Read Kaqchikel Jos 15 Bible Online

Jos 15 - Kaqchikel bible

Jos 15

¹Ri ruwach'ulew ri xuk'ulumaj rik'in sakinik ri tzobaj richin ri Judá, xya'ox k'a chike achi'el ri kajlabal chi kach'alal-ki', y ri kik'ulba't nitiker-el chuchi' ri ruwach'ulew Edom, y ri pa xokon napon rik'in ri tz'iran ruwach'ulew nibix Sin chire, jari' ruchi' ri xokon.

²Y ri ruk'ulba't ri k'o pa xokon nitiker-el chuchi' ri Tzayi-Choy akuchi k'o-wi ri ruq'a-ya' ri nitzu'un-apo pa xokon.

³Ri pa xokon nel k'a pe rik'in ri ruwa-juyu' Acrabim, niq'ax rik'in ri Sin y nijote-q'anej pa xokon, napon k'a pa tinamit Cadés-barnea, niq'ax k'a pa tinamit Hesrón y nijote-q'anej k'a pa tinamit Adar y nuchojmij-ri' pa qajbel-q'ij chire ri tinamit Carcá.

⁴Y keri' niq'ax-el pa tinamit Asmón y niq'ax-el rik'in ri ch'uti'n raqen-ya' richin Egipto, y nibek'is k'a rik'in ri palou. Jari' ri ruk'ulba't ri pa xokon.

⁵Ri k'ulba't ri k'o pa relebel-q'ij ja ri Tzayi-Choy, y napon k'a rik'in ri akuchi nok-wi-apo ri raqen-ya' Jordán. Y chiri' ri k'ulba't ri k'o pa xaman, nel-pe k'a rik'in ri ruq'a' ya' y nuchojmij ri raqen-ya' Jordán ri nibe pa xaman,

⁶re k'ulba't re' napon-q'anej pa tinamit Bet-hoglá, y nuchojmij-el-ri' k'a pa xaman chire ri tinamit Bet-arabá, y nijote-q'anej k'a akuchi k'o-wi ri abej richin Bohan ri ruk'ajol kan ri Rubén.

⁷Y napon k'a pa taq'aj kojol juyu' richin Acor y nijote-q'anej k'a pa tinamit Debir, nuchojmij-el-ri' pa xaman y napon k'a jun chik tinamit Guilgal, nitzu'un-qa chuwech ri ruwa-juyu' Adumim, ri k'o pa xaman y ri ch'uti'n raqen-ya' niq'ax chikikojol. Y ri k'ulba't ri' niq'ax-el k'a rik'in ri ralaxbel-ya' richin Semes, y napon k'a rik'in ri ralaxbel-ya' richin Roguel.

⁸Re k'ulba't re' nijote-q'anej pa taq'aj richin ri ruk'ajol ri Hinom y niq'ax pa xokon chire ri Jebús, ri chuqa' rubini'an Jerusalem; y k'ari' nijote-q'anej pa xaman y nuchojmij ri taq'aj kojol juyu' richin ri Hinom y napon k'a rik'in ri taq'aj kojol juyu' richin ri Refaim chuxikin ri xaman.

⁹Y re k'ulba't re' nuchojmij ri ruwi' ri juyu' chiri' y napon-qa k'a rik'in ri ralaxbel-ya' richin ri Neftóah, y nel-pe pa taq tinamit ri e richin ri juyu' Efrón, y nuchojmij ri tinamit Baalá ri chuqa' nibix ri rutinamit Jearim chire.

¹⁰Chirij re' ri k'ulba't nuchojmij-el-ri' k'a pa qajbel-q'ij chire ri tinamit ri' y napon k'a rik'in ri jun chik juyu' Seír, y niq'ax k'a chuxikin ri juyu' Jearim, niq'ax-el chuchi' ri xaman; ri chuqa' nibix juyu' Quesalón chire. K'ari' niqaqa-qa pa tinamit Bet-semes y niq'ax-qa k'a pa tinamit Timná.

