Read Kaqchikel Gal 4 Bible Online

Gal 4 - Kaqchikel bible

Gal 4

¹Y ninwajo' k'a chuqa' ninchojmirisaj más chiwech ri rubanik ronojel re'. Achi'el ta jun ak'ual ri k'o nrichinaj kan chire ri rutata', jak'a roma xa k'a ko'ol ok, k'a man jani nuk'ul ta kan ri kan nrichinaj kan. Y stape' kan ja rija' rajaw ronojel, man jun rukojol re ak'ual re' rik'in jun loq'on samajel, roma k'a man ja jun k'o pa ruq'a'.

²Re ak'ual k'a re' e kanon chajiy y yuq'uy richin. Y ri ak'ual k'o chi nik'oje' chuxe' ri kitzij ri winaqi' ri', k'a toq napon na ri q'ij ri bin chire roma ri rutata' richin nuk'ul ri k'o chi nrichinaj.

³Y keri' k'a qabanon roj. Ri ojer kan, roj oj achi'el k'a ri ak'ual ri man jani tuk'ul ri nrichinaj kan. Xaxe chik k'a roj xojk'oje' chuxe' jalajoj ruwech pixa' ri e richin ri ruwach'ulew.

⁴Jak'a toq xoqaqa ri q'ij ri cha'on roma ri Dios, rija' xuteq k'a pe ri ruk'ajol y xo'alex-qa rik'in jun ixoq. Y roma chiqakojol roj judío xalex-wi ri ruk'ajol, xk'oje' k'a chuxe' ri pixa' richin ri Moisés.

⁵Y rija' xpe richin xojrukol roj ri ojk'o chuxe' ri pixa' ri', y richin chuqa' xuben chi yojok ralk'ual ri Dios.

⁶Y richin niq'alajin chi oj-ralk'ual chik ri Dios, rija' xuteq k'a pe ri Loq'olej Espíritu pa taq qánima qonojel. Y ri Loq'olej Espíritu nubij k'a: ¡Nata' yin, nata' yin!, nicha' chire ri Dios.

⁷Rik'in k'a ri' niq'alajin chi kan oj ralk'ual wi ri Dios, y man ojk'o ta chik chuxe' ri pixa'. Y roma oj ralk'ual chik ri Dios, niqichinaj ri nuya' rija'.

⁸Y toq rubanon kan, toq k'a man jani tiwetamaj ruwech ri Dios, rix xa ja ri ch'aqa' chik dios ri xe'isamajij, ri xa man e qitzij dios ta.

⁹Jak'a re wakami, kan iwetaman chik ruwech ri Dios. O más utz ninbij chi ja ri Dios ri etamayon chik iwech rix. ¿Achike k'a roma toq rix niwajo' chik nisamajij ri jalajoj ruwech pixa' richin ri ruwach'ulew?

¹⁰K'a ek'o q'ij ri ye'ichajila', y chuqa' ye'ichajila' ik', juna' y ch'aqa' chik nimaq'ij.

¹¹Roma ri' yin ninna' chi ri samaj ri xinben iwik'in, achi'el xa ta man jun xk'atzin-wi.

¹²Yin xinel yan pe chuxe' rutzij ri pixa'. Roma ri' wach'alal, nink'utuj utzil chiwe chi tibana' achi'el xinben yin. Toq xik'oje' iwik'in, rix yalan utz xiben wik'in, jak'a re wakami kan xiniya' pa q'axo'n.

¹³Rix jebel iwetaman, chi pa nabey xa roma jun yabil xichapo toq xik'oje' iwik'in y xintzijoj ri utzilej ch'abel richin kolotajik chiwe.

¹⁴Y rix janila k'iy tijoj-poqonal xik'owisaj wik'in roma ri yabil ri'. Y man rik'in ri in yawa', rix man itzel ta xinitz'et, ni man xinimalij ta. Xa kan jebel nuk'ulik xiben. Kan achi'el xa ta jun ángel richin ri Dios, o achi'el xa ta kan ja yin ri Cristo Jesús, ri xiben chuwe toq xinik'ul.

¹⁵Y chiri' yalan xkikot ri iwánima woma yin. Kan xq'alajin k'a chi janila xiniwajo'. Y yin wetaman chi wi ta kan k'o xk'atzin chuwe, rix kan xiya' ta chuwe stape' ta ja ri runaq' taq iwech. Jak'a re wakami, ¿akuchi k'a xbe-wi ri kikoten ri xk'oje' iwik'in pa nabey?

¹⁶¿Nich'ob rix chi yin xinok etzelanel iwichin roma toq xinbij ri qitzij chiwe?

¹⁷Y ek'o k'a ka'i-oxi' winaqi' chi'ikojol ri k'iy utzil nikiben chiwe. Jak'a rije' keri' nikiben roma nikajo' chi ye'itzeqelibej, y yinimalij ta kan yin.

