Read Kaqchikel Fil 2 Bible Online

Fil 2 - Kaqchikel bible

Fil 2

¹Wach'alal, roma jun chik ibanon rik'in ri Cristo, k'o uxlanibel-k'u'x iwik'in, ri Loq'olej Espíritu nuben chiwe chi kan junan iwech, kan niwajo-iwi' y nijoyowaj iwech chi'iwachibil-iwi'.

²Roma ri' ninbij k'a chiwe chi kan junan iwech tibana', y jantape' kixajowan. Ronojel ri niben, rik'in jun ik'u'x tibana'. Wi keri' xtiben, kan xkikikot k'a iwoma.

³Ronojel ri niben, man tiben richin ninimirisaj-iwi' o richin chi xaxe chi utz yixk'ulun. Xa tiqasaj-iwi', y tibana' chi ja ri ch'aqa' más kiq'ij chiwech rix.

⁴Tich'obo' ri niqa' chikiwech ri ch'aqa' chik, y man xaxe ta ri niqa' chiwech rix.

⁵Kan kixch'obon k'a rix achi'el xch'obon ri Cristo:

⁶Roma rija' kan Dios wi. Jak'a man xuya' ta rejqalen chi junan ruq'ij-ruk'ojlen rik'in ri Dios.

⁷Man xupoqonaj ta k'a xuya' kan ri ruq'ij-ruk'ojlen, richin xo'alex-qa chuwech re ruwach'ulew. Kan xok k'a achi'el roj winaqi'; xsamej achi'el xabachike samajel.

⁸Rija' xuqasaj-ri'. Kan xunimaj y xuben k'a ronojel ri xubij ri Dios chire. Keri' xuben, k'a jampe' xapon chupan ri kamik; jun kamik chuwech ri cruz ri kan janila ruk'amon-pe k'ix.

⁹Y roma ri' ri Dios xuben chire chi k'o ruq'ij-ruk'ojlen ri chila' chikaj, y xok nimalej ajaw pa ruwi' ronojel, Y chuqa' xuya' jun rubi' ri más nim ruq'ij chikiwech konojel bi'aj.

¹⁰Richin keri' kan xaxe ta k'a pa rubi' ri Jesús yojxuke' qonojel: stape' ri ek'o chila' chikaj, re ojk'o chuwech re ruwach'ulew, y ri ek'o chuxe' re ruwach'ulew.*f2*

¹¹Y kan qonojel k'a xtiqabij chi ri Jesucristo jari' ri qajaw. Y keri', xtiqaya' ruq'ij-ruk'ojlen ri qatata' Dios.

¹²Roma ri', rix ri yalan yixinwajo', ninbij k'a chiwe chi jantape' tinimaj tzij, achi'el ibanon-pe toq xik'oje' iwik'in. Kan keri' chuqa' tibana' wakami, stape' man ink'o ta iwik'in. Rik'in qasanri'il, titija' iq'ij richin nisamajij ri ik'aslen rik'in ri Dios k'a toq xtitz'aqatisaj na.

¹³Roma ri Dios jari' ri nisamej pa taq iwánima, y nuya' ri rayibel chiwe chi niben ri niqa' chuwech rija'. Y kan nuya' chuqa' iwuchuq'a' richin yixtikir niben.

¹⁴Y ronojel ri niben, man kixxebeloj chubanik, ni man tiben oyowal.

¹⁵Richin keri' kan niq'alajin chi kan utz wi ri ik'aslen, y man ta jun itzel nilitej chiwij. Tiq'alajin k'a chi ix ralk'ual ri Dios, y chi man jun etzelal k'o pan iwánima, stape' ixk'o chuwech re ruwach'ulew chikikojol winaqi' ri man choj ta kik'aslen; ri kan e sachineq-wi rik'in ri kich'obonik. Ja rix k'a ri yixsaqirisan kichin ri winaqi' ri' roma ja rix ri ix achi'el rusaqil ri ruwach'ulew,

¹⁶roma niq'alajirisaj ri ch'abel richin k'aslen chikiwech. Yin ninwajo' k'a chi iwoma rix ri wánima xtikikot ta chupan ri q'ij toq xtipe ri Cristo, richin keri' xtiq'alajin chi k'o xk'atzin-wi ri samaj ri xinben iwik'in.

¹⁷Ri kuqubabel-ik'u'x y ri isamaj kan achi'el jun sipanik ri niya-apo chire ri Dios. Y rik'in juba' k'o ta chi xtibiyin nukik'el achi'el nitix ri kik' pa ruwi' ri sipanik ri'. Wi ta keri' nibanatej, yin roma ri' xkikikot, y xkikikot chuqa' iwik'in rix.

¹⁸Y keri' chuqa' rix, kan tikikot k'a ri iwánima, y kan junan k'a qojkikot.

¹⁹Wi ri ajaw Jesús xtuya' q'ij, chi'anin xtinteq-el ri qach'alal Timoteo iwik'in, richin nuk'en-pe rutzijol chuwe ri achike ibanon rix. Y keri' xtikuqer nuk'u'x yin.

²⁰Ninteq-el rija' roma kan man jun chik k'a k'o wik'in ri kan ta junan ránima wik'in yin, y qitzij ta nuch'ob achike ibanon rix.

²¹Ri ch'aqa' chik qach'alal xaxe ri niqa' chikiwech rije' ri nikich'ob, y man nikich'ob ta achike ri nik'atzin pa rusamaj ri Cristo Jesús.

²²Jak'a rix kan iwetaman chik k'a chi ri qach'alal Timoteo kan yalan-wi utz. Iwetaman chik chi rija' okineq achi'el nuk'ajol, roma samajineq wik'in richin qaq'alajirisan ri utzilej ch'abel richin kolotajik.

²³Roma ri' ja rija' ri xtinteq-el iwik'in toq yin xtinnabej ri nojin pa nuwi' re pa q'atbel-tzij.

²⁴Jak'a yin kan kuqul k'a nuk'u'x chi ri Dios xtuben chi yin chuqa' xkitikir xkinapon chik iwik'in pa jun ka'i-oxi' apo q'ij.

²⁵Chuqa' xa kan k'atzinel chi ninteq yan el iwik'in ri wach'alal Epafrodito ri itaqon-pe wik'in. Rija' xiruto' rik'in ri xk'atzin chuwe; kan qachibil k'a qi' rik'in richin qatijon qaq'ij pa rusamaj ri Dios.

²⁶Rija' janila nrajo' chi yixrutz'et yan chi'anin, roma retaman chi rix xiwak'axaj chi rija' janila xyawej.

²⁷Y qitzij chi rija' janila xyawej y jubama xken. Jak'a ri Dios xujoyowaj ruwech, y xujoyowaj chuqa' nuwech yin, roma wi ta xken, k'o ta chik jun q'axo'n xpe wik'in pa kiwi' ri q'axo'n ri kan ek'o chik pa wánima.

²⁸Roma ri' kan xinch'ob-wi k'a chi nitzolin yan iwik'in, richin nikikot ri iwánima toq xtitz'et, keri' yin maneq chik xkixinbisoj ta.

²⁹Kan rik'in k'a janila kikoten tik'ulu', roma rija' kan rujachon-ri' richin nusamajij ri Dios. Keri' ruk'amon chi niben kik'in konojel qach'alal ri kichajin ri samaj ri',

³⁰roma rija' xa kan jubama k'a xken chubanik ri rusamaj ri Cristo. Kan xuya' k'a ri' chuwikamik richin xiruto' rik'in ri samaj ri man yixtikir ta rix richin yinito' chubanik.