri nixupun ri trompeta richin yerumol ri aj-labal, wi xaxe nuxupuj ri trompeta y xa man jun rubeyal, ¿nikimol kami ki' ri aj-labal?

⁹Keri' chuqa' wi rix yixch'on pa jun ch'abel ri xa man ketaman ta ri ye'ak'axan iwichin, ¿niq'ax kami chikiwech ri xibij? Man xtiq'ax ta. Xa chuwa-kaq'iq' k'a xkixch'on-wi.

¹⁰Y janila k'iy ruwech ch'abel ri ye'ukusex wawe' chuwech re ruwach'ulew, y ronojel ch'abel kan k'o-wi ri nikibij.

¹¹Jak'a wi yin xa man wetaman ta ri ruch'abel jun chik wineq, y rija' nich'on ta wik'in. Roma ri' chuwech rija' yin xa man in ruwinaq ta. Y keri' chuqa' rija' chinuwech yin xa man nuwinaq ta.

¹²Y wi rix kan janila ye'irayij ri sipanik ri yeruya' ri Loq'olej Espíritu, kan utz wi; jak'a kan tirayij ri nuben chi yek'iy ri ch'aqa' chik qach'alal.

¹³Roma wi jun qach'alal ya'on chire chi nich'on pa jun chik ch'abel, tuk'utuj k'a chire ri Dios chi nitikir ta nuq'alajirisaj ri xubij.

¹⁴Roma wi yin yich'on ta rik'in ri Dios pa jun chik ch'abel, man rik'in ta ri nunojibal yich'on-wi; ri keri' xaxe choj xinbij ri k'o pa wánima.

¹⁵¿Achike k'a ri k'o chi ninben? Roma yin ninwajo' yich'on rik'in ri Dios rik'in ri wánima y rik'in chuqa' ri nunojibal. Y keri' chuqa' ninwajo' yibixan rik'in ri wánima y rik'in chuqa' ri nunojibal.

¹⁶Roma wi k'o ta jun ri xa choj k'o-apo chiri' y xa man niq'ax ta chuwech ri nibij, toq rix xaxe rik'in ri iwánima yixch'on rik'in ri Dios; toq rix yixk'achoj, rija' man nitikir ta nubij: Ja' kan keri'.

¹⁷Ri matioxinik k'a ri niben, rik'in juba' yalan utz, jak'a ri ye'ak'axan iwichin man jun niketamaj richin yek'iy ta rik'in ri kik'aslen.

¹⁸Yin yalan yikikot y yimatioxin chire ri Dios chi yich'on pa ch'aqa' chik ch'abel, más chiwech chi'iwonojel rix.

¹⁹Jak'a toq yin yinapon chikikojol ri molaj qach'alal, yin ninwajo' más yich'on pa jun ch'abel ri kan niq'ax-wi chikiwech konojel, roma stape' ta xa ka'i-oxi' ch'abel ri ninbij, más utz ke chuwech ninbij ta 10,000 ch'abel chike ri xa man niq'ax ta chikiwech.

²⁰Wach'alal, man k'a kixch'obon achi'el yech'obon ri ak'uala'; xaxe chuwech ri mak kan tibana' achi'el ri ak'uala', jak'a rik'in ri ich'obonik tibana' achi'el ri winaqi' e nima'q chik.

²¹Chupan ri ruch'abel ri Dios nubij: Yin xich'on iwik'in rix judío y xenkusaj winaqi' ri man e iwinaq ta, ri jun wi chik ch'abel yech'on-wi. Jak'a man rik'in ri', man xiwajo' ta xiwak'axaj, nicha'.*f14*

²²Y rik'in re', niqatz'et chi ri ch'aqa' chik ch'abel kan richin jun retal chike ri man nikajo' ta nikikuquba' kik'u'x rik'in ri Cristo, y man retal ta chiqe roj. Jak'a toq roj niqaq'alajirisaj ri nibix chiqe roma ri Dios, ri' jun retal xaxe qichin roj, y man kichin ta ri man jani tikinimaj.

²³Man rik'in ri', xa ta rix imolon-iwi' y yixch'on ta pa ch'aqa' chik ch'abel, toq ye'apon ta iwik'in qach'alal ri man k'iy ta ketaman chirij ri ruch'abel ri Dios, o ye'apon ta ri man jani kikuquban ta kik'u'x, xa xtikibij k'a chiwe chi ix ch'ujerineq.

