Read Kaqchikel Jos 18 Bible Online

Jos 18 - Kaqchikel bible

Jos 18

¹Konojel ri winaqi' israelita xkimol-ki' chiri' pa tinamit Siló y chiri' xkipaba-q'anej ri rachoch ri Jehová richin molojri'il, y re' xkiben toq xjach yan ri ruwach'ulew chike.

²Y k'a ek'o na kan e wuqu' tzobaj chike rije' ri man jani tijach ri kulew ri k'o chi nikichinaj kan.

³K'ari' ri Josué xubij chike: ¿Achike iwoyoben rix richin niwichinaj ri ruwach'ulew ri xa jachon chik chiwe roma ri Jehová ri qa-Dios y ri ki-Dios chuqa' ri qati't-qamama'?

⁴Ke'icha' k'a e oxi' achi'a' chikikojol ri jujun tzobaj richin yenteq-el, y xkebe k'a richin nibekinik'oj ri ruwach'ulew ri achike rubanik. K'ari' xketzolej-pe richin nikitzijoj chuwe; k'ari' xtinjech chiwech richin xtiwichinaj kan.

⁵Re achi'a' re' xtikelesaj k'a pa wuqu' ri ruwach'ulew ri man jani tijach; jak'a ri tzobaj richin ri Judá kan xkek'oje' chiri' pa kiruwach'ulew ri k'o pa xokon, y chuqa' ri e rijatzul ri José kan xkek'oje' chiri' pa kiruwach'ulew ri k'o pa xaman.

⁶Xtikelesaj k'a pa wuqu' ri ruwach'ulew ri'. Y k'ari' xkixpe k'a chinuwech yin, y kan chuwech k'a ri Jehová xtiqaben-wi ri sakinik pa ruwi' ri ruwach'ulew ri'.

⁷Jak'a ri tzobaj richin ri Leví man jun ulew xtikichinaj kan chi'ikojol rix, roma ronojel ri nusuj ri tinamit chire ri Jehová, jari' ri nikichinaj kan rije'. Y ri tzobaj richin ri Gad, ri Rubén, y ri nik'aj tzobaj richin ri Manasés, rije' kan xjach yan k'a chike ri ulew ri xkichinaj kan ri k'o pa relebel-q'ij chire ri raqen-ya' Jordán; jare' ri xujech yan kan ri Moisés ri rusamajel ri Jehová, xcha' ri Josué chike.

⁸Ri achi'a' ri xecha'ox-el richin nibeketaj ri ruwach'ulew kan xkiben k'a rutzijol richin yebe. Y k'ari' ri Josué xubij-el chike: Kixbiyin chupan chijun ri ruwach'ulew ri'; tibewetaj, y toq xkixk'achoj kan, k'ari' xkixtzolin-pe wik'in re wawe' pa Siló, richin xtinben ri sakinik chuwech ri Jehová ri qa-Dios, xcha'.

⁹Xebe k'a ri achi'a' ri' richin xbekinik'oj chijun ruwach'ulew. K'ari' xkelesaj k'a pa wuqu', y xkitz'ibaj k'a pe chupan jun wuj y k'ari' xetzolej akuchi ek'o-wi-qa ri kiwinaq chiri' pa tinamit Siló y xe'apon k'a rik'in ri Josué.

¹⁰K'ari' rija' xuben ri sakinik chuwech ri Jehová chiri' pa Siló. Y chiri' xujech-wi kan ri ulew chike ri ch'aqa' chik tzobaj ri e rijatzul kan ri Israel.

¹¹Ri nabey sakinik xuk'ulumaj k'a ri tzobaj richin ri e rijatzul kan ri Benjamín, y xya'ox k'a chike achi'el ri kajlabal chi kach'alal-ki'; y xkik'ulumaj ri ruwach'ulew ri k'o chikikojol ri kiruwach'ulew ri tzobaj richin ri Judá y ri kiruwach'ulew ri e rijatzul kan ri José.