¹⁸Jak'a wi k'o k'a jun ri nibanon utzil chiwe roma nrajo' chi utz ta yixk'oje', kan yalan-wi jebel, y beneq ta ruwech nuben keri' y man ta xaxe toq yin ink'o iwik'in.

¹⁹Toq rix man jani tikuquba' ik'u'x rik'in ri Cristo, yin kan janila q'axo'n xink'owisaj, achi'el ruq'axo'n jun ixoq ri nibe'alex yan ti ral. Y wakami jun bey chik ja q'axo'n ri' ninna' pa wánima. Ri q'axo'n ri' jantape' xtink'uaj, k'a toq rix xtiya' q'ij chi ri Cristo xtiq'alajin chi utz chupan ri ik'aslen.

²⁰Y yin janila k'a ninwajo' chi ink'o ta apo iwik'in re wakami; richin keri' man ta yich'on iwik'in achi'el re ninben wakami. Kan man nich'obotej ta k'a chinuwech achike ruk'amon ninben iwik'in.

²¹Rix ri niwajo' yixk'oje' chik chuxe' ri pixa': ¿Achike k'a roma toq man q'axineq ta chiwech ronojel ri nubij?

²²Roma tz'ibatajineq kan chi ri Abraham xek'oje' e ka'i' ruk'ajol. Ri jun ruk'ajol xk'oje' rik'in ri Agar ri loq'on aj-ik'. Y ri jun chik ruk'ajol xk'oje' rik'in ri rixjayil ri kan totajineq chik.

²³Ri ruk'ajol ri xk'oje' rik'in ri raj-ik', xalex achi'el ye'alex konojel ak'uala'. Jak'a ri jun chik ruk'ajol xalex roma kan ja ri Dios ri xsuju-pe chire.

²⁴Re tzij re' jun k'ambel-na'oj, roma re ka'i' ixoqi' re', nuk'exewachuj ri ka'i' jikibel-tzij ri xuben ri Dios. Ri Agar, achi'el ri jikibel-tzij ri xban pa ruwi' ri juyu' Sinaí. Y konojel k'a ri ye'alex keri', ye'alex chupan ri ximonri'il.

²⁵Ri Agar, kan achi'el-wi ri jikibel-tzij ri xban pa ruwi' ri juyu' Sinaí, ri pa ruwach'ulew Arabia. Chuqa' nuk'exewachuj ri nuwinaq judío ri kitzeqeliben ri pixa' ri k'o pa Jerusalem. Y roma ri' ek'o pa ximonri'il richin ri pixa'.

²⁶Jak'a ri Sara nuk'exewachuj ri tinamit Jerusalem, ri richin ri chila' chikaj. Y roj kan oj ral k'a rija' y kan oj totajineq chik.

²⁷Y chirij k'a ri' nich'on-wi ri ruch'abel ri Dios ri tz'ibatel kan, toq nubij:*f11* Kan kakikot k'a rat ixoq ri man jun bey xayawej kan chirij jun ak'ual. Rat ri man xek'oje' ta awal, kan kabixan rik'in kikoten, roma stape' at malin kan, kan xkek'oje' más e k'iy awal chikiwech ri ixoqi' ri k'o kachijil kik'in, nicha'.

²⁸Roma ri' wach'alal, rix xixok ralk'ual ri Dios roma keri' xusuj chiwe, kan junan k'a rik'in ri xbanatej rik'in ri Isaac, achi'el ri xusuj ri Dios chire ri Abraham.

²⁹Chupan ri q'ij ri' ri ral ri Agar ri man sujun ta pe roma ri Dios, xa xretzelaj k'a ri Isaac, ri kan sujun-pe y xalex rik'in ri ruchuq'a' ri Loq'olej Espíritu. Kan keri' chuqa' nik'uluwachitej wakami qik'in roj ri xojalex yan rik'in ri ruchuq'a' ri Loq'olej Espíritu. Yojetzelex k'a koma ri winaqi' ri maneq ri Loq'olej Espíritu kik'in.

³⁰Jak'a roj man niqaben ta achi'el xuben ri aj-ik' ri', roma ri ruch'abel ri Dios nubij chi telesex-el ri ixoq ri', rachibilan ri ral, roma ri ral ri aj-ik' man jun xtrichinaj chire ri rubeyomel ri rutata'. Xa kan xaxe wi ri ral ri ixjayilonel ri ruk'amon nrichinaj ri beyomel ri', roma ri ixoq ri' kan totajineq.*f12*

³¹Wakami k'a wach'alal, roj ri qakuquban qak'u'x rik'in ri Jesucristo, oj achi'el ri ral ri rixjayil ri Abraham, y kan oj totajineq chik.