Read Kaqchikel Jos 2 Bible Online

Jos 2 - Kaqchikel bible

Jos 2

¹Toq ri tinamit Israel k'a ek'o na chiri' pa k'echelaj Sitim, ri Josué ri ruk'ajol kan ri Nun, xeruteq-el ka'i' achi'a' pan ewel richin yebe chupan ri ruwach'ulew Canaán richin nibeketamaj kan jebel ri tinamit rubini'an Jericó. Y ri achi'a' xebe k'a y xe'ok pa rachoch jun ixoq itzel ruk'aslen rubini'an Rahab y chiri' xkiq'axaj-wi ri aq'a'.

²Y k'o k'a jun xya'on rutzijol chire ri rey richin ri Jericó y xubij chire: Wakami ek'o achi'a' e rijatzul kan ri Israel ri xe'oqaqa-el wawe' richin chi nokinachaj kan re qaruwach'ulew, xcha'.

³K'ari' ri rey ri' xuteq rubixik chire ri Rahab y xubij-el: Ke'awelesaj-pe ri achi'a' ri ek'o pan awachoch y ke'ajacha-pe, roma xa e peteneq wawe' richin chi nokinachaj chijun re qaruwach'ulew, xcha'.

⁴Jak'a ri Rahab xa xerewaj ri achi'a', y xubij-el chike ri yekanon kichin: Qitzij na wi chi ek'o achi'a' xek'oje-el pa wachoch, jak'a man xinwetamaj ta akuchi na kepe-wi,

⁵jak'a toq niq'equmer yan pe y nitz'apex yan kan ruchi' ri tinamit, ri achi'a' ri' xe'el-el y man wetaman ta akuchi xebe-wi, ke'itzeqelibej k'a chi'anin richin xkebe'iq'i', xcha'.

⁶Rija' keri' xubij chike, jak'a xa man keri' ta, xa e rujotoban-q'anej pa ruwi' ri rachoch y xerewaj chukojol ri raqen lino ri e rusa'on pa ruwi' ri jay.

⁷Y ri achi'a' xebekikanoj ri nachanela' y toq e eleneq chik el ri yekanon kichin jari' toq xtz'apex kan ruchi' ri tinamit. Y rije' xebe, xekikanoj chijun ri bey ri nibe pa raqen-ya' Jordán, y xe'apon k'a chuchi' ri raqen-ya' y xekikanoj chiri' y man xekil ta.

⁸K'ari' ri Rahab xjote-q'anej pa ruwi' ri jay kik'in ri nachanela' toq k'a man jani kewer-qa y xubij chike:

⁹Yin wetaman chi ri Jehová xujech yan re ruwach'ulew re' chiwe, roma ri' ri ikiy rix xoqaqa yan pa qawi' roj, y qonojel ri ojk'o chupan re jun tinamit re' xmayamoyan-qa ri qánima iwoma rix,

¹⁰roma qak'axan chik chi toq xixel-pe pan Egipto, ri Jehová kan xuchaqirisaj ri Kaqa-Palou chiwech richin chi xixq'ax chupan, y chuqa' qak'axan chik toq xe'ik'is ri Sihón y ri Og, rey kichin ri amorreo ri ek'o juk'an chire ri Jordán.

¹¹Toq roj xqak'axaj re' kan xk'is ruchuq'a' ri qánima, y konojel ri achi'a' kan kixibin-ki' iwoma rix, roma ri Jehová ri i-Dios rix, kan jari' ri Dios richin chila' chikaj y richin re ruwach'ulew.

¹²Wakami k'a nink'utuj k'a jun nimalej utzil chiwe, richin chi niya' itzij chuwe, pa rubi' ri Jehová ri i-Dios richin achi'el k'a yin xinjoyowaj iwech, keri' chuqa' xtiben pa kiwi' konojel ri aj pa wachoch y kan xtiya' jun retal chuwe chi kan jujik chi xtiben.

¹³Y xtikol ri kik'aslen ri nte-nata', ri e nuxibal, ri e nunimal, ri e nuchaq' y konojel ri kalk'ual rije', richin xtikolotej ri qak'aslen chuwech ri kamik ri', xcha' ri Rahab.

¹⁴Y ri nachanela' xkibij: Roj xtiqaya' qatzij chi kan xtiqakol ri ik'aslen, wi man xqojisujuj ta ri achike roma ojk'o wawe' roj, y toq ri Jehová xtuya' re ruwach'ulew re' chiqe, kan qitzij wi chi xtiqajoyowaj iwech, xecha'.

¹⁵Y ri Rahab xukusaj jun kolo' richin chi yeruqasaj-qa pa ventana, roma ri rachoch rija' k'o chuwech ri tz'aq ri rusutin-rij ri tinamit.

¹⁶Y toq man jani keqaqa-qa xubij chike: Kixbiyin k'a la chuwa taq juyu' y tiwewaj-iwi' chiri' oxi' q'ij richin chi man yixilitej ta koma ri e tzeqelibeyon-el iwichin y toq xketzolin-pe rije', k'ari' xtichop-el ibey rix, xcha'.

¹⁷Y rije' xkibij k'a chire ri Rahab: Roj kan xtiqataqej ri ya'on-tzij y xtiqaben ri xak'utuj chiqe.

¹⁸Jak'a toq xqojok chupan re ruwach'ulew re', rat xtaxim re kolo' keq chuchi' ri ventana akuchi xqojaqasaj-wi roj y xke'amol chupan ri awachoch, ri ate-atata' y konojel ri awach'alal y ri e rach'alal ri atata'.

¹⁹Y xabachike k'a ri xtel-el chupan ri awachoch toq najin ri oyowal y xtiken, man qamak ta chik roj; y konojel ri xkek'oje' awik'in chupan ri awachoch, wi xkeken, kan roj xqojejqalen.

²⁰Y wi rat xqojasujuj ri achike roma oj peteneq re wawe', roj chuqa' xqojtotej chire ya'on tzij ri niqaben pa ruwi' ri xak'utuj chiqe, xecha' rije'.

²¹K'ari' ri Rahab xubij: Keri' k'a xtibanatej achi'el ri xibij, xcha'. K'ari' chi'anin k'a xerujech-el y jari' xeqaqa-el y xebe. Y ri kolo' keq xxime' kan chiri' pa ventana richin retal.

²²Y xebe k'a ri nachanela', xe'apon k'a ri chuwa taq juyu', y chiri' k'a xkewaj-wi-ki' oxi' q'ij, k'a xetzolin na pe ri yekanon kichin k'ari' xebe. Kan janila k'a xekanox y man xe'ilitej ta, y roma ri' ri yekanon kichin xetzolin pa Jericó.

²³K'ari' ri nachanela', xetzolin y xebeqaqa-pe chuwa taq juyu' richin xkiq'axaj ri raqen-ya', y xe'apon rik'in ri Josué y xkitzijoj chire ronojel ri xkik'uluwachij.

²⁴Y rije' xkibij chire ri Josué: Kan qitzij na wi chi ri Jehová xujech yan chijun ri ruwach'ulew Canaán pa qaq'a' y ri winaqi' ri ek'o chupan ri ruwach'ulew ri' kan xpe k'a jun nimalej xibinri'il chike. Y xmayamo' yan qa ri kánima qoma roj, xecha' rije'.