Read Kaqchikel Jos 21 Bible Online

Jos 21 - Kaqchikel bible

Jos 21

¹Ri aj-raqen richin ri tzobaj richin ri Leví xebe pa tinamit Siló richin xebech'on kik'in ri sacerdote Eleazar, ri Josué y ri e tata'al kichin ri e kablajuj tzobaj.

²Y xech'on kik'in chiri' pa Siló, ri k'o pa ruwach'ulew Canaán; y kere' k'a xkibij: Ri Jehová rubin chire ri Moisés richin tiya'ox qatinamit richin yojk'oje' roj chupan, y chuqa' rik'in kisoq'olbal richin yek'oje' ri qawej chupan, xecha'.

³Ri ch'aqa' chik israelita kan keri' k'a xkiben kik'in; xkiya' k'a jujun kitinamit ri xkichinaj kan, rik'in kisoq'olbal akuchi yek'oje-wi ri kawej, achi'el rubin ri Jehová. Jare' ri xya'ox kan chike rije'.

⁴Xsakix k'a ri tinamit, y ja ri e rijatzul kan ri Quehat, rumama' kan ri sacerdote Aarón, ri xek'uluman nabey. Y rije' xkik'ulumaj kan jujun tinamit ri xsipex kan chike koma ri tzobaj richin ri Judá, ri Simeón y ri Benjamín: Ronojel re' e oxlajuj tinamit.

⁵Ri ch'aqa' chik rijatzul kan ri Quehat xkik'ulumaj kan rik'in sakinik lajuj tinamit, pa kiq'a' ri tzobaj richin ri Efraín, ri Dan y ri nik'aj tzobaj richin ri Manasés ri k'o pa qajbel-q'ij chire ri raqen-ya' Jordán.

⁶Y ri rijatzul kan ri Guersón xkik'ulumaj kan rik'in ri sakinik jujun tinamit ri xsipex kan koma ri tzobaj richin ri Isacar, ri Aser, ri Neftalí y ri nik'aj chik chire ri tzobaj richin ri Manasés ri k'o pa ruwach'ulew Basán: Ronojel ri xkik'ulumaj kan e oxlajuj tinamit.

⁷Ri e rijatzul kan ri Merarí xkik'ulumaj kan ri xsipex kan koma ri tzobaj richin ri Rubén, ri Gad y ri Zabulón: Ronojel ri xkik'ulumaj kan e kablajuj tinamit.

⁸Y ri ch'aqa' chik israelita xkijachala' k'a chike ri e rijatzul kan ri Leví rik'in sakinik, ri tinamit y ri kisoq'olbal richin nikiya' ri kawej achi'el xubij ri Jehová chire ri Moisés.

⁹Ja tinamit re' ri xkiya' kan ri tzobaj richin ri Judá y ri Simeón,

¹⁰y re tinamit re' xkichinaj kan ri e rijatzul kan ri Aarón ri rumam ri Quehat; y ri Quehat ri' rijatzul kan ri Leví. Ja rije' ri xek'uluman pa nabey chire ri sakinik.

¹¹Ri xya'ox kan chike ja ri rutinamit Arbá, ri tinamit richin kan ri rutata' ri Anac ri nibix chuqa' Hebrón chire, ri k'o chuwi-juyu' richin ri Judá, rik'in ri kisoq'olbal,

¹²jak'a ri qasanbel-ulew richin ri tinamit y ri kokoj kitinamit, kan richinan chik ri Caleb ruk'ajol ri Jefuné.

¹³Y keri' xya'ox kan ri tinamit Hebrón chike ri e rijatzul ri sacerdote Aarón. Y ri tinamit ri' richin tobel kichin ri winaqi' ri chaq k'ate' nikiben jun kamik. Y chuqa' xya'ox kan ri tinamit Libná,

¹⁴Jatir, Estemoa,

¹⁵Holón, Debir,

¹⁶Ain, Jutá y ri Bet-semes. Ronojel re' e beleje' tinamit rik'in ri kisoq'olbal ri k'o chupan ri kiruwach'ulew ri e ka'i' tzobaj richin ri Judá y ri Simeón.

¹⁷Ri tzobaj richin ri Benjamín xkiya' kan ri tinamit Gabaón, Gueba,

¹⁸Anatot y Almón: Ronojel re' kaji' tinamit rik'in kisoq'olbal.

¹⁹Konojel ri tinamit kichin ri sacerdote ri e rijatzul ri Aarón, xuben oxlajuj tinamit, chikijujunal rik'in ri kisoq'olbal ri ek'o chuchi-el ri tinamit.

²⁰Ri ch'aqa' chik chike ri e rijatzul kan ri Leví ri e rijatzul kan ri Quehat, xkik'ulumaj kan rik'in sakinik ri tinamit kichin ri tzobaj richin ri Efraín.