²⁴Jak'a xa ta chi'iwonojel pan ich'abel rix yixch'on-wi toq nimol-iwi' richin niq'alajirisaj ri xbix chiwe roma ri Dios, y ye'apon ta ri winaqi' ri', rije' yixkak'axaj ta. Y roma ri' rije' nikina' chi kan e aj-maki' wi. Y ronojel ri' nuben k'a chire ri kánima chi ronojel ri yebix kan qitzij wi.

²⁵K'ari' k'a ye'el-pe chuwa-saqil ronojel ri k'o pa kánima. Roma ri' rije' xa kan jari' xkexuke-qa richin nikiqasaj-ki' y nikiya' ruq'ij ri Dios, y xtikibij chi kan qitzij wi chi k'o ri Dios chi'ikojol.

²⁶Wach'alal, ri ruk'amon chi niben toq nimol-iwi'; wi ek'o chiwe rix ri yebixan, ri yetijon, ri yeq'alajirisan ri ruch'abel ri Dios, ri yech'on pa ch'aqa' chik ch'abel y ri yeq'axan, ronojel ta re' nik'atzin ta chi ri qach'alal yek'iy rik'in ri kik'aslen.

²⁷Ri qach'alal ri ya'on chike chi yech'on pa ch'aqa' chik ch'abel, kan xaxe ta k'a e ka'i' o e oxi'. Y nik'atzin chi xaxe jun nich'on pa jun bey, y k'o ta jun qach'alal ri niq'axan achike ri xubij.

²⁸Jak'a wi xa man jun ri nitikir ta niq'axan ri nikibij pa ch'aqa' chik ch'abel, más utz man kech'on. Y xaxe k'a chike qa rije' kech'on-wi-qa y richin chuqa' chi yech'on rik'in ri Dios.

²⁹Keri' chuqa' ri qach'alal ri yebin chi ya'on chike chi k'o nikiq'alajirisaj, kech'on k'a e ka'i' o e oxi'. Y ri ch'aqa' chik tikich'obo' rij jebel ri achike xkibij.

³⁰Jak'a wi k'o ta jun qach'alal ri nich'on, y ri Dios k'o ta chuqa' jun chik ri nuq'alajirisaj chire jun qach'alal ri tz'uyul chiri', ri nich'on pa nabey xa titane-qa y tuya' kan q'ij chire ri jun chik.

³¹Rik'in ri keri', kan konojel k'a qach'alal yetikir nikiq'alajirisaj ri nibix chike. Jak'a nik'atzin chi nabey nich'on na jun, k'ari' ri jun chik. Y ri ch'aqa' chik qach'alal kan k'o-wi k'a niketamaj chirij ri nik'atzin chike chupan ri kik'aslen.

³²Keri' ri qach'alal ri k'o nikiq'alajirisaj, tikibana' ronojel pa ruchojmilal.

³³Roma ri Dios nrajo' chi ronojel nibanatej rik'in ruchojmilal y rik'in ch'uch'ujil y man rik'in ta sachibel-k'u'x. Nik'atzin chi rix tibana' achi'el nikiben ri ch'aqa' molaj qach'alal.

³⁴Toq nimol-iwi' pa rubi' ri Dios, ri ixoqi' kan ruk'amon chi tikinimaj tzij y man keq'ajan-apo, roma man ruk'amon ta richin yech'on; xa kan kek'oje' chuxe' kitzij ri kachijilal, achi'el nubij ri pixa'.

³⁵Y wi k'o jun tzij ri xa man niq'ax ta chikiwech, tikik'utuj k'a chike ri kachijilal toq ye'apon pa taq kachoch, roma man ruk'amon ta chi jun ixoq nich'on-apo chiri'.

³⁶Toqaqa k'a chi'ik'u'x chi ri ruch'abel ri Dios man xtikir ta pe iwik'in rix, y ni man xaxe ta rix ri ix k'uluyun.

³⁷Y wi k'o ta jun qach'alal ri nibin chi rija' kan nuq'alajirisaj ri ruch'abel ri Dios, o ruk'ulun jun chik sipanik, kan tuq'alajirisaj k'a chiwech chi ri xinbij yin kan rik'in ri Dios peteneq-wi.

³⁸Y wi rija' man nunimaj ta re', rija' chuqa' man xtinimex ta.

³⁹Roma ri' wach'alal, kan titija' k'a iq'ij richin niq'alajirisaj ri ruch'abel ri Dios, y man ke'iq'et ri qach'alal ri ya'on chike chi yech'on pa ch'aqa' chik ch'abel.

⁴⁰Jak'a ronojel ta re', kan ta pa rubeyal y pa ruch'ajch'ojil ta yebanatej-wi.