Read Kaqchikel Jos 20 Bible Online

Jos 20 - Kaqchikel bible

Jos 20

¹Ri Jehová xch'on rik'in ri Josué y xubij chire:

²Kach'on kik'in ri awinaq y kere' k'a tabij chike: Ke'icha' ri tinamit richin tobel achi'el xinbij chire ri Moisés,

³richin keri' chiri' nuto-wi-ri' ri wineq ri nukamisaj jun chik wineq ri xa man ruch'obon ta richin keri' nuben. Re tinamit re' kan xtik'atzin k'a richin tobel chuwech ri nich'ojin pa ruwi' ri wineq ri xken.

⁴Ri wineq ri niberuto-ri' chiri', napon k'a chuchi' ri tinamit y chiri' niberuq'alajirisaj chikiwech ri aj-raqen richin ri tinamit ri achike roma animajineq-el. Y rije' xtikiya' q'ij richin nok-apo, y xtik'oje-qa chiri' pa tinamit richin tobel.

⁵Wi k'o ta jun wineq ri nich'ojin pa ruwi' ri kamineq y rutzeqeliben-el ri xbanon ri kamik, kan man xtijach ta pe chire roma xa chaq k'ate' keri' xuben chire ri rachpochel y man roma ta k'ululanik xuben keri'.

⁶Keri' ri animajineq-el nik'oje' kan chupan ri tinamit ri' k'a toq xtapon ri nich'ojin pa ruwi' ri kamineq, y k'ari' xtuk'uex chuwech ri rutinamit richin xtiq'at-tzij pa ruwi'. Y ri animajineq-el, nik'oje' kan chupan ri tinamit richin tobel k'a niken na ri nimalej sacerdote ri k'o toq xapon chiri', k'ari' nitzolej pa rutinamit y nibe chirachoch, xcha' chire ri Josué.

⁷Jak'a tinamit re' richin tobel ri xekicha': Ri Quedes ri k'o pa Galilea ri k'o chuwi-juyu' richin ri Neftalí, ri Siquem ri k'o chuwi-juyu' richin ri Efraín y ri rutinamit Arbá ri nibix chuqa' Hebrón chire ri k'o chuwi-juyu' richin ri Judá.

⁸Y ri juk'an chik ruchi' ri raqen-ya' Jordán, chuwech-apo ri tinamit Jericó, xkicha' k'a ri tinamit Béser, ri k'o pa tz'iran ruwach'ulew, y re' k'o pa taq'aj chupan ri kiruwach'ulew ri tzobaj richin ri Rubén; y chupan ri ruwach'ulew Galaad xkicha' ri tinamit Ramot ri kichin ri tzobaj richin ri Gad; y chupan ri ruwach'ulew Basán xkicha' ri tinamit Golán, y re' kichin ri tzobaj richin ri Manasés.

⁹Ja tinamit re' xecha'ox richin nikito-ki' xabachike winaqi', ri e rijatzul kan ri Israel y ri man e kiwinaq ta ri ek'o chikikojol rije'. Xecha'ox k'a ri tinamit ri' e richin tobel kichin ri chaq k'ate' nikiben jun kamik, richin man nikamisex ta roma ri nich'ojin pa ruwi' ri kamineq, k'a toq xtapon na ri qij richin niq'at-tzij pa ruwi'.