Read Kaqchikel Jos 19 Bible Online

Jos 19 - Kaqchikel bible

Jos 19

¹Ri ruka'n ruwach'ulew ri xsakix xkik'ulumaj kan ri tzobaj richin ri Simeón, xya'ox chike achi'el ri kajlabal chi kach'alal-ki', y ri xkichinaj kan rije' k'o pa runik'ajal ri xkichinaj kan ri tzobaj richin ri Judá.

²Jak'a tinamit re' ri xok kichin: Ri Beerseba, Sebá, Moladá,

³Hasar-sual, Balá, Ésem,

⁴Eltolad, Betul, Hormá,

⁵Siclag, Bet-marcabot, Hasar-susá,

⁶Bet-lebaot y Saruhén; ronojel re' e oxlajuj tinamit rik'in ri kokoj kitinamit.

⁷Chuqa' xkichinaj ri ralaxbel-ya' richin Rimón, ri tinamit Éter y ri Asán, y ri kokoj kitinamit.

⁸Y chuqa' xya'ox chike ri kokoj tinamit ri ek'o k'a chunaqaj ri tinamit Baalat-beer ri chuqa' nibix Ramat ri k'o pa xokon chire. Jari' ri xkichinaj kan ri tzobaj richin kan ri Simeón, achi'el ri kajlabal chi kach'alal-ki'.

⁹Chupan ri xkichinaj kan ri tzobaj richin ri Judá xelesex-wi k'a ri xkichinaj kan ri tzobaj richin ri Simeón, roma ri xkik'ulumaj kan rije' kan janila nim chike.

¹⁰Ri rox ruwach'ulew ri xsakix xkik'ulumaj kan ri tzobaj richin ri Zabulón, xya'ox chike achi'el ri kajlabal chi kach'alal-ki'. Ri k'ulba't ri k'o pa xokon chire ri kiruwach'ulew napon k'a pa tinamit Sarid.

¹¹Ri k'ulba't ri' nitiker-el pa Sarid y napon-q'anej pa qajbel-q'ij y niq'ax pa tinamit Maralá, y napon k'a pa tinamit Dabéset, y niq'ax rik'in ri ch'uti'n raqen-ya' ri k'o-apo chuwech ri tinamit Jocneam, y chiri' nibek'is-wi.

¹²Y nitzolej chik pa Sarid, ri k'ulba't ri' nibe pa relebel-q'ij, y napon k'a chuwa taq juyu' Tabor y nibe pa tinamit Daberat y nijote-q'anej pa tinamit Jafía.

¹³Y niq'ax-el pa relebel-q'ij chire ri tinamit Gat-héfer, y niq'ax-el rik'in ri tinamit Itá-casín y nik'is k'a rik'in ri tinamit Neá.

¹⁴Ri k'ulba't ri k'o pa xaman nitiker-el pa tinamit Hanatón, y nuchojmij-ri' pa qajbel-q'ij y napon k'a pa taq'aj kojol juyu' richin Jefté-el, y chiri' nibek'is-wi.

¹⁵Yerumej chuqa' ri tinamit kibini'an Catat, Nahalal, Simrón, Idalá y ri Belén. Ronojel ri tinamit ri ek'o pa kiruwach'ulew, e kablajuj e kachibilan ri kokoj kitinamit.

¹⁶Ronojel k'a re' xkichinaj kan ri tzobaj richin ri Zabulón, achi'el ri kajlabal chi kach'alal-ki'.

¹⁷Ri rukaj ruwach'ulew ri xsakix xkik'ulumaj kan ri tzobaj richin Isacar, y xya'ox chike achi'el ri kajlabal chi kach'alal-ki'.

¹⁸Ri xkik'ulumaj kan jari' ri tinamit Jezreel, Quesulot, Sunem,

¹⁹Hafaraim, Sihón, Anaharat,

²⁰Rabit, Quisión, Ebes,

²¹Rémet, ri ralaxbel-ya' Ganim, ri ralaxbel-ya' Hadá y ri tinamit Bet-pasés.

²²Ri k'ulba't ri k'o pa xaman napon k'a chuwa taq juyu' Tabor, y napon pa tinamit Sahasimá, y ri tinamit Bet-semes, y nibetane' rik'in ri raqen-ya' Jordán; ronojel k'a re' e waqlajuj tinamit rik'in kokoj kitinamit.

²³Jare' ri ruwach'ulew ri xkichinaj kan ri tzobaj richin ri Isacar y xya'ox chike achi'el ri kajlabal chi kach'alal-ki'.

²⁴Ri ro' sakinik ri xban xkik'ulumaj kan ri tzobaj richin Aser, y xya'ox chike achi'el ri kajlabal chi kach'alal-ki'.

²⁵Ri kiruwach'ulew numej ri tinamit kibini'an Helcat, Halí, Beten, Acsaf,

²⁶Alamélec, Amad, y Misal. Ri k'ulba't ri k'o pa qajbel-q'ij napon k'a rik'in ri juyu' Carmelo y napon rik'in ri ch'uti'n raqen-ya' Sihor-libnat.

²⁷Ri ruk'ulba't ri k'o pa relebel-q'ij nitiker-el pa tinamit Bet-dagón, y nuchojmij-ri' pa xaman, y junan beneq ri kik'ulba't rik'in ri kiruwach'ulew ri tzobaj ri e richin kan ri Zabulón k'a pa taq'aj kojol juyu' richin ri Jefté-el, y napon pa tinamit Bet-émec, Neiel, y napon k'a kela' pa xaman chire ri tinamit Cabul.

