Read Kaqchikel Jos 14 Bible Online

Jos 14 - Kaqchikel bible

Jos 14

¹Jare' ri ruwach'ulew ri xkichinaj kan ri israelita pa Canaán. Y ri xejachon ja ri sacerdote Eleazar, ri Josué ruk'ajol kan ri Nun, y ri e tata'al richin ri tzobaj kichin ri winaqi' israelita.

²Ri ruwach'ulew ri xkichinaj kan, xjach rik'in sakinik chike ri beleje' tzobaj rik'in nik'aj, achi'el ri rubin ri Jehová chire ri Moisés.

³Jak'a ri ka'i' tzobaj rik'in nik'aj ya'on chik kan ri kiruwach'ulew roma ri Moisés ri kan k'o chi nikichinaj ri pa relebel-q'ij chire ri raqen-ya' Jordán. Jak'a ri tzobaj richin ri Leví man jun ruwach'ulew richin tiko'n xkichinaj chikikojol rije'.

⁴Ri e ruk'ajol kan ri José ka'i' tzobaj kibanon; ri jun tzobaj ja ri richin ri Manasés y ri jun chik tzobaj ja ri richin ri Efraín. Jak'a ri tzobaj richin ri Leví man jun ri xkichinaj kan richin yetikonej chuwech; ri xkichinaj kan rije' xaxe jujun tinamit richin yek'oje-wi y juba' kisoq'olbal richin ri kiwákix y ri kikarne'l.

⁵Keri' xkiben ri israelita richin xkijech ri ruwach'ulew Canaán chikiwech rije', achi'el ri rubin ri Jehová chire ri Moisés.

⁶Y jujun chike ri e rijatzul kan ri Judá xebe richin xebetzijon rik'in ri Josué pa Guilgal; y chikikojol rije' beneq ri Caleb ruk'ajol ri Jefuné ri rijatzul ri Quenaz, y rija' xubij-apo chire ri Josué: Rat kan jebel awetaman achike xubij ri Jehová chire ri Moisés pa Cadés-barnea pa nuwi' yin y pan awi' rat.

⁷Yin k'o k'a kawineq nujuna' toq ri Moisés xojruteq-pe, y xojel k'a pe pa Cadés-barnea, richin xoqetamaj kan re ruwach'ulew re' y yin xink'uaj-el ri rutzijol chire achi'el ri xuna' ri wánima toq xintz'et re ulew re'.

⁸Ri qachibil ri xepe qik'in richin xoqanik'oj re ruwach'ulew re' xa xkiben chire ri tinamit richin xmayamo-qa ri kánima; jak'a yin xinben achi'el rubin ri Jehová ri qa-Dios.

⁹Jari' toq ri Moisés xuya' rutzij y xubij chuwe: Kan qitzij na wi ri ruwach'ulew ri akuchi xaq'ax-wi, jari' xtok awichin rat y kichin ri awijatzul richin jantape', roma kan xaben pa ruchojmilal achi'el xubij ri Jehová ri qa-Dios, xcha' chuwe.

¹⁰Xq'ax yan k'a kawineq wo'o' juna' toq ri Jehová xubij re' chire ri Moisés toq k'a yojbiyin na chupan ri tz'iran ruwach'ulew y k'a ruya'on na nuk'aslen k'a re wakami, y wakami jumuch' wo'o' chik nujuna'.

¹¹Jak'a yin kan k'a janila in kow nina' kan k'a achi'el ri q'ij ri' toq xojruteq-pe ri Moisés, richin xoqanik'oj re ruwach'ulew re'. Y k'a k'o na wuchuq'a' richin yibe pa labal.

¹²Taya' k'a chuwe re chuwi' taq juyu' re' achi'el xubij kan ri Jehová chupan ri q'ij ri'. Rat kan xawak'axaj chupan ri q'ij ri', chi ri nima'q kipalen achi'a' ri e rijatzul kan ri Anac ek'o chiri' y kan k'a ek'o na chiri' chupan ri nima'q taq tinamit ri e sutin-kij rik'in tz'aq; rik'in ri ruto'onik ri Jehová xkenwelesaj-pe achi'el rubin rija', xcha' ri Caleb.

¹³K'ari' ri Josué xuya' ri urtisanik pa ruwi' ri Caleb, y xujech kan pa ruq'a' ri tinamit Hebrón richin xrichinaj kan.

¹⁴Kan chupan k'a ri q'ij ri' ri Caleb xrichinaj kan ri tinamit Hebrón, roma kan xutaqej ronojel ri xbix chire roma ri Jehová ri ki-Dios ri israelita.

¹⁵Ri tinamit Hebrón, ojer kan rubini'an Rutinamit ri Arbá, roma ojer kan ri chiri' xk'oje' jun achin nim rupalen rubini'an Arbá rijatzul kan ri Anac. Y ri israelita xetane' k'a chire ri labal.