¹¹Nel k'a pe pa ruk'ulba't ri tinamit Ecrón, niq'ax-el chuchi' ri xaman; y nuchojmij-el-ri' pa xaman y napon k'a pa tinamit Sicrón, y niq'ax k'a el chuchi' ri juyu' Baalá y nel-el pa tinamit Jabneel. Y ri ruk'ulba't nik'is k'a chupan ri palou.

¹²Ri k'ulba't ri k'o pa qajbel-q'ij ja ri palou; jari' ri k'ulba't kichin ri e rijatzul kan ri Judá ri xkitaluj chikiwech achi'el ri kajlabal chi kach'alal-ki'.

¹³Ri Josué xuya' kan ri tinamit Hebrón chire ri Caleb ruk'ajol ri Jefuné richin ri tzobaj richin kan ri Judá, richin xrichinaj kan achi'el ri rubin ri Jehová chire ri Josué. Y ri tinamit ri' k'o chupan ri ruwach'ulew Judá, ri ojer kan nibix rutinamit ri Arbá chire, y ri Arbá ri' jari' ri ánima rutata' ri Anac.

¹⁴Ri Caleb xerelesaj k'a pe chi e oxi' rijatzul kan ri Anac: Ri Sesai, ri Ahimán y ri Talmai.

¹⁵Y chiri' xjote-q'anej kik'in ri ek'o chiri' pa tinamit Debir ri ojer kan xubini'aj ri rutinamit ri Séfer.

¹⁶Y ri Caleb xubij chike ri aj-labal: Ri xtibebanon oyowal y xtuch'ek ri tinamit Séfer, yin kan xtinya' ri numi'al Acsa chire richin nok rixjayil, xcha'.

¹⁷Ri Caleb k'o k'a jun rach'alal rubini'an Quenaz, y ri rach'alal ri' k'o k'a jun ruk'ajol rubini'an Otoniel; y ja rija' ri xch'akon. K'ari' ri Caleb kan xuya' k'a ri Acsa chire richin xok rixjayil.

¹⁸Toq rije' xe'el-pe chiri' richin yebe yan pa kachoch, jari' toq ri Otoniel xubij chire ri Acsa chi tuk'utuj*f3* juba' kulew richin tiko'n chire ri rutata'. Y jari' toq rija' xqaqa chirij ri rubur. Y ri Caleb xuk'utuj chire ri achike nrajo'.

¹⁹Rija' xubij-apo: Nink'utuj jun utzil chawe chi taya' jun chik sipanik chuwe. Kan qitzij wi chi aya'on chik wulew jak'a xa janila chaqi'j richin tiko'n y yin ninwajo' chi naya' ta ulew chuwe ri akuchi ek'o-wi ri ralaxbel-ya', xcha'. Ri rutata' kan xuya' k'a ulew chire ri k'o ralaxbel-ya' chupan ri k'o pa jotol y ri jun chik ri k'o pa xulan.

²⁰Jare' ri ulew ri xkichinaj kan ri tzobaj richin ri Judá, achi'el ri kajlabal chi kach'alal-ki'.

²¹Ri tinamit ri xok kan kichin ri pa xokon ri k'o pa k'ulba't chire ri Edom: Ja ri Cabseel, Éder, Jagur,

²²Quiná, Dimoná, Adadá,

²³Quedes, Hasor, Itnán,

²⁴Zif, Télem, Bealot,

²⁵Hasor-hadatá, Quiriot, Hesrón ri chuqa' nibix Hasor chire,

²⁶Amam, Semá, Moladá,

²⁷Hasar-gadá, Hesmón, Bet-pélet,

²⁸Hasar-sual, Beerseba, Bisotia,

²⁹Baalá, Iim, Ésem,

³⁰Eltolad, Quesil, Hormá,

³¹Siclag, Madmaná, Sansaná,

³²Lebaot, Silhim y En-rimón; ronojel k'a re' e juwineq beleje' tinamit rik'in ri kokoj kitinamit.