²⁸Y nuchojmij-ri' k'a pa qajbel-q'ij y napon k'a pa tinamit Abdón, Rehob, Hamón y Caná, y niq'ax-el rik'in ri ruwach'ulew Sidón.

²⁹Ri k'ulba't ri' nuchojmij-ri' y napon rik'in ri tinamit Ramá y chuqa' napon k'a rik'in ri tinamit ri sutin-rij rik'in tz'aq rubini'an Tiro, y niq'ax-el pa tinamit Hosá, y nik'is chiri' chuchi' ri palou. Numej chuqa' ri tinamit ri kibini'an Mahaleb, Aczib,

³⁰Umá, Afec, Rehob; ronojel re' e juwineq ka'i' tinamit rik'in kokoj kitinamit.

³¹Jare' ri ruwach'ulew ri xkichinaj kan ri tzobaj richin Aser, achi'el ri kajlabal chi kach'alal-ki'; ronojel re tinamit re' rachibilan ri kokoj taq tinamit.

³²Ri ruwaq ruwach'ulew ri xsakix jari' ri xkik'ulumaj kan ri tzobaj richin ri Neftalí xya'ox chike achi'el ri kajlabal chi kach'alal-ki'.

³³Ri k'ulba't ri k'o pa xaman yerumej ri tinamit Hélef, Elón-saananim, Adamí-néqueb y Jabneel y napon k'a pa Lacum y napon akuchi nel-wi-pe ri raqen-ya' Jordán.

³⁴Y nuchojmij-ri' pa qajbel-q'ij, y napon chuwa taq juyu' Tabor y niq'ax rik'in ri tinamit Hucoc. Junan beneq ri kik'ulba't rik'in ri kiruwach'ulew ri tzobaj ri e richin kan ri Zabulón, y chirij ri' junan beneq ri kik'ulba't rik'in ri kiruwach'ulew ri tzobaj ri e richin kan ri Aser.

³⁵Jare' ri tinamit ri e sutin-kij rik'in tz'aq, ri xya'ox chike: Sidim, Ser, Hamat, Racat, Quinéret,

³⁶Adamá, Ramá-hasor,

³⁷Quedes, Edrei, ri ralaxbel-ya' richin Hasor,

³⁸Irón, Migdal-el, Horem, Bet-anat y Bet-semes; ronojel re' belejlajuj tinamit rik'in ri kokoj kitinamit.

³⁹Jare' ri kiruwach'ulew rik'in ri tinamit y ri kokoj kitinamit. Ja ronojel re' ri xkichinaj kan ri tzobaj richin ri Neftalí, xya'ox chike achi'el ri kajlabal chi kach'alal-ki'.

⁴⁰Ri k'isibel ruwach'ulew ri xsakix ja ri xkichinaj kan ri tzobaj richin ri Dan, xya'ox chike achi'el ri kajlabal chi kach'alal-ki'.

⁴¹Chupan ri kiruwach'ulew ri xkichinaj kan k'o ri tinamit Sora, Estaol, Ir-semes,

⁴²Saalbim, Aialón, Jetlá,

⁴³Elón, Timnat, Ecrón,

⁴⁴Eltequé, Guibetón, Baalat,

⁴⁵Jehúd, Bené-berac, Gat-rimón,

⁴⁶Mejarcón, y Racón, rachibilan ri ruwach'ulew ri k'o chuwech ri tinamit Jope.

⁴⁷Jak'a ri tzobaj richin ri Dan man xech'akon ta chikij ri tinamit ri ek'o chupan ri ruwach'ulew ri xya'ox chike; roma ri' xbekibana-q'anej oyowal kik'in ri winaqi' ri e richin ri tinamit Lésem ri k'o pa xaman, y xech'akon chikij y xekikamisaj chi espada konojel ri ek'o chiri'. Xek'oje' chupan ri tinamit ri', y xkijel k'a ri rubi' y xubini'aj Dan; re' natabel richin ri ánima kitata'.

⁴⁸Jare' ri ruwach'ulew ri xkichinaj kan ri tzobaj richin ri Dan xya'ox chike achi'el ri kajlabal chi kach'alal-ki'.

⁴⁹Chirij k'a ronojel re', toq xek'achoj chujachik ri ruwach'ulew ri xya'ox kan chike chikijujunal ri tzobaj, jari' toq ri ruwinaq xkisipaj kan juba' rulew ri Josué richin xichinan kan chikikojol.

⁵⁰Ri Josué kan ruk'utun-wi-pe ri tinamit Timnat-sérah y rije' kan xkiya' k'a chire achi'el ri rubin ri Jehová. Y ri tinamit ri' k'o chuwi' taq juyu' richin ri ruwach'ulew ri tzobaj richin Efraín. Y rija' xupaba-q'anej jun bey chik ri tinamit y chiri' xk'oje-wi.

⁵¹Jare' ri xkichinaj kan ri kablajuj tzobaj ri e rijatzul kan ri Israel chire ri sakinik ri xban, koma ri sacerdote Eleazar, ri Josué y ri e tata'al richin ri tinamit, y ja rije' ri xech'aron ri ruwach'ulew ri xya'ox chike, y re' kan chuwech ri Jehová xkiben-wi, ri chuchi' ri rachoch richin molojri'il chiri' pa Siló. Keri' xk'achoj k'a rujachik ri ruwach'ulew.