Read Kaqchikel Gal 2 Bible Online

Gal 2 - Kaqchikel bible

Gal 2

¹Y toq xq'ax yan k'a kajlajuj juna', yin xibe chik jun bey ri pa Jerusalem, e wachibilan-el ri qach'alal Bernabé y ri Tito ri aj-Grecia.

²Y yin xibe roma kan ja ri Dios ri xq'alajirisan chinuwech. Toq xinapon, xaxe ri achi'a' ri k'o kiq'ij chikikojol ri qach'alal y yin ri xqamol-qi'. Y xintzijoj k'a chike ri achike rubanik ri utzilej ch'abel richin kolotajik ri nintzijola' chike ri man e qawinaq ta, richin keri' tiketamaj chi ri samaj ri ninben yin kan k'o-wi rejqalen.

³Man rik'in wi ri', ni ri qach'alal Tito stape' rija' man qawinaq ta, man xban ta chire chi xqupix richin ri retal achi'el ri k'o chi nikiben ri qawinaq.*f2*

⁴Man rik'in ri', chikikojol ri qach'alal ek'o ri xa man e qitzij ta qach'alal. Y rije' kan xkajo' chi xban ta ri etal ri'. Rije' kiju'un-apo-ki' xaxe richin nikinachaj ri solberi'il richin ri k'aslen rik'in ri Cristo Jesús, roma rije' kan nikajo' chi k'a yojxime' na chuxe' ronojel ri nubij ri pixa'.

⁵Jak'a roj ni xa ta juba' xubij qánima chi xeqanimaj ta; richin keri' ri qitzij rubanikil ri utzilej ch'abel richin kolotajik, jari' ta ri nik'oje' iwik'in.

⁶Y ri qach'alal ri k'o kiq'ij man jun chik k'a xkibij-pe chuwe. Y yin, man ja ta k'a wi k'o kiq'ij o maneq kiq'ij ri xintzu', roma ri Dios man ja ta ri nitzu'un ri wineq ri nutzu'.

⁷Pa ruk'exel chi k'o ta xkibij-pe chuwe, xa jari' toq xkinabej chi kan chuwe yin chilaben richin nintzijoj ri utzilej ch'abel richin kolotajik chike ri man e qawinaq ta, achi'el toq xchilabex chire ri Pedro chi tiberutzijoj ri ch'abel ri' chike ri qawinaq judío,

⁸roma ri Dios ri xtaqon richin ri Pedro chutzijoxik ri ch'abel richin kolotajik chike ri qawinaq, chuqa' jari' ri xitaqon yin richin nintzijoj ri ch'abel ri' chike ri man e qawinaq ta.

⁹Roma ri' toq ri Santiago ri chuqa' nibix Jacobo chire, ri Pedro y ri Juan, ri k'o kiq'ij chikikojol ri qach'alal, xq'ax chikiwech chi ja ri Dios chilabeyon-pe ri samaj ri' chuwe. Y richin niq'alajin chi junan qawech chi qachibil-qi', xkichop qaq'a', yin y ri Bernabé. Xaxe k'a roj yojbesamej chikikojol ri man e qawinaq ta, y rije' yebesamej chikikojol ri qawinaq judío.

¹⁰Xaxe k'a xkichilabej-pe chiqe chi kan ke'oqaqa chiqak'u'x ri man jun k'o kik'in ri ek'o pa Jerusalem. Y jari' ri nintej nuq'ij ninben.

¹¹Chirij ri' ri Pedro xbek'oje' pa tinamit Antioquía, y yin janila k'a xich'olin chirij, roma man choj ta ri najin chubanik chiri'.

¹²Roma pa nabey, kan niwa-wi kik'in ri qach'alal ri man e qawinaq ta. Jak'a xa xe'apon rik'in chiri', achi'a' ri e rachibil ri Santiago ri e eleneq-el pa Jerusalem. Y ri Pedro jari' k'a xuchop chi man nibewa' ta chik kik'in ri qach'alal ri man e qawinaq ta. Keri' xuben roma xuxibij-ri' chikiwech ri achi'a' ri xe'apon rik'in, roma ja achi'a' ri' ri yebin chi ri nikik'ul ri ch'abel richin kolotajik, k'o chi yequpix na richin ri retal.

¹³Y man xaxe ta ri'; xa kan keri' chuqa' xkiben ri qach'alal ri kan e qawinaq-wi ri e k'es chiri' pan Antioquía. Keri' kan xq'alajin k'a chi ri qach'alal ri e qawinaq xa ka'i' kipalej, roma pa nabey kan e beneq-wi kik'in. Y jajun ri Bernabé xuben achi'el ri xkiben rije'.

¹⁴Y roma k'a ri nikiben xa man ruk'uan ta ri' rik'in ri qitzij ri nubij chupan ri utzilej ch'abel richin kolotajik, chikiwech k'a konojel xinbij chire ri Pedro: Rat kan at judío-wi, jak'a xa man ataqen ta chik ri nubij ri pixa'. ¿Achike roma nawajo' chi ri man e qawinaq ta nikiben achi'el nubij chupan ri pixa'?, xicha' chire.

¹⁵Roj ri kan oj judío-pe pa qalaxik, kan man oj aj-maki' ta achi'el ri winaqi' ri man e judío ta.

¹⁶Man rik'in ri' qetaman chi ri wineq kan nik'ulun chi man jun rumak chuwech ri Dios*f3* xaxe toq nukuquba' ruk'u'x rik'in ri Jesucristo, y man roma ta chi nutaqej ri pixa'. Roma ri' roj judío chuqa' qakuquban qak'u'x rik'in ri Jesucristo richin chi man jun qamak yojk'ulun chuwech ri Dios, y man roma ta chi qataqen ri pixa'. Roma man jun nik'ulun chuwech ri Dios chi maneq ta rumak xaxe roma nutaqej ri pixa'.

¹⁷Roj xqakuquba' qak'u'x rik'in ri Cristo richin chi man jun qamak yojk'ulun chuwech ri Dios. Y roma ri' xq'alajin chi roj man xqataqej ta ri pixa'. Jak'a man yojtikir ta niqabij chi ja ri Cristo ri xobanon-qa aj-maki' chiqe. Man keri' ta.

¹⁸Y wi ta ninbenchapa' chik pe richin nintaqej ri pixa', kan nibeq'alajin k'a pe ri' chi man utz ta ri xinben toq xinya' kan.

¹⁹Yin man chik ink'o ta chuxe' ri nubij ri pixa', roma xa achi'el in kamineq chik. Y re ink'es wakami, kan roma k'a ri Dios.

²⁰Roma toq ri Cristo xkamisex, yin achi'el ta kan xiken rik'in. Y roma ri' re nuk'aslen re k'o wakami, man wichin ta yin, xa kan richin ri Cristo ri k'o pa wánima. Y ronojel k'a ri ninben-el chuwech re ruwach'ulew, xtinben k'a roma kan rik'in ri Cristo ri ruk'ajol ri Dios nukuquban-wi nuk'u'x; ri Cristo ri najowan wichin, y xuya' chuqa' ri' richin xkamisex woma.

²¹Yin man xtinwixowaj ta ri rutzil ri Dios, roma wi xaxe rik'in ri pixa' man jun qamak yojk'ulun chuwech ri Dios, ri Cristo man jun ta xk'atzin-wi chi xken.