¹²Ri k'ulba't ri' k'o pa xaman chire ri ruwach'ulew nitiker-el chuchi' ri raqen-ya' Jordán, y nuchojmij-el-ri' pa qajbel-q'ij y nijote-q'anej y niq'ax pa xaman chire ri tinamit Jericó; y chirij re' nijote-q'anej chuwi-juyu' y napon-q'anej pa tz'iran ruwach'ulew richin ri tinamit Bet-avén.

¹³Chiri' niq'ax-el pa xokon chire ri tinamit Luz ri chuqa' nibix Betel chire. K'ari' nixule-qa pa tinamit Atarot-adar, y niq'ax rik'in ri juyu' ri k'o pa xokon chire ri tinamit Bet-horón ri k'o pa xulan. Jari' ri k'ulba't ri k'o pa xaman.

¹⁴Ri ruk'ulba't ri k'o pa qajbel-q'ij chire ri ruwach'ulew nitiker-pe pa Bet-horón, y nuchojmij-el-ri' pa xokon y napon k'a pa rutinamit Baal ri chuqa' nibix Quiriat-jearim chire; re tinamit re' kichin ri e rijatzul kan ri Judá. Jari' ri k'ulba't ri k'o pa qajbel-q'ij.

¹⁵Y ri k'ulba't ri k'o pa xokon nitiker-pe pa ri tinamit Jearim, nuchojmij-ri' pa relebel-q'ij y napon k'a pa ralaxbel-ya' richin ri tinamit Neftóah.

¹⁶Y re k'ulba't re' nuchojmij-ri' pa xokon y niqaqa pa taq'aj kojol juyu' Ben-hinom, ri k'o pa xaman chire ri taq'aj kojol juyu' Refaim. Chirij re' nuchojmij-ri' pa relebel-q'ij y niq'ax pa xokon chire ri juyu' kichin ri aj-Jebús, y napon-qa pa ralaxbel-ya' richin Roguel.

¹⁷Nuchojmij-el-ri' pa xaman y niq'ax-el chuchi' ri ralaxbel-ya' richin Semes, y chiri' nuchojmij-ri' pa relebel-q'ij y napon k'a pa tinamit Guelilot, ri k'o-pe chuwech ri ruwa-juyu' richin Adumim. Y k'ari' niqaqa rik'in ri abej richin ri Bohan ri ruk'ajol kan ri Rubén.

¹⁸Napon k'a pa xaman chire ri ruwa-juyu' akuchi natzu-wi ri raqen-ya' Jordán. Y chirij ri' nixule-qa pa taq'aj kojol juyu',

¹⁹y napon k'a pa xaman chire ri tinamit Bet-hoglá y nibetane' k'a rik'in ri ruq'a' ya' ri k'o pa xaman chire ri palou, ri akuchi nok-wi ri raqen-ya' Jordán. Jari' ri ruk'ulba't ri k'o pa xokon.

²⁰Y ri raqen-ya' Jordán jari' ri ruk'ulba't ri k'o pa relebel-q'ij. Jari' ri xkichinaj kan ri rijatzul ri Benjamín, achi'el ri kajlabal chi kach'alal-ki'.

²¹Ri tinamit kichin ri tzobaj richin ri Benjamín, achi'el ri kajlabal chi kach'alal-ki', xkichinaj kan ri Jericó, Bet-hoglá, ri taq'aj kojol juyu' richin Quesís,

²²Bet-arabá, Semaraim, Betel,

²³Avim, Pará, Ofrá,

²⁴Quefar-haamoní, Ofní y Gueba; ronojel re' e kablajuj tinamit rik'in kokoj kitinamit.

²⁵Y chuqa' xkichinaj ri tinamit: Gabaón, Ramá, Beerot,

²⁶Mispá, Quefirá, Mosá,

²⁷Réquem, Irpeel, Taralá,

²⁸Selá, Élef, Jebús ri chuqa' nibix Jerusalem chire, Guibeá y Quiriat; ronojel re' e kajlajuj tinamit rik'in kokoj kitinamit. Jare' ri xkichinaj ri e rijatzul ri Benjamín, achi'el ri kajlabal chi kach'alal-ki'.