Read Kaqchikel 2 Co 12 Bible Online

2 Co 12 - Kaqchikel bible

2 Co 12

¹Y kan qitzij wi chi man ruk'amon ta ninya-qa nuq'ij. Jak'a wakami yin xkich'on juba' chirij ri achik' y ronojel ri nuk'ut ri ajaw chinuwech.

²Yin wetaman k'a ruwech jun achin ri runiman chik ri Cristo. Y k'o yan chik k'a kajlajuj juna' ri xuk'uex k'a pa rox kaj. Jak'a man wetaman ta ri achike rubanik toq xuk'uex, wi kan rik'in ri ruch'akul o xaxe ri ru-espíritu, xaxe k'a ri Dios ri etamayon.

³Yin wetaman chi ri achin ri' xuk'uex k'a chila' chikaj, jak'a xaxe ri Dios etamayon wi rik'in ri ruch'akul o xa chupan jun achi'el achik. Chiri' xerak'axaj ch'abel ri man e tikirel ta chi yebix, y man ya'on ta q'ij chike ri winaqi' richin chi nikibij.

⁵Ri achin ri xuk'uex chila' chikaj, kan ruk'amon-wi k'a chi niya'ox ruq'ij. Jak'a yin man jun bey xtinya' ta qa nuq'ij. Jak'a wi nik'atzin chi ninya' nuq'ij, xaxe k'a xtintzijoj ri nikiq'alajirisaj chi yin maneq wuchuq'a'.

⁶Y man rik'in ri', wi ta yin ninya-qa nuq'ij, pa rubeyal ta ri ninben y man ta nik'ulun chi man jun etamabel k'o wik'in. Roma yin kan ja ta ri qitzij ri ninbij. Jak'a xa man ninya' ta qa nuq'ij, richin keri' man jun wineq ri tibanon más nim chuwe. Yin xaxe k'a ninwajo' chi tiban chuwe achi'el ri nikitz'et o nikak'axaj chuwij.

⁷Yin kan janila k'a e nima'q ri e ruq'alajirisan ri Dios chinuwech. Jak'a richin chi ronojel re' man tikiben chuwe richin ninnimirisaj nuq'ij, roma ri' toq k'o jun yabil ya'on chire ri nuch'akul. Y ri Satanás nukusaj re yabil re' achi'el jun k'ix richin chi nintej poqon pa ruq'a'.

⁸Y yin oxi' yan k'a bey nuk'utun utzil chire ri ajaw chi trelesaj-el ri nibanon chuwe chi nintej poqon.

⁹Jak'a ri ajaw xubij chuwe: Rat xaxe k'a kakikot rik'in ri wutzil y man jun chik ri xtik'atzin ta chawe. Toq maneq chik awuchuq'a' nana' rat, yin kan xkik'oje' awik'in y ninya' ri uchuq'a' ri nik'atzin chawe, xcha' chuwe. Roma ri' yin janila yikikot roma ri e nuk'uluwachilon ri xa nikik'ut chi maneq wuchuq'a'. Y rik'in ri' kan niqaqa-wi k'a pe ri ruchuq'a' ri Cristo pa nuwi'.

¹⁰Kan janila wi yikikot toq roma ri Cristo k'o ri yenk'uluwachila'; roma re' xa nikik'ut chi maneq wuchuq'a'. Yikikot toq k'o nikiben chuwe richin yinkik'ixbisaj, yikikot toq k'o yek'atzin chuwe y xa man jun nipe-wi, yikikot toq yinetzelex y yikikot chuqa' ri pa q'axo'n. Roma jak'a toq yin maneq chik wuchuq'a' ninna', jari' toq nipe wuchuq'a'.

¹¹Yin xa xinben achi'el jun wineq ri man jun etamabel rik'in, roma xinya-qa nuq'ij. Jak'a xa kan ja rix xixbanon chuwe chi xinben keri'. Pa ruk'exel ri' ja ta rix ri ruk'amon ta chi xixch'on richin xinito' y stape' chi yin xa man jun nuq'ij, jak'a man más ta in ko'ol chikiwech ri nikibananej chi e nima'q taq e taqon roma ri Cristo.

