Read Kaqchikel Jos 1 Bible Online

Jos 1 - Kaqchikel bible

Jos 1

¹Kere' k'a xbanatej chirij ri rukamik ri Moisés: K'o k'a jun achin rubini'an Josué ruk'ajol kan ri Nun y ri achin ri' ja rija' ri to'onel richin ri Moisés ri rusamajel ri Jehová; y toq kamineq chik el ri Moisés, ri Jehová xubij chire ri Josué:

²Rat xatz'et chi ri nusamajel Moisés xken-el. Wakami k'a, rat xkayuqen richin ri atinamit Israel, xke'aq'axaj k'a apo chupan ri raqen-ya' rubini'an Jordán, richin chi ninya' ri ulew chiwe rix.

³Ronojel ri ulew ri akuchi xkixq'ax-wi jari' xtok iwichin, achi'el nubin chire ri Moisés.

⁴Ri iruwach'ulew nitiker-pe chuchi' ri tz'iran ruwach'ulew ri k'o pa xokon y napon k'a chuchi' ri juyu' Líbano ri k'o pa xaman, y nuchop chik pe chuchi' ri nimalej raqen-ya' Éufrates ri k'o pa relebel-q'ij y chijun kiruwach'ulew ri e rijatzul kan ri Het y napon k'a chuchi' ri palou akuchi niqaqa-wi ri q'ij; ja ronojel re' ri ruchi' ri ruwach'ulew ri xtok iwichin.

⁵Man jun k'a xtitikir chawij chupan ronojel q'ij chire ri ak'aslen, achi'el xik'oje' rik'in ri Moisés, kan keri' chuqa' xkik'oje' awik'in rat, man xkatinya' ta kan y man xkatinmalij ta kan.

⁶Kow k'a kak'oje' y man taxibij-awi', roma ja rat xkajachon ri ulew chike ri awinaq, ri ulew ri xtikichinaj kan, ri xinya' nutzij chire chi kan chike ri ite-itata' ninya-wi.

⁷Xaxe ninnataj chawe chi kow k'a kak'oje' y man taxibij-awi' y kan tataqej k'a ronojel ri pixa' kichin konojel winaqi' ri xuq'et kan ri nusamajel Moisés pan iwi', man k'a tajech'ej kan awi' chire re pixa' re' ni ta pan awijkiq'a' ni ta pan awajxokon richin k'a keri' ronojel ri xtaben kan utz k'a xtel chawech.

⁸Man jun bey k'a katane' chubixik ri pixa' kichin konojel winaqi' ri tz'ibatel kan chupan re wuj re', xa kan chi paq'ij, chi chi'aq'a' taquqa-rij richin nayek pan awánima ri tz'ibatel kan chupan ri wuj, y keri' kan utz k'a xkabe chupan ri abey y ronojel k'a ri xtaben kan utz k'a xtel chawech.

⁹Tawak'axaj k'a ri ninbij chawe: Tatija' k'a aq'ij y kow k'a kak'oje', man taxibij-awi', ni man timayamo-qa ri awánima roma yin Jehová ri a-Dios kan xkik'oje' awik'in xabakuchi xkabe-wi, xcha' ri Dios chire ri Josué.

¹⁰K'ari' ri Josué xeruteq-el ri achi'a' ri e aj-raqen richin ri tinamit y xubij-el chike:

¹¹Kixbiyin pa runik'ajal ri akuchi ek'o-wi-qa ri winaqi' y tibij chike chi tikichojmirisaj ri achike ri nikik'uaj richin nikitej roma pa rox q'ij xqojbe richin chi xtiqaq'axaj ri raqen-ya' Jordán richin yojok-apo y xtok qichin ri ruwach'ulew ri xtuya' chiqe ri Jehová ri qa-Dios, xcha' chike.

¹²Chuqa' rija' xch'on kik'in ri achi'a' ri e riy-rumam kan ri Rubén, ri Gad y ri nik'aj tzobaj richin ri Manasés y xubij chike:

¹³Toqaqa k'a chi'ik'u'x chi ri ch'abel ri xubij kan ri Moisés ri rusamajel ri Jehová toq xubij chi ri Jehová qa-Dios xuya' yan k'a ri ulew ri rusujun kan chiwe, richin chiri' yixk'oje-wi richin q'asen, xcha' kan ri Moisés.

¹⁴Wakami k'a ri iwixjayilal, y ri taq iwalk'ual y ri iwawej xkekanej k'a kan chupan re iruwach'ulew, re ruya'on kan chiwe ri Moisés re k'o pe kere' chire re raqen-ya' Jordán, jak'a rix achi'a' ri ix richin labal xkixik'o-el rik'in ri ikamisabal chikiwech ri qach'alal richin xke'ito'.

¹⁵Rix kan xqojito', k'a toq ri Jehová xtuya' na chiqe ri ulew richin xtiqichinaj achi'el ri xuya' yan chiwe rix; y k'ari' xkixtzolin-pe chupan re ruwach'ulew re' re iwichinan kan rix, re ruya'on kan ri Moisés ri rusamajel ri Jehová chiwe, re k'o pe kere' pa relebel-q'ij chire re Jordán, xcha' ri Josué.

¹⁶K'ari' ri aj-raqen kichin ri e ka'i' tzobaj rik'in nik'aj xkibij chire ri Josué: Roj kan xtiqaben ronojel ri xtabij chiqe y xqojbe xabakuchi xqojateq-wi-el rat.

¹⁷Roj chuqa' xkatqanimaj, achi'el xqanimaj rutzij ri Moisés pa ruwi' ronojel. Xaxe niqajo' chi ri Jehová ri qa-Dios kan ta xtik'oje' awik'in, achi'el xk'oje' rik'in ri Moisés.

¹⁸Y xabachike k'a ri xtiyakatej chirij ri apixa' y man xtuben ta ri xtabij rat chire, kan xtiken k'a. Xaxe k'a niqajo' chi tatija' aq'ij y man tik'oje' xibinri'il chawech, xecha' rije'.