Read Kaqchikel Jos 11 Bible Online

Jos 11 - Kaqchikel bible

Jos 11

¹K'o k'a jun achin rubini'an Jabín rey richin ri tinamit Hasor. Y toq xrak'axaj ronojel re', jari' toq xuteq rubixik chire ri Jobab rey richin ri tinamit Madón, chire ri rey richin ri tinamit Simrón y ri chire ri rey richin ri tinamit Acsaf,

²y chuqa' chike ri rey ri ek'o chuwa taq juyu' ri ek'o pa xaman, ri ek'o pa taq'aj kojol juyu' ri k'o pa xokon chire ri choy richin Quinéret, ri ek'o pa taq'aj chuwech ri palou y ri ek'o pa tinamit Nafot-dor ri k'o pa qajbel-q'ij chire ri ruwach'ulew,

³y ri rey ri ek'o pa kiwi' ri winaqi' aj-Canaán ri ek'o pa relebel-q'ij y ri ek'o pa qajbel-q'ij, y chike ri amorreo, ri hitita, ri ferezeo, ri jebuseo ri ek'o chuwa taq juyu' y chike ri heveo ri ek'o chuxe' ri juyu' Hermón chiri' pa ruwach'ulew Mispá.

⁴Rije' y konojel aj-labal kan janila k'a e k'iy, ri kan man e ajlatel ta achi'el ri sanayi' ri k'o chuchi' ri palou. Ri e rey y ri achi'a' ri' xebe richin xbekibana' oyowal e kachibilan-el janila e k'iy kiej y carruaje richin oyowal.

⁵Konojel k'a re rey re' xjunamatej k'a el kiwech, y xebek'oje' chunaqaj ri ti choy rubini'an Merom richin nibekibana' oyowal kik'in ri israelita.

⁶K'ari' ri Jehová xubij chire ri Josué: Man tak'en kikiy rije', roma ke taq wa' chua'q xenjech yan pan iq'a', y konojel rije' e kaminaqi' chik. Y rix xke'itzak'ila' kan ri paten-iboch' richin ri kaqen ri kikiej, y ri ki-carruaje xke'iporoj kan, xcha'.

⁷Chirij ri' ri Josué y konojel ri aj-labal xebe y chaq k'ate' xekichop chi oyowal ri etzelanel kichin ri ek'o chunaqaj ri ti choy Merom.

⁸Ri Jehová xerujech k'a ri winaqi' ri' pa kiq'a' ri Josué y ri achi'a'; xekich'ek y xekitzeqelibej k'a pa nimalej tinamit Sidón y k'a pa Misrefot-maim y k'a pa taq'aj richin Mispá ri k'o pa relebel-q'ij. Y xekikamisaj kan y man jun k'a xk'ase' kan.

⁹Ri Josué xuben kik'in achi'el rubin ri Jehová chire: Xekitzak'ila' k'a kan ri paten-iboch' richin ri kaqen ri kikiej, y ri ki-carruaje xekiporoj kan.

¹⁰K'ari' xetzolin ri Josué y ri achi'a' y xe'apon pan Hasor y xekich'ek, y xkikamisaj ri ru-rey rik'in espada. Re tinamit re' ojer kan ja rija' ri xk'oje' pa kiwi' konojel ri rey ri'.

¹¹Kan xekikamisaj chi espada konojel ri winaqi' ri ek'o pa tinamit ri', y kan man jun chik k'a xk'ase' kan; y ri tinamit xkiya' ruq'aq'al.

¹²Keri' chuqa' ri Josué y ri achi'a' xekich'ek k'a konojel ri tinamit ri', y ri ki-rey xekikamisaj chi espada, y xekik'is k'a achi'el rubin kan ri Moisés ri rusamajel ri Jehová.

¹³Jak'a ri tinamit ri ek'o pa ruwi' taq juyu' man xekiporoj ta, xaxe k'a ri tinamit Hasor ri xkiporoj kan.

¹⁴Y ri Josué y ri achi'a' xok kichin ronojel ri ek'o chupan ri tinamit ri xekich'ek, y chuqa' ronojel ri awej ri xekil chupan ri tinamit ri'; jak'a konojel ri winaqi' xekikamisaj chi espada, y kan man jun xk'ase' kan chike,

¹⁵achi'el k'a ri xubij ri Jehová chire ri Moisés ri rusamajel; keri' chuqa' xubij kan ri Moisés chire ri Josué. Y ri Josué kan xuben k'a ronojel achi'el xubij ri Jehová chire ri Moisés.

¹⁶Keri' ri Josué y ri achi'a' xekich'ek ronojel ri ruwach'ulew: Ri chuwi' taq juyu', ronojel ri ruwach'ulew pa xokon, ronojel ri ruwach'ulew Gosen, ri taq'aj ri k'o chuwech ri palou, ri taq'aj kojol juyu' richin ri raqen-ya' Jordán y ri ruwa taq juyu' richin Israel.

¹⁷Ri ruwach'ulew ri' nitiker-el pa xokon rik'in ri juyu' Halac ri nijote-el pa Seír, napon k'a pa xaman chire ri Baal-gad ri pa taq'aj richin ri juyu' Líbano, chuxe' ri juyu' Hermón. Xekich'ek k'a ri e ki-rey y xekikamisaj.

¹⁸Ri Josué y ri achi'a' kan k'iy juna' xkiben labal kik'in ri rey ri'.

¹⁹Man jun k'a chike ri tinamit ri' ri xjunamatej ta kiwech kik'in ri Josué y ri achi'a'; xa kan xaxe k'a ri winaqi' heveo ri ek'o pa Gabaón ri xjunamatej-kiwech kik'in. Ri ch'aqa' chik xech'akatej rik'in ri labal.

²⁰Xbanatej k'a ronojel re' roma kan ja ri Jehová xkowirisan ri kánima ri winaqi', richin xkiben oyowal kik'in ri aj-Israel. Y ri Jehová xuben keri' richin chi xekamisex, y man jun xjoyowan ta kiwech. Keri' xek'is konojel tinamit, achi'el k'a xubij ri Jehová chire ri Moisés.

²¹Chupan k'a ri q'ij ri', ri Josué chuqa' xeruk'is konojel ri e rijatzul kan ri Anac ri nima'q kipalen ri ek'o chuwi' taq juyu' richin Hebrón, richin Debir, richin Anab, y ri ek'o chuwi' taq juyu' richin Judá y richin chijun ruwach'ulew Israel. Ri Josué kan xeruk'is k'a konojel ri winaqi' ri ek'o chiri' y chuqa' ri kitinamit.

²²Man jun k'a chike ri e rijatzul ri Anac ri xk'oje' ta kan chupan ri kiruwach'ulew Israel. Xaxe k'a xek'oje' kan chupan ri tinamit Gaza, Gat y Asdod.

²³Keri' ri Josué y ri aj-labal xkich'ek ronojel ri ruwach'ulew, achi'el ronojel rubin ri Jehová chire ri Moisés. Ri Josué xujech k'a ri ulew chike ri ruwinaq richin xkichinaj chikijujunal, achi'el ri kitzobaj; y xok k'a kichin y xe'uxlan k'a chire ri labal.