¹²Rix kan iwetaman k'a chi xinkoch' ronojel, y xq'alajin chiwech chi kan in jun taqon roma ri Dios; re' roma kan k'iy k'a meyel taq banobel y retal ri xenbanala' chi'ikojol.

¹³Yin nubanon k'a chiwe chi kan ix junan kik'in ri molaj qach'alal pa ch'aqa' chik tinamit. Xaxe k'a chiwe rix kan man jun to'onik ri xink'utuj, roma ri' wakami nink'utuj kuyubel numak chiwe roma re itzel banobel re'.

¹⁴Y re wakami, kan ink'o chik richin chi yinapon pa rox mul iwik'in. Y man k'a tich'ob chi k'o ejqa'n ninbenya' chiwij. Yin xa man ja ta k'a ri k'o iwik'in ri ninwajo', yin ja rix ri yixinwajo'. Roma achi'el nubij ri tzij: Ja ri tata'aj nimolo ri beyomel richin nuya' kan chike ri ralk'ual, y man ja ta ri alk'ualaxela' ri yemolo beyomel richin nikiya' chire ri kitata'.

¹⁵Roma ri' yin kan rik'in k'a janila kikoten xtinkusaj ri nubeyomel iwik'in rix, y chuqa' kan ninya' wi' yin roma kan janila ri wajowabal chiwe rix, stape' rix man kan ta yiniwajo' achi'el ri yixinwajo' yin.

¹⁶Roma ri' kan tiq'alajin k'a chiwech chi man jun ejqa'n nuya'on chiwij. Jak'a ek'o chiwe rix ri yebin chi xa kan in nowineq chubanik, y jebel ix nuq'olon.

¹⁷¿Xixinq'ol kami yin rik'in jun chike ri qach'alal ri xenteq chila' iwik'in?

¹⁸Roma richin xinteq ri qach'alal Tito ri chila' iwik'in, nabey na xink'utuj janila utzil chire, y k'ari' xbe rachibilan-el ri jun qach'alal. Ri qach'alal Tito man xixruq'ol ta, roma rija' y yin kan junan wi ri qach'obonik y ri qabanobal.

¹⁹¿Nich'ob rix chi rik'in ri ch'abel ri xqabij-qa yojtajin chiqato'ik-qi' chiwech? Ni, roma kan chuwech ri Dios ninbij chi xojch'on keri' iwik'in, roma jun qabanon rik'in ri Cristo. Kan richin k'a yixqato' roma janila yixqajo', y richin kan yixk'iy ta rik'in ri ik'aslen.

²⁰Roma yin ninna' chi toq xkinapon ri chila' iwik'in, achi'el xa man ix beneq ta achi'el ri woyoben yin. Y ninna' chuqa' chi itzel xtina' chuwe roma man ninbenbana' ta chik iwik'in achi'el ri iwoyoben rix. Rik'in juba' xa ninbenwila' chi'ikojol rix oyowalen, ch'upun-k'u'x, ek'o ri janila ye'oyower, ich'aralon-iwi', k'o itzel taq tzij ye'ibila' chikij ch'aqa' chik, yixch'on chikij ch'aqa' chik, man jun kiq'ij niben chike ri ch'aqa' chik qach'alal, y ek'o chuqa' banobel ri ye'iben ri xa man jun rubeyal.

²¹Ri ninpoqonaj k'a yin chupan re jun chik bey re yinapon iwik'in, ja wi rik'in juba' ri Dios nuqasaj nuq'ij chiwech rix y nuben chuwe chi yinoq' roma ri ibanobal rix; roma rik'in juba' xtinbenwila' chi k'a e k'iy qach'alal ri k'a ek'o na pa mak y man tzolejineq ta pe kik'u'x. Ri achi'a' y ri ixoqi' xa k'a nikikanola' na ki' richin yemakun.