²¹Xya'ox k'a chike ri tinamit Siquem ri k'o chuwi-juyu' richin ri Efraín. Re tinamit re' richin tobel kichin ri winaqi' ri chaq k'ate' nikiben jun kamik. Chuqa' xya'ox kan ri tinamit Guézer,

²²Quibsaim y ri tinamit Bet-horón. Ja kaji' tinamit re' rik'in ri kisoq'olbal.

²³Ri tzobaj richin ri Dan xkijech kan ri tinamit Eltequé, Guibetón,

²⁴Aialón y ri tinamit Gat-rimón: Kaji' tinamit rik'in kisoq'olbal.

²⁵Y ri nik'aj tzobaj richin ri Manasés ri ek'o pa Basán xkijech k'a ri ka'i' tinamit, Taanac y Gat-rimón, rik'in ri kisoq'olbal.

²⁶Ronojel re' xkik'ulumaj kan ri ch'aqa' chik chire ri e rijatzul kan ri Quehat; lajuj tinamit rik'in ri kisoq'olbal.

²⁷Ri e rijatzul kan ri Guersón, ri rijatzul kan ri Leví, xya'ox ka'i' tinamit chike koma ri nik'aj tzobaj richin ri Manasés: Ri tinamit Beesterá y ri tinamit Golán ri k'o pa ruwach'ulew Basán. Y ri Golán ri' jun tinamit richin tobel kichin ri winaqi' ri chaq k'ate' nikiben jun kamik: Ri ka'i' tinamit ri' rik'in kisoq'olbal.

²⁸Ri tzobaj richin ri Isacar xkijech kan ri tinamit Quisión, Daberat,

²⁹Jarmut y ri ralaxbel-ya' Ganim: Kaji' tinamit rik'in ri kisoq'olbal.

³⁰Ri tzobaj richin ri Aser xkiya' kan ri tinamit Misael, Abdón,

³¹Helcat y ri Rehob: Ja kaji' tinamit re' rik'in ri kisoq'olbal.

³²Ri tzobaj richin ri Neftalí xkijech kan ri tinamit Hamot-dor, Cartán y ri Quedes ri k'o pa ruwach'ulew Galilea. Y ri Quedes ri' jun tinamit richin tobel kichin ri winaqi' ri chaq k'ate' nikiben jun kamik. Ja oxi' tinamit re' rik'in ri kisoq'olbal.

³³Ronojel ri tinamit kichin ri e rijatzul kan ri Guersón e oxlajuj tinamit rik'in ri kisoq'olbal.

³⁴Jak'a ri e rijatzul kan ri Merarí ri man jani tiya'ox kitinamit, xya'ox chike koma ri tzobaj richin ri Zabulón re tinamit re': Ri Jocneam, Cartá,

³⁵Dimná y Nahalal. Ja kaji' tinamit re' rik'in ri kisoq'olbal.

³⁶Ri tzobaj richin ri Rubén xkijech kan ri tinamit Béser, Jahas,

³⁷Cademot y ri Mefáat. Kaji' tinamit rik'in ri kisoq'olbal.

³⁸Ri tzobaj richin ri Gad xujech kan ri tinamit Mahanaim, Hesbón, Jazer y ri Ramot richin ri Galaad. Y ri Ramot ri' tinamit richin tobel kichin ri winaqi' ri chaq k'ate' nikiben jun kamik. Re' e kaji' tinamit rik'in ri kisoq'olbal.

⁴⁰Ronojel ri tinamit kichin ri e rijatzul kan ri Merarí e kablajuj tinamit rik'in ri kisoq'olbal.

⁴¹Ronojel ri tinamit kichin ri levita chukojol ri kulew ri e rijatzul ri Israel e kawineq waqxaqi' tinamit, y chikijujunal ri tinamit ri' k'o kisoq'olbal chikinaqaj.

⁴³Kere' k'a xuben ri Jehová richin xuya' ronojel ri ruwach'ulew chike ri tinamit Israel, roma kan xuya' rutzij chike ri kite-kitata' chi kan xtuya-wi chike. Y rije' xkichinaj k'a y chiri' xek'oje-wi.

⁴⁴Y man jun k'a chike ri etzelanel kichin ri xupaba' ta ri' chikiwech rije', roma ri Jehová kan xerujech pa kiq'a'. Y keri' kan xuya' k'a uxlanenri'il ri chiri' pa kiruwach'ulew, achi'el ri ya'on-tzij ri rubanon kik'in ri kite-kitata'.

⁴⁵Kan man jun k'a ch'abel ri man ta xbanatej chire ronojel ri rusujun ri Jehová chike ri e rijatzul kan ri Israel; kan ronojel k'a xbanatej.