³³Ri tinamit ri ek'o chuwa taq juyu': Ja ri Estaol, Sorá, Asná,

³⁴Zanóah, En-ganim, Tapúah, Enam,

³⁵Jarmut, Adulam, Socó, Azecá,

³⁶Saaraim, Aditaim, Guederá, y Guederotaim; ronojel re' e kajlajuj tinamit rik'in ri kokoj kitinamit.

³⁷Y ja chik ch'aqa' tinamit re': Ri Senán, Hadasá, Migdal-gad,

³⁸Dileán, Mispá, Jocteel,

³⁹Laquis, Boscat, Eglón,

⁴⁰Cabón, Lahmam, Quitlís,

⁴¹Guederot, Bet-dagón, Naamá y Maquedá; ronojel re' e waqlajuj tinamit rik'in ri kokoj kitinamit.

⁴²Y ja chik ch'aqa' tinamit re': Ri Libná, Éter, Asán,

⁴³Iftah, Asná, Nesib,

⁴⁴Queilá, Aczib, y Maresá; ronojel re' e beleje' tinamit rik'in ri kokoj kitinamit.

⁴⁵Y chuqa' xkichinaj ri nima-tinamit Ecrón rik'in ri e rutinamit y ri kokoj rutinamit,

⁴⁶y chuqa' ri tinamit y ri kokoj kitinamit ri ek'o chikikojol ri Ecrón y ri tinamit Asdod, y napon k'a chuchi' ri palou.

⁴⁷Y chuqa' xkichinaj ri nima-tinamit Asdod rik'in ri e rutinamit y ri kokoj rutinamit, y chuqa' ri nima-tinamit Gaza rik'in ri e rutinamit y ri kokoj rutinamit ri napon k'a rik'in ri raqen-ya' richin Egipto y ri palou.

⁴⁸Y chuqa' xkichinaj ri tinamit ri ek'o chuwi' taq juyu'; y ja kibi' re tinamit re': Ri Samir, Jatir, Socó,

⁴⁹Daná, rutinamit ri Saná ri chuqa' nibix Debir chire,

⁵⁰Anab, Estemoa, Anim,

⁵¹Gosen, Holón y Guiló; ronojel re' e julajuj tinamit rik'in ri kokoj kitinamit.

⁵²Y chuqa' xkichinaj ri tinamit Arab, Dumá, Esán,

⁵³Janum, Bet-tapúah, Afecá,

⁵⁴Humtá, rutinamit Arbá ri chuqa' nibix Hebrón chire, y ri Sior; ronojel re' beleje' tinamit rik'in ri kokoj kitinamit.

⁵⁵Y chuqa' xkichinaj ri tinamit Maón, Carmel, Zif, Jutá,

⁵⁶Jezreel, Jocdeam, Zanóah,

⁵⁷Caín, Guibeá y Timná; ronojel re' e lajuj tinamit rik'in ri kokoj kitinamit.

⁵⁸Y chuqa' xkichinaj ri tinamit Halhul, Bet-sur, Guedor,

⁵⁹Maarat, Bet-anot y Eltecón; ronojel re' e waqi' tinamit rik'in ri kokoj kitinamit.

⁶⁰Y chuqa' xkichinaj ri rutinamit Baal ri chuqa' nibix rutinamit Jearim chire, y chuqa' ri tinamit Rabá; ka'i' tinamit rik'in ri kokoj kitinamit.

⁶¹Chupan ri tz'iran ruwach'ulew xkik'ulumaj ri tinamit Bet-arabá, Midín, Secacá,

⁶²Nibsán, y ri jun chik tinamit ri nibix Atz'an chire, y ri En-gadi; ronojel re' e waqi' tinamit rik'in ri kokoj kitinamit.

⁶³Ri rijatzul kan ri Judá man xetikir ta xekelesaj-pe ri jebuseo ri ek'o chiri' pa Jerusalem, xa xek'oje-qa chikikojol rije' k'a re wakami.